هو احنا مش اصحاب؟

[أحمد الخزرجى]

هو احنا مش اصحاب؟ طب ممكن تقوليلى بحبك؟ حتى لو مش حقيقه مجرد كلمه وخلاص اصل انا عندى حرمان عاطفى نفسى احس ان اهم حد وان حد بيخاف عليا مجرد كلمه مش هاتخسرك حاجه بس هاتبقى عندى بالدنيا كلها ممكن انام على كتفك وابكى انا حياتى كلها خشنه ماعنديش خاله ولا عمه ولا اخت ولا حد يطبطب عليا لما اكون حزين حتى امى بتكسف منها نفسى احس براحه فى حضن حد ممكن أخد حضن منك؟ حضن مالهوش علاقه بالجنس حضن يدفينى ويحسسنى انى مطمن مش خايف من بكره طب تعالى نتوه سوا مش يمكن تحبينى بجد هاجيبلك ورد وعصافير ولو حد كلمك هتخانق معاه عشانك وهاديكى الجاكيت بتاعى لما نكون ماشيين فى السقعه مع بعض امسكى ايدى هارتاح طب انتى بتعيطى ليه دلوقتى صعبت عليكى والا زعلتى منى على فكره انا بهزر او بخرف بس هايحصل ايه لو بتكلم بجد ماتقوليلى بحبك وردى فيا الروح خرجينى من سجن وحدتى ال قاتلنى حسسينى انى عايش بتنفس انى موجود وليا لزمه مش مجرد اله اكل واشرب واشتغل واشقى وانام احضنينى انا فعلا محتاج حضن ولو عاوزه تمشى بعدها امشى بس هاتبقى حييتينى انا مش هعمل كده ده مجرد كلام بس انا فعلا نفسى اعمل كده يلا جربى يمكن نبدا من جديد يلا نبدا بنضافه انسى ماضيكى وانا كمان هنسى ننسى جروحنا والالام ال فاتت ونحس ببعض مش يمكن انتى محتاجه لكده وممكن تكونى فرحانه وانا بطلب منك يمكن وجايز ساكته ليه ماتردى عليا انا عارف انك مش لاقيه ردود مع ان ال جواكى كلام كتير اوى يلا نطير يلا نحلم مستنيه ايه ال كتير وال جاى الله واعلم بيه ماتيجى نلحقه سوا تعالى نجرب تعالى نمثل تعالى نعمل اى حاجه انا لما اسيبك وامشى هنهار واقول ياريتنى ماكنت قولت كده وهفضل افكر كتير ودماغى توجعى واقول ياترى هى كانت بتفكر فى ايه وانا بكلمها ردى عليا بأى كلام ابوس ايدك الحرمان هايموتنى ماسك دموعى عشان ماتشوفيهاش وانى مش بعرف اعيط قدام حد وبمجرد مابقى لواحدى هفضل اعيط كتير مش هعرف امسك نفسى زى دلوقتى ممكن يكون الحياه علمتنى القسوه بس انا لسه جوايا نبض ومشاعر لسه احساسى ماتعدمش ضمينى جامد لصدرك خلينى انسى الهموم وتعب السنين صدقينى راحتى فى حضنك هاتخلينى اعيط من حرمانى طول الوقت ال فات ذكريات وسكات نسينى الزمان نسينى المكان حضن ونسيان ده كل ال بتمناه قوليلى وحشتنى انا بحب الكلمه دى اوى بتحركنى من جوه قوليلى ماتغيبش عنى قوليلى محتاجاك قوليلى كان نفسى اقابلك من زمان الكلام كتير اوى جوايا مش عارف اقول ايه انا تعبان ومخنوق حاسس انى مش عايش ومع ذلك هاموت يلا بقا مستنيه ايه اعتبريها جميله اعطفى عليا انا مش لاقى غيرك ماتصعبيهاش ماتعقدهاش احنا هانعيش كام مره الوقت بيسرقنا والعمر بيعدى هو احنا ملايكه لا ده احنا اخطائنا وذنوبنا مالهومش عدد ولا احنا شياطين برده احنا فينا ضمير بيوجعنا ها بقا اتكلمى ياخوفى لاكون بكلم نفسى وانتى مش موجوده اصلا شكلى بكلم الهوا او حتى بحلم او سرحان وايه يعنى مش فارقه كتير طب انا هجيب ورد وامشى فى الشارع وكل ماقابل واحده اديها ورده يمكن واحده تحبنى وتحس بيا ولو انتى موجوده خرجينى من حلمى فوقينى صحينى هاقول تانى مش عارف انهى الكلام

[غربة روح]

هو الاصحاب ممكن يحبوا بعض
لا الصداقه شيء والحب شيء اخر
دا المفروض يعني

[أحمد الخزرجى]

اقتباس المشاركة الأصلية كتبت بواسطة غربة روح هو الاصحاب ممكن يحبوا بعض لا الصداقه شيء والحب شيء اخر دا المفروض يعني

هلاوس أفكار مش أكتر

[توحد ارواح]

صح ممكن يكون خيال
او احلام ملت الانتظار ونفسنا تتحقق
جدا جميله
شكرا وبانتظار جديدك
تقديري

[دفاتر القمر]

الاجمل ان تظل الصداقه كما هي
تسلم ايدك شكرا لك

[انا جيجي]

الصداقة افضل مليووووووون مرة من ان تتحول الى حب

تحياتى

[السفيره عزيزه]

والله احلام ورغبات مشروعة
بس بضوابط الشرع والسنه
اما الصداقة بين البنت والولد
مفروض فى اضيق الحدود
والاحلام مجلها مفتوح والاماني
وربنا يرزقنا الحلال الطيب

دمت بالخير يارب
السفيرة

[أحمد الخزرجى]

اقتباس المشاركة الأصلية كتبت بواسطة السفيره عزيزه والله احلام ورغبات مشروعة بس بضوابط الشرع والسنه اما الصداقة بين البنت والولد مفروض فى اضيق الحدود والاحلام مجلها مفتوح والاماني وربنا يرزقنا الحلال الطيب دمت بالخير يارب السفيرة

الاحلام مجلها مفتوح والاماني

وفى حد بيعمل غير انه يحلم ويتمنى

شكرا

[أحمد الخزرجى]

اقتباس المشاركة الأصلية كتبت بواسطة انا جيجي الصداقة افضل مليووووووون مرة من ان تتحول الى حب تحياتى

(انا بهزر او بخرف بس هايحصل ايه لو بتكلم بجد )

برجاء الإنتباه إلى الموضوع فى القراءه

إقرأيه مره اخرى

شكرا

[أحمد الخزرجى]

اقتباس المشاركة الأصلية كتبت بواسطة اميرة الصمت الاجمل ان تظل الصداقه كما هي تسلم ايدك شكرا لك

انا وربنا ما اتكلمتش عن إلى الردود بتقول برجاء القراه مره اخرى والتركيز

شكرا