الحلقه التانيه فى الملعب مع ( مورشو ) خاصه جدا

[محمود الصاروخ]

السلام عليكم
أعضاء ومشرفين وادارة منتدى بنات مصر



بدون مقدمات أهلا بيكم معانا فى الحلقه التانيه من برنامج

( فى الملعب )

اعداد وتقديم / محمود الصاروخ



حلقه خاصه جدا مع مشرف مصرى مشهور معروف محبوب
معاه رتبه جميله شغله اجمل من رتبته
عمره ما أخر لحد طلب
لايق اسمه عليه كتير

كفايه بس انك تشوف اسمه وتدخل موضوعه
دمه خفيف وعمره ما ساب حد فى حاله

معانا مشرف القسم

( Morshooo )





قبل ما ندخل فى جو الحلقه والاسئله اللى جاوب عليها مورشو
هو قالى كلمتين بخصوص الحلقه دى واتمنى كلنا نطلعه غلطان فى الكلمتين

قالى ابقى قابلنى لو حد شاف الحلقه دى كامله

اما نشوف مين هيطلعه غلطان ويشوف حلقتنا كامله
لانها حلقه خاصه جدا جدا جدا



( بسم الله نبدأ )

حبيب قلبى ( مورشو ) منورنى ياريس وانت عارف من زمان ان نفسى فى اليوم ده وتكون ضيف معايا ف أى حاجه
وبشكرك انك وافقت تكون معايا فى البرنامج
( فى الملعب )


ايه ياعم الكلام الكبير دا بس
منورك اه معاك انى منورك
تسلم يامعلم على الدعوة
وسعيد بوجودى فى التوبيك الرياضى دا

( انت حبيبى ياعم مورشو )
اه وربنا



هبدأ معاك ب كام سؤال كده بره الملعب ويارب اكون خفيف عليك كده انا والأسئله أهو نطلع عليك اللى بتعمله ف الناس شويه

قول يانجم قول

1- عاوز أعرف منك مين هو ( مورشو ) يعنى اسمك سنك عنوانك بتدرس ايه ، كده يعنى ؟

احمد
30 سنه
متزوج
من القاهره
مخلص بكالوريوس خدمه اجتماعيه

2- بتكون مبسوط وفرحان كده وانت جايب الناس فى موضوع صفحات الاعضاء ؟

اكيد
والحمد لله صفحات الاعضاء
شايف انه من انجح المواضيع فى المنتدى حاليا
واهم حاجا انه بيجمع الاعضاء ودى ميزة كبيره

( أكيد ياعمنا مش انت اللى عاملها )

3- انا عارف انك أهلاوى بس عاوزك تقول كلمتين لجمهور الزمالك ( اللى انا منهم ) ؟

وفرحان ليه كدا وانتا بتقول
( انا منهم )

بص يانجم
محدش ينكر ان الزمالك فريق كبير
وفيه نجوم كبار ونجوم سواء فى المنتخب
او فى عالم الاحتراف
او فى عالم التدريب
ودا مش الفتره دى بالعكس نادى الزمالك خرج عمالقه زى
حسن شحاته
فاروق جعفر
حماده امام
ايمن يونس
ابراهيم يوسف
جمال عبد الحميد
حازم امام
تامر عبد الحميد
عبدالحليم على
محمد عبد الشافى
عمر جابر
........ الخ
ففعلا انتو بتشجعو كيان كبير ونادى عريق
ودا ما يمنعش برضو ان الزمالك لما يلاعب اى فريق
اكيد هشجع الفريق التانى

( كويس انك عارف ان الزمالك فريق كبير )

4 - عرفت منك انك بتلعب كورة مع صحابك عاوز أعرف منك مركزك ايه ف الملعب واخر مرة جبت هدف امتى بالظبط ؟

يابنى انا هداف مصر اساسا
احنا بنلعب حاليا خماسى فانتا عارف
يعتر مابيبقاش فى مراكز يعتبر لكن انا
عموما بلعب تحت خط وسط مهاجم
وطالما خماسى فاكيد الاجوال بتيجى كل اسبوع

( غرور بقى )



( ثانيا اسئله عن الرياضة المصرية )

1- كان معايا قبلك العضو ( جنون قلب ) وقال ان ماحدث فى مباراة الزمالك وانبى كان مدبر ، عاوز أعرف رأيك فى هذه القضيه ؟

بص احنا عيبنا اننا دائما بنحب نخلى الغلط صح
يعنى ناس كتير قالت كان المفروض الامن يدخلهم
زى ما حصل فى مباراه ( السنغال ) ونهائى ( الكونفدراليه )
وكأن دخولهم كان صح
بغض النظر عن مين غلط ومين صح
انا ضد القتل عموما حتى لو مشجع واحد
واكيد الغلط على ( الداخليه )
وهى السبب فى قتل اكثر من 22 شهيد
كل همه انه رايح يشجع فريقه والسبب الاكبر
على رئيس النادى الى حرم الشباب دى من انهم يشترو
تزاكر عشان فى خلاف بينهم وبين ( رئيس النادى )
فالسبب فى المجزرة دى اكيد
( رئيس النادى ) و ( الداخليه )

انت كده صح يامورشو عجبنى تفكيرك ده

2- هل تؤيد عودة الدورى من جديد أم ضد عودتة ؟

مع رجوع الدورى اكيد
لان لو الدورى اتوقف ناس كتير هيتخرب بيتها
وانا ضد ان حد يقول مفيش مباريات
الا لما حقهم يرجع
حقهم هيرجع حتى لو بعد 100 سنه هم
وشهداء الاهلى

3- مارأيك فى اتحاد الكورة وقول ليهم كلمه ؟

اتحاد السكسونيا
كلهم عصابه ( مافيا )
سواء حسن فريد
او الشامى
او جمال علام
اتحاد بلا اى بطوله او اى انجاز

4- ما رأيك فى محمد صلاح مدرب الزمالك السابق ونفس الكلام جاريدو مدرب الاهلى ؟

محمد صلاح مكنش ينفع يكمل مع الزمالك حتى لو عمل ايه
غير كدا معتقدش ان فى اى اضافه ليه بعد هروب
باتشيكو بالعكس الوقت الى كان لازم
يكسب الاهلى واعتقد انها فرصه مش هتتعوض
معرفش يحافظ على المكسب .
ولو باتشيكو كان فضل اعتقد كان هيعمل فريق قوى

جاريدو

حظه وحش جدا من وقت ما مسك الفريق
وكله اصابات الفريق تقريبا مكتملش ابدا
غير ان الاهلى بيعمل فريق جديد والاغلبيه شباب
عكس الزمالك يعتبر شارى نجوم

( فعلا باتشيكوا كان عاجبنى جدا وزعلت انه مشى )

5- عاوزك تقول كلمتين تعلق بيهم على ماتش الاهلى الاخير السوبر الافريقى لكل واحد شمت فى الاهلى ؟

انا تقريبا اول مره الموسم دا اشوف الاهلى
بالشكل الى شوفناه عليه فى النهائى
فعلا كنا منظمين جدا جاريدو اتعامل بشكل كويس مع المباراة
ضربات الجزاء معتقدش انها بتدل على سير المباراة
باسم على
معتقدش ان حد يقدر يحمله مسئؤليه حاجا
صحيح الجول كان غلطه منه بس دى طبيعه كرة القدم
هدف = خطأ
والغطل بيكون من اول المهاجم لحد حارس المرمى

موضوع الشماته
انا شايف ان دى من مميزات كره القدم
مش هنضحك على بعض وحد زمالكاوى
يقولى انا زعلت لما خسرتو
وانا شايف انه مش عيب على فكره
كل مشجع وبيحب الكيان الى بيشجعه
ولو المنافس وقع او خسر اكيد بيكون كويس للمنافس التانى
يعنى لو الاهلى اخد السوبر كان هيفرق ببطوله جديده
عن نادى الزمالك ولما خسر خلاص الامور زى ماهى
فاكيد مفيش مشجع زمالكاوى هيقول ياريت الاهلى
ياخد بطوله قاريه عشان يفرق عننا

فانا شايف ان دى ميزة كرة القدم فعلا ان فى
مكسب وخسارة وفى فريق بياخد بطولات وفريق بيخسرها
المهم محدش يتعدى حدود الاحترام

6- ما رايك فى ترشيحات اتحاد الكورة للمدير الفنى للمنتخب ؟ وهل حسن شحاته يصلح لهذا الدور ؟

حسن شحاته
مش هيعمل زى ماعمل فى الكره المصريه من
2006 لـ 2010
الفتره دى كان فيها
تريكه ومتعب وبركات
واحمد حسن ووائل جمعه والحضرى
وحسنى وزيدان وفتحى وعمرو زكى

اى فريق ناجح لازم يكون
لاعبين + مدرب
انتا دلوقتى فى فتره عمل فريق جديد
انا شايف ان كان لازم نجيب مدرب اجنبى
يبنى فريق جديد ودا مش عيب وكتير بنشوف مدربين
عالميين بيمسكو منتخبات صغيرة عشان تبنى منتخب
واحنا الحمد لله منتخبنا واسمنا مش صغير عشان
ماتقدرش تجيب مدرب محترم يبنيلك منتخب قوى
تقدر توصل بيه 2018

7- ما رايك فى موضوع انتقال محمد صلاح لفيورنتينا ؟

احسن قرار
وانا مكنتش حابب انه يروح شيسلى
وكنت بتمنى يروح ( ليفربول )
مورينيو بيفكرنى بجوزيه
لما كان ماسك الاهلى بيهتم بالنجوم فقط
صلاح بالنسبالهم لاعب مغمور لسه ماتعرفش
واتمنى ان ( صلاح )
يلعب موسم كمان فى فورنتينا

8- برايك من هو أحسن لاعب فى مصر ؟

حاليا
تريزيجيه

9- بتشجع مين فى مصر غير الاهلى بعد الاهلى يعنى ؟

عموما ومش الموسم دا بس
بحب ( الاتحاد )
مع انه طرقعلنا بس مش مه

10- برايك من هو المدرب الأفضل فى مصر ونفس الكلام الفريق الأفضل بس غير الاهلى والزمالك ؟

طارق العشرى
واحسن فريق الموسم دا
انبى



( ثالثا اسئله عن الرياضه العربيه والخليجيه )

1- من هو اللاعب المفضل لديك عربيا وخليجيا ؟

عمورى
نجم بنى ياس الاماراتى



2- ناديك المفضل عربيا وخليجيا ونفس الكلام المنتخب ؟

عربيا بحب اتفرج على
( الترجى التونسى )

خليجي
( الهلال والاهلى السعودى )

منتخب عربى
( تونس )

منتخب خليجى
( الامارات والسعوديه )

3- ما رأيك فى الكوره السعوديه وما أحسن نادى سعودى ؟

الكره السعوديه بقت مميزة جدا
ودا بسبب النجوم الاجانب سواء
مدربين او لاعبين
السعوديه بتقدر تجيب لاعبين باسعار كبيرة جدا
لكن بيفيدو الكره السعوديه ودائما
بيجيبو مدربين عالميين ودى حاجا بتميز الكرة السعوديه

احسن نادى سعودى
اكيد ( النصر )
ماشى بشكل كويس جدا الفتره دى ومحتل الصدارة
بفرق مش قليل عن الاهلى

4 - سؤال خاص بـ ( المعلقين ) بتفضل المعلقين المصريين ام الخليجين ام المغاربه ؟

والله حسب المباراة يعنى لو مباراة فى الدورى
تحس ان مش داخل انك تتفرج على معلق غير المصرى
حتى لما ( الكاديكى ) كان بيعلق على مباريات الدورى
كنت تحس انه غريب
لكن عموما المعلق الخليجى والعربى
اتقدمو كتير عن المعلق المصرى

5- مارأيك فى نادى الهلال السعودى وهل ترشحه للحصول على دورى عبداللطيف جميل هذا الموسم ؟

انا شايف ان ( النصر ) الاقرب
الهلال بعيد عن المنافسه الموسم دا

6- سؤال اتمنى الاجابه عليه بصراحه يامورشو من هو اللاعب الذى يطربك وانت تشاهده وتحكم عليه بانه يستطيع الاحتراف خارجيا ؟

بقولك ايه قصدك مصرى يعنى والا قصدك ايه

( كان قصدى فى الكوره العربيه عموما يامورشو )

7- ماهو أفضل دورى عربى برأيك ؟

الدورى السعودى
والدورى المصرى

8- برايك ماهو أفضل منتخب عربى وخليجى يقدم كرة قدم جميله وممتعه ( حاليا ) ؟

الجزائر عربيا
الامارات خليجيا



( رابعا اسئله عن الرياضه العالميه )

1- ما رايك فى الدورى الإيطالى بدون اليوفى ؟

بص اليوفى دى حكايه
فريق ينزل درجه ثانيه ويصعد ويحصد البطولات
دى حاجا غريبه شويه
الميزة ان الاعبين لما الفريق نزل درجه تانيه
فضلو موجودين ودى حاجا تحسبلهم اكيد
الدورى الايطالى من غير اليوفى
اكيد هيكون دورى قوى
لان الفرق بين التانى ( روما )
والخامس ( فيورتينا )
تقريبا نفس الفرق بين ( اليوفى ) الاول
( وروما ) الثانى
عموما انا بحب الدورى الايطالى جدا على فكره
وصعبان عليه ( الميلان )

2- ما رايك بفريق العاصمه الإيطاليه ( روما ) وما هى ميولك الأوروبيه ؟

روما
بيفكرنى بالاسماعيلى
يقدم كره جميله جدا تقريبا بيعتمد على العالمى
( توتى ) لكن
بيفضل ينافس وفى الاخر بيقع

3- سمعنا من بعض الناس ان المنتخب الالمانى توج ببطولة كاس العالم بسبب المنشطات والكلام ده أحب اسمع رأيك فى الموضوع ده ؟

بص يا ريس انا هحكيلك حاجا بسرعه كدا
انا شغال فى قطع الغيار
فى مستورد بينزلنا شغل وكدا فبنكلم مع بعض
فبيقولى انه كان فى المانيا وهم منزلين
( بلى عجل ) جديد المانى
فقولتله لا انا مش عايز من النوع دا هاخد
اليابانى فقالى تعرف وانا هناك بقولهم ان
( بلى العجل ) اليابانى شغال كويس فى مصر
وكله شغال بيه فكان ردهم
خلال 3 سنين ( الماركه بتاعتنا )
هتكون رقم 1 فى العالم وبكره هتعرف الكلام دا

المقصود من كلامى دا ان الناس دى بتخطط فعلا
مش ماشين بالبركه زى ما بيقولو
لا اكيد الناس دى عشان تاخد ( كاس العالم 2014 )
كانت مخططه ومعتقدش ان المانيا بمستواها الى شوفناه
كان بالمنشطات

( وهى دى الحقيقه اللى لا يمكن حد ينكرها ، المانيا أبطال العالم )


4 - برأيك من يستطيع ان يحقق لقب دورى ابطال اوروبا هذا الموسم ؟

الريال اوالبايرن

5- هل مانشستر يونايتد قادر على اللحاق بـ تشيلسى وخطف الصدارة ؟

ياراااااااااااااااااجل
المان اعتقد هنشوفه الموسم الجاى
تشيلسى والسيتى هيفضلو كدا
لحد اخر مباراة من الدورى الانجليزى

6- من الفريق الذى يطربك أدائه ولعبه من الفرق العالميه ؟

الريال والبايرن

7- من تفضل ( ميسى ) ام ( الدون رونالدو ) ؟ ولماذا ؟

الكريستيانو
كريستيانو تحس انه ماشى بمستوى واحد دائما
عكس ميسى ممكن يقع فتره فى نص الدورى
ورونالدو بيتميز عن ميسى
فى حاجات كتير اهمها
السرعه والياقه
ودى اعتقد اهم ما يميز اى لاعب كرة قدم

8- من الأقوى برأيك ( الانتر ام الميلان ) ولماذا ؟

الاتنين زفت الموسم دا

9- برأيك ماهو أفضل منتخب يقدم كرة قدم جميله عالميا ونفس الكلام الانديه ؟

حاليا منتخب المانيا

الانديه
البايرن وباريس سان جيرمان



( خامسا اسئله عن القنوات الرياضيه والاعلام )

1- هل تتوقع افلاس قنوات بى ان سبورت قريبا أو حتى ضربها عن طريق القراصنه مثلا ام لا ؟

اتمنى
انا سمعت انها بتخسر الفتره دى
وكانو بيقولو انها فى طريقها للافلاس
وبعدين ربنا يخليلنا القراصنه
ومحدش بيغلب يا صاروخ دلوقتى عشان يتفرج على
اى مباراة

2- برأيك ماهى السلبيات التى توجد فى الاعلام الرياضى المصرى من رأيك ؟

الانتماءات
كل محلل او مقدم برنامج بيجامل الفريق الى بيشجعه
وتحس ان لو واحد قال لا التانى يقول اه عند فيه
ودا شوفه من
شلبى وشوبير
الاتنين بهايم ربنا كرمنا بيهم

3- ما رايك فى القنوات الرياضيه المصريه وأدائها ؟

احنا معندناش ثقافه القنوات الرياضيه اساسا
القنوات تفضل طول اليوم تجبلك مباريات قديمه
وبليل تشتغل على برنامجين مباشر وخلاص كدا
نقول عليهم قنوات رياضيه
لما تقدملنا بطولات حصريا
حتى لو تنس طاوله

4 - ما رايك فى أداء أبو تريكه كـ ( محلل ) رياضى ؟

ماتبعتوش بصراحه لحد دلوقتى

( ياراجل )

5- ما رايك فى قناة ( الأهلى ) فى الوقت الحالى ؟

قناة مستواها قليل جدا
وجايبا 2 والا تفهم منهم حاجا
شادى محمد وهشام حنفى
الاتنين اقل من انهم يقدمو برامج على قناة الاهلى
وبكلم انهم اقل من ناحيه موهبه مقدم برامج
قناة الاهلى كانت فى اجمل اوقاتها مع
خالد توحيد و المنيسى والقيعى

6- برأيك هل سيأتى اليوم وتسطيع القنوات المصريه المنافسه على بث بطولات عالميه ؟

معتقدش امكانيتنا الماديه
ماتسمحش بالكلام دا

7- ما رأيك فى مستوى قناة ( النيل للرياضه ) فى الوقت الحالى ؟

اول مره اشوف برامج رياضيه تحس فيها
ان البرنامج معمول فى ( حمام ) وبلدى

8- برأيك ما السبب حول ضعف وتراجع القنوات الرياضية المصريه ؟

طبيعى مع الحاله الى احنا فيها
نتراجع ونكون بالشكل دا
لما الدورى يكمل والجمهور يرجع
والداخليه تعرف ليها ايه وعليها ايه
والجماهير تعرف انها رايحه مدرجات كرة قدم تشجع بس
ساعتها هنبقى احسن من كدا بكتير
قول يارب

9- برأيك ماهى أحسن القنوات الرياضيه الموجوده حاليا ؟

ابو ظبى
فعلا قنوات تحب تشوفها حتى فى تصويرها
تحس انها مختلفه

( كلمه أخيره )
مساحه وقول كل اللى فى نفسك فيما لا يقل عن 5 سطور

منك لله ياعم
الحوار هيبقى كبير كدا
وابقى قابلنى لو حد شافه لاخرة
اتمنى للكرة المصريه ترجع تانى لمكانها الطبيعى
واتمنى الى حصل فى الدفاع الجوى
تكون اخر الاحداث المؤسفه فى المجال الرياضى
واتمنى ( مافيا ) كرة القدم المصرية يغورو فى داهيه

هههههههه
هيشوفوه ملكش فيه


(( انا بقول كفايه كده ))

منك لله ياعم انتا

نورتنى ياريس

تسلم على الاستضلفه يا نجم وكنت سعيد بيها

( حبيبى يامورشو وربنا )




وصلنا لـ نهاية الحلقه واتمنى انها تعجبكوا جميعا

إنتظرونا قريبا مع عضو جديد

من برنامج

( فى الملعب )

ılıılılıılılılıılılıılılıılılıılılıılılıılılıılılıılılıılıl

خالص حبى
محمود الصاروخ

[كبريت]

ايه ده ياعم محمود
فين التقطيع ياعم

انا كنت منتظر منك انك تقطع الراجل ده
ال امبارح يقولك هلبس الشورت ومش عارفي مين وارجع

فاكر نفسه لسه بمركز شباب مش عارف مين


وبعدين تعالى هنا ياعم الحاج مورشو


ايه الكلام ده



اتحاد السكسونيا
كلهم عصابه ( مافيا )
سواء حسن فريد
او الشامى
او جمال علام
اتحاد بلا اى بطوله او اى انجاز


هههههههههههههههههههه

انت خليتني افطس م الضحك على كلمة سكسونيا دي
لانك فعلا وضحت بصدق وقوة
وعبرت بكلمه من خلال مصطلح ينطبق فعلا عليهم

بس زعلان منك ياعم محمود
كنت عايز اشوف الجدع ده متقطع ياعم

بس بامانه

توبيك ولا اروع ومعلومات قيمه

أ محمود أحسنت جدا
أ مورشو أحسنت جدا


توبيك جميل جدا
تحياتي لحضراتكما

[الملكة كيلوباترا]

بجد حلقة ممتعة جــدا
تسلم على الحلقة

[Sea Pearl]

قرأتها كلها..صبورة انا
انا كان ليه فى الرياضة بس دلوقتى مش عدت بتابع
طريقة عرض الاسئلة جميلة
واجابات مورشو عرفت منها شوية معلومات
نورت مورشو
تسلم محمود ع الحلقة

[محمود الصاروخ]

اقتباس المشاركة الأصلية كتبت بواسطة كبريت ايه ده ياعم محمود فين التقطيع ياعم انا كنت منتظر منك انك تقطع الراجل ده ال امبارح يقولك هلبس الشورت ومش عارفي مين وارجع فاكر نفسه لسه بمركز شباب مش عارف مين وبعدين تعالى هنا ياعم الحاج مورشو ايه الكلام ده اتحاد السكسونيا كلهم عصابه ( مافيا ) سواء حسن فريد او الشامى او جمال علام اتحاد بلا اى بطوله او اى انجاز هههههههههههههههههههه انت خليتني افطس م الضحك على كلمة سكسونيا دي لانك فعلا وضحت بصدق وقوة وعبرت بكلمه من خلال مصطلح ينطبق فعلا عليهم بس زعلان منك ياعم محمود كنت عايز اشوف الجدع ده متقطع ياعم بس بامانه توبيك ولا اروع ومعلومات قيمه أ محمود أحسنت جدا أ مورشو أحسنت جدا توبيك جميل جدا تحياتي لحضراتكما

طب اعمل ايه اكتر من كده انا
مليون سؤال اهو وكل سؤال له اجابه عنده

ياعم ده محدش يعرف يقطعه صدقنى
^^
نورتنى ياريس

[محمود الصاروخ]

اقتباس المشاركة الأصلية كتبت بواسطة arco soso بجد حلقة ممتعة جــدا تسلم على الحلقة

تسلمى اركو سوسو على المرور الجميل
منورانا دايما

[محمود الصاروخ]

اقتباس المشاركة الأصلية كتبت بواسطة śèá pèárł قرأتها كلها..صبورة انا انا كان ليه فى الرياضة بس دلوقتى مش عدت بتابع طريقة عرض الاسئلة جميلة واجابات مورشو عرفت منها شوية معلومات نورت مورشو تسلم محمود ع الحلقة

مفيش أحلى من الصبر
ليه كده بس دى الرياضه جميله
تسلمى على مرورك الأجمل
فى انتظارك دايما
^^

[راجعة لحبيبى]

يامكبر هالبرنامج وهالاسئله
تعبتولى عيونى انتم الاثنين
ساعه يارجال اقرا
الله يسامحكم
اول مره اشوف مرشويعرف يرغى كذا
ماشالله يامحمود
جد برنامج مره حلو
وعيشتوناوياكم جو الكوره والتشجيع
مشكورين انتم الاثنين
وتسلم الايادى
لروحكم السعاده

[جنون قلب]

موروشوآ رائع جدآ


هختلف معـآك فى نقطه حسن شحـآته ومنتخب مصر
الميزه فى حسن شحـآته كـآنت طريقه اللعب وكمــآن الروح بين اللآعبين
وغير كده ارجع واقولك اه المنتخب كــآن قوى جدآ
بس برضه الروح كانت مطلوبه
انى اشوف متغب بينزل لحد سيد معوض عشان يستلم
ونفس الفكره زكى ينزل لغايه فتحى عشان يستلم
ده طبعا تكتيك مختلف جدآ
وبرضه تبص على شوقى واحمد حسن وحسنى كـآنوآ بيعلبوآ عكس انديتهم
ورغم كده بيبدعوآ


نيجى للمتخب دلوقتى
بص على اللاعبين هتلآقى كفـآءآت عاليه جدآ
يعنى الدفاع هتلآقى سعد سمير وعلى جبر وكمان نجيب وهتلآقى شريف علآء
اسمــآء كتير جدآ
خط الوسط المدآفع هتلاقى برضه مجموعه كبيره جدآ
وخط الوسط المهــآجم كلهم بس الله مـآ شــآء الله
وبرضه هتلاقى ظهور جدديد مثلآ عندك الشيخ الوآد ده تحفه وقـآدر يلعب منتخب



يعنى فرصه حسن شحـآته اكبر من الاول
وهنشوف منتخب قوى باذن الله


,
مشكور اخوى موروشو وليــآ عوده ليا بس افوقلكـ
عشان تقريبـآ نفس الميول
وبقول ل محمود احسن حـآجه علملتهــآ فى حلقتى ان انت اختصرت الاسئله
عشان كأن ممكن نتخاصم فى حته زى دى


مشكور حبيبى واستضـآفه رائعه

[توحد ارواح]

فعلا حلقه خاصه جدا ودسمه

الاسئله كانت شامله و منوعه


الضيف ماشاء الله متابع وعنده ثقافه كرويه جامده


ابدا قرات التوبيك كله دون رتابه او ملل بالعكس


بس مهما كان انتمائنا اما يلعب الفريق المنافس

مع اي فريق مش مصري اكيد نشجعه

من منطلق انا وابن عمي ع الغريب

حلقه جميله والاستضافه مميزه


يدوم النشاط