ابو العيال راكب حمار ..~

[Lamees]

قصتنا النهاردة مختلفة شوية لأنها في الريف المصري هناك حيث البساطة والطيبة وتلقائية رد الفعل كانت هناك اسرة بسيطة تعيش في الريف المصري يذهب الحج محمود الى الحقل ليحرث ارضه ويزرعها وياخذ في يده جاموسته وبقرته وحماره وتبقى الست زينب مراته في البيت ودي مهمتها لا تقل اهمية عن مهمته تنظف بيتها وتطبخ طبيخها وتخبز العيش الفلاحي الجميل وتجلس في انتظار ابو العيال والعيال عشان يتجمعوا كلهم على طبلية واحدة وياكلوا مع بعضهم العيال رجعوا البيت والست زينب بتقولهم فين ابوكم يا عيال قالولها ده لسه بيسقي الارض ولسه قدامه شوية وقت زعلت زينب وقالت وازاي هناكل لوحدنا يا عيال دي اللقمة مش بتحلى الا باللمة وابوكم في وسطينا طيب استوني شوية اروح اندهله خرجت زينب وهي ماشية لمحت ابو العيال راكب حمارته وماشي قالتله استني يا حج محمود مش هتيجي تاكل معانا قالها ارجعي يا ولية انا لسه قدامي شوية وقت قالتله لأ والنبي يا اخويا دي اللقمة مش هتحلى غير بيك وفضلت تلح عليه لحد ما خنقته وهي بتشده من على الحماره عايزة تنزله من عليها عشان يروح معاها قعد يقولها يا ولية روحي البيت انتي مش بتفهمي طب عليا الطلاق بالتلاتة ما انا نازل من على الحمار اتجننت زينب وقعدت تصرخ وتصوت وتقول الحقوني يا ناس الحاج محمود طلقني الناس اتلمت عليهم خير يا حج محمود قالهم الولية بنت *** نرفزتني خلتني حلفت بالطلاق ما انا نازل من على الحمار الموقف صعب وزينب مش مبطلة عياط وصراخ وهي تردد هانت عليك العشرة يا حج محمود يا مصيبتك السودة يا زينب حاولوا الجيران يهدوها شوية وخدوا الحاج محمود وهو على الحمار مش قادر طبعاً ينزل من على الحمار احسن كده هتكون ام العيال طالق واحد من جيرانهم اسمه الحاج محمد قال تعالى معايا يا حج محمود مش هيحل الموضوع ده غير الشيخ عبد الفتاح شيخ الجامع الكبير اللي في اخر البلد راح معاه الحاج محمود ومعاه باقي الجيران وعرضوا الموضوع على الشيخ اللي ابتسم وقالهم طيب تعالوا معايا وراحوا كلهم على ارض الحاج محمود ووقف بالحمار جمب نخلة كبيرة وقاله اطلع على النخلة يا حاج محمود من غير ما تنزل من على الحمار وبسرعة اتسلق الحاج محمود النخلة وهما سحبوا الحمار وقاله انزل بقى يا حج محمود من على النخلة وتاني مرة امسك نفسك وبلاش الحلفان عمال على بطال بالطلاق خدت زينب نفسها وفضلت تزعرد لووولي لوووولي وبصتله وقالتله مش هتيجي بقى عشان نتغدى قالها تاني انتي لسه محرمتيش وجرى وراها بالقبقاب ^_^ تمت ..~ اطياف الماضي 4 \ 3 \ 2015

[أميرة محمود]

قصة جميلة وخفيفة اوى اطياف
عجبتنى جدا تسلمى ع الابداع
ورسالتى لزينب: في ايه يا زينب
سيبي الحاج محمود براحته
والغدا يتأجل يعنى ههههههه
بس بعد ما الشيخ حل الموضوع
هى كل ال ف دماغها الغدا بردوا
ههههههههه

[™Amiliya]

ههههههههههه جميلة بجد

والله ممتعة

تسلم ايدك يامبدعة

[ساحر الأحزان]

قصة جميلة وظريفة رونى

كتبتيها باسلوب بسيط وظريف

وادى اخرت زن الحريم

الراجل اتجنن

[العاشق الذى لم يتب]

يسلام يخرب بيت الحمار وسنينه
كان هيتسبب فى خربان بيت الحاج محمود
ربنايسترعرضه شيخ الجامع الكبير
كنت هزعل على اللمة على الطبلية
اصلا انابحبهااوى
ايه العظمة دى يارونى
قصاصة ورب الكعبة
حلوة القصة الريفية دية
تسلمى

[ابو نصير]

سيدتى أطياف.......
جميله قوى بجد وبصدق لأنها مليانه عبر يعنى بالعربى الفصيح أدى العيش لخبازه
واسئلو أهل العلم ولا تسئلو أهل الجهل فى عالم الجهل.....
ونسئل على أهل الفتوى ولا نسئل أهل الفسوى
...................
تحياتى وتقديرى سيدتى
ابو نصير

[Lamees]

اقتباس المشاركة الأصلية كتبت بواسطة أميرة محمود قصة جميلة وخفيفة اوى اطياف عجبتنى جدا تسلمى ع الابداع ورسالتى لزينب: في ايه يا زينب سيبي الحاج محمود براحته والغدا يتأجل يعنى ههههههه بس بعد ما الشيخ حل الموضوع هى كل ال ف دماغها الغدا بردوا ههههههههه

اه اصل الست زينب ست مصرية
دام عملت الغدا يبقى الكل لازم ياكل
وحتى لو فيها طلاقها

مرور جميل اميرة
كوني بالقرب

[Lamees]

اقتباس المشاركة الأصلية كتبت بواسطة ايميليا ههههههههههه جميلة بجد والله ممتعة تسلم ايدك يامبدعة

ويسلم مرور وحضورك وجمال طلتك هنا ايمي

[Lamees]

اقتباس المشاركة الأصلية كتبت بواسطة ساحر الأحزان قصة جميلة وظريفة رونى كتبتيها باسلوب بسيط وظريف وادى اخرت زن الحريم الراجل اتجنن

الستات المصرية ياخدوا نشان في الزن
بس دي بقى نهاية كل ست زنانة

مرورك جميل انتظره
تحيتي

[Lamees]

اقتباس المشاركة الأصلية كتبت بواسطة العاشق الذى لم يتب يسلام يخرب بيت الحمار وسنينه كان هيتسبب فى خربان بيت الحاج محمود ربنايسترعرضه شيخ الجامع الكبير كنت هزعل على اللمة على الطبلية اصلا انابحبهااوى ايه العظمة دى يارونى قصاصة ورب الكعبة حلوة القصة الريفية دية تسلمى

وبـ مناسبة انها قصة ريفية
هي حقيقة ريفية فهي حدثت بالفعل

شكراً للمرور استاذ رفعت