الحلقه الثانيه من ( اجمد عضو 3 ) مع ( Words Whisper )

[morshooo]

بسم الله الرحمن الرحيم

اهلا بيكم جميعا

وحلقه جديده من

( أجمد عضو )



طبعا كلنا عارفين ان ضيفه

حلقه النهاردة

الاداريه المتميزة /

Words Whisper






بس تعالو نشوف

عناوين من الحوار

Words Whisper : أنا هقول اللي عندي واللي بعده بآ مُصِر مش يشوف الأمور أوضح فـ أنا كدا هكون خلصت الكلام اللي عندي ..

المتحدث عن الاعضاء دوره هو لقبه ويجمع افكار الاعضاء ويرشح اعضاء للتميز او الاشراف

الإدارة الحالية أو اللي قبلها أو اللي بعدها مش هيجبروا النفوس تصفى

للاسف المراقبين والمشرفين تغيبو عن ترشيح الاعضاء الى تم تكريمهم مؤخرا

الفترة الماضية كانت خاملة وللحق فمش فيه أي عضوية قدمت حاجه مميزة 100%

أنا بتعامل مع عضويات و IP مش يخصني شخصياتهم المسألة كلها زي ماقلت مفاضلة ..

عايز الحق ؟
أنا شايفه ان الأسماء اللي اتكرمت أكتر من المفترض

همسات نشاطها فعلا كويس وفعلا تواجدها راقي بس زي ماسبق قلت في مفاضلة

عارف إيه أسوأ حاجه بتحصل حقيقي ان أراعي زعل اللي قدامي
أكتر من ايه الصح يتعمل وللأسف الشديد دا اللي الأعضاء عايزينه

أنا عندي مرارة واحدة ونفسي أكمل بيها الـ 30 فياليت اللي يتكلم
ياإما يبآ فاهم بيقول ايه ياإما يسكت عشان اللي بيتكلم على جهل
بيبآ شكله وحش

احنا من أسباب وجودنا هنا ان نغير مود ضغط المشاغل ونروق
شوي فبلاش حد يتعامل مع المكان انه مكان حرب أو خناق




ودلوقتى تعالو نشوف الحوار :

فى البدايه اهلا بيكى فى ( اجمد عضو ) ..

هلا فيك
وشكرا على تلبية حضرتك لطلبي ..




شايفا ان النهاردة هتقدرى توضحى كل الامور لاعضاء المنتدى ؟

والله أنا هقول اللي عندي
واللي بعده بآ مُصِر مش يشوف الأمور أوضح
فـ أنا كدا هكون خلصت الكلام اللي عندي ..




طيب فى البدايه وبأختصار فهمى الاعضاء ايه دور ( المتحدث عن الاعضاء ) ؟

دوره هو لقبه بس كدا
- يجمع أفكارهم ويدرسها ويقدمها ..
- يرشح للتميز والإشراف ..
- و يقدم أفكاره اللي بتمثلهم لدراستها وتطبيقها إن كانت مناسبة ..




يعنى ايه يجمع افكارهم يعنى لو انا عايز اقدم اقتراح ؟ المفروض هو الى يناقشنى فى الاقتراح دا والا الادارة ؟

والله حسب ماحضرتك حابب
حابب تتحاور معاه وتوصل للصيغة الأنسب وهو يقدمه نيابة عنك
كـ متحدث عام باسم الأعضاء اعمل كدا
أو لو حابب تناقش الإدارة مباشرة اتفضل ..






ليه ظهرت الفكره دى حاليا ؟ وشايفا انها نجحت فعلا فى مرحلتها الاولى حتى الان يعنى لحد فتره التصويت كانت الامور تمام والا فى مشاكل ؟

ظهرت لأن ف مسافة سيئة بين الأعضاء
مش فيه حسن نية ولاتقديم عذر للآخر
فيه اصطياد للأخطاء وتضخيمها
وبشوف كدا حتة اللي عايز يفرم اللي قدامه
ومش هيرضيه غير انه يفرمه !
ومليون صوت مش عايزين يتجمعوا ولاحد عايز يسمع التاني
كل واحد حاطط نفسه في خانة المظلوم اللي عايز حقه !!
كل واحد شايف انه الأحق بالأفضل وغيره نكتة !!
والتعامل الغير منطقي والغير مقبول مع الإدارة
انهم نوع من آلة موجودة مخصوص عشان تعمل كل حاجه لواحدها
ولو مش عملت حاجه معينة مش راضي عنها
تبدأ سلسلة هجوم و إساءة بلا عقل و لاتفكير
ونظام أنا أعترض للاعتراض بدون فهم خلفية الأمور
وبدون مايخرج نفسه برا الدايرة ويشوف الأمور
وفجأة يبآ نفس الشخص اللي أصلا مش بيشخصن الأمور
واللي كان ف إجماع أو أغلبية شايفينه كويس
لما يبآ إداري تبدأ اسطوانة انه بيجامل و اتغير ووووو
لحد مابآ الإداري مخنوق من اللون دا أساسا !
فبسيطة ييجي حد بآ من الأعضاء في موضع مسؤولية ويتكلم عنهم
يمكن على الأقل الحوار يوجِد ود بين الناس زي زمان
زي أول مادخلت المنتدى كدا مع ان وقتها الإدارة كانت صارمة و [ منغلقة ] في قراراتها ..

اما عن نجاح الفكرة
فدا مش أقدر أحكم عليه حاليا
بس حتى وقت التصويت
كان السبق لـ سوء النية !!!!




انا معاكى ان فى مسافه سيئه بين الاعضاء بس ازاى ( ياسر ) هيكون مسئؤل عن تقليل المسافه دى والادارة نفسها مش قادرة تعمل دا ؟

على فكرة هي مش مسألة مش قادرة تعمل دا
حضرتك راجع الأحداث من قبل مش بس الوقت
أصل الإدارة الحالية أو اللي قبلها أو اللي بعدها
مش هيجبروا النفوس تصفى
والغريب انه بآ الطبيعي الادارة اللي تكون موجودة تتهاجم مش تُنقَد
فوجود عضو من الأعضاء اهو أقرب لهم ..




الفتره الى فاتت شوفنا التكريمات الاداريه ؟ فى الاول عايز اعرف مين الى بيقرر ان دا يتكرم ودا لا ؟ والمراقبين كان ليهم دور والا لا ؟

الإشراف و الرقابة بيكون لهم دور في الترشيح للتكريمات
والأحمر بيقدم ترشيحاته بردو
وبعدين من جانب الأحمر ( الادارة ) بيتم المفاضلة بين الأسماء المقدمة
دا الطبيعي بس للأسف مش دا اللي حصل
والإشراف و الرقابة تغيبوا عن الترشيح
مع ان فيه موضوع مثبت بقسم الإشراف للترشيحات
ومش فيه حاجه بتقديم طلب مسبق من جانب الادارة للإشراف و الرقابة بالترشيحات
بس احتمال بسبب فترة الخمول الشديد اللي كان مر بيها الفورم
لكن حاليا شايفه انه بدأت الأمور تتحسن ..




المشرفين والمراقبين اتغيبو صحيح لكن الطبيعى ان يتم ابلاغهم ان فى تكريم وعايزين منكم ترشيحات ؟

ماشي وهما فعلا بيحاولوا يقدموا اللي بيقدروا عليه
ومجهود كل شخص لايُنكَر
وفعلا ببداية التعيين طلبنا منهم تقييمات المشرفين و الترشيحات
بس هما كمان لهم ظروفهم
وعشان كنا نفضل منتظرين يبآ الأمور هتتأخر أكتر
بس أكيد ترشيحات المشرفين والمراقبين مهمة كتير ..





شوفنا فى التكريم 4 اعضاء تم ترقيتهم للتميز ( ساد لاف / جيجى / هاديه / لمار* ) ترقيتهم كانت بناء على ايه ؟

الفترة الماضية كانت خاملة
وللحق فمش فيه أي عضوية قدمت حاجه مميزة 100%
لكن كان فيه تواجدات جيدة بتحاول تثبت نفسها
ودا بحد ذاته كويس جدااااا ويستحق الشكر
ودا من أسباب عدم ترقية حد لرتبة مشرف ..





ليه ماتمش تمييز ( كبريت ) مع انه من انشط الاعضاء الفتره الى فاتت ؟ والا ماتمش ترقيته بسبب اعتراض الاعضاء على عضويته ؟

بالأكيد مش هنحكم على استحقاق عضو عشان نظرة غيره
ولو كدا يبآ كنا مش هنكرمه خالص
أنا بتعامل مع عضويات و IP مش يخصني شخصياتهم
المسألة كلها زي ماقلت مفاضلة ..




فى كمان 4 اعضاء حصلو على ( وسام الابداع الحصرى ) ( ابو نصير / جنون القلب / sama / العندليب ) ؟ بيتم اختيار الاعضاء الى بتحصل على وسام الابداع بناء على ايه ؟ وليه تم اختيار الـ 4 اعضاء دول ؟

عايز الحق ؟
أنا شايفه ان الأسماء اللي اتكرمت أكتر من المفترض
لكن عشان من فترة مش حصلت تكريمات
وعشان فيه محاولات إثبات الذات بشكل إيجابي
تستاهل ان الادارة تشكرها ..

مش فيه حاجه اسمها هكرم الكل
مهما زودنا عدد المكرمين
أصل التكريم دا بيكون بالمفاضلة
وعشان ترضي الكل فتكرم الكل يبآ دا ظلم
إرضاء الكل ظلم
العدل ان يكون فيه فرق بين الأفضل و غيره
اللي زعلان من التكريم وشايف ان كان لازم يتعمل له تمثال
واللي شايف ان حل المشكلة كان تكريم الناس كلها
ماتيجوا نعكس الوضع ونشوف إيه إحساس شخص قدم الأفضل
لما يلاقي ان الأمور ماشيه كدا وخلاص وكله بيتساوى بنشاطه ؟
هيحس بالظلم وانه مش كان لازم يتعب نفسه دام الكل ف كفة واحدة
وهو صاحب الحق فعلا
ولأنه صاحب الحق فهو اللي يستحق أراعي زعله ..





يعنى دا كان ( مهرجان التكريم للجميع ) ؟ ومين السبب فى عدم التكريمات الفترة الى فاتت ما اكيد الادارة ؟


لا مش كان مهرجان تكريم الجميع
بس حبينا نكرم عدد كبير
مع مراعاة وجود مفاضلة
وآه الإدارة هي اللي مش كرمت الفترة الماضية
بس مش كان ف نشاط أصلا ليتم تكريم عليه ..




شايفا ان ( جنون القلب ) يستحق الوسام رغم انه بقاله شهر والا شهرين فقط مسجل بالمنتدى ؟ فى المقابل فى اعضاء بقالهم سنين مخدوش الوسام دا لحد دلوقتى ؟

الردين اللي قبل يشرحوه
أما عن الأعضاء القدام فلما هتيجي تكرم
بتكرم القديم اللي نشاطه مازال مستمر
مش القديم اللي انقطع هتكرمه بأثر رجعي وهو مش بيشتغل..




مش يمكن انقطع عشان مفيش فايده وشايف الادارة نايمه ومفيش اى تقدير ليه ؟ وانا لو عضو قديم وكنت شغال لفترات كبيرة والاقى عضو بقاله شهرين بيتكرم دا يخلى العضو القديم يقول ايه ؟

بالتكريمات الدورية اللي قبل
وقت نشاط القدام اتكرموا
لكن بتكلم ف حاليا
هكرم عضو بأثر رجعي ؟!!
يعني الوقت لو انا نشيطة باليوميات
وجيت شهر مش نشيطة خالص
وحضرتك جيت تعمل تكريم الشهر اللي بعده
هتكرمني ؟!




تم تكريم 7 اعضاء بوسام التفاعل والنشاط ؟ بيتم اختيار الاعضاء دى بناء على ايه ؟

فيه عضويات عامله نشاط مقبول
حاليا عاملين نشاط حلو بالفورم
وبقالهم فترة بيحاولوا يثبتوا تواجدهم
وبتمنى يستمروا وفعلا يتركوا بصمة مميزة
مش يكون يومين وخلاص ..




فى فتره معينه بتحسبوها لتكريم الاعضاء دى والا بتتحسب ازاى يعنى ازاى العضو يعرف ان هيتم تكريمه بوسام التفاعل والنشاط ؟

التكريم المنتظم بيكون شهري
أو كل شهرين كحد أقصى
ودا ان شاء الله هنعيده الفترة القادمة
وعن ازاي العضو يعرف انه هيتكرم
فدا ان يكون نشاطه مستمر حتى وقت التكريم
التكريم بيكون عن فترة محددة فيكون خلال الفترة دي له نشاط يستحق ..




( شاعر الحب الحزين ) و ( عازف الصمت ) اصبحو مشرفيين مميزين ؟ بس ازاى ( همسات فوق القمر ) تتميز على النشاط ومايتمش ترقيتها لمشرفه مميزة رغم نشاطها ؟

همسات نشاطها فعلا كويس
وفعلا تواجدها راقي
بس زي ماسبق قلت في مفاضلة
فيه حد بيتواجد أكتر
فيه حد قدم فكرة في قسمه أفضل
الأسماء كلها اللي حضرتك ذكرتها مميزين
بس فاضل بينهم
أنا شخصيا عايزه أشوف من همسات خروج عن المعتاد الفترة الجايه
أنا متأكدة انها تقدر تعمل أحسن وأحسن حتى من مشرفين كتير ويمكن أحسن من الكل
ومتأكدة انها تقدر تقدم فكرة مختلفة تماما في الأقلام
ودا اللي عايزه أشوفه منها ، عايزاها تطلع برا المعتاد
حد زي همسات عنده أكتر من اللي بيقدمه عشان يعطيه
أنا عايزاها بآ تعطي الأكتر دا
ف حد بتبآ عارف آخر حاجه كويسه يقدر يعملها ايه
و ف حد بتبآ متأكد ان عنده أحسن وانه مبدع أكتر من شغله بس مش عمل لأي سبب بآ
أنا عايزه حته الإبداع دي اللي عند همسات تخرجها ..

كمثال بردو حضرتك يا أ.مرشدي من الناس اللي ممكن يغيبوا فترة
بس لما بتتواجد أكيد بتعمل نشاط مميز
وحتى وحضرتك غايب فترة صغيرة - مش طويلة -
ممكن مش يتم الانتباه لدا لأن فيه حاجه قبلها محسسه اللي موجود بالـ touch الخاصة بيك ..




تم تعديل تكريم المشرفين بوسام النشاط الدائم بعد اعتراض ( جبل عالى ) ؟ وشوفنا اعتزارك ليها فى التوبيك شايفا ان 3 أداريين مخدوش بالهم من مجهود ( جبل ) وقت ماتم تحديد الاعضاء دا كان غير مقصود ؟

راجعوا كدا صيغة اعتذاري
أنا مش اتكلمت مين أخد باله ومين لا
أنا اللي قلته انها غابت فترة ولأنها مش قدمت بيها توبيك خاص بقسم المشرفين
مش تم الانتباه لربط الفترة دي بتعبها وانها كانت لعذر ..




شايفا ان الـ 4 مراقبين بالمنتدى كلهم شغالين ويستهلو التكريم الاخير ؟ رغم ان فى منهم بيدخل وينقطع عن المنتدى ؟

شايفه انهم أكتر حد بيحاول
وانهم أكتر حد بيعوض غياب حد منا فعلا ..




فى حاجتين ماتعودناش عليهم فى التكريم الادارى وكنت عايز اعرف منك ايه الفايده منهم :
اولا : تكريم ااعضاء السويتش ماكس ودى حاجا غريبه ايه دخل قسم فى تكريم أدارى ؟

لا هو مش تكريم عن قسم السويتش
هو تكريم عن تلبية طلبات الأعضاء كشيء خدمي
سواء فوتو أو سويتش ..




فى التكريم انتو مكرمين مصممى الموقع وتلبيه الطلبات دا تمام لان دى خدمه عامه للجميع ؟ لكن اكرم الى بيعملو اعمال فلاشيه ماكدا كدا دى طبيعه القسم يبقى كمان كنت اكرم اليوميات عشان الاستضافات والنقاش عشان القضايا بتاعتهم والخزعبلات عشان مواضيعهم ... الخ ؟ مش شايفا ان دا تكريم اتحط كدا من ضمن التكريمات ومش محتاجه تقولى مين الى اقترح دا لانه الادارى كان مشرف على القسم دا ؟

لا لا لا
طبيعة القسم تصاميم و دروس
مش ان أعمل للأعضاء طلباتهم للتواقيع الفلاشية
دا شيء إضافي كخدمة للأعضاء ..




ثانيا : اول مره يتحط اعضاء وتترشح انها تكون مشرفيين ليه ماتحطوش كمشرفين على طول او تم تبليغهم خاص .
ايه الفكره انكم تقولو هنشوف شغلهم لمده شهر .

قلتها فوق
ان مش ف حد حاليا
فعلا قدم حاجه مميزة جدا
لدرجة انه يبآ مشرف
وبعدين كـ إنصاف بردو
هو المشرف اللي بيعمل مشاركات كتير ؟
لا . المشرف هو اللي يقدر يغير قسمه للأفضل
اللي بيقدم قيمة أفضل مش قدر أفضل بس
وعامة فكل اللي تم تكريمهم قريبين من الاختيار دا
و كمان مشرفي الأقسام يقدروا يرشحوا حد لو أقسامهم محتاجه
فترة الاختبار دي عشان عايزين مشرفين هيفرقوا في أقسامهم
مش يبؤوا مجرد ألوان وألقاب وخلاص ووجودهم في القسم زي أي عضو
وعشان كرأي شخصي تعيين حد حاليا غير مناسب
لأن مش فيه مفاضلة حقيقية أختار على أساسها
وعشان مش فيه مفاضلة فالمشرف اللي هيتعين دا
هيبآ فاكر كل مهمته يعمل مشاركات وتكريم من غير ماينتبه لأنه يعمل بصمة مميزة
واحتمال يشتغل يومين وفجأة بح يختفي لأني مش اعطيت نفسي فرصة لأفضل اختيار
وكلمة نفسي هنا مش أقصد بيها أنا
أنا كلامي كإدارة بوجه عام بس عشان أنا اللي بتكلم ..




مش شايفا ان دا ممكن يحبط الاعضاء المرشحين لو ماتمش وضعهم كمشرفين بعد شهر على الاقسام دى ؟

والله احنا مش قلنا دا هيكون مشرف
احنا قلنا مرشح للإشراف >> فرق
والموضوع بآ بإيدهم هما
يللا يتنشطوا ويعملوا أفكار بالأقسام اللي بيفضلوها
ويوروا الكل انهم يليق عليهم الإشراف
عشان هما لو يستحقوا أكيد هيكونوا ان شاء الله ..




لو عضو فيهم انتو خلاص قررتو انه يكون مشرف قسم والمشرف الحالى اعترض على وضعه كمشرف معاه هتعملو ايه ؟

أنا قلت لسه مش قررنا
والأكيد ان مشرف القسم القديم
هيكون عايز الأفضل لقسمه
فلو فيه حد فعلا هيكون إضافة للقسم
هو أول حد هيكون عايزه معاه ..




ليه تم ترشيح جيجى على اليوميات رغم نشاطها على الخزعبلات ؟

هي عضوة نشيطة ونشاطها حلو
سواء هنا أو هنا
وترشيحها مش ثبوتية بتعيينها
وأكيد هيؤخَذ بالاعتبار رأي المشرفين القدامى على الأقسام
وأكيد احنا منتظرين منها ومن غيرها
ان نشوف حاجه مميزة بجد مش موضوع أو حوار أو رد وخلاص
عايزين حد يثبت انه فعلا مميز وهيقدر يخلي القسم أفضل
أيا كان القسم دا ..




الفتره الاخيرة فى اعضاء كتير بتشتكى من ( قسم الشكاوى ) بسبب الردود بتاعت الادارة ؟ شايفا ان الاعضاء دى بتظلم الادارة والا فعلا فى ديكتاتوريه فى بعض الامور ؟

دكتاتورية !
عارف إيه أسوأ حاجه بتحصل حقيقي
ان أراعي زعل اللي قدامي أكتر من ايه الصح يتعمل
وللأسف الشديد دا اللي الأعضاء عايزينه
اللي بييجي يشتكي هو غالبا مش بيقدم شكوى وعايز رد
لا . هو عايز رد معين وان الأمور تمشي زي ماهو شايفها !
مع ان اللي جوا المشكلة بنسبة 99% بيشوف غلط
ومع ان معلش يعني احنا مش أطفال عايزين بس طبطبة ومعلش يابابا وهو اللي وحش !
غالبا اللي بييجي يشتكي بيلف ويدور ف نفس دايرة
هو اللي وحش وعايزه يتجلد وأنا ملاك وكويس !
اللي جاي يشتكي بيشوف من منظور واحد
مش بينتبه يشوف باقي الزوايا وان الأمور مش هو بس
دكتاتورية ايه ! حضرتك من الناس القديمة
وعارف كويس ان الأعضاء من وقت د.طارق الله يوفقه
أخدوا مساحة مشاركة في الرأي أكبر مش كانت موجودة أصلا
الغريبة ان الوقت اللي المساحة دي مش كانت موجودة
كانت الناس نفوسها أفضل وكان ف جو عام لطيف
انما لما بقيت موجودة عوضا عن التفكير في مسؤوليتها
بآ التفكير في مصلحة فرديتها فوصلنا انه مش عايز يشوف أصلا
انه الاداري اللي هو شخص مش روبوت ليه وجهة نظر معينة من برا المشكلة
و انه عشان براها شايف كل الزوايا
على عكس اللي جواها وشايفها مقفولة على غضبه و رفضه و رغبته في الانتقام !
ونفس الشخص اللي رافض الادارة عشان مش على هواه
لو خرج برا الدايرة وبص للمشكلة كطرف خارجي
أو عرضت عليه مشكلة شبهها هو مش طرف فيها
هيعطي نفس رأي الاداري الدكتاتور
ولو هو الطرف التاني هيبآ عايز من الاداري نفس رد الفعل اللي اعطاه ..
بالنهاية الادارة بشر مش منزهين
بس النظام اللي بقالوا فترة الأعضاء بتتبعه
بتاع الضغط و الصوت العالي وأصل انتم فيكم وفجأة يقلبوا على الشخص
و فعلا من يوم ماظهر وأي إداري كاره يكون في المنصب دا
وعايز يخلص منه بس بيحاول يثبت الأمور عشان مش كله يضيع
عشان كل اداري لليوم ليه ذكرى حلوة هنا وعاصر الوقت الي كان ف ناس حلوة
أنا واحدة من الناس بتمنى أرجع أشوف ناس حلوة بتعرف تقدر
وبصراحة دي أكتر حاجه عايزه أعملها حتى لو أثرها مش هيبان سريعا
وحتى لو اللي موجود الوقت مش فهمها
عايزه أرجع أشوف ف المسابقات مشاركات تليق بمسابقة
مش أي مشاركة وخلاص !
عايزه أرجع أشوف مواضيع مميزة بجد
و أعضاء مميزة بجد
و ناس مبدعة فعلا
وجوايز المسابقات مش بتتوزع ببلاش وكله كسبان
فمش مهم هيقدم إيه لأنه كدا كدا كسبان
أما نظام الزعيق وأصل الإدارة فيهم وعليهم ودول أساسا وحشين
عشان التصرف الحاصل مش على هوى فلان فقرر يسيء بدل مايشوف وجهة نظر الادارة
اللي هي فعلا بتوضح وجهة نظرها لما ترد على شكوى
فدا لن يشكل ضغط ولن يجعل من خطأ صواب ولاهغير صح عملته عشان حد بيزعق
وبالله بالمناسبة بآ
بلاش جو الناس اللي بتفتي ف اللي ماتعرفوش
ألئا حد داخل لاعارف حصل ايه ولا متابع حاجه ولا شاف خلفية الأمور
ويكتب انا مش راضي عن اللي حصل الادارة دكتاتوريين هبآ أقطع عنهم المصروف !
قبل ماتقرر سيادتك تفتي وتحكم على حاجه ماتعرفهاش
يبآ يااما تعرف وتفهم وبعدين تتكلم ياإما تسكت
لكن بلاش جو الفتي العجيب اللي بشوفه
وفللان شالوه من الاشراف ، مافيش تقدير !
مايمكن فلان دا اللي أصر ، اربطه بآ وعافية هتقعد !
وفلان منعوا الرسايل عنه وهو أساسا من الأولياء !
أنا كمان شفت سيادة الولي دا وهو ماشي ع الميه !
أنا عندي مرارة واحدة ونفسي أكمل بيها الـ 30
فياليت اللي يتكلم ياإما يبآ فاهم بيقول ايه ياإما يسكت
عشان اللي بيتكلم على جهل بيبآ شكله وحش
ومجرد صوت كدا راشق ف أي دوشه وخلاص
قبل ماتتكلم احترم قيمة الكلمة وخلي لها احترامها وافهم
لما تبآ بتحترم كلمتك تعالى كلمني و هتناقش معاك
انما ألئا اللي داخله يزعق وكلمة هنا وكلمة هناك
أحب أقول لسيادتك أنا عن نفسي مش هكلف نفسي بالرد عليك
انت واحد مش محترم قيمة كلمتك فمش بتوزنها يبآ أرد عليك ليه ؟!!

وعلى فكرة عشان بس ف ادمغة غريبة
صيغة المخاطب وكلمة انت وسيادتك وماإلى ذلك
كلام عام وأكيد مش موجه لـ أ.مرشدي .




لما عضو بيقول ديكتاتوريه معنى كدا ان النظام دا بيتاخد مع كذا عضو مش مع عضو واحد وممكن يكون من نفس الادارى ؟


شوف أ.مرشدي
أكيد أحترم مشاعر العضو و رؤيته
حتى لو كان دا راجع لتسرعه
أو تأثره بشيء شخصي
وفي الحالة دي يبآ الصح
أشرح وجهة النظر وأوضحها وأعطيه وقت ليهدأ ويتفهم
أما لو كان فعلا بسبب غلط من إداري مش مجرد تسرع أو إحساس من العضو
فعندك باقي الطاقم الاداري و الأعضاء
لما اداري بيغفل عن شيء بوضح له
ودا مش يقلل منه في أي شيء لأننا بشر
وكل الطاقم بيكمل بعضه فعادي جدا ننبه بعض
وأنا لو قصرت أو غفلت هما كمان بينبهوني
وبعدين مش حد هيتعمد يقصر ..




ليه مش بتقولو ان اى مسابقه يكون ليها شروط وزى ما بتقولى مش كله كسبان ؟ وعارف ان تقريبا فى موضوع خاص باالمسابقات بس ليه مش بتابعو المسابقات دى وتعرفو منظمها ان كدا جوائز واوسمه كتير المفروض يقللها ؟

سبق دا نبه عنه أ.أمجد
وحضرتك عارف وعارف كان ايه رد الأغلب
وهيتم التأكيد عليه تاني
والاهتمام بتطبيقه أكيد إن شاء الله ..




فى نهايه الحوار تحبى تقولى ايه لاعضاء المنتدى ؟


احنا من أسباب وجودنا هنا
ان نغير مود ضغط المشاغل
ونروق شوي
فبلاش حد يتعامل مع المكان انه مكان حرب أو خناق
و حطوا باعتباركم ان كل منصب هنا هما بشر
زي كمان ماانتم بشر
وأي تقصير أو غلط من حد عادي جدا يحصل
زي ماكلكم بتغلطوا وعايزين يتم التماس العذر لكم
وزي ماعايزين غيركم يراعي مشاعركم راعوا مشاعر غيركم
الوقت اللي فيكم يدخل توبيك أو أي مكان ويحس بس
ان المكتوب له علاقة فيه حتى لو دا مش حقيقي
بيزعل ويقدم شكوى ويقول اهتموا بمشاعري
شوفوا بآ كم حد فيكم بيدخل يهاجم مش بس ينتقد
وكم حد فيكم في مهاجمته بيغلط باللي بيتكلم عنه ويفضل يهاجم ويهاجم ويُسيء
على فكرة اللي بتهاجموه دا وتغلطوا بكلامكم عنه عشان إداري أو مراقب هو كمان بني آدم
مش تفضلوا تضغطوا عليه ومستنيين مش يغضب ولايفقد أعصابه
اللي تكرهوه لأنفسكم اكرهوه كمان لغيركم
وقبل ماتعطوا حكم خرجوا نفسكم برا الدايرة وشوفوا الأمور .



وبكدا بتخلص حلقه النهاردة

انتظرونى وحلقه جديدة من

اجمد عضو

[انا جيجي]

اولا حلقة جامدة يا مورشو وتستحق التقييييييييييييم

والضيفة ماشاء الله

انا هتكلم فى النفقطة الى تم ذكر اسمى فيها

د.اسماء لما بكتب موضوع او بعمل توبكات استضافات

ده فى حد ذاته تميز وابداع واعتقد الكل يشهد بذلك

وعامة كون انى استحق التميز او لا فده مش هيحبطنى او هيقلل من نشاطى

ومرسى لحضرتك

[كبريت]

ليه ماتمش تمييز ( كبريت ) مع انه من انشط الاعضاء الفتره الى فاتت ؟ والا ماتمش ترقيته بسبب اعتراض الاعضاء على عضويته ؟

بالأكيد مش هنحكم على استحقاق عضو عشان نظرة غيره
ولو كدا يبآ كنا مش هنكرمه خالص
أنا بتعامل مع عضويات و ip مش يخصني شخصياتهم
المسألة كلها زي ماقلت مفاضلة ..




هو تمام السؤال وتمام الجواب وان كنت متحفظ تماما مع احترامي له مش عشان التميز لأنه طالما مش حصل فلن ابحث عنه انا فقط يكفيني ادائي باغلب اقسام المنتدى وكفايه والفضل لله مؤكد حركة نشاط وابتكار برامج واعلى موضوعات فيها ردود والاهم من كل ده عندي حب الناس اغلى واعظم مكسب والتميز ييجي وقت ما ييجي الامر كله بيرجع للضماير وطالما الضماير مرتاحه وشايفه ان ده الوضع الصح انا كمان مرتاح للغايه ومؤكد ده ردي بتفاعلاتي وحضوري بالمنتدى والكل اكيد شايف ده



نايس توبيك أ مورشو وبحييك جدا
ناس ردود راقيه وان كنت متحفظ على بعض الفلسفه فيها مديرتنا ووردس

تحياتي للكل


كبريت

[SaMa.]

اكتر حاجه وحشه هنا الناس الل كارهين بعض
وبيدخلو ينتقموا موش ينبسطوا لو عرفتي تحددي دي
وكل واحد يخليه ف حالو
هتبقا فلة
واحلي حاجه انتي ي عسولة
ثانكس مورشو

[big bốss]

وهو أساسا من الأولياء !
أنا كمان شفت سيادة الولي دا وهو ماشي ع الميه !
أنا عندي مرارة واحدة ونفسي أكمل بيها الـ 30

هههههههههههه ضحكنى الرد دا

بس عجبتنى ردود د \ اسماء

كلها صريحه و مباشره من غير اى اصتناع

و عرضت حقائق مكناش نعرفها

و بالنسبه لهمسات هى نشيطه و تستحق

و عندها افكار حلوه بس ضغط نفسي عندها

ربنا يشفى مامتها

و مش هنفقعلك المراره يا دكتوره

بس انتوا مش تخلوا فشتنا عايمه برضو

نايس مورشو عجبتنى اسئلتك

بالتوفيق

[العاشق الذى لم يتب]

حوارجريئ وكبيروطويل ومفيد وعظيم
مش هقول غيرانى لاحظت اسماء
جواهاشوية تعب وقهروغيظ وضيقة
وخاصة من قسم الشكاوى وكترالرد عليها
اكيد مسئولية كبيرة
وارضاء الناس جميعهاغاية لاتدرك
ولكن لازم دكتورتناتستحملى
وتزودى طاقة الاستحمال وكظم الغيظ
وباللين والهدوء تمتصى غضب الغاضبين
كلامك معقول وراقى
واجابة بهدوء ومفيدة
فقط ادعوالله لك ولك لالادراة
وايضا لجميع الاعضاء ان نكون سوسامتسامحين منتوادين
ونبطل نشتكى بعض
ونروح ننشر أخبارنا وتفاصيل علاقتناومابيننا
من مشاكل او خلافات أو مودة ومحبة
نذيعهالمن نعرف أو لانعرف
مجرد ان يبث الشيطان بيننا الفرقة والوساوس
لازم نستحمل بعض
ونسامح بعض
وهنامش مكان محكمة هنااجتمعنا
نتعارف نتقابل نتوادد
وإن أختلفنا نبعد بالمودة ونحفظ ماكان بيننا
من مودة وأسرار
نجتمع لنرقى بالمنتدى ونتعلم ونستفيد ممانراه ونقرأه ونسمعه
وكم من مديركان هنا
وكم من ألوف من الاعضاءكانواهنا
وذهب الجميع
ولم يبق سوى السيرة الحسنة والكلمة الحسنة
شكرامرشو
شكرا اسماء
مودتى

[طبيب الهوى]

أخي موروشو


حلقتك اليوم من أقيم الحلقات التي قرأتها من قبل


من حيث الأسئلة المُباشرة الصريحة


وكذلك الردود المُباشرة والصريحة لأبنتي أسماء


أحسنت إدارة الحوار يا مورشو


وكذلك أبنتي أسماء أحسنت الرد بفلسفتها الخاصة


والتي تروق لي دائِماً


أبنتي أسماء


في بعض الأمور كُنت أجهلها وعلمتها اليوم من ردودك


أشكرك كثيراً عليها وأحييكِ على ردودك كَكُل


تحياتي وودي وورودي


أبو عصام

[.Lamar]

حلقة قوية اخى

واجابات احس يكسوها قليل من الحدة

ربما من ضغوط مسئوليات الادارة

اتفق مع اجزاء و اختلف مع اخرى و اولهم همسات

و اختلاف الرد لا يفسد للود قضية


كل الشكر اخى

دمت متميز

[الملكة كيلوباترا]

انا مش عارفة اقول ايه بعد اجابات الادارية المميزة اسماء
من احسن الحلقات اللى شوفتها اليوم
ونتمنى تكريم همسات فوق القمر فى الفترة القادمة بااذن الله
ونتمنى ايضا نشوف اعضاء يتميزوا فى الفترة القادمة
ومافيش اى ظلم من ناحية الادارة ابدا

[احساسى صحيح]

انا ليا بعض الملاحظات اتمنى تقبلها بصدر رجب
اثناء البرنامج الانتخابى انا طلبت اثناء توبيك النقاش فى برنامجى للمتحدث
ان الاداره تنتظر حتى يتم اختيار متحدث يشارك مع الاداره فى الاختيار
ويحمل عنها بعض المسؤليه ,,
انا متهيئلى لوكانت الاداره إستمتعت لرأيى وإتأخرت حتى إنتهاء التصويت على إختيار المتحدث
كان ممكن تلافينا بعض الاثار إللى ظهرت بعد إعلان التكريم ..
حضرتك ذكرتى ان من ضمن وظيفة المتحدث المشاركه فى التكريمات وترشيحات الاشراف
يبقى إزاى انا هشارك بعد اعلان التكريم والترشيح
لو ردك الاشتراك من الفتره الجايه يبقى غير مقنع
لأن انا لا اعلم متى هيكون فيه تكريم تانى وانا مدتى محده بـ 45 يوم فقط ..

بعد إنشاء قسم المتحدث وضِعت مثلى مثلكم فى حل مشاكل وشكاوى الاعضاء
وعذرتكم فعلا لأنى شاهدت اشياء عجيبه لن اخوض فيها
ولكن بالمجمل هناك سلبيات كتيره جدا فى عدم الاهتمام بالرد على الاعضاء بطريقه إيجابيه
وإعطائهم حلول او ردود من خلالها إنهم مش ياخدوا فكره سلبيه عن الاداريين
المسئله انا اراها بسيطه وشاركت فى حل بعضها وتحتاج فقط للاهتمام وبعض الود
والانصات للعضو حتى ولو كان ثائر لأن مهمة الادارى الاحتواء وليس التذمر ..

يمكن انا عندى تباين فى الاقتناع ببعض الردود من حضرتك
ان فيها ايجابى وفيها سلبى بس بالعموم المفروض اننا نتخطى تلك المرحله
والاهم نسمع لبعض ونرد على بعض علشان نقدر نزرع الثقه بيننا
وربنا يوفقكم لخدمة الاعضاء
شكرا د اسماء للتوضيحات
شكرا مورشو على تفاعلك القيم