مجموعة :: قولي عليا (زجل )

[اشاعة شمس]

قدرت اكتب كلام متقال
ولو بالوزن تقله جبال
صحيح الكتف يتحمل
وانا شيال ...
وقولت خلاص هتتعدل
لقيت الحال علي ده الحال
قاعد فاضي ومش شغال
ولا مشغول
فقررت اخش في علاقة
حبالها تطول
يعدي العمر وبيجري
وانا فاضي عامل مشغول
ويوم اخصمها واصحلها
ويوم نومي بيغلبني
وتيجي الدنيا اشقلبها
فتتشقلب وتغلبني
وتفلت ايدي وتسبني
وانا فاضي ومش شغال
علي ده الحال بقالي كتير
زهقت خلاص من التغير
ونفسي اثبت علي علاقة
حبالها تطول
على ده الحال
قدرت اكتب كلام متقال
صحيح الكتف يتحمل
وانا شيال
‫#‏أنا_شيال‬‬‬‬‬‬‬‬
‫#‏محمود_ابو_العنين‬‬‬‬‬‬‬‬
8/2/2015


الدكتورة ....
فاكرة عشان هتكوني دكتورة ...
وعشان حلوة وكمان امورة
وانا غلبان ويا دوب مستورة
يبقى تسيب ابن المنصورة
وبتهدمي حبي الاسطورة
طب والله لامسح رقمك واقطع بأيدي الصورة
وانتي هتيجي وتبكي عليا هتجيني زي الشطورة
طب والله انا كنت بحبك بس انتي غبية وانعورة
مقدرتيش تفهم احلامي
وكل ما اجي اكلمها تقولي
أنا بكرا هبقى دكتورة
***
اها يانا يا ابن المنصورة
***
شهدات بالكوم والالوان
وشـــــبــاب علطان في كل مكان
عملت اية شهدات واهمية
لفوها في قرطاس طعمية
او عملوا منها ارجوز
يضحك يلعب يضرب بالجوز
وشهيد في ميدان التحرير مات
ولا حد راح شاف ابوه ولا قالو لأمه سلامات
***
اها يا بلد خربانة ودقة
وعيال بتهيس حلبوقة
وعيال بتشيش في الغرزة
والشعب تمالي غلبان
علشان حرية انسان
وعشان دكتورة اسنان
بتبيع قلبي الحيران
انا ناقم علي كل الدنيا
***
اها يا بلدي يا شيش بيش
ملعوبة يا حبة ملاطيش
عايشن كده علي التنتيش
بتقولوا في شعارات وهمية
حمدين وبرادعي وعموره
خدوا كلمه من ابن المنصورة
ما تسيبوا بلادنا في حالها
دا بلدنا حزينة ومقهورة

مصر خلاص بتضيع يا ولاد
يلا نفرق شاي وموغات
يمكن تولد شعب جديد
يعرف يتحدى البشاوات
*****
اعلامنا شعاره السبوبة
والشعب بيموت علي امبوبة
والبنت عمرها 30 ويعيني لية مش مخطوبة ؟
وشبابنا بيضرب في حاجات
واحلامه صبحت منكوبة
بتزيق من وضع بلدنا
ويقولوا اسمعوا يا ولادنا
نسمع مين سبونا في حلنا
ضيعتوا حتى شبابنا
اها يا سلام لو نتجوز
وتحفظوا لينا علي بلدنا
والناس بتقول شاعر بيهيس
طب والله كلامي كويس
واسئل نفسك يا ابن بلدنا
عجبك حالنا ... طب دم ولادنا
انا مش قادر افكر فيها
لما حبيتي اللي مربيها
علشان هتكون دكتورة
تمسح اسمي من الصبورة
وتزحقلني كده بصبونة
***
طيب ماشي يا بلد الشهدات
هفضل اكتب كده في حاجات
وهعلمكم ان الاصل اجمل من الصورة
وان الدنيا مش بشهادة
الدنيا مواقف رجالة
بتحافظ علي بنت بلادها
وتحافظ علي دينها وبيتها
مش محتاج اتكلم تاني
اصلي بهيس ما انا وحداني
الدكتورة بتبعني عشاني
انا متعلم تحت السلم
وهي خلاص بقيت دكتورة
****
حسني مبارك ظلم الشعب ...
كان نفسي اتعلم في الغرب
بس يا عيني ودوني مدرستي
وادوني كتابي وكراستي
حصة رسم وحصة كميا وحصة احصا مع العاب
واتخرجت بعد الجامعة
اعرف اكتب وأعرف واقرا
واتوظفت وظيفة كبيرة
العب بنج والعب طولة
وحياتي بتضيع في مقولة
وحبيبتي بقيت دكتورة
مابقتش عارف اكلمها
حاسس انها بعدت عني
اصل بلدنا بلد شهدات
ولا بتعبر حد شريف ولا شاب نظيف ولا حتى دماء الشهداء
اصرخ عيط صوت نعر طبل زمر
اعمل فيها كمان متعور
انت يا مصري هتفضل عايش علي الاوهام
الحرية شعار بنقوله
بس الواقع كلام في كلام
عاوز اقول كلمة اخيرة أصحي
يا شعب انا داخل انام !!



اه صحيح الشعر اصفر
والعيون لونها عسلي
والبياض مالي الخدود
والشفايف لونها بمبي
والجمال عدى الحدود
بس انتي اصغر من انك تكسري ياحلوة قلبي
قلبي اللي ياما كتب كلام للعاشقين
ملفوف في عقد الفل والياسمين
يده دوا للمجروحين
ف يطيبوا من مرض الهوا
وغدر الحبيب
وفي النهاية انا قلبي كان كبير عليكي
وكل شيء قسمة ونصيب

كنت سلبي
كنت واجع حتي قلبي
كنت نفسي تبقي ليا
واكتشفت بعد فترة
اني ضحية
يعني في نهاية الحكاية
كنت سلبي
كنت بكسب كل حاجة
بس يوم ما جيت خسرت
خسرت قلبي
كنت سلبي






أنا مسافر
أقولك أية . وأحبك لية . يا بنت الاية يا بيعاني
وكم من عمري ضيعته علي أوهامك
وكم من حلم حققته عشان أحلامك
وكم من دمعة من عيني عشان أحزانك
وبعد ده كله بيقولوا . أعيش خدامك
***
عشان حرية توصلك يموت ألف شاب وشاب قدامك
يقولوا شهادئك الابطال .. وبيموتوا بأسم الحب علشانك
قوليلي يا أمي مين ترضى تقف في مكانك
تشوف أولدها بيموتوا قدمها
ولا تغضب ولا تصرخ
ولا تحمي عيون أولادك
وناس تركب علي أكتفهم الطاهرة
وسرقوا منهم الثورة
وأنتي واقفة بتشاهدي كما الصخرة
يا شيخة خلي عندك دم !
دا كم من شاب هجروكي وسيبينك بسبب الدين وشيلت الهم
وخيرك للي سرقينيك *** ويا ريتهم في لحظة غدر حميّنك
وفي الاعلام والقنوات يبعوكي ** وقت الثورة يخنوكي
وكم من أبن سيبينك ** مسافرين لأرض الغير وكرهينك
خلاص همشي وهنساكي *** وهقتل كل لحظة حب كنت بعشها وياكي
لكن عمري ما هنسى الأهل والأصحاب ولا الشهداء
دمائهم لسة في ترابك علي أرضك
خلاص ماتوا بيحموكي عشان شعبك .. عشان حرية توصلك
ومالأخر خذلتيهم ** وحتى القتلة سبتيهم
أقولك أية انا معبي ** ولا قادر أداري عليكي وأخبي
بقولك أية يا بيعاني ** أنا مسافر وبطلب منك أنسيني وأنساكي
ومهما هغيب هرجع ليكي من تاني
أنا عارف وفي الأخر هقول أسف
عشان روحي بتحتجلك
نهيتي هتبقى علي ايدك ** تضميني بكفن أبيض
وقبري هيبقى في ترابك ** يصلي عليا أحبابك
وأخر لحظة في الدنيا ** وقبل القبر بثواني
تسمحيني وتبكيني وتنزل دمعة من عينك
تضميني في ترابك ** وتخديني في أحضانك
تقولي تعالى يا ولدي أنا أرضك أنا وطنك
ولو تكرهني من قلبك ** أنا بحبك أنا بحبك
******
انا مسافر
** تعيشي يا مصر يا بلدي يا أم الدنيا **




انا مش مع الاخوان
ولا ضد الكلام عنهم
لكن لو ثورة للاسلام
انا هكون واحد منهم
دا دين مش لعبة يا خوانا
نبدل نارنا بالجنة
ولا هقبل في يوم تفويض
يكتفني بدرع حديد
تروح السكة ويانا
يأما تكون في سجن حديد
انا بتبرأ لرب الكون من الفرقة
من الاخوان من الجيش من الشرطة
من النور من الوفد من المستقبل اللي اتهد
ومن صرعاتكم علي السلطة
بدم شهيد من الجيش من الشرطة من الاخوان من الفقرا من الاعيان
نسيتوا انه كان انسان
بيحلم انه يوم يفرح
نهاية القول
انا مسؤل علي نفسي
ولجل كلامي يبقى صريح
وواضح للي سمعني
لانـ أخوان ولا جيش ولا شرطة
ولا وفدي ولا سلفي ولا صوفي
وأه لو تعرفوا ظروفي
ولو تهوتوا في وصفي يوم
انا مصري
انا مسلم انا عربي انا مظلوم
ولو شقيتوا عن قلبي
تلقوا اسم مصر هناك
وشهدائها حوليها بيتسلوا
دموع عيني بتسقيهم
حنان قلبي يدفيهم
ونور قلبي حوليهم
وشوشهم كلها نور
هنا في قلبي مافيش سجان
ولا فيه سور
ولا شيخ يكفرهم
ولا ظابط يموتهم
مفيش بينهم فراق هنا في قلبي
مفيش دا مات عشان اخوان ودا مات عشان جيش ودا مات عشان شرطة
عشان اخرج من الورطة
انا سامع دلوقتي
هنا في قلبي
و كل شهيد بيقول بصوت عالي
انا مصري
أنا عربي
انا مسلم
انا انسان
انا انسان
‫#‏انا_مسلم‬‬‬‬‬
‫#‏محمود_ابو_العنين‬‬‬‬‬

كنت بغير
غيرة أعمى
بس الاعمى مسيره يشوف
أصل نصيبي ديما غامض
كله مطابات كله ظروف
أسمع مني أعمل معروف
فاعل خير
كنت بدور ع التغير
و كنت بغير
فجأة لقيت نفسي ف دوامة
بكره ناس حوليها ياما
وبعلمها بأيدي علامة
أني بغير
أيوة بغير
من كل صحابك
مش اهانات والله جنابك
مش تقليل من ثقتي في حبك
هو في حد يقلل منك
يجي يخبط يوم علي بابك
يطلب ايدك ؟
تحملي اسمه
يحلم ان ولاده معاكي
جسمك يبقى ملامس جسمه
بس الغيرة دي طبع في دمي
يعني رجوله
يعني لحد اليوم علي امي
لسة بغير
واللي يقولك سابك لية
قولي عليا كان بغير
مستحملش كلام الغير
ولا اقولك قولي عليا
فاعل خير

تحياتي

واشوف وشكم بخير

[أميرة محمود]

حلو موضوع الدكتورة دا
ابداع عجبتنى المجموعة كلها
سلم القلم

[ساحر الأحزان]

كلمات زجلية جميلة

اخى اشاعة

وتعبيرك فيها باسلوب زجلى ساخر

زادها جمال

[السفيره عزيزه]

اتنين بس ال قدرت اقراهم واشهد انهم
جمال جدا والفكرة سهله وواضحة.
بس يعنى لو اتعرضوا على اقوات متفرقة
كان احسن ودي وجهة نظري.

دمت بخير ورقي
السفيرة

[Sea Pearl]

مش قدرت اكمل التوبيك مع ان قلمك رائع
بس لو على توبيكات منفصلة كان افضل
وكل خاطرة اخدت حقها
عجبتنى نظرتك للحياة واللى احنا عايشينه
يدوم التميز
فى انتظار جديدك

[a7med -3del]

عشان اكون صريح معاك انا قريت دخلة دكتورة واول حوضوع لاني معنديش. الصبر. اكمل لاني بمل حتي من نفسي كل موضوع لوحده حكاية لكن منفصل،مكن .ينفع تظلم كلامك كده
انت متمكن تحياتي

[العاشق الذى لم يتب]

جميل وزجل راقى
ومضمون اجمل
سلمت