فرحة في 2015 شوية فضفضة

[اشاعة شمس]

السلام عليكم

اوقات كتير بنفكر في حياتنا علي اي مسار هي بتروح
والنهاردة انا حابب افضفض معاكم شوية
لعلها تكون الاخيرة ليا في المنتدى هنا

اولا خليني ابدي اعجابي بفكرة المنتدى واسلوبه
وفكرة اللايك اللي مأثرة فيا جدا ومحبباني في المكان
جميل جدا ان لما يعجبك موضوع تعمل لايك وجميل جدا لما يعجبك عضو تبعتله رسالة تقيمه فيها تشكره او تهنئة علي موضوعه
والاجمل انك تكون داخل المكان ده لانك عارف ان فيه شخص كان عزيز عليك
شخص بتعتبره كاتب ماهر بيعبر عن احساسك
مع انك ممكن تكون مفيش بينك وبينه اي تقارب او معرفة حقيقة
برغم انك محولاتك معاه توجت كلها بالفشل
برغم انك كتبت عنه وكتبت له كل حاجة ممكن تغير شخص
بس جميل اوي انك تعرف حقيقة مهمة في حياتك عشان ترتاح

تغير الاشخاص اصعب من نقل الجبل

يعني تقدر تنقل جبل من مكان لمكان تقدر تهدم جبل بقوته وعظمته

لكن صعب تغير شخصية انسان من شيء الي شيء الا لما يكون التغير نابع من جواه

صحيح انا حولت بس فشلت

ودي كانت تاني مرة افشل مع انسان وثقت فيه
المرة الاولى كان بيتظاهر انه عشاني هيعمل اي حاجة ( لانه كان واثق اني شخص كويس )
ومع اولى موجهة حقيقة ولما تفكر صح عشان تخلي العلاقة حقيقة تكتشف ان كل شيء بيظهر علي حقيقته
تكتشف ان الدنيا بتظهر ليك حاجات كان صعب تصدقها
زي ان الشخص اللي وضعت ثقتك فيه ووضع ثقته فيك
حلف بحايته انه هيكون معاك
تكتشف انه بيتخلى عنك وبيسيبك وتجيلك رسالة اخيرة منه
( احنا انتين الظروف جمعتهم ببعض بس مستحيل يكونوا لبعض ابدا )

فتفضل تنسى وتهدم كل حاجة جواك فجأة وعلي اعتاب 2015 يظهر شخص في حياتك اجمل من كل حاجة قبلتها في حياتك
متحرر من نفسه
طيب اوي
جميل جدا حتى في اسلوبه

فتقرب وتقرب وتقرب لحد ما تدمنه وتنسى كافة الفوارق اللي بينكم

فتكتشف بعد فترة
انه بيتغير في ملابسه في اسلوبه
فتقول من جواك ( هييييييييه ) هو ده اللي كنت بدور عليه
فتجري بسرعة وتحاول تعمل حاجة صح
فتتصدم لتاني مرة
بس المرة دي لازم تتعلم الدرس كويس

وتعرف ان اختياراتك مكنتش غلط بس الظروف مش مساعدة

ظروفك المادية هي اللي بتخليك تضعف
نظرتك لنفسك مش مجرد شخص فقيراو شخص بيبدأ حياته
نظرتك لنفسك انك مش هتاخد شيء الا وربنا كتبه ليك

الغريب اني في السنوات الاخيرة بعدت عن كل الاصدقاء
وبقيت ببحث عن شخص واحد اشيله همي ويتولى امري
اتكلم معاه

( يعني لو بتتكلم يوميا مع خمس اصدقاء كل صديق بتكلم 30 دقيقة مثلا
المجموع ساعتين ونص

انا لاء مش محتاج كل الاصدقاء دول محتاج شخص واحد يسمعني ويكلمني الساعتين ونص

هههههههه انا عارف انها حالة غريبة
يمكن توحد عزلة
يمكن يكون خلل نفسي او ازمة ثقة او احساس زيادة عن اللزوم
الشخص دا لازم يكون له شروط

بيخاف عليك
بيحبك
بيثق فيك
بيتمنى وجودك في حياته
بيحسسك بالامان والثقة
بيحسسك بالاستمرارية ورغبته في وجودك
مش بيكدب
بيخاف علي زعلك
بيغير عليك وبيخاف من غيرتك
بيحب هزارك
وبيسمع كلامك
بيطيعك وبيحبك لانه عارف انك مش هتطلب منه حاجة خارقة للعادة

في الاول والاخر اهله يكونوا شايفينك شخص مناسب
فرحنين بيك
عارفين انك راجل وانك تتحمل مسؤلية وده الاهم
مش بصين لفلوسك كام ولا بيسألوك عندك كام في البنك ولا عندك ورث ولا لاء
هما بيبصوا لاصلك الطيب بيسئلوا عن عيلتك

هههههههه انما تخيل ان فيه ناس اول حاجة بتسئل عنها راتبك كام
وعندك ميراث ولا لاء
وبعدين بقى اي حاجة تانية

صحيح انا عارف ان فضفضتي غريبة شوية
مرتبطة بشيء واحد
ودا يرجع لكوني معنديش صحاب فقدتهم كلهم في ازمات الحياة ومع مرور عقارب الساعة
لما بقبلهم بنضحك ونفتكر ايام زمان ونهزر ونسلم علي بعض وناخد بعض بالحضن
بس قضاء وقت كتير في الحديث اسف هناك شخصية واحدة هي من تستهواني

انا عارف ان ده عيب كبير جدا في شخصية اي انسان
بس هي دي الحقيقة ولية الهروب منها

تستمر الاحاديث بداخلي
يا ترى عام 2015 هيشهد شيء غريب في حياتي زي ما شخص ما دعا لي اني في 2015 حياتي هتتغير وممكن ارتبط
بالفعل بعد الخروج من ازمات الحياة كان لبد يكون فيه تغير
صحيح ماسعتش له الا بعد فقدان الثقة في كل اللي قبلتهم في حياتي

واي شخص بيخسر انسان عزيز عليه وبيكتشف انه مقدرش يكمل معاه بيكون هناك اسباب

1- مقدرش يفهمك
2- فهمك بس مقدرش يستحملك
3- مقدرش يكمل معاك
4- شايفك شخص سيء
5- نظرته ليك اتغيرت

وحاجات كتير اوي ممكن تخليك تسيب شخص في وسط الطريق
الجرح والاهانة والتكبر والتفوه بالفاظ
كل ده ممكن يدفعك انك تبعد عن شخص وتسيبه

ف النهاية اقدر اقولك
انك هتقابل ناس كتير في حياتك
منهم اللي هيمدح فيك
ومنهم اللي هيزمك
ومنهم اللي هيتجاهلك
ومنهم اللي هيقدرك

متخسرش اللي هيقدرك
ومتهتمش باللي هيتجهلك
ومتفرحش باللي بيمدحك
ومتزعلش من اللي هيزمك

اوعا تعليق قلبك بشخص وتقول هو ده حياتي وعمري وكل كياني
لانه ممكن في يوم وليلة يتغير
اوعي تحب واحدة وتفكر فيها وكأنها حياتك لان كلامها ممكن يتبدل
اوعى تقول انت عمري وانت قلبي وانت كل حاجة ليا
قولها علي سبيل المجاملة بس اوعا تخليها واقع لانك مع اول موقف وحشة في حياتك من الشخص ده هتتعقد والدنيا هتسود في عنيك

بص خليك معلق قلبك بربنا صحيح حب خطيبتك وحب مراتك
بس اوعا تفتكر ان الحياة بدونها هتنتهي
اوعي تغرق في بحر الوعود والعهود والمواثيق والكلام المعسول

اوعا تفتكر ان اي بنت لما بتقول كلمة انها ممكن تلتزم بيها طول الحياة
لا والله ممكن متقدرش توفي بوعودها ممكن تكون شخصيتها ضعيفة بتقول كلام كبير اوي اكبر من اللي هي تقدر تنفذه
اوعى تعلق امالك علي وعود شخص تاني
خلي امالك معلقة بالله رب العالمين

فوق قبل ما تندم وتحزن وتحلق شعرك او تتعقد
فوق قبل ما تكتشف ان الشخص اللي المفروض انه يشد علي ايدك ويقويك هو نفسه اللي بيضيعك


بس عاوز اقولك حاجة حتى لو كل ده حصل
اوعا تفقد الامل في ربنا
اكيد هيعوضك باللي يصونك ويحفظك في نفسه
ويوطي علي ايدك يبوسها ويقولك انت حياتي وعمري ومش محتاج من ربنا غير انك تكون معايا
مش هيبص لفلوسك هيقيمك كأنسان وانت قيمتك كبيرة اوي ميعرفهاش غير انسان بيوزن الناس باخلاقها مش بأموالها

هتكتشف بجد ان كل خياراتك اللي انت حولت تتمسك بيها انها كانت غلط وان ربنا كان عينلك الاحسن والافضل
كان مستني بس الوقت المناسب ليك
يمكن كنت محتاج تجربة او اتنين عشان تفهم
يمكن كان بيهيئك ويقويك

عشان تعرف ان الدنيا مش فلوس ولا شكل جميل
عشان ترضى بقضاء ربنا ليك وقدره
عشان تفهم ان اختيار ربنا ليك احسن من اختيارك
عشان تنضج وتكبر وتفهم وتتغير متكونش شخص سطحي وهوائي
عشان تقيم الناس صح ويقيموك صح

عشان تحب وتتحب بجد مش كلام ومشاعر إلكترونيا
لاشخاص انت مشوفتهمش
وممكن تعيش وتموت وانت متعرفهمش

ممكن تكون في سوق او مشوار او في بارك وتقبلهم بس متعرفهمش ولا هما يعرفوك ممكن عنيهم تيجي في عنيك بس متحسش بيهم ولا هما يحسوا بيك

اوعا تحدد قدرك بأيدك
خلي قدرك هو اللي ربنا يكتبهولك ويكون نصيبك


الرسالة دي صعبة وملخص حياة والله
واللي هيفهمها صدقني هيرتاح
مع ان فيها غموض كبير بس فيها ملخص حياة شاب
علي وشك 30 سنة
ملخص انسان كان بيبحث عن معالم انسان
بس للاسف اكتشف ان مفيش غير خزلان
ضياع
استهتار بالمشاعر
اوهام معبئة في قلوب خاوية بتوعد وعود براقة تكتشف في النهاية انها سراب مميت
وتفضل تجري وراه لحد ما تكتشف في النهاية انك رجعت محمل بكفيك تراب

ولكن اوعا تحزن واوعى تنسى ان التراب اللي انت شايفه ملوش قيمة في حياتك
هو نفسه اللي اتخلق منه الانسان
فتأكد ان ربنا هيرزقك الافضل

فلا تيئس من تراب الحياة
في النهاية لا يسعني الا ان اشكر الجميع علي الفترة الرائعة اللي قضتها معاكم في المنتدى المميز ده
كمان اشكر الانسان اللي دخلني هنا للمنتدى
وبشكر كل الناس اللي تواصلم معايا وسئلوا عني في غيابي
بشكركم وبتنمالكم حياة افضل باذن الله

مع خالص تحياتي ليكم
وبالتوفيق
اشاعة شمس

[السفيره عزيزه]

اولا اقول طيب ليه تسيب مكان انت بنفسك قلت انه مميز.
وكمان انت الاخر مميز وكتاباتك كتير مميزة ايضا
وننتظرها لانها متنوعة وسلسة وتخاطب النفس مباشرة.
وبعدين الفترة دى بالذات ما احد يبعد رجاء لان التواجد قليل
الامتحانات بئه وكده يعنى...
اما عن النصايح الغاليه التى تفضلت وقلتها وصدق النية
واضح وصريح فيها وهو تجنب الوقوع فى ما لا يروق بل يوجع النفس.
قلب طيب اراه يريد الخير والنصح والارشااد الى الخير..
بهذه النية تثاب اخى خيرا ..والذى يمر من هنا اكيد فى شيء وافق
تجاربة هو ايضا ...ربى يقسم للجميع الخير حيث كان.

نتمنى ان تظل معنا وبيننا دوما وان اراد الله غيرذالك
نتمنى لك الخير وندعوا لك بظهر الغيب.
نكن لك كل الاحترام فقد وجدناك اهل له وزيادة

دمت بكل الخير والسعادة
السفيرة

[رنا 20]

مشكوووووووور

[ساحر الأحزان]

انت شخص فاضل اشاعة

ووجودك بينا بيسعدنا

وتلك هى مراحل الحياة

طول ما انت ليك عمر

حتقابل وجوة كتيرة ومواقف كتيرة

بحياتك

وطالما احنا حبينا المكان

فصعب اننا نسيبة ونتخلى عنة

ودوما تمسك بخيط الامل

حتى ولو خيط رفيع

[™Amiliya]

انت منورنا اخويا محمود بمواضيعك الشيقة والي فيها رسائل مهمة للجميع

تحياتي ليك ولوجودك المثمر بنا

[Stop Ana Eltop]

مش عارفه ليه رغم اني مريت بظروف صعبه كتير في حياتي بس لسه متأكده انها من اختياري
اي شخص وجعني او جرحني خاني او بعني كان اساسه من اختياري
يعني لو قيست الكلام دا عليك انت اخترت الاشخاص الغلط في حياتك الي بصوا لفلوسك مش لذاتك انت بنفسك الي اخترتهم يدخلوا حياتك
30 سنه كتيير اوي وفرصه عظيمه انك تحقق جزء كبير من احلامك
ومتعلقش نفسك باشخاص اوهام
او تدخل حد غلط في حياتك حفاظا علي ماتبقي منك ومن مشاعرك
فرصه لتجديد حياتك اجمع

لو شفت الرد دا فكر تاني في امور حياتك
وابدء انك تخرج اي شخص غلط من حياتك حتي لو عزيز
وادخل تااني هنا بقن
بالتوفيق دايما

[اشاعة شمس]

اقتباس المشاركة الأصلية كتبت بواسطة stop ana eltop مش عارفه ليه رغم اني مريت بظروف صعبه كتير في حياتي بس لسه متأكده انها من اختياري اي شخص وجعني او جرحني خاني او بعني كان اساسه من اختياري يعني لو قيست الكلام دا عليك انت اخترت الاشخاص الغلط في حياتك الي بصوا لفلوسك مش لذاتك انت بنفسك الي اخترتهم يدخلوا حياتك 30 سنه كتيير اوي وفرصه عظيمه انك تحقق جزء كبير من احلامك ومتعلقش نفسك باشخاص اوهام او تدخل حد غلط في حياتك حفاظا علي ماتبقي منك ومن مشاعرك فرصه لتجديد حياتك اجمع لو شفت الرد دا فكر تاني في امور حياتك وابدء انك تخرج اي شخص غلط من حياتك حتي لو عزيز وادخل تااني هنا بقن بالتوفيق دايما

شوفت ردك وعجبني جدا ودخلت تاني عشان اعلق عليه

علي فكرة انا بعمل كده من زمان اوي
وبحاول اخلي حياتي ميدخلهاش حد خالص
بس هو فيه حاجة انا مؤمن بيها

قدر ربنا اكيد خير .. واكيد اختياراتك الغلط دي بتخليك تكتسب حاجة جديدة في الحياة .. بتفهم امور جديدة .. بلاش كده
خلينا نقول بتخليك - بتأكد عندك شيء ...

غيابي كان بسبب ظروف صحية مش بسبب الموضوع ده بس الحمد لله انا دلوقتي احسن بفضل الله
وكل ما هلاقي وقت هدخل وهكتب ان شاء الله لجميع الاعضاء
وبشكرك وبشكر كل من رد في الموضوع وتحياتي للجميع

[Stop Ana Eltop]

لاء طبعا دخل الناس حياتك وناس كتير اوي بس ميعدوش القشره البرانيه
علاقات سطحيه اوي وميدخلش الاعماق الا الي اثبت انه حقاا يستحق يدخل

الحياه حلوه اوي احلي من اننا نعيشها في عزله
اه بيعلمونا الف درس ودرس بوجعهم بس مشاعرنا اغلي من دروسهم
وقدرنا بيتغير بمقدار تغيرنا
نفسنا ربنا مابيحملهاش الا وسعها


ربنا يشفيك ويعافيك
وهدخل تاني اتابع كتاباتك بقن
بالتوفيق داايما