أغرب علاقاتي

[المجهول عاد بالسعاده]

رغم كل الأسباب القاطعة اللي مانعانا نكمّل
وخلّت فكرة إننا نرجع لبعض مستحيلة ومرفوضة من الطرفين
إلا إن دايماً.. دايماً
في حاجة رابطانا ببعض
بتخلّينا نراقب بعض من بعيد
ونصطاد أخبار بعض..
يمكن كل حاجة بينا باظت.. حتى إننا نبقى ذكرى جميلة..
كلنا بنغلط.. عارف..
وهي كانت دايماً تقولي: "كلنا بنغلط يامجهول وحّد الله"
لكن في جميع الأحوال..
مهما كان، برضه إحنا كنا عِشرة، وفي ذكريات كتير بينا..
لما اتقابلنا أول مرة قدّام الحُصري في أكتوبر
ولما خدتها سينما على بابا، كان فيلم الإرهاب والكباب
وكانت منبهرة جداً بدور عادل إمام
أول مرّة تدخل الرحاب في حياتها كانت معايا
مش بعايرها والله بس هي اتكلمت في الحوار ده كتير على صفحتها يعني
لما كانت مش عارفة تاخد قرار في موضوع الحجاب
أنا اللي قولت لها فاكس عشان هتقلعيه بعد 3 ساعات
حتى بالأمارة ضحكت وعملت صوت كده وهي بتضحك
ودلقت البيرة ع الطفاية اللي كنت بنضف فيها البذر
كانت المرّة الوحيدة اللي عرفت تروح فيها دهب
كانت بتخاف من الكماين وتمسك في دراعي جامد
وأقولّها يا بنتي متخافيش.. مصر اتغيّرت بعد الثورة وكده
صحيح أنا علّمتها حاجات كتير
حاجات كتير هتفضل عندها بإسمي..
محدّش هيعرف حتى ينسخ منها حرف..
حتى الواد إبن صاحب المول إلى جنب بيتهم بيغير مني..
بس برضه هعمل بأصلي..
لإن أنا أساساً من بلاد الله الواسعه
وأقولّها رمضان كريم

[Lamees]

علاقاتنا بيحكمها القسمةوالنصيب
فضفضة حلوة
يتم النقل للقسم المناسب

[reda galal]

ممتاز ما كتبت

فى انتظار جديدك

[ساحر الأحزان]

احنا ما فهمنا برضة يا عم المجهول

انت دلوقتى لسة مستمر معاها

ولا العلاقة انتهت

لو حصل شىء وعكر صفو العلاقة

فبحكم الحب الى بينكم صلحوها

ورجع المياة لمجاريها

ربنا يوفقكم

[خارج عن القانون]

فيه حاجه انا مش فاهمها
غريبه جدا انكم تدخلو سينما ويكون فيها فيلم الارهاب والكباب
الا بقا لو كنت دخلتو فى 92 وعلاقتكم استمرت لغايه بعد الثورة
فيه حاجه انا مش فاهمها

[Silver Flower]

أنتا السبب أنتا الي علمتها
على حسب ما فهمت