البروتين ؟؟

[esra2 mohamed]

قبل ما نتكلم عن الأكل اللى فيه البروتين..بس محدش سأل يعنى إيه بروتين؟!..أيوه عارف إنه نوع من أنواع الأكل..بس إيه اللى مخليه محتوى الأهمية الكبيرة دى وسط الأنواع التانية ولازم يبقى موجود فى الفطار والغدا والعشا..

يعنى إيه بروتين؟..

البروتين دا جُزئ كبير بيتكون من حاجة اسمها أحماض أمينية (اللى بيتكون منه البروتين)..ومجرد أما يدخل الجسم، يبتدى البروتين ده يتهضم ويتكسر ويتحول للصورة المصغرة دى اللى اسمها أحماض أمينية عشان يقدر يخش الخلية..

جسمك عبارة عن “مصنع بروتين”..

مجرد أما الأحماض دى توصل الخلية، يبتدى الجسم يصنع أشياؤة كلها من الأحماض دى ويحولها لبروتين ويستفيد منها الجسم من خلال:

• إنه يبنى الخلايا ويقويها ويصلحها زى الأنسجة اللى موجودة فى الجسم وتربط الأجهزة ببعضها وبتحمى الجسم عن طريق طبقة “الكيراتين” اللى موجودة أعلى الجلد وبرضو الضوافر..

• بيعمل مضادات الأجسام فى الجهاز المناعى..

• بيعمل إنقباض للعضلات “الأكتين” و”المايوسين” نوعين من البروتينات مسئولة عن عملية إنقباض العضلة..

• بيعمل إنزيمات عشان تسرع بعض العمليات فى الكيميائية فى جسم الإنسان..زى الإنزيمات اللى بتهضم الأكل..مثلاً إنزيم “ليباز” أو “Lipase” المسئول عن هضم الدهون..

• وبيصنع بعض الهرمونات زى الإنسيولين المسئول عن التحكم فى نسبة السكر فى الدم..

• وبيصنع “الهيموجلوبين” اللى بيشيل الأوكسجين فى الدم..

و فيه غير كده كتير جداً..البروتين دا مهم جداً..والمشكلة إنه مش بيتخزن فى الجسم زى السكر والدهون، فلازم نحصل عليه يومياً..بس البروتين ده عامل زى العربية لازم لها بنزين..والبنزين ده زى الكاربوهيدرات والدهون اللى لازم تكون بكمية معقولة فى أكلنا..

الأكل اللى فيه بروتين..

السمك بأنواعه وخصوصاً التونة والسردين والماكريل، والبيض، والفول أهم مصدر من مصادر البروتين النباتى، والخضار، والبقوليات (الفاصوليا والبليلة والشعير)، واللحوم والكبدة والجبنة، وعيش الغراب أو المشروم أو الفطر والمكسرات (اللوز والكاجو والسودانى)، والزبادى واللبن اللى خالى الدسم.

أهم حاجة متنسهاش..الوجبة الغذائية تكون مكتملة الأركان عشان ناكل صح ونبقى ناس صح الصح

[توحد ارواح]

بالفعل اهم حاجه نوعية الاكل
تسلمي اسراء ع المعلومات الجميله

[جبل عالي]

موضوعك قيم وبه شرح جميل
تسلم ايدك للإفادة الرائعة

[.Lamar]

طرح مفيد و معلومات قيمة

سلمت يداكى

بالتوفيق

[سارة سرسور]

ألف شكر حبيبتي
على المعلومة المفيدة
تسلمي