قواعدك العشرون لإختيار شريك حياتك المصون :d

[rony yaso]

1- ما تتعقديش من الجواز
2- الجواز حلو فما تتعقديش منه
grin emoticon
3- خلي ثقتك في ربنا كبيره وادعي بالزوج الصالح وانتي موقنه بالإجابة وما تتعقديش من الجواز
grin emoticon
4- ربنا موزع رزقه بالتساوي علي البشر فطبيعي جدا أن ابتلاءك ممكن يكون في زوجك ساعتها اتعاملي مع الموضوع زي أي ابتلاء تاني واصبري واحتسبي الأجر والثواب عند ربنا وما تعقديش البنات من الجواز grin emoticon
5- الجواز مش للخلفة وبس مش الهدف أبدا أننا نزود عدد الجنس البشري وخلاص
6-الرسول لما قال "تزوجوا فاني مكاثر بكم الأمم"..(حديث ضعيف) ماكانش يقصد اكيد إنه الهدف الوحيد من الزواج هو زيادة العدد ولا أن زيادة العدد في حد ذاتها المقصود بيها إننا نكون كتير وخلاص وإلا ما كانش قال في حديث "يوشك الأمم أن تداعي عليكم" :
بل أنتم يومئذ كثير ولكنكم غثاء كغثاء السيل يعني مش الفكرة ف العدد الفكرة في مدي تأثير العدد ده وتربيته وقوته
7-الزواج ميثاق غليظ وهو أحب الامور الي الله "ما بني بناء في الإسلام احب اي الله من الترويج"
الأسرة عبارة عن مجتمع صغير جوة المجتمع الكبير وحدة بناؤه
يعني لو عايزين المجتمع ينصلح لازم نبدأ باصلاح وحدة بناؤه والبداية بتبقي من أننا نفهم قدسية الزواج
8- مرة أخيرة بالله عليكي ما تتعقديش من الجواز grin emoticon
9- لازم ولابد تسألي نفسك أنا بتجوز ليه ؟!
بتجوز لمجرد إشباع رغبات معينة زي الأمومة أو تلقي الحب وغيرها
ولا بتجوز عشان حاجات أكبر من كده
تحديد الهدف هيريحك بعدين
10- قلبك تحافظي عليه كويس بابه مقفول بمليون قفل مش أي حد يخبط تفتحيله وتدخليه
عقد الزواج مش عقد إيجار ولكنه أشبه بعقد تمليك اللي هيسكن قلبك المفروض يعني هيسكنه مدي الحياه ففكري كويس قوي قبل ما تاخدي قرار الإرتباط بأي حد
11- مشاعرك بالإنجذاب لأي حد والإعجاب بيه مشاعر طبيعية ومحدش يقدر يلومك عليها بس بتفضل كلها مشاعر نابعة من القلب وقرار زي قرار الإرتباط ما ينفعش أبدا قلبك ياخده لوحده
لازم تصطحبي عقلك في رحلة الاختيار دي فمش أي واحد يقولك كلمتين حلوين يبقي هو ده ومفيش غيره
وهنا هتفيدك جدا خطوة تحديد هدفك من الجواز
12- مهم جدا تبقي عارفه نفسك كويس عارفة إنتي عايزه ايه وايه العيوب اللي هتقدري تستحمليها وايه العيوب اللي استحالة تعرفي تتعاملي معاها
ايه أهدافك وأحلامك وطموحاتك عشان مهم تكونوا متفقين فيها عشان يفضل الشغف مزين علاقتكو وعمر الملل أبدا ما يخيم عليها
فترة الخطوبه معموله عشان تعرفي البني آدم اللي قدامك كويس تبدأي تدرسي
مواصفاته عيوبه مميزاته وتاخدي وقتك في مقارنتها بالحد الأدني من المواصفات اللي إنتي محدداها مسبقا وعشان تعرفي تعملي كده بهدوء ركزي في الخطوة الجاية
13- الخطوبة خطوبة والزواج زواج grin emoticon
اللي اقصده أن كل فترة وليها خصوصياتها ومميزاتها
يعني..
14- في فترة الخطوبه من حقك تفسخي الخطوبة في اي وقت ما تستسلميش لأهلك لو هيجبروكي أنك تحسي بمسئولية كبيرة ناحية الخطوبة لأن الخطوبه ما هي إلا وعد بالزواج وده بيترتب عليه حاجتين
15- أول حاجه فيهم أن خطيبك ده ما يزال غريب عنك لسه مش محرم ليكي يعني ما ينفعش أبدا يلمسك أو تقعدوا في مكان لوحدكو مقفول عليكو من غير محرم ليكو
واسمعيها مني نصيحه ما تسمحلهوش يقولك كلام ما يقدرش يقولهواك قدام أهلك
16- حاولي علي قدر الإمكان تنحي المشاعر والقلب في الفتره دي وتحاولي تاخدي قرار الإستمرار مع الشخص ده بعقلك ما تصدريش قلبك عشان ف الفترة دي هيبقي سهل جدا إنه يتخدع
هيبقي قدامكو وقت كتير قوي تصدرو فيه قلبكو بعدين
من يوم كتب الكتاب لحد آخر يوم في حياتكوا مع بعض فمجتش ع اليومين دول يعني
17- تاني حاجة وهي نصيحة الرسول "أخفوا الخطبه"..وبالرغم من ضعف الحديث إلا أن مجتمعنا ما عادش بييفرق بين الجواز والخطوبة ف حتة الحدود بين الولد والبنت وحتة إنك مش من حقك تقولي ما استريحتش مش عايزاه
وعشان نحاول نتجنب الحته دي لازم نسمع نصيحة الرسول لأنك انتي نفسك قرارك هيتأثر بشكل كبير لو كل الناس عارفه انك مخطوبه وعملتي حفله كبيره واشهار وبتاع
مهما كان البني آدم ده ما ينفعش هيبقي القرار بالإنفصال صعب لأن هقول ايه للناس دي كلها وهضطر اقول عيوبه حتي لو مش عايز اتكلم
فاسمعي كلام الرسول وخلي الخطوبه علي اضيق الحدود
18-الصراحه مهمة جدا في الفتره دي مهم جدا حبة قوانين تتحط في الاول توضحوا بيها عايزين الفتره دي تمشي ازاي
19- يعني مثلا ممكن نتفق أننا في النهاية عايزين نبني أسرة سعيدة وطبيعي جدا أننا نبقي متوافقين عشان نقدر نبنيها وكوننا طلعنا مختلفين فده مش معناه أن في حد فينا وحش ده ببساطه معناه أننا بس مش متوافقين مع بعض وأن البني آدم التاني اللي روحه هتتآلف مع روحك وهيكملك موجود في مكان تاني مش هنا
فلو قررنا نفترق ممكن جدا نفترق بإحسان ويفضل الود والأحترام مش شرط نفترق بس عشان عايزه ازود الشبكة ألف جنية ولون النيش مش عاجبني آة عشان طنط مامتك غلطت في طنط مامتي !
20-
"خذوهم فقراء يغنهم الله من فضله"
اوعي أبدا أبدا تبصي للفلوس من حقك طبعا مستوي معين ما تقدريش تنزلي عنه بس مش الطبيعي أن ده يكون مستوي والدك اللي بقاله عشرين سنة مثلا بيشتغل ويتعب

منقوووووول للافادة

[.Lamar]

نصائح جميلة يا قمر

لو قراناها بتمعن اكيد هنستفيد

شكرا ليكى

ونورتى المنتدى

[rony yaso]

بنورك يا حبيبتى دى اول مشاركه ليا ويارب فعلا كلنا نستفاد

[.Lamar]

ان شاء الله تفيدى و تستفيدى

وبداية موفقة غاليتى

[توحد ارواح]

بالفعل نصائح وتوجيهات مهمة
تسلمي روني ع موضوعك الجميل
منتظره منك المزيد
نورتي القسم والمنتدى

[العندليب الاسـمر]

الحقيقة انه اصعب قرار ممكن الواحد ياخدة في حياتة

والحقيقة برضة ان القواعد ممكن تكون كاسترشاد شئ جميل

لكن الواقع كثيرا ما يفرض علينا شروطة الخاصة

تحياتي وتقديري لطرحك اختنا الكريمة

ونورتي المنتدي

[rony yaso]

اقتباس المشاركة الأصلية كتبت بواسطة توحد ارواح بالفعل نصائح وتوجيهات مهمة تسلمي روني ع موضوعك الجميل منتظره منك المزيد نورتي القسم والمنتدى

تسلمى على زوقك وتشجيعك

[rony yaso]

اقتباس المشاركة الأصلية كتبت بواسطة العندليب الاسـمر الحقيقة انه اصعب قرار ممكن الواحد ياخدة في حياتة والحقيقة برضة ان القواعد ممكن تكون كاسترشاد شئ جميل لكن الواقع كثيرا ما يفرض علينا شروطة الخاصة تحياتي وتقديري لطرحك اختنا الكريمة ونورتي المنتدي

بنورك ويسعدنى ىمرورك