الحلقه الـ 9 [في الملعب] مع الماجيك [ خاصه جدا جدا ]

[محمود الصاروخ]

..][ بسم الله الرحمن الرحيم ][ ..



احبتنا اعضاء وزوار منتديات بنات مصر - قسم الرياضة العربية والعالمية
اسعد الله اوقاتكم جميعا ويسرنا ان نطرح لكم الحلقة التاسعة من البرنامج الرياضي

[ في الملعب ]
اعداد وتقديم / محمود الصاروخ



هذه المرة جاء الاختيار لـ المدير العام صاحب الشعبية الكبيرة في المنتدي
ضيفنا العزيز والمحبوب الماجيك



إستمتعوا بهذه الاسئله والاجابات الخفيفه
ونرجو ان تحضى هذه الاستضافة بأعجابكم واستحسانكم



[ بسم الله نبدأ ]



- حبيب قلبي ياماجيك منورني ياكبير ومن زمان نفسي اعمل معاك حلقه مميزه
في البرنامج والحمدلله انك معايا النهارده وهستغل انا الحلقه دي وهسألك عن كل حاجه تخطرعلي بالك بما انك داخل الجيش وكده ومش هنشوفك كتيرف ناخد راحتنا بقن

أهلا بيك ياكبير معايا في الملعب

حبيبي امحمود من ايام الجيزه قشطه ي كبير
خليها ع الله بقى ويارب نعرف نوفي لان مليش اوى فيها مانت عارف








- هبدأ معاك ب كام سؤال كده بره الملعب
وان شاء الله اكون خفيف عليك انا والاسئله كده


يا باشا ولا يهمك
المهم متكترش الحموله داخلين ع كومسيون
ومش هتبقى مستحمله
الاسئله والاسايطه علينا
كده كتير وربنا

1- البطاقه الشخصيه اسمك وسنك وعنوانك ومخلص ايه والكلام ده يعني وبراحتك ع الاخر ؟

احمد
22 وشوية فكه == D
مصر_سوهاج_الدور التانى
خلصنا بكالوريوس تجاره ولله الحمد
متعرفش بقى فلتنا من بق الاسد ازاى
تاريخ الجامعه معروف بدكاترته وناسها العجيبه
بس احنا اتخلقنا للمهمات الصعبه ،، اه والنعمه

2- البدايه للماجيك في منتديات بنات مصر وماهي الصعوبات التي واجهها في مشواره هنا ؟ وهل كانت الاداره حلم من اول مادخلت المنتدي ؟

اخويا هو اللى جابنى هنا
والراجل مشى وانا كملت سبحان الله
البدايه كانت ف الالعاب طبعا ههههه
كنا شله كبيره ف القسم داا وبعدها خرجنا للمسابقات
وبدأت اندمج مع المواضيع التانيه والاقسام لغاية ما انت شايفنى كده ،،
انا مكنتش باحلم بحاجه ولا عمرى طلبت
لا اشراف ولا اعترضت ع تكريمات ولا تقييمات
ولا ف دماغي حتى اقدم الاداريين يقولولك
لان المنتدى مكنش هو الاول بالنسبالي وكنت ماسك مناصب ف اماكن تانيه من قبل بنات مصر ،،
كنت بتفاجئ بكل حاجه سواء تكريم او ترقيه
وحتى الاشراف جاتلى رساله بطلب من الاداره وقتها ووافقت وكنت مشرف ع الفلاشات
وللعلم دا القسم الوحيد اللى مسكت اشراف عليه
من تقريباً 2011 لاواخر 2014
مش فاكر بالظبط ومكسل ادخل اللوحه
كنت ممكن اتولى الفوتو معاه بس اكتفيت بالفلاشات
لان القسم دا اتعمله كيان وبقى زيه زي الفوتوشوب
بفضل ربنا واعضاءه والعبد لله والواد محمود ملك جبال
وجات بعدنا ايمان بقى عامله شغل حلو وربنا يكرمها دايما
ودا لغاية ما بقيت ادارى وشيلت نفسى من القسم
سيبت كل المسئوليه للى موجودين فيه بقى
ولاى حد عايز ياخد فرصة الاشراف ويتعامل ،،
اما الصعوبات فا ماظنش واجهتني اى صعوبات
ممكن ف البدايه كان فيه سيستم معين للمنتدى
فا دخلت للشروحات بتاعت صوت الاعضاء وقعدت ألف في اليوتيوب ولغاية دلوقت بالمناسبه بألف في المواقع وببص ع اى حاجه ممكن استفاد منها
اخوك شاطر وباعرف اتعامل الحمد لله مع اى تعطيل يقف معايا ،،

3- ما الفرق بين شغل الماجيك قبل الاداره وبعد الاداره ؟

مفيش فرق كبير
قبل الاداره كان ليا نشاطات ف اقسام كتيره
وبعدها الحال نفسه
لان عمتا مكنش شغلى منحصر ف الفلاشات بس
هيبقى الفرق ف الصلاحيات بقى
وان بقت الفرصه قدامي عشان اقدر اظبط واستفيد
من حاجات كتيره اكيد باللوحه قدرت اعملها ،،

4 - قرار أخدته هنا في المنتدي وندمت عليه بعد كده ؟

اممممم لا ماظنش ندمت ع حاجه
الندم دا لحظة يأس
وانت لازم بتجرب وبتتعامل لان هي الحياه كده
وان غلطت مره فا دي فرصه عشان تتعلم وتتعامل بعد كده

5- موقف طريف حصلك داخل المنتدي ؟

صعب اوى افتكر زكريات زهايمر بقى امحمود
بس انا فاكر الغربله اللى اتعملت عندى
وبعدها دخلت عند كل الناس اللى اشتركوا ف الجريمه
وعدلت تواقيعهم ورمزياتهم بتصميم هكر ع شكل هيكل عظمي والتصميم نزلته ف الفوتوشوب بعدها
والناس اتخضت بقى والشكاوي اتعملت
وكلنا قعدنا نلعب عليهم
صعبوا عليا بصراحه

6- منتديات بنات مصر ماذا تعني للماجيك بشكل عام ؟

تجربه افادتني كتير جدا
ومش ممكن انكر فضل الموقع داا ودوره
في تنميه الماجيك

7- معروف ان الماجيك اهلاوي لو حابب يقول كلمتين لجمهور الزمالك ماذا يقول ؟

اهاا اهلاوي بس حيادي
الزمالك
بيعجبنى لعب باسم مرسى ومصطفي فتحى
وحفني وجبر وجابر
ببص للفريق دا وعايز انه يبقى اقوى مش عشانه لان اهلاوي ولكن عشان المنتخب لان مصري بقى امحمود
والعرق الاحمر الممزوج بالابيض والاطار الاسود ف دمي



( ثانيا اسئله عن الرياضة المصرية )


1- ما رأيك في اتحاد الكره المصري بشكل عام ؟ وما رأيك في ازمة السنغال الشهيره ؟

اتحاد ضعيف وهزيل
مش عارفين يسيطروا ع اى حاجه
ازمة السنغال الشهيره وانا مسمعتش بيها
مش فاضى ي عم ورانا جيش

2- ما رأيك في بيسيرو مدرب الاهلي بعد الخساره من المقاصه ؟ وما رأيك في فيريرا مدرب الزمالك؟

دا ردي ع موضوع ليك لسه عامله من شويه
وهو الانسب لبيسيرو

عايز ايه من مدرب كل ما الصحفيين يسألوه اى أسئله يقول نفس الكلام
"كانت عندنا فرص مؤكده كتيره وكنا نستطيع الفوز" !
المبارايات مش بالفرص ودي لسته شماعات ليس لها قيمه بلغة الكوره
لان الكوره اهداف واقتناص فرص وتسجيل ،،
مدرب لسه مدخلش ف جو الدورى المصري وهيبقى ظلم الحكم عليه دلوقت
بس دخول متعب من البدايه وقعاد ايفونا ع الدكه وصالح جمعه واستبعاد رمضان صبحي
والناس اللى اكتفت بالتصوير بالتيشرت امثال الشيخ المفروض ينجز بقى ويستفاد منهم
انطوى غير موفق ف الكام ماتش اللى فاتوا
والناس اللى اتدلعت كتير زي مؤمن زكريا لازم يرتاحوا شويه
اخطاء ياريت يفكر فيها ويدرسها كويس
عشان يقدر يعوض في المباريات اللى جايه ،،

بخصوص فيريرا
حاسس انه معدش يقدر يفاجئ باقي الفرق باى تشكيل
شغله بقى روتيني بمعنى آخر
مستوى البدايه للزمالك ف الدورى ضعيفه لغاية دلوقت

3- ما رأيك في قرار المدير الفني للمنتخب باستبعاد رمضان صبحي عن معسكر المنتخب القادم لمواجهة تشاد ؟

بيقولك اى لاعب عمل مشكله مع النادى بتاعه معاقب من الانضمام لصفوف المنتخب
بس لاعب زي دا محتاج ياخد الفرصه
اى نعم اوقات بيتصرف بعفويه ولسه مكبرش
بس هو مش هيتعلم صح غير ف الملعب وتعليمات المدربين

4 - الاهلي هل برأيك كان يحتاج اللي لاعب الزمالك محمود كهربا ؟ وما رأيك في كلمة كهربا لا يصلح للعب في الاهلي ؟

بص مش هاقولك ياريته كان جيه عندنا وبتاع
لان مؤمن اهو موجود الراجل ضيع فرص كتيره
واقتنص بردوا فرص ورجع خستع تانى
وهى دي الكوره عموما
مش علطول الكيرف بتاع اللاعيب هيفضل عالي
بخصوص كهربا شايف انه تأقلم واخد وضعه ف الزمالك
واهم حاجه بالنسبالى كاهلاوي انه يعمل شغل حلو عشان المنتخب اللى هو احد لاعيبيه
وبخصوص كلمته دي وجهة نظره
وفي رأي سطحيه جداا لانه مجربش يلعب وسط لاعيبة الاهلى
ممكن واحد زي دا لما يلعب وسط التيم ومعروف انه بيضم مجموعه من اصحاب المهارات العاليه امثال عبدالله ومؤمن ورمضان وصالح جمعه وغالى والقناص متعب ...الخ يعمل شغل حلو
بس هو دلوقت ف احضان فيريرا ووسط لاعبييه وعامل شغل حلو فا ربنا معاه بقى ،،

5- برؤيتك الخاصه ماهي حظوظ المنتخب المصري في تصفيات كاس العالم ؟ وما هو انسب تشكيل للمنتخب في الوقت الحالي ؟

اممم مش عايز اقول حاجه احباط
عشان الصفوه اللى اعتزلوا كلهم مكنش ليهم حظ ف كأس العالم
بس الجيل الصاعد دلوقت فيه احتماليه يعملوا حاجه
لانه بيضم مجموعه من الناس المميزين
زي قناص الهجوم باسم مرسى
وباقي الخطوط حفني وكهربا ومصطفي فتحي
وعلى جبر والشناوى
دول من الزمالك
ومن الاهلى
عمرو جمال
وباقي الخطوط غالى ورمضان وعبدالله السعيد ومؤمن
وحجازى واكرامي
ومش هاقول تشكيل بقى
بس اكيد معظمه هيضم الاسماء اللى قولتها فوق
مع حفظ كل لاعب ف مكانه بقى

6- من هو أحسن لاعب في مصر في الوقت الحالي ؟

باسم مرسى ورمضان صبحي ومصطفي فتحي

7- من هو المدرب الافضل في مصر في الوقت الحالي ؟

فيريرا
مع العلم ان مش متابع مجهود باقي مدربين الفرق التانيه



( ثالثا اسئله عن الرياضه العربيه والخليجيه )


1- ميولك في الكرة السعودية ؟ ومن هو النادي الذي تتابع اخباره بشكل كبير ؟

الملعب دا مليش فيه خالص ي محمود
معنديش اى ميول والله ولا بتابع شئ

2 - ما رأيك بجماهير الأندية السعودية هل ترى أنها متعصبة بشكل مبالغ فيه أما تعصب معقول بغض النظر عن الأندية التي ينتمي لها الجمهور؟

بص يا زميل عشان نبقى متفقين
انا مش مسئول عن اى فتي بيتقال في الجزء دا
بس انا شوفت جماهير الامارات لما لعب الاهلى والزمالك ف السوبر
جماهير محترمه وكان التنظيم مميز
ومتهيالى مش هتلاقي متعصبين اكتر من جمهور الاهلى والزمالك في الدنيا كلها

[ انا بكلمك عن السعوديه مش الامارات بس عموما افتي براحتك اماجيك ]

3- ما رأيك في نادي الهلال السعودي بشكل عام ؟

اظن انه النادى الاول في السعوديه
بس طالما دى مكانته هناك زي الاهلى والزمالك عندنا
هيبقى نادي حلو بقى يا محمود

4 - ماهو اللاعب الذي يطربك وانت تشاهده في الكوره العربيه بشكل عام ؟

يطربني !
ليه ي عم ماسك مايك وبيغني وهو بيلعب
وربنا ياخي ما متابع حد من الخليج خالص
حليش بتاع الجزائر اسمه لسه فاكرهه من ايام تريكه
بس مش بيطرب طبعا دا كان بيكسر اللاعيبه
بلعبه الخشن

5- ناديك المفضل عربيا وخليجيا ونفس الكلام المنتخب ؟

حسبي الله ونعمه الوكيل فيك يا فخــري
وبخصوص المنتخبات
هاقولك مصر بقى وامرنا لله
ومش متابع المنتخب كما يجب كمان والله امحمود

6- برايك ماهو أفضل منتخب عربى وخليجى يقدم كرة قدم جميله وممتعه ( حاليا ) ؟

الجزائر
تونس
مصر
دا ترتيب الفيفا لكورة القدم العربيه
بس دا اللى اقدر اقوله
وربك يكرم المنتخب ويرجع يسيطر تانى
الله يرحم ايامك يا تريكه

7- ماهو الدوري الاقوى عربيا برأيك ؟ ولو طلبت منك ترتيب افضل ثلاث دوريات عربية حسب وجهة نظرك ماذا ستختار ؟

مش متابع غير الدورى المصري
وكمان مش باشوف غير مباريات الاهلى وبعض الزمالك

8- هل تستطيع تحديد ثلاث اساطير للخليج ؟

لو استطيع كنتش هتاخر والله امحمود

[ هههههههه حبيبي اماجيك ]



( رابعا اسئله عن الرياضه العالميه )


1- منتخبك المفضل عالميا ؟ ولاعبك الاول عالميا ؟ ومدربك المفضل ؟

المانيا
مش هاقولك لا رونالدو ولا ميسى
يكفي روبين لاعب هولندا

2- من شجعت في كأس العالم الماضي ؟

مش عايز اقولك غانا والجزائر
بس هنقول الماكينات الالمانيه بقى

3- رأيك في : كريستانو رونالدو ؟ ميسي ؟ توتي ؟

اسماء لها تاريخ
بشوف توتي مع صلاح مستقبل المنتخب المصري
لاعب مميز ومحترم
وكريستيانو انتماءه للريال بس
معندوش اى تاريخ مع منتخبه البرتغالي
بس لاعب مهاري وبيعرف يجيب جون
ميسي مش اى حد بيقدر ياخد منه الكوره
لاعب بيعرف يتعامل كويس مع الظروف والاحوال
اللى بتتوجد داخل الملعب وصانع العاب مميز

4 - برأيك من يستطيع ان يحقق لقب دورى ابطال اوروبا هذا الموسم ؟

بص انا مش متابع الدورى بردوا حاليا
يعني تقدر تقول الفتره دي منعزل شويه
ومشغول ف امورى وربك يقدم اللى فيه خير
بس يعني البارسا والملكي وبايرن ميونيخ واتليتكو مدريد
هما اللى دايما بتبقى الاحتمالات عليهم

5- من الفريق الذى يطربك أدائه ولعبه من الفرق العالميه ؟

برشلونه
ميسى ونيمار وسواريز
مثلث مرعب لاى فريق

6- برأيك ماهو أفضل منتخب يقدم كرة قدم جميله عالميا ونفس الكلام الانديه ؟

زي ما قولتلك مش متابع حاليا
بس هنقول منتخبات المانيا
وانديه برشلونه



[ كلمة اخيرة ]
كلمه حابب تقولها لبرنامج في الملعب

كل دي اسئله امحمود
معلش بقى هتلاقي حاجات كتير مش متابعها
ودا تقصير مني وانا عمتا مليش اوى ف الكوره
ولا متعصب فيها لاى فريق سواء عربيا او عالميا
بس برنامج مميز واسئلته الفنيه كتيره
ودا ان دل ع شئ بيدل ع مدى متابعتك ودرايتك بعالم الكوره
ويارب نكون وفينا قدر المستطاع
ومنكونش ضيوف رخمين عليكوا بقى
كل الود والتقدير ,,

[ حبيب قلبي يا ماجيك سعيد جدا بالحلقه دي والله ]



[ كلمة ختامية من محمود الصاروخ ]

بشكر ضيفي العزيز والغالي جدا ( الماجيك ) علي رحابة صدرة واجابتة الكافية
وأدعوا الله العلي القدير ان يوفقه فيما هو قادم في حياته وفي جيشه ويرده
اللي ديارة بأفضل حال



وبكدة نكون وصلنا لنهاية حلقتنا النهاردة
وأرجوا ان اكون وفقت في هذه الاستضافة والطرح بما يليق مستواكم
ومستوي ضيفنا الغالي جدا

أعدكم جميعا بالافضل في قادم الايام بإذن الله
وانتظرونا قريبا مع عضو جديد في برنامج
[ الملعب ]



تحياتي للجميع محمود الصاروخ

[حازم34]

حوار مميز وجميل


بين مشرف رياضي استاذ في الرياضه والنقد الرياضي وبين مدير خلوق واداري ناجح

فخرج اللقاء مفيدا في امور الاداره وكره القدم

يسلموا بجد اتنين بارعين رائعين

تقبلوا مروري

[فداااااااااااء]

حوار ممتع واخى الماجيك دمه خفيف
أساعدكم الله
سلمت اخى محمود حوار قيم

[توحد ارواح]

بالفعل حوار جميل ممتع

ماشاء الله ا/ الماجيك عنده خلفيه جامده


اراؤه كتير ف محلها والاجابات صريحه ومباشره

تسلم ا/ محمود ع البرنامج و مجهود رائع منك ف اعداده


والاستضافه مميزه فعلا

دمتم سالمين

[countess]

لقاء جميله بس حرام نسيتو النصر السعودي لا
يقل اهميه عن الهلال 😌

[Fatma eissa]

استضافه جامد
وأسئلة وأجوبة حلوه
تسلم ايدك

[محمود الصاروخ]

اقتباس المشاركة الأصلية كتبت بواسطة حازم34 حوار مميز وجميل بين مشرف رياضي استاذ في الرياضه والنقد الرياضي وبين مدير خلوق واداري ناجح فخرج اللقاء مفيدا في امور الاداره وكره القدم يسلموا بجد اتنين بارعين رائعين تقبلوا مروري

ربنا يكرمك ياحازم مرورك هو الاجمل ياغالي
منورنا دايما ياكبير

[محمود الصاروخ]

اقتباس المشاركة الأصلية كتبت بواسطة فداااااااااااء حوار ممتع واخى الماجيك دمه خفيف أساعدكم الله سلمت اخى محمود حوار قيم

تسلمي فداء علي مرورك الاجمل
منورانا

[محمود الصاروخ]

اقتباس المشاركة الأصلية كتبت بواسطة توحد ارواح بالفعل حوار جميل ممتع ماشاء الله ا/ الماجيك عنده خلفيه جامده اراؤه كتير ف محلها والاجابات صريحه ومباشره تسلم ا/ محمود ع البرنامج و مجهود رائع منك ف اعداده والاستضافه مميزه فعلا دمتم سالمين

مرورك هو الاجمل والله
منوراني دايما كده

[محمود الصاروخ]

اقتباس المشاركة الأصلية كتبت بواسطة countess لقاء جميله بس حرام نسيتو النصر السعودي لا يقل اهميه عن الهلال 😌

نظرا لأداء الهلال الاكتر من رائع في دوري ابطال أسيا
وخروجه المشرف من الاهلي الاماراتي اتكلمت عن الهلال
ونظرا لأنه نادي القرن الاسيوي وزعيم أسيا
تسلمي علي مرورك اختي
منورانا