تحيا بلد الكوسه

[Just Ahuman]

أنا جيت تاني بقي وحشتوني جداً من إمبارح بصراحه

المره دي أنا جاي بموضوع بعيد خالص عن مواضيع الشباب اللى ذكرتها فى التلت مرات اللى فاتو ألا وهو الكوسه .. أيوه الكوسه مش اللي بناكلها طبعاً .. الكوسه كمصطلح يعني المحسوبيه أو الوسايط وما أكثرها طبعاً

يعني مثلاً فى المدرسه أيام ما الواحد كان طالب .. تلاقي مُراقبة الدور داخله فى الإمتحان تنادي المُراقبه وتقولها .. خلي بالك يا ميس من كوكو ده إبن ميس فُلانه شدي حيلك معاه .. وطبعاً المُراقبه ردها يكون كالتالي "من عينيا وإحنا عندنا أغلي من كوكو عيوني لكوكو والفرخه مامته " .. وتمشي مُراقبة الدور وتيجي ميس إنشراح لكوكو وتقوله وريني ورقتك يا حبيبي كده وتفضل تحل فى الورقه لحد أما تفنشها فى ثواني ويطلع كوكو من الأوائل على الفصل والغلابه اللى بيتعبو ويذاكرو يبقو أقل منه رغم إنه ميستاهلش أي حاجه من كل ده .. ودي أول صوره للموضوع

ثاني صوره بقي لإتنين زمايل متخرجين من كليه واحده . واحد مُتفوق ومن الأوائل على الدُفعه والثاني مستواه متوسط ويادوب جاب مقبول أو جيد .. من الطبيعي يكون الأولويه فى التعيين كمُعيد فى الكليه للي تعب وطلع عين أهله فى الدراسه .. لكن فى النهايه بيحصل العكس بيتعين الفاشل ليه بقي عشان سعادته باباه دكتور فى الكليه أو رئيس قسم .. ودي كانت تاني صوره معانا فى الموضوع

ثالث صوره بقي للموضوع بنشوفها فى المصالح الحكوميه بقي .. تلاقي الناس واقفه طابور طويل عريض من صباحية ربنا مثلا عشان يعملو ورق أو مُستند أو بطاقة الرقم القومي .. ويقوم ييجي واحد مبقالوش ثواني فى المكان منادي ع الموظف ويديله الموبايل يقوله كلم ياخد الموظف الموبايل "ألو .. أيوه يا باشا .. عينيا حاضر أنت تؤمر يا باشا.. مع السلامه يا باشا مع السلامه" ويقفل الموظف الخط ويقول للأخ إياه "إتفضل خش يا باشا " ويدخل النبي حارصه وصاينه وحاجته تخلص فى التو واللحظه ومش مهم الناس اللي واقفه يطلع عين أهلهم مفيش مشاكل .. ولو حد إعترض يكون رد المواظف كالتالي "اللي مش عاجبه يشد فى حواجبه .. واللي زعلان يروح يشتكي"

طبعاً دي أمثله بسيطه جداً ولو فضلت أتكلم على أمثله من دي للصبح مش هخلص .. عايز رأيكم فى الموضوع ده وعايز أعرف لإمتي هنفضل كده !!

وفى النهايه هقول "ولو نيلك يا مصر صلصه مش هيكفي الكوسه اللى فيكي"

فى إنتظار تعليقاتكم

[توحد ارواح]

بالفعل مصالح كتيره بتنقضي بالواسطه والمحسوبيه
وللاسف الموضوع ده منتشر علي كل المستويات
واكيد بيسبب عقد ومشاكل وازمات نفسيه
المفروض نبدا بنفسنا ونحاول نكون صح
تسلم ع الطرح المميز

[حازم34]

موضوع وطرح جميل

يسلموا اخي جست هيومن

الكوسه وكانها الاصل في البلاد العربيه

يا بخت من كان النايب خاله دا مثل

وال له ظهر ما ينضرب علي بطنه

ويا بلدنا يا عجيبه فيكي حاجه محيراني

نزرع القمح في سنين يطلع القرع في ثواني

سنين وسنين وبنيت الامه علي الخير ولكن طلعت الكوسه في ايام معدوده

ولكن كله بيظهر في الطبخ

وربك بيحاسب والشعب الاصول ما يسكت عن حقه

موضوع جميل اخي ومحتاج كتب ودراسه

تقبل مروري سيدي

[ابو نصير]

حبيب قلبى
عندما ينتصر الجهل على العلم والفكر المتخلف على الفكر المستير
فأعلم سيدى أن هذه الأمه تتخبط وتخوض فى مستنقع الا معرفه
أبو نصير
الذى لا تعلمه مع أحترامى الشديد يوجد فى مصر مافيا الوسايط والوظائف
وهذا ورث متوارث لكى تظل الدوله تعانى من الجهل
وبذلك سوف يشعر هؤلاء بالتفرقه العنصريه فيموتون تدريجيا
منور
تحياتى

[countess]

معاك حق الكوسه والواسطة او مايسميها البعض هنا فايتمين واو

هي عاق جدا كبير وساعات كتير بيكون سبب في احباط اي بني آدم ناجح

يسلمو كتير

[ندوشه 2011]

الكوسه دي موجوده في المدارس والجامعات والتعينات والمصالح الحكوميه امتي بقي تنتهي والبلد تنضف

[Just Ahuman]

اقتباس المشاركة الأصلية كتبت بواسطة توحد ارواح بالفعل مصالح كتيره بتنقضي بالواسطه والمحسوبيه وللاسف الموضوع ده منتشر علي كل المستويات واكيد بيسبب عقد ومشاكل وازمات نفسيه المفروض نبدا بنفسنا ونحاول نكون صح تسلم ع الطرح المميز

كلامك مظبوط .. وده بيمثل إحباط لناس كتير .. العيب فينا فعلاً عشان بنقبل بكده .. منوراني دايماً

[Just Ahuman]

اقتباس المشاركة الأصلية كتبت بواسطة حازم34 موضوع وطرح جميل يسلموا اخي جست هيومن الكوسه وكانها الاصل في البلاد العربيه يا بخت من كان النايب خاله دا مثل وال له ظهر ما ينضرب علي بطنه ويا بلدنا يا عجيبه فيكي حاجه محيراني نزرع القمح في سنين يطلع القرع في ثواني سنين وسنين وبنيت الامه علي الخير ولكن طلعت الكوسه في ايام معدوده ولكن كله بيظهر في الطبخ وربك بيحاسب والشعب الاصول ما يسكت عن حقه موضوع جميل اخي ومحتاج كتب ودراسه تقبل مروري سيدي

أمثالك كلها مظبوطه حازم وفعلاً زي مانت قولت العيب فينا عشان بنتهاون.. منورني طبعاً

[Just Ahuman]

اقتباس المشاركة الأصلية كتبت بواسطة ابو نصير حبيب قلبى عندما ينتصر الجهل على العلم والفكر المتخلف على الفكر المستير فأعلم سيدى أن هذه الأمه تتخبط وتخوض فى مستنقع الا معرفه أبو نصير الذى لا تعلمه مع أحترامى الشديد يوجد فى مصر مافيا الوسايط والوظائف وهذا ورث متوارث لكى تظل الدوله تعانى من الجهل وبذلك سوف يشعر هؤلاء بالتفرقه العنصريه فيموتون تدريجيا منور تحياتى

صديقي .. بستني تعليقك دايماً والله .. بالظبط الموضوع ده سبب أساسي فى تأخُرنا والله وفعلاً ده عُرف متوارث .. ربنا يرحمنا برحمته .. أنت اللي منور والله

[Just Ahuman]

اقتباس المشاركة الأصلية كتبت بواسطة countess معاك حق الكوسه والواسطة او مايسميها البعض هنا فايتمين واو هي عاق جدا كبير وساعات كتير بيكون سبب في احباط اي بني آدم ناجح يسلمو كتير

ده واو وكل الحروف كمان والله .. ده مش عائق ده سد في طريق ناس كتير .. ربنا يكرم والوضع يتغير .. نورتيني يا نجمة الغناء العالمي