الحلقه الاولي من ( لو كنت مكاني ) مين الغلطان ؟

[phalsteen]

الفكرة دي تقريبا عملتها قبل كدة بس العقل مبقاش زي الاول
والذاكرة بعافيه شويتين والحاله مش ولابُد
فعلي السريع كدة نشرحها من جديد

لو كنت مكاني

مشكله هعرضها في صورة حوار وانتوا ليكوا الرأي والتعقيب
والتحليل وكما تشأون يا سادة


البداية :

نظرات عتاب في عيون بطل الحكاية ودموع وانهيار وتعب
علي وجه البطله وحاله من الصمت التام والترقب الشديد
مين هيبدأ الحوار
لحد ما يقرر البطل يكسر حاجز الصمت وبضحكه باهته يبصلها
ويمكسها من ايديها ويبدأ من هنا الحوار

هــــــــــــــو :

والمفروض والمطلوب مني حاليا اجي اصالحك وارضايكي واقولك سماح
ومتزعليش واقدر موقفك وظروفك واعلن عن مدي فشلي وعصبيتي
تعرفي ان دا كان ممكن وجايز وطبيعي وكان هيبقي زي العسل
علي قلبي كمان لو كنتي حبتيني فعلا ؟
مستغربة اوي كلامي معلشي كملي استغرابك وخليه معاكي للنهاية
انا عارف انك كنتي بتمثلي علي نفسك وبتهربي من حبك ليه بيا
يعني بلغه اصح وداويها بالتي كانت هي الداء
علاج مؤقت عشان تهربي من الحب اللي مالك كل حواسك وعايش جواكي
ايوة اللي صورته بتغطي عنيكي وبتدرايها عشان متفضحكيش قدامي
وقبل ما تسألي لما انت عارف اني مبحبكش لية قبلت ؟
هقولك ببساطه لاني بحبك للدرجه اللي تخليني ارضي اعيش معاكي الحب حتي لو تمثيل حتي لو هشحت منك كل كلمه وكل ضحكه وكل لحظه فرح مصطنعه مالهاش طعم يعني انا كمان مشترك معاكي لاني طمعت اقدر ادفنه براكي واخد جزء من مكانه
بس فشلت في كدة ورضيت يتلعب بيا
عارفه كام مرة سكتي بعد كلمه بحبك
عشان تلحقي قبل ما قلبك يكمل ويقول اسمه ؟
عارفه كام مرة نمتي وغلطتي باسمه وبحروفه ؟
عارفه كام مرة بكيتي بعد ما كنت اقولك بحبك وليه ؟
عارف والله انك دوستي علي نفسك كمان مش عشان تحبيني لا
عشان تشوفيني هو
تخلقيه فيا ومعرفتيش
لانك ببساطه احساسك كاره بحبك مني عايزاها منه هو
وعارفه كمان اني لسة بحبك بعد ما كميه الطعن اللي اخدتها منك
لان الوضع معكوس هو مبيحبكيش وانتي بتحبيه وانا بحبك

هـــي

اسمحلي بس الاول اصقفلك
بامتياز قدرت تصورني بابشع الصور وتكمل دور البراءة للنهاية
وترسم دور الحبيب اللي مش عايز غير السعاده حتي لو مش معاه
بس الاول كدة انت فاكر قولتلي الكلام دا كام مرة ؟
وفاكر رد فعلك بعدها واعترافك انك غلطان واعتذارك لان ببساطه مبتفكرش
ولاني من البداية كنت صريحه معاك وحكتلك كل حكاية عن حبي اللي فات
عملك هاجس مش عارف تفوق ولا تنساه
طول الوقت شايفه قدامك
ومطلوب مني استحمل دا لامته مثلا ؟
انت باختصار احساسك بيصورلك الحاجة اللي
عايشة جواك ودايما بتفكر فيها
وعامه طالما شايف اني مبحبكش ولسة بحبه
اكيد مش هيزعلك لو قولتلك انا من دلوقتي مش عايزاك
ولا عايزة اطعن حد ولا ازود جراح ولا ادي لحد الفرصه يظلم نفسه
باسم حبي
واعتبر دا اخر الحوار



تم

ليكم التعليق

انتظروني السبت والثلاثاء من كل اسبوع
في لو كنت مكاني

نفرتيتي

[bobaOo]

حوار رائع جدا
وكل منهم يحس نفسه مظلوم من الآخر بإسم الحب
مش معنى انها حكتلك عن حبها السابق انها لسه بتفكر فيه
ومش معنى انو يقولك كده انو بيشكك في حبك ليه واهو زي ماقلتي قال الكلام ده كتير ورجع اعتذر وندم

انا لو مكانها بعد الكلمتين دول هسيبو كام يوم لغايه مايهدي وهيرجع يتكلم دة لو بيحبها

تسلم ايدك سما
متابعه ان شاء الله

[جنون قلب]

أختى الفـآضله نفرتيتى

نورتى اولا مكـآنكـ / وثـآنيـآ أحييكـ على الفكره
بس منين لينـآ آلحوآر ده مـآ هو اصلآ موجود فى حيـآه كل وآحد
بس المشكله بقـآ فيـآ وفيكى وف كل وآحد
انه بيشوف الحوآر من وجه نظره
يعنى اللى بيحكى غير اللى بيتحكيله
هو كـآن عـآشق .. بس غبى
وهى مكنتش خاينه
ولآ برضه بريئه
لان فى موآقف وحكـآيــآت اللى بتخلينــآ نفكر فى كل حـآجه
هى مش قـآدره تنسى اللى بتحبه .. صح او غلط ده موضوعنــآ



ليه من الاسـآس يوصل الحوآر ل كده
انـآ مش هقف مع البطل ولآ هكون ب جوآر البطله
لآنى ممكن فى يوم من الآيـآم أكون مكــآنه
بس فى حاجـآت بتحصل هى اللى توصل الحوآر ل كده
والدليل ان ه من كلآمه بـآين انه استحمل كتير
وهى رآفضه تستحمل او حتى تبين العكس


من آلآخر محدش هيعرف يرد على الحوآر ده غيركـ
وبرضه مش هتكونى منصفه ل طرف من الاطرآف
لآننـآ دآيمـآ بنلعب دور الحيـآديه
اللى بنبـآن فيها اكتر رومـآنسيه
وبرضه مستحيل تحسى ب كلآم البطل
ولو البطله خـآينه هتقفى ل جوآرهـآ



سعدت كثيرآ ب الحوآر ده
بس أنـآ لو مكـآن البطل مزعلش عليهــآ
واعتبرهـآ هم وإنزآح من على قلبه
هيفيد بأيه يقعد يتعب فى اعصـآبه
ويوهم نفسه ب الحب والكلآم ده
وهى تقريبــآ مش شـآيفه غير رآحتهــآ




ب التوفيق لكـ أختى نفرتيتى
متمنيين ان نرآكـ هُنـآ ل مزيد من الوقت
حتى تُتحفينـآ ب روآئع يوميـآتكـ
ف هذآ المكـآن يليق بكـ
ولآبد ان تذهبى ل المكـآن الذى يليق بكـ


همسه ./ على البطل أن يبحث عن مكـآن يليق به
والبطله متأكد أنهـآ وجدت المكـآن هذا منذ زمن فى غفله منه



ب التوفيق ل كل المـآريين من هُنـآ

[توحد ارواح]

بداية كان من الخطأ ان تحكي عن حبها
لان دي مربط الفرس
كل همسه وكل ضحكه وكل دمعة هيفسرها ان الاخر سبب لها

بس انتي مش ذكرتي ف السياق هل هما متزوجين ام مجرد ارتباط
علشان هيبقي الرد ع هذا الاساس

المهم لو متزوجين وفيه اولاد يبقي لازم تكمل معاه
وتحاول بشتي الطرق انها تحتويه اكتر

اما ان كان مجرد خطوبه او ارتباط
يبقي الحل زي ما ذكرتي تسيبه وكلا ف طريق

فضفضه راقيه جميله سما

[دمعه حائره]

بيفضل الماضي شبح يؤرق السلام العاطفي للجانبين
سواء كان فيه دليل او مجرد اوهام
واللى بيساعد على اثاره الافكار دى
الاهمال ووجود اسرار بينهم
اكيد الحل الفراق لان طبيعى هاتفضل بينهم المشكله دى
تسلمى سمسمه على الفكره وعرضها

[ابو نصير]

سيدة مصر الأولى ......
ابو نصير بيحييك وبؤلك ايه الغيبه ديه فين ايام الخزعبلات
المهم موش جديد عليكى التنويع ودائما للتقدم ياست نفرتيتى
ابو نصير
منوره

[αЛαstoOorα]

الفكرة جميلة وبحييكي عليها ,,

بالتوفيق !

[phalsteen]

اقتباس المشاركة الأصلية كتبت بواسطة boba0o حوار رائع جدا وكل منهم يحس نفسه مظلوم من الآخر بإسم الحب مش معنى انها حكتلك عن حبها السابق انها لسه بتفكر فيه ومش معنى انو يقولك كده انو بيشكك في حبك ليه واهو زي ماقلتي قال الكلام ده كتير ورجع اعتذر وندم انا لو مكانها بعد الكلمتين دول هسيبو كام يوم لغايه مايهدي وهيرجع يتكلم دة لو بيحبها تسلم ايدك سما متابعه ان شاء الله

تسلمي يا قلبي
نورتي
وشرفني رأيك

[phalsteen]

اقتباس المشاركة الأصلية كتبت بواسطة !lion hart! الفكرة جميلة وبحييكي عليها ,, بالتوفيق !

ثانكس اخي
تشكرات

[phalsteen]

اقتباس المشاركة الأصلية كتبت بواسطة ابو نصير سيدة مصر الأولى ...... ابو نصير بيحييك وبؤلك ايه الغيبه ديه فين ايام الخزعبلات المهم موش جديد عليكى التنويع ودائما للتقدم ياست نفرتيتى ابو نصير منوره

انشغالات بئه استاذنا
ميرسي للسؤال اولا
ثانيا ان شاء الله احاول اكون معاكم دايما
شرفني رأيك وسعدت بيه كالعادة