إحنا بنشتري راجل لبنتنا .. وفى الآخر .....؟

[Just Ahuman]

(إحنا بنشتري راجل لبنتنا .. اللي عندكو عندنا مش هنختلف)

جُملتين بيسمهم دايماً أي عريس بيتقدم لخطبة واحده ..

طبعاً الزواج من سُنن الحياه وحثنا الرسول عليه أفضل الصلاة والسلام إن من يستطيع ولديه المقدره فليتزوج ... ندخل فى صلب الموضوع ..

الواحد مننا كشاب بيروح يتقدم لخطبة بنت بيحبها أو عروسه أهله شايفينها مناسبه ليه وهو بيروح على حسب كلامهم عنها وثقتهم فيها إنها تصلح لبنتهم .. بيروح الشاب بياخد أهله معاه "والده ووالدته مثل وأخ كبير إلخ.." بتبقي القعده جميله ولطيفه ودمها ظريف وبنسمع فيها الجملتين اللي ذكرتهم وأهل العروسه بيعطوك إيحاء إنك لو قولتلهم هاخد العروسه دلوقتي وأمشي مش هيمانعو من كتر ماهما مُتساهلين فى طلباتهم .. وبتنتهي القعده بشكل ودي وظريف خالص وبتقروا الفاتحه وبتلبسها خاتم مثلاً وبتشوف الحياه وردي جداً ...

بعد فتره بتروح أنت تزور خطيبتك أو اللى هتبقي خطيبتك بمعني أصح تلاقي والدتها بتقولك "أنا بنت أختي مش أقل من بنتي أنا عايزه قسوره وخاتم ودهب وياقوت ومرجان " .. وقتها بيكون ردك من لسان حالك "ليه يا حاجه هو حد قالك إنكو هتناسبو علي بابا" .. تقوم راده عليك وقايلالك "وأنا يعني بنتي مش لاقيه هي بايره ومش لاقيه عرسان ... ده كل يوم بيجيلها عريش إيشي محامي وظابط ودكتور" .. من جواك بترد برضو "ليه يا حاجه إنتي مخلفه سكارليت جوهانسون ولا مني زكي وأنا معرفش" .. ودايماً المُناقشه بتنتهي بخناقه وفى الغالب الخطوبه بتتفشكل بسبب تمسك الأم بحاجات غريبه رغم إن الكلام فى الأول كان غير كده خالص

ندخل على الحاجه التانيه وهي التجهيز فى الشقه .. أم أو أبو العروسه "بص يا حبيبي إحنا عايزين العفش بقد كده وعايزين السيراميك واحده بيضه والتانيه فوحلقي وحته من فرنسا وحته من إيطاليا" .. من جواك هتقول بقي "يا جماعه أنا مش إبن طلعت مصطفي والله" وغالباً بتتفشكل الجوازه بسبب إختلاف على التجهيزات

مش معني كده إن كل الأهالي كده .. فيه أهالي كويسين وبيقدرو ظروف الشباب .. بس اللى أنا إتكلمت عن شريحه موجوده فى وقتنا الحالي وأنا شوفت أمثله كتير من دي مع أقارب وزملاء ليا

فإيه رأيكم فى الموضوع ده .. مستني ردودكم

[.Lamar]

فيه كلمة كمان بتتقال

الصراحة راحة

يعنى اللى ذكرته بيحصل اه

لكن الوضوح من البداية اهم

في جلسة كدة للاتفاق على كل شى من صغيره لكبيره

و دة صح لبنتهم قبل عريسها

على القليل ما تنحسب عليها خطوبة لو فشلت

العقل بيقول كدة

تسلم لطرحك اخى

تحياتى

[bobaOo]

ده لو بالطريقه دي
البنت هتتخطب مليون مرة وتفشكل
ويتحسب عليها مليون خطوبه

ربنا يهدي الاهالي
تسلم للطرح

[توحد ارواح]

بالفعل النوعيه دي موجوده
ولكن الاتفاق من البداية هو الاساس
وبالنهايه المفروض برده من الاهالي
التغاضي عن الطلبات المبالغ فيها
حتي تتم الزيجه بسلام
واهم حاجه ان العريس يتقي الله ف بنتهم

تسلم ع الطرح القيم

[ابو نصير]

اسمع يابرنس
وفى أكتر من كده ممكن توصل لطلاق قبل الدخله علشان القيمه
ابو نصير
الصراحه راحه واللى أؤله شرط أخره نور وكل كلمه تقولها محسوبه عليك
وتخيرو النطفه أن العرق دساس
منور
إذا كان الجواز أو الخطبه يبنى على متاع الدنيا لا بد أن نخسر
وسؤال هل نحن نبحث عن العرض والشرف أم نبحث على العرض وهو العفش
وانا اتعجب كل العجب عندما نعسر الحلال فيبحث الشباب عن الحرام
لا تصعبو الحلال لكى نهلك جميعا فى الحرام
ابو نصير

[حازم34]

اولا --

الكلام دا حقيقي موجود ولكني اعتقد يكونوا عارفين حاله العريس الماديه

ثانيا -- كما قالت الاخت لابد من وضع النقاط علي الحروف قبل كل شئ

ثالثا -- الحب الجميل بيصنع كل شئ جميل يعني لو الواحد فعلا ناوي خير وينوي المحافظه علي بنات الناس

يفعل كل شئ يطلب منه لو قادر ماديا

مش هتصدق طلبوا مني شيك علي بياض ولم ارفض ابدا ولم اقل شئ وكل شئ كان جميل وبعد

الزواج بسنتين لقيت الشيك عندي

ها الايام وانا رايت عيني ممكن بعض الشباب ياخد نات الناس كلعبه ممكن ينتهي منها ايما وقت شاء

انظر اخي الكريم لحالات الطلاق الان

تعدت وتعدت اللامعقول

واسال عن السبب

موضوع جميل ويسلموا علي الطرح

[فداااااااااااء]

دا بيحصل لان بعض الناس بتغير من بعض وكمان بياخدوها كمعايرة وتفاخر

ولان التفاخر اهم شيء فلازم البنت تتجهز باغلى شيء اما ما اتفق عليه وكلمة بنشترى راجل

بتطبق وتتحط فى ظرف وبيرموها
هى فئة من المجتمع وللاسف مازالت على نفس الفكر

الله يصلح الحال

سلمت اخى محمود
يدوم النشاط

[Just Ahuman]

اقتباس المشاركة الأصلية كتبت بواسطة .lamar فيه كلمة كمان بتتقال الصراحة راحة يعنى اللى ذكرته بيحصل اه لكن الوضوح من البداية اهم في جلسة كدة للاتفاق على كل شى من صغيره لكبيره و دة صح لبنتهم قبل عريسها على القليل ما تنحسب عليها خطوبة لو فشلت العقل بيقول كدة تسلم لطرحك اخى تحياتى

كلام جميل لمار بس أحيانا الإتفاقات بتتغير فبالتالي بتحصل المشاكل
تسلمي على مرورك

[Just Ahuman]

اقتباس المشاركة الأصلية كتبت بواسطة boba0o ده لو بالطريقه دي البنت هتتخطب مليون مرة وتفشكل ويتحسب عليها مليون خطوبه ربنا يهدي الاهالي تسلم للطرح

ربنا يستر يا بوبااا .. منوره الموضوع

[Just Ahuman]

اقتباس المشاركة الأصلية كتبت بواسطة توحد ارواح بالفعل النوعيه دي موجوده ولكن الاتفاق من البداية هو الاساس وبالنهايه المفروض برده من الاهالي التغاضي عن الطلبات المبالغ فيها حتي تتم الزيجه بسلام واهم حاجه ان العريس يتقي الله ف بنتهم تسلم ع الطرح القيم

الله ينور عليكي لازم شويه من عندهم عشان الدنيا تمشي .. العريس مش سوبر مان يعني .. تسلمي على مرورك الدايم