بطلت الكتابة خلاص

[a7med -3del]

سالوني... ليه بطلت تكتب
وفين اشعار الشوق والحب
ضحكت.. ضحكة عالية وقولت
بقيت واحد معندوش قلب
ضحكو وقالو..
انت شكلك بقيت سياسي
ومبتكتبش من فترة
قولت والله انا بحاول
بس ايديا مش قادرة
كام مرة مسكت قلمي
وبسرعة رميته تاني
طعم الكلام ماسخ
وكأن الكلمة كارهاني
قالولي.. طيب خلي بالك
ومتزودهاش عشان
النظام واخد باله
ورجالته في كل مكان
قولتلهم .. انا مش اخوان!
قالولي مايهمش
هتتحاكم عشان انسان
حاضر... فهمت
باختصار عايزني يعني اعيش جبان!
انا قولت امشي جمب الحيط
وارجع لقلمي واشعاري
واحد بيحب واحدة..
وواحد تاني مش داري
والشوق واللهفة.. والاشتياق ويا الحنين
واثبت حضوري.. باي رغي في،كلمتين
وافضل اتكلم عن حبيبتي..
عن مشاعري عن اهاتي
بالنسبة ليا الوضع ده ممل جدا..
اني اعيش برة حساباتي
وانكر شعوري.. يبقي ضعفي هو دوري
وتخلص حياتي
حاولت.. لكن بجد مقدرتش
اصل اللي اتعلمته.. اللي محسهوش مكتبهوش
والحالة العامة ماتسرش.. علشان ماتفكروش
اصل الكتابة احساس.. مش كلام كده وخلاص
ممكن اسمع.. ممكن اقرا.. بس كتير مابحسهوش
قالو عندك موهبة،.. حاول تنميها
وارجع اكتب زي زمان
قولت انا عندي اكون ماليش فيها
بس اعيش لو يوم انسان
احس بغيري واتأثر.. راجل بجد مش منظر
اعيش الضحكة والدمعة..
ومكنش في يوم برفان
صورة وبس ع الحيطة.. ماشي في الزحمة والزيطة
هاقول لاء عشان لاء..
هيا الي هتعملي كيان
انا انسان
ولو الكتابة ورقة وقلم..
وكلام من غير احساس
انا بعلنها صريحة..
بطلت الكتابة خلاص
Ahmed adel
3-12-2015

[جبل عالي]

حسيتها جدا وحسيت كل كلمة فيها
والمعنى واصل ومشاركين فيه

كلمات رغم المرارة صادقة مرتبة

تسلم ايدك وبضم صوتي لصوتك
وفعلا خلاص بطلنا كتابة

[ايمان طلعت]

مانت اهو لسه بتكتب
بقلم كله احساس
والورقه لو تنطق
هتصرخ من معني الحروف
دام نبض قلمك

[د/ عبد الله]

لا يا عم اوعى تبطل. متحرمناش م الكلام الجميل ده
بجد موهبة جميلة
وان كان ع اللى احنا شايفينه من قهر وظلم عبر عنه بقلمك وطلع فى الكتابة مشاعرك
ما هو لو مش هنقول اللى بنحسه يبقى عمرنا ما هنتحرك
بالتوفيق ان شاء الله

[نقاء]

لانستطيع حماية انفسنا في هذه البلااد
أقوى الإشياء التي نستطيع فعلها الكتابه فقط.
أستمر.

[اندرسون]

انت حكيت قصة كتم. الصوت
احسنت فابدعت
ارفض تكون جبان ...... اصرخ وقول انسان