الحلقه الاولى من ( ذكريات بنات مصر ) مع ( دمعه حائره )

[morshooo]

بسم الله الرحمن الرحيم

مزاج الخير

اهلا بيكم وأولى حلقات برنامجكم

( زكريات بنات مصر )




زى ما قولت قبل كدا المنتدى اختلف كتير جدا عن الاول

وممكن يكون السبب فى دا قله الاعضاء بالمنتدى ودا بيخلى

المنتدى بدون افكار او مسابقات او اقلام تستحق المشاهده

رغم ان فى اعضاء قداما بالمنتدى حاليا بس خلاص

مفيش تشجيع ليهم انهم يستمرو فى الكتابه عشان كدا

دى كانت فكره التوبيك هنشوف مع بعض زمان الاعضاء

كانو بيشجعو بعض ازاى وكمان عشان نعرف الاعضاء المحبوبين

كسبو حب الاعضاء ازاى وياترى تعاملهم مع الاعضاء كان ازاى

ومين من الاعضاء مهما يغيب هيفضل فى زاكرة المنتدى بمجهودة

ومواضيعه والى قدمه لاعضاء المنتدى من افكار ومسابقات وأدارة الاقسام .




معانا النهاردة عضوة تقريبا فيها كل صفات العضوة المثاليه

قدمت للمنتدى كتير جدا من بدايه اشتراكها بالمنتدى لحد النهاردة

لما تيجى تسئل اى عضو مين افضل أدارى اتعاملت معاه بالمنتدى

لازم يقول العضوة دى من ضمنهم لانها فرضت احترامها وتعامولها

مع الجميع ومكنتش بتتعامل بصلاحيات سواء كانت مشرفه او مراقبه او أداريه

معانا الادارية المتميزة /

دمعه حائره






تعالو نشوف ياترى

الحلقه الاولى

قالت فيها ايه عن ( بدايتها ) بالمنتدى


1 / فى البدايه اهلا بيكى ( دمعه ) فى برنامج ( زكريات بنات مصر ) ؟

اهلا بيك يامروشو منور المنتدى وحلو اسم البرنامج




2 / اكيد جاهزة تخرجى لاعضاء المنتدى كل حاجا فى زكرياتك عشان يعرفو عملتى ايه
عشان توصلى لمكانتك دى فى المنتدى ؟

ههههه ايوة جاهزة عملت الشاى
وبسمع عمر خيرت (خلي بالك من عقلك)




3 / حلقه النهاردة ( الجزء الاول ) هيكون عن بدايه تواجد ( دمعه ) فى البدايه وعايز اعرف
ازاى دخلتى المنتدى ؟

شوف علاقتى بالنت كانت محدودة شويه وكانت بس عباره
عن حاجات خاصه بشغل للعيله برا,,مراسلات بس
وبالصدفه كان ايامها ببحث عن ديكورات لان كان فيه
شويه تجديد عندى فى البيت
وفتحت جوجل ومنه لقسم الديكور هنا لفت نظرى الردود
وشكل المنتدى كله كانت حاجه جديدة بالنسبالى
اتصفحت المكان وعارف احساسك لما تدخل مول كبير جديد
مندهشه وبتفرج على كل قسم وتوبيك موجود
فضلت كده اسبوع لحد ماسجلت وعملت توبيك ترحيب
لانى شوفت الكل بيعمل كده وقولت اعرف الناس انا جيت
اول ماسجلت هنا مكنتش فاهمه يعنى ايه منتدى
وخواص كتير مكنتش اعرفها ولاكنت فاكره انى هاكمل
كنت مهتمه افهم واعرف اتعامل مع الاقسام الاول




4 / بداياتك فى المنتدى كانت فى قسمى ( اليوتيوب و الخواطر ) ؟ ياترى كان ليهم علاقه
بشخصيتك او ايه سبب اهتمامك بيهم فى بدايه دخولك ؟

فعلا ايامها كنت مهتمه باليوتيوب
قسم سهل ومناسب لاول دخولى مش محتاج مجهود
انى اعمل موضوع واكتر وقت كنت بتفرج عليه
حتى فى البيت كانت قنوات اغانى بكل اللغات
مصري وتركى واجنبي
والكلام ده من خمس سنين اكيد اهتماماتى اختلفت
بس شخصيتى عموما بحب الموسيقى والشعر
قسم الخواطر اكتر قسم كنت بفضل فيه
ليا فيه ذكريات حلوة كتير
كان فيه اعضاء مبدعين
كلهم كانوا بيكتبوا حلو جدا وكنت بتعلم منهم
شجونى انزل خواطر واتعلمت اعبر عن اللى جوايا
كان جو اسري جميل ومنوع بين هزار وجد وابداع
حبيت القسم وكان فرصه كبيره انمى موهبه كنت اهملتها




5 / بعد كدا دخلتى اقسام النقاش واهتميتى بقلم الاعضاء ؟ تفتكرى دى كانت بدايه انتشار
دمعه كعضوة نشيطه فى المنتدى ؟

انا بحب النقاش دايما حتى فى حياتى العاديه
كنت بهتم بالمواضيع فيه وكان قسم ساخن فيه مشاكل كتير
قلم الاعضاء بعدها عرفته
كان قسم ليه متابعين ومكانه خاصه عندنا كلنا
يعنى انا مبحبش افضل فى قسم واحد وحبيت فكره
انى اكتب فى اكتر من قسم واشارك فى كل الاقسام
هى طبيعه فيا اكتر يمكن لحد دلوقتى
وفعلا كان ليها اثر انى اتعرف واتميزت بسرعه
فى الادبى والاقلام




6 / الموضوع دا ( حديث مع فنجان قهوة ) فاكره كتبتيه ليه ؟ وكان ليه اى موقف معاكى ؟

حديث مع فنجان قهوة
ياه ده موضوع قديم اوى
فاكره كانت رحيق الجنة طلبت منى اكتب موضوع فى القسم
ده كان من ضمن فاعليات بتعملها زمان
وفكرته من حديث دار بينى وبين بابا
كنا بيكلمنى عن وضع البلد والناس اللى اتغيروا
وبرغم ان زمان كانت الامهات ممكن مش متعلمات
لكن عرفوا يربوا اولادهم ويطلعوا منهم عباقره
وسياسين اثروا فى تاريخ البلد
وحتى فى اللبس كان متحرر اكتر من دلوقتى
ولاكان فيه تحرش ولاجرايم من اللى بتحصل دلوقتى
انبسطت جدا يومها لما لقيت الموضوع عجبهم
وكان دافع ليا انى استمر




7 / بداياتك فى اليوميات كانت مع ( حفله تنكريه ) و ( مجلس حكماء بنات مصر )
ايه حكايه الموضوعين دول وقتها ؟

بحب الحفلات التنكريه جدا وحبيت اعمل حاجه ترفيهيه
حتى لو بالصور وكتير فرحوا يومها وشاركوا
وافتكر انا شاركت بصوره لتوبا متنكره
واللى اتنكر اللى سوبر مان وسندريلا وغيرهم
قضينا وقت لطيف
اما مجلس الحكماء ده كان حكايه يومها
جاتلى الفكره انى اجمع خمس اعضاء بالانتخاب
يكونوا صوت للاعضاء عند الاداره
يشاركوا فى الترقيات والمشاكل اللى بتحصل للاعضاء
يحطوا حل يكون بعيد عن قرارات الاداره يقنعهم
يومها دخل اللى اعترضوا وكتير وافقوا واقترحوااسماء
افتكر احمد, الادارى ايامها الغالبيه اختاروه
هو واستاذ احمد الشريف
ومتهيالى حد اختارنى يمكن طارق على مااعتقد
وقال نعمل الفكره شخص واحد بس انا رفضت
الفكره ماتنفذتش
بعدها بفتره طارق عمل المتحدث عن الاعضاء
وفرحت جدا يومها لانها كانت حل كويس




8 / كلنا شايفين استمرارك فى اليوميات لحد دلوقتى صحيح عن طريق برنامج واحد لكن ايه
سر حفاظك على التواجد بقسم اليوميات ؟

هو انا ليا برنامج تاني بس مكملتش فيه
زى (بنقولك ارجع)
لانى بقيت اغيب انا كمان
وبرنامج اجدد عضو انا بهتم بيه جدا لانه بيساعد العضو الجديد
انه يشيل الرهبه من المنتدى ويتعود على الاجواء هنا
وبنتعرف عليه اكتر
يعنى بيكون زى بدايه اكتر تقرب المسافه بينه وبين الاعضاء القدامى
وقسم اليوميات من اهم الاقسام هنا وسبب لانطلاق كتير من البرامج
ونجاح لعدد كبير من الاعضاء
فيه حريه اكتر وغير تقليدى فى مواضيعه
وبيجمع عدد كبير من الافكار والاعضاء بشكل يجذب باقى المنتدى
وتولى الاشراف عليه مشرفين عرفوا ينجحوا القسم ويخلوه من انشط الاقسام
بدايه منك انت يامرشد ومجهودك الكبير فيه
لحد المشرفين دلوقتى عليه




9 / شايفه ان تعامل الاعضاء معاكى فى بداياتك كان طبيعى بمعنى ان اهتمام الاعضاء بيكى
كان على قدر تعبك فى المواضيع ؟ والا كنتى بتتظلمى ؟

بصراحه انا لحد دلوقتى بشوف انى اخدت
من الحب والاهتمام بالقدر الكافي واكتر
سواء فى ترقيات او مشاركات الاعضاء عندى فى المواضيع
ومش ظلم ولاحاجه بس كان فيه مشاكل بتحصل وسوء تفاهم
نتيجة تعاملنا بالكتابه وممكن محدش يفهم وجهة نظرك كويس
وخصوصا لو مش يعرفك وده كان فى السنه الاولى




10 / ايه الى حصل فى المنتدى قررتى وقتها انك هتستمرى فيه وماشاء الله بقالك
فيه تقريبا 5 سنين ؟

مفيش حاجه حصلت غير ان كان عندى وقت فراغ كبير
وبدأت احسن مستوى الكتابه والخواطر
وده كان بيشجعنى استمر,وارتبطت اكتر بالمنتدى
كونت صداقات وارتبطت بمتابعه اعضاء هنا
حبيت كتاباتهم وخواطرهم ولازم اشارك فيها
ده غير الاشراف كان بعد ماسجلت بشهرين تقريبا
وكان مسئوليه انى لازم ادخل يوميا




11 / شايفه ان اختيارك كمشرفه بدرى كدا كان دافع ليكى وكانت مسئؤليه عليكى وكنتى
مشرفه على قسم ايه فى بدايتك ؟

كان قسم الخواطروبصراحة انا يومها اتفاجئت
ومكنتش عارفه هيكون مطلوب منى ايه
ولما سألت قالوا اللى زى انتى بتعمليه متابعه وردود
وكنت ايامها بكتب كتير
وعرفت بعدها مهام الاشراف اكتر والحمد لله قدرت
فى فتره قصيره اثبت وجودى اكتر فى القسم
وكان من انشط الاقسام فى المنتدى
بعدها بفتره اتنقلت الابداعات وكانت تقريبا ملهاش نفس الشعبيه بتاعه الخواطر
وقليل اللى بيشاركوا فيها
بس انا كنت بحب القسم ده جدا
ولحد دلوقتى ليه مكانه خاصه عندى
وبمساعده المبدعين فيه عملت احسن المسابقات والافكار
فعلا كانت فرصه وحافز انى استمروافضل متواجده




12 / بدايتك فى المنتدى ياترى كنتى بتفكرى فى مواضيعك الى بتنزليها ومستنيه رد فعل
الاعضاء لما تدخلى تشوفى مين رد وقال ايه ؟ والا كنتى متاكده انك بتقدمى حاجا الاعضاء
هتعجب بيها ؟

كنت بكون قلقانه جدا وخجوله من اى خاطره
او موضوع انزله بحس انه مش قد المستوى هنا
وافرح لما الاقي من الردود عجبهم الموضوع
ولو حد قدم نقد بحس انه عاوز مصلحتى
وخصوصا لما يكون باسلوب كويس
اكتر فتره ساعدتنى فى الكتابه والثقه فى انى استمر
ايام لما اشتركت فى مسابقه معاك كانت الاكاديميه
وقدمتلنا افكار نكتب فيها
هى دى ايامها اللى ساعدتنى ازاى اعمل موضوع بكل العناصر المتكالمه فيه
لانى مكنتش اعرف ف حكايه التنسيق
وترتيب الافكار وعرضها
اتعلمت ده فى المسابقه
حبيت اذكرها واشكرك عليها




13 / بعد بداياتك دى كلها كان ايه قرارك اتجاه الاقسام يعنى ايه اكتر قسم اهتميتى بيه
وقررتى تكلمى فيه ؟

زى ماقولت قبل كده الاقسام الادبيه كلها
بالاضافه لقسم قلم الاعضاء اكتر اقسام بكتب فيها
وحصل فيها تطور وقرارت كتير
بس بعد الاداره لما فكرت افتح قسم الملاحظات
واضافه عضويه المبدعين عشان افصل
بين التميز للحصري والمنقول
ايامها خد منى وقت كبير
عشان اشرح الفكره واوصلها للاعضاء
وازاى هايخدم الاعضاء ابتداء من التميز
عشان يكتبوا مواضيعهم براحتهم
القسم يمكن ميكونش مهم لناس كتير
لكن بالنسبالى حاليا اهم قسم عندى
بينطلق منه كل مواضيعى
لانى مش بكتب كل يوم
وقت مايجيلى الافكار بكتب مش لازم انزلها على طول
كمان زمان قسم الشكاوى كان مصدر قلق كبير بالنسبالى
خد منى وقت وجهد كبيروكلام كتير وتوتر
بس الحمد لله
مبقاش من اهتماماتى حاليا




14 / ايه القسم الى كان بيمثلك القسم الترفيهى يعنى لو مدايقه تقولى هدخل القسم دا اشوف كام موضوع فيه ؟

بحب قسم الخزعبلات بيسلي جدا ويضحك
ولما بكتب فيه وارجع اشوف الكلام بضحك على نفسي
واليوميات مسلي جدا وبيعرفنى معلومات عن الاعضاء
كمان الفضفضه قسم جميل بحب اتابعه وارد على المشاكل
لكن مابنزلش فيه مواضيع كتير




15 / جاهزة للحلقه الجايه عشان نعرف منك مشوارك الادارى كمشرفه ومراقبه ونائب
الادارى وأداريه ؟

ان شاء الله مع انه مشوار طويل
بس هاحاول ابسط الحكايه واحكى كويس




وبكدا بيخلص

( الجزء الاول )



( الجزء الثانى )

ومشوار دمعه الادارى بالمنتدى

[Aya 7ekaya]

اولا بهنيك على اختيارك منه هتفضل من اجمل الاعضاء فى المنتدى ومش كتير عليها انها تكون شمس المنتدى والحقيقه فترة تواجدها كاداريه كنت من افضل الفترات اللى مر بيها المنتدى لانها شخصيه تتحب ومهما اتكلمت ووصفت مش هقدر اوصف جمال شخصية منه
وف انتظار الجزء التانى ان شاء الله

[الفيلسـوف]

كل التهنئه لمجهودك داخل القسم يامورسو ولاسئلتك الجميله
ام عن منه فهى فعلا شخصيه ف قمه الاحترام والاخلاق
من الاداريين اللى انا ما حضرتهم طبعا بس لحد الان
من يوم ما دخلت المنتدى ماسمعت كلمه وحشه عن منه سواء متفقين
او مختلفين ودى
نعمه كبيره من الله ليها
وف انتظار الباقيه يا كبير

[واد حبيب]

حلقه جميله يا مروشو في دمعه
عرفنا كتير عن حياتها دخل المنتدي
في انتظار باقي الحلقه

[ايمان طلعت]

فكرة البرنامح حلوة
بتعرفنا مشوار ناس معرفنهاش من بدايه دخولها
منه غنيه عن التعريف وتعاملها راقي مع الكل
كانت اول معاملاتي فبدايه تسجيلي معاها كاداريه
كنت بسألها علي حاجات خاصه بالمنتدي
محستش منها ابدا بتعالي فتعاملها
حبتها ومازلت
ربي يوفقها فحياتها وتفضل هنا دايما
مشكور مورشو للبرنامج
متابعه معاك

[نجاة حسام]

فكره جميله للبرنامج

اننا نتعرف على اعضاء فى المنتدا ومنهم نستفيد

تحياتى لدمعه حائره

ولحضرتك استاذ مورشو

[حـيـــــآة ❤]

منه من الشخصيات ال كانت فارقه فالمنتدي وهتفضل فارقه
مع اني محضرتهاش اوي
بس ونعم الاداريه والعضوه الخلوفه
ومنظره التكمله باذن الله
تسلم احمد

[countess]

منه تعتبر من اهم شخصيات المنتدى

وعشنا مع بعض ذكريات جميله

كنّا هنا مع بعض على الحلوه والمره

[دمعه حائره]

شكرا يامروشو على الاستضافه رجعتنى لايام جميله بحبها
والتنسيق الجميل ده اول مره تغيير الفواصل
كنت خلى اجاباتى بالبينك بحب اللون ده
شكرا لاتاحه الفرصه للتعبير عن حبي للمنتدى
ومجهودك بحييك عليه

[فداااااااااااء]

حوار رائع اخى أحمد
منة إنسانة رائعة ومميزة بالفعل ومحبوبة

الفترة دى اول مرة اعرف عنها يمكن دى الفترة اللى بتسبق تواجدى

رائع الحوار
سلمتم روحكم