عملنا ايه , نستحق عليه !!

[twitter man]

غريب امركم ايها المصريون

كل ما اتفرج على افلام الابيض والاسود بيحصل عندى تضارب فى الطبقه السابعه من دماغى ,, الناس كانت ايه ؟؟

فى سياق الزمن دا كان العمل شرف لا يضاهيه شرف ,, كان الكسيب فخر لنفسه وعيلته ومحط انظار الجميع ,, الشغل مش عيب كانت الحكمه اللى بتصطبح بيها ودانك طول ما انت ماشى ,, الناس كانت بتصحى بدرى وتنام بدرى والانتاج فى اعلى معدلاته

دا حتى القطاع العام فضل يكسب لحد اواخر السبعينات ,, ومع كل دا الناس كانت عايشه حياه بسيطه ,, ايه السبب ؟؟

ايه اللى يخلى اسره دخلها كويس وفى زمن الاسعار فيها رخيصه ميفكروش فى الرفاهيه ؟؟؟

امم واضح ان الاجابه الوحيده العقلانيه على السؤال دا انهم كان عندهم اولويات تانيه ,, بقليل من البحث هتلاقى ان الاولويات اتركزت بالترتيب

1- اكل

2- شرب

3- لبس

4- مصاريف الاولاد

5- ادخار

وكانت الرفاهيه وجودها على قائمة اولويات الاسره زى نطقها (( رفاهيه )) يعنى مش اولويه ولا حتى امر مرغوب فيه .

كان المثل الشائع (( القرش الابيض ينفع فى اليوم الاسود ))

الغريب ان الفلسفه الحياتيه دى مكنتش نتيجه الفقر او العوز لان الاتنين مقتضاهم معاكس تماما لفكرة الادخار ,, وكمان مكنتش نتيجه لقلة الدخل لان بحسابات مش معقده نقدر تلاقى ان القوه الشرائيه للفرد فى السبعينات مثلا كانت ضعف ان لم تكن ضعفين القوه الشرائيه للفرد حاليا ودا باعتبار اننا فى الوقت دا كنا لسه فى حزام الدول المنتجه والمصدره لكثير من المنتجات ,, دا ناهيك اننا كان عندنا شبه اكتفاء ذاتى .

يبقى السؤال المنطقى ,, ليه حرموا نفسهم (( بمفهوم جيلنا )) وابتعدوا عن الرفاهيه ؟؟

جاوب بقى مع نفسك

وفى الوقت اللى بتدور فيه على اجابه خلينى افردلك شوية حقايق فى المرايه علشان نبطل نغمة الدنيا صعبه وايام سودا والبلد بتقع

ثق يا معلم تمام الثقه ان ما من وطن ارتفع الا بمواطنيه وما من وطن انهار الا على ايدى ابناؤه ,, وهو دا حرفيا الحاصل فى واقعنا المنيل وتعالى نشوف امثله هايفه تبين الفرق الشاسع بين ناس كانت بتنتج وعاشت كما سبق زكره وبين ناس نايمه فى البيوت والمكاتب والجناين والمدرجات والفصول والسينمات وعايشه كما سيرد زكره

مبدئيا كمعلومات عامه

احنا بنستورد من الخارج ب 70 مليار دولار وبنصدر بحوالى 25 مليار ,, يعنى فى حوالى 35 مليار دولار بيخرجوا كل سنه من البلد ومبيرجعوش تانى فى بلد مديونه ب 300 مليار دولار

وارداتنا اللى ب 70 مليار عباره عن

القمح اللى فلاحينا مش قادرين يزرعوه علشان بنوا على الاراضى الزراعيه بيوت علشان يجوزوا العيال

البترول والغاز اللى اتصدروا بتراب الفلوس لاسرائيل والاردن والنهارده بنسوتردهم بالغلى والكوى

الدواء اللى فى يوم من الايام كان عندنا شبه اكتفاء ذاتى منه بقينا مركزين دلوقتى على الترامادول والالترادول والمنشطات الجنسيه , وحتى دى بقينا بنجيبها من بره اصل المحلى تأثيرها مش قد كدا

طبعا دا كان ممككن يتوفر لو احنا شعب بننتج ,, انما وليكن يا سيدى لظروف قهريه خارجه عن ارادتنا وارادة الكنبه اللى نايمين عليها مضطرين لاستيراد الطاقه والغذاء والدواء (( دا غير فاتورة السلاح اللى بنستورده ومش معروف ارقامه ))

لكن لما تعرف ان فوانيس رمضان واكل الكلاب والقطط والفواكه والمكسرات والالعاب الناريه والعاب الاطفال والادوات المكتبيه والجمبرى والكفايار ولحم الغزال والنعام ,, دا بيكلفنا سنويا فوق ال 12 مليار دولار فى الوقت اللى الاحتياطى الفعلى من الدولار فى البنك المركزى هو 6 مليار يبقى مفيش غير كلمه واحده تقدر تعبر عن الحاله اللى وصلنا ليها

جدك وجدى وابوك وابويا لو عاشوا فى زماننا وشافونا بعد كل ما سبق زكره بنعمل الاتى تتصور ايه رد فعلهم

1- كل بيت فيه من 1 الى 5 موبايلات على حسب عدد افراد الاسره ,, بعدد مستخدمين لشبكات المحمول يقارب ال 50 مليون مشترك

2- سطوح مصر مغطاه بالكامل باطباق الستالايت بكافة احجامها

3- 35 مليار جنيه هى حجم تجارة الاجهزه الكهربائيه فى مصر فى 2015

4- اكثر من 3 مليار دولار هى حجم تجارة سوق السيارات فى مصر 2016

وعلشان منقعدش نوجع فى قلب بعض كفايه كدا استفزاز بالارقام وتعالى اوجهك لاستفزاز من نوع تانى

تخيل بقى قمة الاستفزاز بعد كل الانهيار والمعاناه والفشل دا كله ان المصريين قرروا ان جواز عيالهم لازم يكون فى بيت مشتمل على كل الوان الرفاهيه لدررجة ان فى بعض المحافظات العروسه بتجيب لكل غرفه تكييف وفى الغالب الاعم العريس بيعمل غرفه للاطفال وهم لسه ميعرفوش ربنا هيرزقهم والا لآ ,, دا غير لمعة الذهب اللى بتدل على ان الناس العريس شارى وكل ما كان الدهب اكتر كان دليل على ان العروسه بنت ناس وتستاهل ودا مش مرتبط بالحاله الماديه لايا من الطرفين ,, لا عادى جدا والد العروسه ممكن يعمل قرض او يستلف او يبيع عربيته او ارضه او اى حاجه علشان يجوز البت والعريس واهله نفس القصه

وبعد كل الارقام دى والفشل دا والاستهتار دا واللامسؤوليه دى والنفاق المجتمعى دا تلاقى اللى طالع يصرخ ويقول (( البلد خربانه ))

اى عته هذا ؟؟

مبقاش عندى اى تعليق ممكن اضيفه فى الموضوع غير اننا فعلا وحقا وصدقا شعب عايز علاج نفسى قبل فوات الاوان .

سلام

[الأميرة رودي]

انا معاك أننا فى أمور تافهه بنصرف ببزخ .
وأشكال رفاهية سطحية بقت أساسية ومن ضمن اولويتنا.
ومعاك كمان أننا محتاجين علاج نفسي فى أمور كتير.
دراسه جميله وارقامك تعقد
حللت واقع رزل بنعيش فيه..
عجبنى موضوعك جداااا
تسلم ..

[فداااااااااااء]

لا يمكن ان يقوم شعب بإنتاج والدولة تستعمل مطرقة لتكسير عزيمته
العلماء لما فروا من بلدنا إلى الغرب من شجعهم على ذلك
الاختراع والتحفيز للمواطن من قضى عليه
دولتنا عايزة المواطن يعمل كل حاجة وهى بس عليها تعطى أوامر وتتفرج
المهام منقسم إلى اثنين دولة ومواطنين
وطالما كل طرف منفصل عن الآخر لا يوجد تعاون كما كان فى زمن الماضى فلا يوجد إنتاج ولا تقدم
طرح قيم انرت القسم اخى

[دمعه حائره]

احنا شعب مستهلك وعند الانتاج كسول
وفى اى مصلح او مؤسسة تلاقى الفساد وانعدام الضمير
شوف الصين واليابان وبرغم كل الكوراث اللى بتحصلهم لكنهم
بيقدروا يقوموا تانى وينهضوا ببلدهم لانه شعب شغال وعاوز ينتج
وده اللى ينقصنا برغم كل الموارد اللى عندنا فشلنا
تحليل قيم تسلم على المقال

[twitter man]

اقتباس المشاركة الأصلية كتبت بواسطة الأميرة رودي انا معاك أننا فى أمور تافهه بنصرف ببزخ . وأشكال رفاهية سطحية بقت أساسية ومن ضمن اولويتنا. ومعاك كمان أننا محتاجين علاج نفسي فى أمور كتير. دراسه جميله وارقامك تعقد حللت واقع رزل بنعيش فيه.. عجبنى موضوعك جداااا تسلم ..

الواقع الرزل هيتغير لما احنا نفسنا نتغير

نورتى الموضوع ,,

[twitter man]

اقتباس المشاركة الأصلية كتبت بواسطة فداااااااااااء لا يمكن ان يقوم شعب بإنتاج والدولة تستعمل مطرقة لتكسير عزيمته العلماء لما فروا من بلدنا إلى الغرب من شجعهم على ذلك الاختراع والتحفيز للمواطن من قضى عليه دولتنا عايزة المواطن يعمل كل حاجة وهى بس عليها تعطى أوامر وتتفرج المهام منقسم إلى اثنين دولة ومواطنين وطالما كل طرف منفصل عن الآخر لا يوجد تعاون كما كان فى زمن الماضى فلا يوجد إنتاج ولا تقدم طرح قيم انرت القسم اخى

الدوله مقصره ,, نعم ,, الاقتصاد منهار ,, نعم ,,

لكن

هل من المنطقى ان مع كل دا ان حياتنا تكون بالتفاهه والاستهتار واللامسئوليه دى ؟؟



نورتى الموضوع

[twitter man]

اقتباس المشاركة الأصلية كتبت بواسطة دمعه حائره احنا شعب مستهلك وعند الانتاج كسول وفى اى مصلح او مؤسسة تلاقى الفساد وانعدام الضمير شوف الصين واليابان وبرغم كل الكوراث اللى بتحصلهم لكنهم بيقدروا يقوموا تانى وينهضوا ببلدهم لانه شعب شغال وعاوز ينتج وده اللى ينقصنا برغم كل الموارد اللى عندنا فشلنا تحليل قيم تسلم على المقال

مينفعش المواطن الموزمبيقى يكون عايش برفاهية المواطن الهولندى ,, دا الفشل ذاته

نورتى الموضوع

[Words Whisper]

ماهي بردو مشكلة مرتبطة بالطبقات الحاكمة في مصر
لأن لهم استفادة منها
إيه اللي ممكن نخسره لو الحكومة وقفت الاستيراد لبعض السلع فترة من الزمن ؟!
الشعب كان عايش بالمنتج المصري ودا كان مخلي التاجر اللي بيشتغل فيه
يعمل منتج كويس لأن منتجه هيمشي
انما الوقت التاجر عارف ان المنتج المصري مركون ع الرف
فبآ المنتج المصري بجودة أقل حتى القطن اللي هو كان من أعلى المنتجات المصرية
معظم استيرادنا صيني لأن ببساطة الفرق بين سعر الشراء و سعر البيع مربح جدااااا للتاجر
خاصة منتج الدرجة التالتة اللي التجار بيختاروه للشعب المصري لزيادة الربح
أنا كمواطن هخسر إيه لو رجعت للمنتجات الوطنية دام هترجع لجودتها ؟
مش هخسر أي حاجه وهيرجع الجنيه له قيمة
لكن السيد التاجر و التجار اللي فوق هيخسروا كتير
عشان كدا الحكومة لم ولن تفكر في غلق الاستيراد لأي سلع
هما نفسهم تجار السلع دي ومستفيدين يبآ عادي بآ الجنيه يقع ..


موضوع قيم
شكراً لحضرتك ..
دمت بخير ..

[twitter man]

اقتباس المشاركة الأصلية كتبت بواسطة words whisper ماهي بردو مشكلة مرتبطة بالطبقات الحاكمة في مصر لأن لهم استفادة منها إيه اللي ممكن نخسره لو الحكومة وقفت الاستيراد لبعض السلع فترة من الزمن ؟! الشعب كان عايش بالمنتج المصري ودا كان مخلي التاجر اللي بيشتغل فيه يعمل منتج كويس لأن منتجه هيمشي انما الوقت التاجر عارف ان المنتج المصري مركون ع الرف فبآ المنتج المصري بجودة أقل حتى القطن اللي هو كان من أعلى المنتجات المصرية معظم استيرادنا صيني لأن ببساطة الفرق بين سعر الشراء و سعر البيع مربح جدااااا للتاجر خاصة منتج الدرجة التالتة اللي التجار بيختاروه للشعب المصري لزيادة الربح أنا كمواطن هخسر إيه لو رجعت للمنتجات الوطنية دام هترجع لجودتها ؟ مش هخسر أي حاجه وهيرجع الجنيه له قيمة لكن السيد التاجر و التجار اللي فوق هيخسروا كتير عشان كدا الحكومة لم ولن تفكر في غلق الاستيراد لأي سلع هما نفسهم تجار السلع دي ومستفيدين يبآ عادي بآ الجنيه يقع .. موضوع قيم شكراً لحضرتك .. دمت بخير ..

دا نص المشكله

لما المواطن يشترى منتج مزيف زى الاف المنتجات اللى بييجى اعلانات ليها فى قنوات فضائيه مشبوهه , وقتها نص المشكله على الحكومه اللى سمحت بدا والنص التانى على المواطن اللى اشترى

بشكل اعم تقصير الحكومه ميكونش المقابل ليه حياة الاستهتار اللى اغلبنا بيعيشها تحت دعوى ضروريات الحياه وكلام الناس .

نورتى الموضوع

[αЛαstoOorα]

آنت بتتكلم ف زمن غير الزمن؟
ف ناس غير الناس
ف حكومة ووقت غير الوقت
لو جدودنا عاشو ف ظل الآنفتاح الفكري
والثقافي والآبتكارات الحديثة ووصائل
الآتصالات السهلة دي ..كانو عملو اللي
آحنا عملناه .بس زودو عليهم شوية حاجات
1- الضمير
2-الآخلاق
3-الآيمان بالله
4-القيم
5-المبادء
...
ولو الحجات دي مش غايبة عننا دلوقتي
كان زمان بلدنا آجمل بلد بينا مش بالحكومة وبس
آنت ذكرت بعض حاجات وقولت عليها رفاهيه
ف ظل وقت جدودنا كانت ممكن تكون رفاهيه
آنما ف ظل وقتنا آحنا دي آساسيات معيشيه
تقدر تقولي مين شغلو بيمشي بدون موبايل دلوقتي؟
او نت؟
زمان كنت بتبعت تلغراف تقعد اسبوعين للرد عليه
دلوقتي الرد بيجيلك ف دقيقة ^^
تقدر تقولي لو انت راجل مقتدر وعيالك متبهدلين ف المواصلات
كل يوم من زحمة السكك..مش هتفكر تجيب عربية؟
مش رفاهيه ..علي قد ما هي حفاظ وتكملة معيشية وتوفير فلوس المواصلات كمان
في آساسيات ممكن تبقة ف نظر البعض ف زمنا رفاهيه
آنما هي آساسيات ف زمنا عشان زمن جدودنا مكناش 100 مليون واحد؟
كانت البلد فاضيه ..اتفرج علي اي فيلم ابيض واسود
هتحس ان دي مش مصر ..تحس انك ف فرنسا ولا حاجة
وبرغم قلة الآعداد دي ..كان فيه فقر؟ وكان فيه برضه ناس بتربط علي بطنها
وكان فيه ناس بتاكل لحمة كل شهر ..ف ظل ان كان في ناس ف نفس الوقت
جوة كل بيت ليهم وحدة بتشتغل مش عاوز اقول شغاله عشان مبحبش اقول كدا ؟
انت بتتكلم ف شباب نايم ف بيته..انا واحد من الشباب اللي وعيت علي مبارك
وعصر مبارك واللي مشوفتش فيه اي خير من يوم ما وعيت ع الدنيا
انا واحد مواليد 87 طلعت وكبرت لقيت مفيش شغل مفيش فهم مفيش تعليم
مفيش مفيش يا اما مفيش يا اما مش عارف وعشان اعرف واتكلم ابقة جاني
وانا المجني عليا ف الآصل؟
لو هتحاسب الناس علي عيشتها ..حاسب اللي كانو سبب ف حرمان الناس
30 سنة ؟؟؟
حاسب اللي آكلو مال اليتامة ومال الشعب ف كرشهم وظلمو آسر كتيرة
انا واحد من الشباب اللي كنت شاطر جداً ف تعليمي وانا صغير
وسبت تعليمي ومكملتهوش بسبب ظروف قهرية او ظروف معيشية آجبرتني لدة
واللي ساعد علي دا بلدي ..لآنها مفكرتش ف آسرة ممكن تتحطم بعد وفاة راعيها؟
انا بلدي معملتليش حاجة ..ولا آدتني حاجة وبرغم دا ..مستعد آضحلها بنفسي
لآن مش بلدي كا وطن هو اللي ظالم؟ حكومته الطاغيه هي اللي كانت كافرة
انا لو محاربتش ف الدنيا عشان اعمل لنفسي كيان وعمل..كان زماني دلوقتي
مرمي علي اي قهوة زي الشباب اللي ذكرتهم مش لاقي الجنيه...
لما حكومة بلدك تبيع بلدك وتبيعك معاها ..يبقة لازم تكون النتيجة شباب عاطل
وآقتصاد واقع ..وسواد ف سواد؟ القصة مش ف اللي بنشتريه وبنرفه بيه نفسنا
القصة ف آننا لو كل واحد مننا بيتولد ف البلد بيتعلم علام محترم
وبيتخرج والحكومة بتكفله كل مصاريفه وبعد ما بيتخرج بتاخدو من ايده
وبتوظفه وظيفة محترمة ف الشركات اللي كانت المفروض دلوقتي بتاعة الشعب
اللي معظمها آتخصص وآتباع ..مكنتش لقيت شاب عاطل
ومكنتش لقيت آنتاج آقل
ومكنتش لقيت آقتصاد واقع
آنما الحكومة هي اللي عملت فينا كدا ..الحكومة قالت يلا نفسي
وميت برميل سواد اسود ع الشباب والشعب ...
ودا اللي ضيع الاخلاق مننا وضيع الضمير جوانا وضيع عدم الآيمان
وخلانا ندبح ف بعض ونقتل ف بعض عشان الجنيه
لو هنتكلم ف مين السبب ف اللي آحنا فيه دلوقتي ..هقولك آحنا؟؟
بس عشان طلعنا لقينا نفسنا بنضيع ..واللي ضيعنا هما اللي فوق