قالي يابني الزمالك هو حياتنا ..!

[محمود الصاروخ]

البين سبورت نقلت ماتش افتتاح كاس القارات علي المفتوح
وهتنقل بكره وبعده ماتشات نصف النهائي ده غير ان ماتش النهائي
هيكون علي القناه المفتوحه نايل سات وللعلم القناه اتش دي
ــ
بس الحمدلله متنازل عن التعليق العربي
مهما يعملو باذن الله هنفضل ضدهم لحد ما ينتهي الاحتكار
تقريبا لحد دلوقتي بقيت السبب في ان ناس كتير جدا بتتفرج علي
ماتشات ببلاش ومن غير اشتراكات
مستمرين مع بداية المواسم الرياضيه الجديده ان شاء الله
وللعلم انا يا اما بحرك الطبق وبروح للتركي 42 شرق
او الاذري 46 شرق او الياه سات 52 شرق عشان اتفرج
ولو كسلت احرك الطبق بخليني في الاقرب
وبتفرج علي القمر الاسرائيلي اموس جنب النايل سات علي طول
اتفرج علي القنوات الاسرائيليه اللي بتحترم المشاهد الفقير
احسن ما اتفرج علي قنوات عربيه كل هدفها سحب فلوس
من المشاهد اللي المفروض يتفرج علي الكوره ببلاش

الصورة فيها قناة اسمها ( كان ) علي القمر الاسرائيلي
اللي حابب يتفرج كل اللي هيعمله هيحرك الطبق 3 سم بالظبط
نحية الشمال ومبروك عليه القنوات الاسرائيليه اللي بتنقل
دايما علي المفتوح ..


محمود الصاروخ

[محمود الصاروخ]

مش هقول كلام جديد لكن هقولك المفيد !
كالعاده وفي كل فرحه لينا دعوتنا عامه للجميع

بدأ العد التنازلي لفرحة محمود الصاروخ
20/7
راجل مجدع تخش ـ اما لو عويل تتنفي

في انتظار الفرحه
ويارب نلاقي مكان للفرحه


محمود الصاروخ

[محمود الصاروخ]

الحمدلله فرحتنا عدت علي خير
كان يوم جميل جدا بوجود كل الاحباب من كل مكان
لتاني مرة في حياتي دموعي تنزل
اول مرة مع وفاة والدي
تاني مرة مع فرح اختي
ربنا يعدي الايام اللي جايه علي خير


محمود الصاروخ

[محمود الصاروخ]

النهارده ماتش السوبر الاسباني او بمعني اصح كلاسيكو العالم
بين الريال وبرشلونه وهيكون منقول بالتعليق العربي علي ابو ظبي
واون سبورت بتعليق فهد العتيبي ومدحت شلبي لكن الحمدلله
مازلت متنازل عن التعليق العربي بشكل عام ومش مستني حد
منهم يجبلي ماتش كوره ببلاش لان في الاساس انا بتفرج ببلاش
ومش عاوزين ننسي ان ابو ظبي الرياضيه مشتركه في جزء
من الاحتكار واكتر الماتشات بتكون علي القنوات المشفره
ـ
كلاسيكو العالم انهارده هيكون معايا بنكهه تركيه
علي القمر التركي ان شاء الله ومازلت مستمر ضد
احتكار القنوات الرياضيه العربيه

محمود الصاروخ

[محمود الصاروخ]

انضف منكم
...

[محمود الصاروخ]

مدخلتش هنا من فتره طويله ومكنتش حابب افتح عموما
بس فتحت لتقديم عمل خاص بخصوص كاس العالم
والعمل ده مش هنا بس لا علي بيدجات كتير
علي الفيس لان ولله الحمد استفدت واخدت
خبره كبيره جدا في مجال السات الرياضي
وكان لازم يكون في تغطيه خاصه
للقنوات الناقله لمونديال روسيا
،،

الفتره الحاليه
كلمة الدنيا جايه عليا بضهرها ممكن تكون قليله علي الوضع
اللي انا فيه مقفول من كل حاجه حواليا سواء شغلي او حياتي
وكاره كل شيء صحابي قرايبي وبخسر حاجات كتير
لأتفه الاسباب وبالفعل خسرت شغلي حاليا
وصفيت من شغلي امبارح اللي تقريبا
كان واخد كل وقتي ومكنتش فاضي
خلال الشهور اللي فاتت كلها
،،

معظم الناس اللي هنا عموما كنا واخدين عنهم فكره كويسه
قبل ما نعرفهم او بمعني اصح لما كانت معرفتنا مقتصره علي هنا
بس للأسف وكالعاده لما بنقرب من حد بنعرف تمامه كويس
ناس ماشيه بـ مبدأ ماينفعش حد يخسرنا لازم احنا اللي نخسرهم
سامحنا كتير وعدينا كتير وقولنا عادي وفي الاخر كانت النتيجه
إحنا اللي وحشين ومنتعاشرش وبالرغم من ده بنفضل شاريين
وبنقول عادي جدا ويمكن يكون ده عيبنا الوحيد
،،

لأول مره في حياتي اكون عاجز تماما عن التفكير في اللي جاي
بعد ما سبت شغلي المفروض يكون في دماغي خطه للمستقبل
لكن للأسف النفسيه تحت الصفر بمعني الكلمه ومفيش اي تفكير
أهلي قرايبي صحابي احبابي حتي اعدائي
الكل ضدي وجاي عليا في وقت المفروض اني محتاج مسانده
من اي حد حتي لو كان غريب ـ ومش مجرد كلام
ومش عارف ليه الناس بتعمل كده ؟!
،،

تخيلو الحاجه الوحيده اللي فرحتني الفتره دي رساله علي الواتس
أيوه رساله علي الواتس من شخص المفروض كل معرفتي بيه
مكان شغل ويمكن محصلش تعامل بيني وبينه بس حس
بيا وحس باللي جوايا رساله جاتلي النهارده
شجعتني شويه اني أقف علي رجلي من جديد
واكمل واثبت للكل مين هو محمود الصاروخ
تفتكرو هقدر ؟؟!





محمود الصاروخ

[محمود الصاروخ]

تعب وبهدله بمعني الكلمه
من اجل الوصول لـمشروع العمر
باقي عن الوصول خطوات بسيطه ان شاء الله
دعواتكم ربنا يعديها علي خير
ـ،

اتعرض عليا ادخل شريك في كافيه هنا
هو حاليا اتعرف وبقي زي الفل وشغال ربنا يوسع رزقهم
بس شايفه مشروع بسيط ان يكون الموضوع
عباره عن كافيه بس ، ومبحبش الشراكه عموما
مغامره كبيره هبدأ فيها الشهور دي
هرمي فيها كل ما املك ،
هوصل ان شاء الله بس فعلا محتاج دعواتكم


محمود الصاروخ

[محمود الصاروخ]

الناس كلها بتقول اهلا هلا بالعيد
وانا اللي بقول اهلا اهلا بالشغل
،،


محمود الصاروخ

[محمود الصاروخ]

عجبوني المطبلاتيه اللي ظهرو الفتره دي
سواء علي النت او علي كافيهات مصر عموما
الكوره عمرها ماكانت منتخب مصر ولا عمرها كانت كاس عالم
الكوره حياه ومش اي حد يعيشها وده اللي مش قادرين تفهموه
اه وبخصوص المنتخب الحمدلله كان عندي حق
لما قولت بعيد تماما عن تشجيع المنتخب
وكنت واثق ومتاكد ان هيتم هتك عرضه في روسيا ههه


محمود الصاروخ

[محمود الصاروخ]

عارف يعني ايه تكون مع اتنين صحابك
شغالين مع بعض في حاجه معينه وبتهزرو وتضحكو
وكمان بتتفقو مع بعض انكو هتخلصو وتروحو تجيبو فطار مع بعض
وتقولهم ثانيه وجاي ويا دوب تديلهم ضهرك ومفيش ثانيه
والحاجه دي تنفجر في وشهم وترجع تلاقيهم راحو ؟
إحساسك يكون ايه في الوقت ده ؟
ــ
ربنا اراد يكتبلي عمر جديد في الوقت ده
بس هقول الحمدلله علي كل شيء
وربنا يرحم صحابي اللي ماتو
ويصبر اهاليهم
ــ
احنا كنا تلاته دايما مع بعض علي المره قبل الحلوه
وفي حد هنا في المنتدي كنت دايما بحكيله عن ابو سلمي
ولو قرا كلامي هيفتكره بس خلاص ابو سلمي دلوقتي في ذمة الله
ــ
دعواتكم
ولو حد زعلان مني في حاجه ياريت يسامحني
انفجار مركب بيراميزا ستار بالمنصوره
مركب الموت ..