دولة القانون....

[مارد الغضب]

قد لا يعرف الكثير من الناس ان زوجتي كانت مدرسة كيمياء متميزة
كانت عاشقة للكيمياء ..متيمة بها
ولكن كيف انهت خدمتها نهائيا كمدرسة؟
هذه هي القصة التي سأحكيها لكم...
في يوم فوجئت بإتصال هاتفي علي الارضي ...حضرتك زوج الست المصونة...نها
قلت للسائل ...نعم مين حضرتك؟
انا والد الطالب مصعب...عميد...مأمور قسم كذا...
اهلا بيك ...اي خدمة؟....
مراتك المحترمة ...اعطت الولد 2 من عشرة في اعمال السنة....ينفع كده؟
انا مليش علاقة بشغل مراتي..
بقي كده؟...انا بقي ليه علاقة....اي اي اي اي.....اغلق الخط
نسيت الموضوع تماما لكن في الصباح بمجرد دخولي عملي جاء الساعي مسرعا
كلم المدير حالا....
ذهبت الي المدير...كان وجهه مغيما....السلام عليكم
لا سلام ولا كلام...رئيس المباحث مصحيني من النوم بيسألني عنك و بيقول
انت متورط في قضية رشوة...حاولت افهمه انك في مكان يستحيل معه
تقاضي رشوة فلم يسمع....لازم تروحله حالا...نصيحة مني خد معاك محامي
كنت ناسي ما حدث بالامس...بعد نصف ساعة تقريبا اتصلت والدتي بي في العمل
حاول تستأذن و تيجي حالا ...بنتك اتفصلت من المدرسة..
ليه يا امي؟....و الله يا بني معرف....تعالي بس
استاذنت من المدير ..اذن لي...و هو يهز رأسه في اسي
بمجرد دخولي البيت رن جرس التليفون...الو ...ايوة يا حبيبتي ...انت فين دلوقتي
انا جي حالا....ايه اللي بيحصل النهاردة..مراتي في القسم ...ولد عمل فيها تقرير طبي
انها ضربته...هذا لم يحدث من قبل ابدا ..فهي لا تستعمل عصا..هي مدرسة ثانوي بنين
اتجهت الي القسم...بمجرد دخولي ...تم القبض علي..بطريقة سيئة جدا
في غرفة رئيس المباحث ..وضع قدمية علي المكتب في وجهي..و بطريقة وقحة
انت يا يلا...تعجبت جدا..انت بتقولي؟....هو فيه حد غيرك...غير سيدك اللي وراك
كان المخبر خلفي..و بمجرد استدارتي رن القلم علي وجهي....بص للباشا ...
استدرت بكل غيظي وكلت للمخبر العديد من الضربات حتي ادميت وجهه...انا لست ضعيفا
تركت المخبر شبه فاقد الوعي واستدرت للضابط بكل عنف ...اعتدل ووجه مسدسه في وجهي
و ضغط الجرس فدخل عسكري تبعه اخرون
امرهم الضابط بعدم مسي او اهانتي و لكني رفست مكتبه بقوة ...و صرخت فيه..فين مراتي
امرني بالهدوء وقال لي باحترام غريب مريب..اتفضل اقعد و بعدين نتكلم
صرخت فيه ..عايز اعرف فين مراتي...صرخ في وجهي بصوت عالي جدا..قلتك اهدي...يا محمد
هات المدام من تحت..باحترام...
هدأت وجلست...اخرج المخبرين حتي المخبر الجريح.....عزم بسيجارة....مبدخنش
قال لي بهدوء ...الكلام اللي حقوله دلوقتي سر بينا..انت مزعل الباشا ليه
باشا مين؟...تذكرت في الحال وربطت الخيوط...بقي كل ده علشان 2من عشرة...انا مليش
دخل بشغل مراتي...انا اصلا بكره الكيميا ..وكنت بنجح فيها بالعافية
المهم دلوقتي نصالح الباشا علشان زعلان قوي...المدام جاية دلوقتي كلمها تديه 9 بلاش عشرة
دخلت زوجتي بكل شموخ و انفة انا اعرفها جيدا واعرف انها لن تتراجع
ترك لنا المكتب وخرج....اخبرت زوجتي بالاحداث و بالمكالمة قالت لي الولد فاشل و فاسد
يا ستي مش مشكلة اهله عاوزينه كده....صممت علي رأيها ...اخبرتها ان ابنتنا انفصلت
قالت و لو...اخبرتها انني متلفق لي قضية...قالت ربنا حيظهر الحق
قلتلها بيتنا حيتخرب ...الناس دي متعرفش ربنا...محدش بيموت من الجوع
دخل الضابط ...ايه نروح نصالح الباشا...قلت له لا يا باشا اتخذ اجراءات التلفيق المدام عايزة
تخرب بيتنا...البلد بلدكم يا باشا بس هي اللي مش عايزة تفهم
هز الضابط رأسه في يأس...قرار نهائي...هززت رأسي اي نعم
قال لي انا مش حعملك حاجة بس المدام حتتحول للنيابة مع تقرير زفت ..اتفضل انت دلوقتي
و المدام حتفضل لحد متتحول للنيابة....ترقرقت دمعة في عين زوجتي و لكنها رفعت انفها في شموخ
في النهاية حكم القاضي بعدم اهليتها للعمل كمدرسة و احالتها للعمل الاداري
فاستقالت

[.نبض القلوب.]

قصة ممكن تحصل ف الزمن اللي احنا فيه
مع صعوبة حدوثها شوية

بس قصة جميلة جدا و مشوقة

اتمني المزيد

تحياتي ،،

[شاعرة الرومانسيه]

حاجه تحزن فعلا لكن احب اقولك أبو اسماء

طظ فى منصب تُذل فيه النفس

ويتحرف المال الى يكسر صاحبه

وده مش حال مراتك بس

ده حال ناس كتير فى مناصب كتير

ولا حد حاسس ولا حد سامع

الله المستعان

[حازم34]

تصدق بالله حبيبي ان مراتك دي تستاهل الكثير والكثير والكثير

يااااه علي الجمال في الكمال في المراقبه لله الديان


اسال الله ان يجزيها عنا خيرا وان يبارك لها

وان يحفظها ويرعاها ويحفظ من رباها

ويبارك لها في اولادها وزوجها

واسال الله ان ينتقم من الفسده والمجرمين

اسال الله ان يحفظكما

من اجمل القصص المهم الهادف

تسلم يا راقي بحبك في الله

والله

[فداااااااااااء]

اظنها انها واقعية لحد كبير

نحن من نصنع الفرعون لكى يتحكم فينا

نحن من نرخص القانون بتهاونا
لو كل فرد كان مثل تلك الزوجة ما استطاعوا ان يكسروا النفوس
ولكن للاسف هناك من يضعف لذا هونا

سلمت اخى واصلح الله الحال

[السفيره عزيزه]

يسقط يسقط حكم الباشا
البشوات فى مصر كتير كتير
البشوات عندنا انتاج محلي احنا السبب
احمد ربنا ال جات على كدة .
هناك قصص لا يتخيلها عقل ابطالها
بشوات العار. الله المستعان.

وعند الله تجتمع الخصوم
وكل محاسب على فعلة.

تحياتى واحترامي

[Lamees]

تحية احترام واعزاز لهذة السيدة
التي رفضت الذل من اجل المباديء
لا يهم المناصب في الدنيا
او كل ما في الحياة كلها
المهم لا نخسر انفسنا ونسقط من اعيننا

قصة واقعية كتير وتحدث اكثر
دام التميز

[مارد الغضب]

اقتباس المشاركة الأصلية كتبت بواسطة .نبض القلوب. قصة ممكن تحصل ف الزمن اللي احنا فيه مع صعوبة حدوثها شوية بس قصة جميلة جدا و مشوقة اتمني المزيد تحياتي ،،

.
بالفعل فالقصة لها جذور حقيقية
سعيد بتشريف حضرتك
تحياتي لسموك

[مارد الغضب]

اقتباس المشاركة الأصلية كتبت بواسطة شاعرة الرومانسيه حاجه تحزن فعلا لكن احب اقولك أبو اسماء طظ فى منصب تُذل فيه النفس ويتحرف المال الى يكسر صاحبه وده مش حال مراتك بس ده حال ناس كتير فى مناصب كتير ولا حد حاسس ولا حد سامع الله المستعان

.
شكرا لتفاعلك حنين
و لو الست دي مرااااااااااااتي
مش عارف كنت حتصرف ازاي
حقيقي الموقف صعب
تحياتي لسموك

[مارد الغضب]

اقتباس المشاركة الأصلية كتبت بواسطة حازم34 تصدق بالله حبيبي ان مراتك دي تستاهل الكثير والكثير والكثير يااااه علي الجمال في الكمال في المراقبه لله الديان اسال الله ان يجزيها عنا خيرا وان يبارك لها وان يحفظها ويرعاها ويحفظ من رباها ويبارك لها في اولادها وزوجها واسال الله ان ينتقم من الفسده والمجرمين اسال الله ان يحفظكما من اجمل القصص المهم الهادف تسلم يا راقي بحبك في الله والله

.
احبك الله يا اسد
علي فكرة القصة من نسج الخيال
و لكنها رصد للواقع المرير وتجبر الباشا
علي الغلابة
فنحن نعيش في دولة البشوات
تحياتي لك يا دك