حبه ليا للاسف كان هزار........

[RoSita]

للاسف اول انسان حبيته بجد وكان كل حياتي وعشان احنا في ارياف مش بنعرف نشوف بعض الا صدفه وكمان مش بنتكلم الا على الموبايل والنت بس.
المهم حبني وعشمني بحجات كتير اوي
كان كل حلم احلمه لينا اروح اقولهوله وهو يوعدني بانه هيحققلي كل احلامي
حتى الجواز كان دايما يقولي عقبالنا. انشاء الله لما هنخلف باه هنسمي ايه...........
كان دايما كلامه كدا معايا............كان اوحش حاجه فيه غروره ........وكان اي حاجه تحصل مني من غير تفاهم يبعد عني ويسبني وفي النهايه ارجعله واقوله معلش........ومن غير ما ازعله يختفي برده كده ولا يكلمني على الموبايل ولا حتى يرد على رسايلي على الايميل .........
واللي انا مستغرباله انه لو شافني في مكان ميسبنيش لوحدي يفضل مراقبني من بعيد.......
ولو رحت مكان يجي ورايا ويسيب شغله.......ويدور عليا ويقلي كلام حلو واوقات تانيه ولا يعبرني ولا يكلمني ولا حتى يطمني عليه...................مفكرشي مثلا ليه انا متمسكه بيه كده حتى لو زعل مني في اي حاجه...............
متمسكه بيه لاني حبيته بجد ومقدرتش في يوم مفكرشي فيه
صورته دايما في خيالي وصوته دايما معايا
في اي مكان بحسه ويايا...........ولو غاب عني شويه اقلق واسال النجوم عليه ونادي على القمر واقوله هو بخير ولالا............
مش بيفوت يوم الا ما افكر فيه ..............
لو مكنتش بفكر فيه مكنتش كتبت الموضوع ده اصلا
انا زهقت وتعبت خلاااااااااااااااااااااااااااااااص معنتش قادره استحمل ببكي ومحدش حاسس بيا
بصرخ ومحدش بيسالني مالك؟؟؟؟؟؟؟
بنادي عليه ومش بيرد عليا ..................
!!!!!!!!!!!!!!!!!!!!!!!!!!!!!!!!!!!!!!!!!!!!!!!!
بحبه اوي ومش قادره ابعد عنه وحاولت كتييييييير انساه لكن مش قادره
صورته مش بتفارقني
ضحكته منورالي حياتي
بشوف بعنيه الدنيا
شايفاه هو احلى حاجه حصلتلي في حياتي
مش عارفه اعمل ايه تعبت بجد

[حروف مبعثره]

دموع الفرح يسعدنى انى اكون اول واحده ترد عليكى بس فيه حاجه مهمه لازم تعرفيها ان الحب مش الى بيعمله حبيبك والغرور ملهوش مكان فى الحب وانا حاسه انه بيستغل حبك ليه»»سورى من غير زعل
يعنى ايه ولا يعبرك ولا يرد على رسايللك دموع عايزه اقللك خلى باللك من تصرفاتك يعنى انا شايفه انك بتحبيه بجنووون وتقريبا ده الحب الاول بس حبيبتى لو فوقتى على جرح كبير هتكون صدمتك قويه يعنى حاولى تبعدى شويه عنه متظهريش له حبك الزائد ولو اشتاقللك وقدر بعادك يبقى بيحبك وقابل للتغير ولو مسألش فيكى يبقى ابعدى عنه عشان متنجرحيش منه وياريت كلامى ميزعلكيش ولى عوده مره اخرى لسماع تعليقك
مرسى على الموضوع

[RoSita]

تسلميلي حبيبتي على ردك ده وانا اكيد مش زعلانه خالص من كلامك بس انا حاولت قبل كده ابعد وفعلا قررنا نبعد عن بعض شويه مستحملتش غصب عني والله
انا حبيته بجد ده فعلا كان اول انسان احس معاه بالامل والابتسمامه والامان
انا فعلا بحبه بجنون
مش عارفه اعمل ايه لكن انشاء الله هعمل بنصيحتك وهحاول لاني بجد تعبت اوي
ميرسي يا حبيبتي

[نوجا]

انا بجد حسه بيكى قوى وفعلا اول حب صعب تنسيه بسهوله بس
حاولى تمسكى وتقوى واشغلى وقتك باى حاجه مفيده انا حسه
بيكى لانى بمر بنفس الظروف الى انتى بتمري بيها يس مش بالظبط
بس انا عارفه انه صعب قوى تنسى اول حب بس ربنا يقويك
شكرا ليكى بجد ربنا يقويك وخليكى جمده معاه وقويه

[RoSita]

ميرسي ليكي اوي يا نوجا
اكيد ردودكوا الحلوه دي اللي بتصبرني
لكن اوعدكوا اني هحاول انساه
هحاول ابعد عنه
بس ادعولي
ميرسي اوي

[محمد الشريف]

دموع الفرح

معذرة فى الرد :


أتصور أن هوان النفس على صاحبها / تها ..... أسوأ من كل سوء وليس عيبا أن نخفق

فى تجاربنا ولكن كل العيب أن نكابر ونظل نتوهم ونزيف لأنفسنا بل ونوهمهما بكل مايشل

قدراتنا على التميز ويكون على حساب النفس التى غالبا ما نرهقها بلا تفكير ثاقب واعى

فالعواطف لدى الإنسان من أرقى المشاعر فلما نتركها بلا بصر ولا بصيرة فالذى أدركه

أن الحب الصادق والعاطفة الجياشة يخفق لها قلب المحب الصادق ولابد من مبادلته إما

بما يوازيها ويوازنها أو بأكثر ... عموما أرى أن التخلص من داخل النفس من تلك الآثار هو

بداية الصواب ونوقف استنزاف أعمالنا فى وهم وخيالات وسراب فجميع لحظات أعمارنا

محسوبة علينا سواء رضينا أم أبينا والحياة بها الحالين السعادة والشقاء ولنا من العقل

والتدبر ما يعصمنا من العبث بمشاعرنا وشقاء أنفسنا .

مع تحياتى

[smsma666]

دموع باختصار شديد هو ما حبك هو بالمعنى الالعامى لعب بيكى واخدك تسليه اللى بيحب بيبقى مهتم باللى بيحبه وبيعمل اى حاجه علشان يرضيه لكن اللى بتحبيه عمل عكس كل الحاجات دى مفروض تفوقى شويه من هذا الوهم
وعايز اقولك معلومه الود يقدر يحب 50 بنت فى وقت واحد ويبين لكل واحده انه بيحبها هى وبس لكن البنت لما تقع فى الحب مش بتقدر تتخلى عنه بسهوله ارجوكى خذى هذه الكلمات وفكرى فيها كويس واوعى تتضعفى وحافظى على كرامتك واوعى تخلى اى حد مهما كان انه يقلل من شانك او يهين كرامتك وده مش واحد بيحب ده واحد بيتسلى انا عارفه ان كلامى فى اندفاع وهجوم عليكى شويه بس فى النهايه انتى زى اختى واتمنى لكى كل خير وسعاده

[AmoOonA]

انا ملاحظه كده انك بتحبيه زياده عن الزوم وهو ميستهلش دا بيتسلي بيكي ومش بيحبك اللي بيحب بيعمل كل خير لحبيبته ولاحظي كمان انك من ارياف يعني الحاجات دي مرفوضه عندكم اكيد ولو حد عرف من بلدكم هتكون فضيحه ليكي ولاهلك
فحاولي انك تنسيه وانا اقولك تنسيه ازاي
اول حاجه بطلي تسمعي اي اغاني
تاني حاجه لو لقيتي نفسك بتفتكريه اعملي اي حاجه تشلغك ومتقعديش لوحدك حاولي تعملي اي حاجه تشغلك علشان تنسيه
وتقربي لربنا اوي واقري قران وصلي
وصدقيني هتنسيه علي طول لو عملتي كده
ادعي لربنا انوا يهديكي وتنسي لان دا مش حب دا بيلعب بيكي
وخلي بالك من نفسك كويس

انا نفسي اساعدك ونفسي تنسيه خالص لانك زي اختي

[AmoOonA]

ونسيت اقولك يا ريت تشيلي من توقيعك كلمه بحبه اوي علشان تنسيه بجد

[amr nad]

انا بجد حاسس بيكى قوى بس ياريت تفكرى شويه لان الحب مش اذلال والحب مجرد من اى غرور اوتكبر لان المفروض انتوا روح واحده والا ايه ياريت تحسى بشخصيتك اكتر من كده وبكيانك كامراه ليها كل الحق فى عمل كل شىء لاثبات ذاتها لانك بكده كائن غير موجود على الهامش
انا مش عايزك تزعل منى او من كلامى لانى بجد عاوز مصلحتك وياريت تعتبرينى زى اخوكى