انا مجرد عابر سبيل فى الدنيا

[طارق طروق]

وسائل الاعلام وكل من هب ودب كان بيهاجم النقاب
وسبحان الله محدش دلوقتى بقى بيهاجم النقاب
حتى فى الخارج كانوا بيهاجموا اى مسلمه كانت ترتدى
النقاب ليه بقى مافيش مهاجمه للنقاب؟
لأن العالم كله بقى بيرتدى النقاب
حد هيقولى انت مجنون يا طارق ايه الكلام الفارغ
اللى بتقوله ده ازاى بقى العالم كله بيرتدى النقاب؟
هقوله الكمامه اللى بتتلبس دلوقتى عشان الكورونا
هى النقاب صح ولا غلط يا متعلمين يا بتوع المدارس
والله هى فكره وخطرت على بالى سواء اقتنعتم ولا مقتنعتوش دى من ضمن العقاب الربانى
واتحدى فى العالم كله ان اى لطخ يطلع تانى يهاجم النقاب
بس كدا وخلص الكلام
باى بقى

[طارق طروق]

من حوالى كدا بتاع اسبوعين اللثه بتاعتى كانت تعبانه
تم الاتصال بالطبيب اتشرح الوضع له قال بسيطه
دا نتيجه نقص فيتانين سى عندك خده وهترتاح
جبت علبه واحده فقط لا غير واستعملتها لحد ما خلصت
هى عباره عن فوار ارتحت عليها قولت اجيب علبه كمان
تخيلوا الناس سحبت كل علب فيتامين سى من الصيدليات
بتاعت مصر كلها ال ايه عشان اكتشفوا فجأه ان فيتامين سى
مهم للكورونا وبيدى مناعه احنا احسن شعب يعمل ازمات للسلع انا مرضتش ساعتها اشترى كذا علبه قولت لما تخلص اجيبها غيرها لو كل واحد عمل كدا هيبقى مافيش ازمه
مش بقولكم احنا شعب متخلف وبقول احنا عشان انا من نفس الشعب لحسن حد يفتكرنى هندى ولا بلاجاديشى
ربنا يهدينا جميعا

[طارق طروق]

الحب فى زمن الكورونا
ده مش عنوان فيلم او مسلسل تلفزيونى
بنت جارتنا كانت معجبه بى وبصراحه مكنتش حاطط فى دماغى اى شىء ناحيتها غير كل ود واحترام
بصفتها جارتنا وده مش تعالى منى لسمح الله
كانت مفاجئه لى وهى تسألنى سؤال واحنا فى الاسانسير
وتقول لى هو انت عندك قلب زينا كدا؟
هو انت مش حاسس بى لحد دلوقتى؟
بصراحه انت مغرور ومنتظرتش اى رد منى ومشت
فكرت فى كلامها وقولت دى مجنونه اكيد
حب ايه فى الكرب اللى احنا فيه ده
دا الواحد معرض للموت اى وقت
يمكن تكون نظره تشاؤميه منى لكن ده واقع
لأننا فى الشغل فى الموقع اللى بعمل فيه
كانت ظهرت حالات كورونا لبعض الزملاء معانا
وربنا سترها معانا بعد ما عملوا لنا اختبارات
والحمد لله الزملاء شفوا من الكورونا
يعنى معرضين للخطر اى وقت يبقى ازاى
الواحد يفكر فى الحب اصلا
طب والله والله انا ما عندى اى غرور خالص
ما علينا

[طارق طروق]

النهارده السبت والحظر هيكون زى ما قالوا
من الساعه 12 بالليل لحد الصبح
بسم الله ما شاء الله والقهاوى والمطاعم وغيره وغيره هتفتح
بس بشروط ما شاء الله ما شاء الله
دا على اساس بقى ان الكورونا خلاص اتخلصنا منها؟
ولا على اساس ان حالات الاصابه بتخف يوميا؟
طب حد يفهمنى عشان انا مش فاهم
منين بتقولوا ان حالات الاصابه بتزيد يوميا
ومنين بترفعوا الحظر للدرجه دى؟
هقول ايه غير ان لينا رب اسمه الكريم
بسبب شعب مش حاسس بالخطر اللى احنا فيه
دا معظم الناس من ساعه ما عرفوا قرار الحظر الجديد اللى هيطبق من اليوم وهما خلعوا الكمامات
عليه العوض ومنه العوض

[طارق طروق]

لو سمحتم يا جماعه
حد يقولى ازاى اقدر اقفل حسابى هنا فى المنتدى؟
واذا كانت الاداره هنا هى اللى مختصه بكدا
ياريت اى حد من الاداره يلبى لى هذا الطلب
وشكرا

[طارق طروق]

اهلا بكم جميعا بعد غياب طويل وكل سنه وانتم جميعا بخير
وسعاده وربنا يرفع عنا جميعا البلاء فى هذه السنه الجديده