كنـــت زمـــــان

[شاعر الحب الحزين]

كنت زمان بحس الأمان

من بسمة حبيب ولهفة صديق

أيامها إحساسي كان

بيرسملي خطوتي ف كل طريق


لمـا كانـت الدنيـا دي ميـزان

العدل ف كفة والناس في كفة

كان اللي يغلط ملوش فيها مكان

يتحاسب على غلطه ويتشفى

دلوقتــي خــلاص اتغيــر الزمــان

والظلم زاد علينا وكفى ووفـى

بقى الظالم في زمننا هو الإنسان

والمجرمين اطفال لسه في اللفة!!


كنت زمان بشوف الدنيا بضحكة طفل بريء

كنت رافع راسي فوق لما كان العربي جريء

ولإيمتا هتصدم فيهم بيموت إحساسي بالبطيء


كنت زمان بنسى الدنيا وانا ف حضن حبايبي

دلوقتي بيبقوا معايا وهموم الدنيا جوه قلبـي

من كتر تفكيري فيا وف ناس غيري

فكري شارد بقول ضايعة حاجتي وهي جنبي

خايف ومش عارف خايف من إيه

تايه مني ولسه مش لاقيني ليه

بموت وقاتلني السكوت بتعاقب على ذنب مش ذنبي


كنت زمان وده كان زمان

وياريت اللي كان ما كان

لو اعرف ان الضحكة هتبكي

لو اعرف ان الطيبة هتشكي

لو اعرف ان اخر طريق الفرح احزان

لكنت قفلت بابي قبل ما يقفله عليا الزمان




( شيء صعب جدا لما تنصدم بكل حاجة حواليك من ناس وأصحاب

وحبايب وأوطان وحاجات تانية كتير وكل يوم تقول بكرا يتغير الحال وييجي بكرا

أصعب من اللي قبله بس مش بنفقد الأمل في ربنا سبحانه وتعالى مهما يحصل

ومهما يكون الإختبار الرباني شديد ليميز الخبيث من الطيب فنحن على أبواب النهاية

بدعي من قلبي يارب بكرا يحمل معاه السلام لكل الناس الأبرياء والفرج لكل مظلوم

والعقاب لكل مجرم وطاغية ويجمع بين الأحبة بكل خير وسلام يارب يارب )




شــــــــــــــــــــــــــــــــــــ . حــــــــــــــــــــــــــــــــــــــــ

[العقل الباطن]

وصفتنا كلنا ..
و فى الآخر دلتنا على المشكله
و كل واحد فينا قراره فى إيده
إما شاكراً و إما كفوراً
شكراً رجعتنى لآيام كنت فعلاً نستها

[*فجر الاسلام*]

كويس جدا فى الاخر عندك امــــل كبير بربنا
لان هو الوحيد اللى مش هيخذلنا ابدا وهيفرج عننا كل الهموم
كلامك رائع اخى الله يسعدك يارب

[شاعرة الرومانسيه]

يااااه طيب ليه النظره السودويه دى ياخالد

خلينا بالفرض لا لينا احباب ولا أصحاب ولا حتى لينا أهل

لكن فيه ربنا الى لايمكن ينسانا ولا يظلمنا

لازم نعيش حتى لو لوحدنا المهم نعيش

ونعترض على الى بيحصل لنا حتى لى بأفعالنا

المهم نثبت اننا عايشين وجوانا قلب بينبض

اراح الله قلبك خالد

[دمعه حائره]

الصدمات على قد ماهى مؤلمة
لكن بتفوقنا وتعرفنا ازاى نعيش صح بعدها
كلمات رائعه ابدعت خالد

[فداااااااااااء]

وكل ما يمر بينا العمر هننصدم كمان وكمان
الحياة كدا اتغيرت والناس اللى جواها كمان اتغيروا
لاعجب من اى شيء نشوفه خيب ظننا فيه زمان
الله يصلح الحال للافضل

دام نبض قلمك ساطعا بكل قيم
سلمت اخى شاعر
لروحك السعادة

[العاشق الذى لم يتب]

زمان ومااحلاه
اتغيرت الدنياخالص
واهو بنتعلم وتستفيد
ونبقى اقوياءمع الصدمات
تسلم خلودة
فى كل الحدائق انت تتجول
دمت بخير

[SaMa.]

قوولت كل الكلام الل جوايا
ثانكس خالد

[Lamees]

نقاء زمان راح من زمان
حالة من الذهول من هول ما نلاقي
ولكن الله المستعان
هون عليك اخي
فالغد افضل بأذن الله
وظني فيك ياربي جميل
تسلم خالد

[جبل عالي]

والأصعب ياخالد ... لما تيجي تبوح ولا تفضفض
تلاقي الكلام تقيل والحروف عاصية عليك
والسطور تايهه ....

يكفي انك عبرت عما بصدور الكثيرين
سلمت يمينك وسلم نبضك وقلمك