مصر تصعد لـ امم افريقيا - ولكن ..

[محمود الصاروخ]

السلام عليكم ورحمة الله وبركاته
--



صعد منتخب مصر للبطوله المحببه أمم افريقيا بعد الفوز أمس
علي منتخب تنزانيا بهدفي العالمي محمد صلاح ولكن تبقي
بعض النقاط التي يجب أن نتحدث عنها بشكل عام
لاننا لا نعلم كيف يسير كوبر في الوقت الحالي

أولا - لا اعلم لماذا يبدأ كوبر مبارياته ب تريزيجيه
وفي الوقت نفسه يتم استبعاد لاعبين هم افضل منه بمراحل
وقد يتفق معي البعض في هذا الامر لانه لم يلعب مع فريقه
سوي علي فترات متباعده للغايه وقد لا يلعب أيضا وهذا
إن دل علي شيء يدل علي انه غير جاهز لبدء مباراه
رسميه مع منتخب مصر وهذا ما شاهدناه سواء
في مباراة امس أو مباراة نيجيريا السابقه

ثانيا - يبقي احمد فتحي صاحب الخبره الكبيره سواء مع الاهلي
أو مع المنتخب ولكن في الوقت الحالي احمد لا يصلح للعب
مع منتخب مصر وهناك لاعبين أفضل منه يجب الاعتماد
عليهم فيما هو قادم وهذا أيضا شاهدناه في مباراة
امس منتخب تنزانيا كان يخترق فقط من جبهة
احمد فتحي بسبب سوء أداءه من بداية المباراه

ثالثا - مروان محسن مهاجم محلي مميز ولكن لا يصلح لمنتخب مصر
وقد يتفق معي البعض بأن عمرو جمال أو باسم مرسي في الوقت
الحالي أفضل منه بمراحل ويجب الاعتماد عليهم فيما هو
قادم بالاضافه لمهاجم الزمالك باسم مرسي لاننا بالفعل
في المرحله القادمه يجب أن نعتمد علي لاعبين
دوللين فقط بعيدا عن المحلي لصعوبة
المباريات في تصفيات كاس العالم

رابعا - منتخب مصر يعاني من منطقة وسط الملعب بشكل عام
في ظل وجود لاعب الارسنال محمد النيني وهذا ليس عيب منه لانه
لا يوجد لاعب في العالم يستطيع ان يقود وسط الملعب وحيدا ولذلك
أتمني أن يتواجد حسام غالي فيما هو قادم في ظل وجود النيني وحامد
وعبدالله السعيد وبالرغم من أن السعيد لم يقنعني اليوم ولكن يبقي
لاعب مهم في تشكيلة منتخب مصر في الفتره القادمه

وفي النهايه نبارك لمنتخبنا علي هذا الفوز المهم ولكن لابد
أن نتعلم من أخطائنا لكي لا يتكرر معنا سيناريو ماضي نحن في غنا
عنه لكي نكمل مشوارنا بنجاح ونستطيع أن نحقق الحلم ونصل
للبطوله الاغلي في العالم وهي كاس العالم

أخيرا - التشكيل المميز لمنتخب مصر من وجهة نظري في الفتره القادمه

في حراسة المرمي
احمد الشناوي

والبديل له
جنش

قلبي الدفاع
رامي ربيعه - علي جبر

والبدلاء لهم
سعد سمير - علي جبر

باك شمال
محمد عبدالشافي

والبديل له
كريم حافظ

باك يمين
حازم امام

والبديل له
المحمدي

وسط الملعب
طارق حامد - النيني

والبدلاء لهم
حسام غالي - ابراهيم صلاح

صناع اللعب
كهربا - صالح جمعه - صلاح

والبدلاء لهم
رمضان - عبدالله السعيد - مصطفي فتحي

المهاجم
باسم مرسي

بديل له
كوكا

( اسئله للنقاش )

- رأيك في اداء المنتخب أمام تنزانيا ؟؟
- برأيك ماهو التشكيل الامثل لمنتخب مصر في الفتره القادمه ؟؟؟



تحياتي لكم محمود الصاروخ

[سَـلمَى]

للأسف المتش فاتني ومعرفتش أتابعه

وكالعادة بستشف ملخص المبارة ومستوى اللعيبة من تعليقات

الجمهور في مواقع التواصل .. الأغلببب أشاد الحضري ومحمد صلاح

وإنبسط بالكلام ال إتقال عل الحضري .. رغم إنه كان في نسبة تخوف من مستواه

لكن الكبير كبير بقى .. ♥

بالنسبة لمحمد صلاح في تطور لاحظوه إنه بدأ يجيد الضربات الحرة وأتمنى إنه
يتطور ويتدرب فيها أكتر ..

بالنسبة لأحمد فتحي وعبدالله السعيد ممكن في مبارة يظهرو بمتسوى أقل من المعروف ليهم
لكن بالمقابل بيبدعو في مباريات كتيرة ..

وباقي اللعيبة محدش إتكلم عنهم كتير ..

وأتمنى إنه نشوف لعيبة أمهر بتاخد فرصتها منهم عمر جمال وباسم مرسي زيي ما قلت

المهم الفوز الحمدلله .. والجاي أتمنى يتصحح إن شاء الله

وبالتوفيق دايما لمنتخبنا ..

تششكر عل الطرح يامحمود

تـََـحياتي ليك يا كابتن ..

[Stop Ana Eltop]

حازم امام اساسى والمحمدى بديل !!
كل كلامك صح وبالذات نقطة مروان محسن بس
جنش والشناوى كويسين جدا بس اى ضربه ثابته بجول ودا مايخليهمش الاختيار الوحيد فى المنتخب
معرفش بحس نفسى الوحيده الى بشوف على جبر ثغره فى الدفاع مهواش كويس ليه دويدار احسن منه بالنسبالى ويمكن حجازى كمان

غير كدا كلامك تمام بس محدش هياخد بيه

تسلم لمجهودك
بالتوفيق

[morshooo]

طيب انا بس ف كام نقطه
منها احمد فتحي لو هتشوف هتلاقي ان فتحي
كان لوحده ف وسط اتنين لان صلاح مكنش بيساعد
والا حامد والنني كانو بيرمو علي فتحي فكان سهل الاختراق
حازم امام مبقتنعش بيه مع المنتخب عمره ماكان ليه
اي بصمه مع انه مع المنتخب من فتره

خط الدفاع ربيعه و حجازي انسب مدافعين ف مصر
ويدخل معاهم سعد و دويدار ومحمود عزت .

تريزيجيه بيلعب برا مصر لانه سريع وكدا كدا
انتا بتلعب علي الهجمات المرتده واهو جابلك
فاول جبت منه الجول ودي كفايه مباراه نيجيريا هناك
اخترق بكورتين كانو ممكن يعملو حاجا لو فاكر .

مروان محسن مفيش مساعده انتا معملتش اي هجمه
منظمه ومكنش ف اي تكتيك ف الملعب اساسا .
انا عن نفسي مش مقتنع الموسم دا لا بباسم والا عمرو جمال
ومايستحقوش الدخول ف المنتخب اساسا .

اخيرا انا مع انضمام
عمرو بركات
لاعيب ممكن يخلصلك مباراه معقده لانه صاحب تسديدات
ومفيش لاعب ف المنتخب بتشوفه بيسدد الفتره الحاليه .

المهم وصلنا لكن الواحد مش مطمن .

[حازم34]

اولا كل سنه وانت بالف خير اخي الجميل محمود ورمضان مبارك عليك انت ومن تحب


مبرووووك تاهل المنتخب
..
للاسف كنت مشغول ما شاهدت مباراه الامس


اولا تنزانيا مش فريق لاختبار قدره المنتخب


ولكن اتمني يكون فيه فعلا اختبار قدره ومهاره اللاعبين


واشكرك اخي الجميل علي التعليق والتحليل


الجميل انت نجم من يومك منور

والله

[محمود الصاروخ]

اقتباس للأسف المتش فاتني ومعرفتش أتابعه وكالعادة بستشف ملخص المبارة ومستوى اللعيبة من تعليقات الجمهور في مواقع التواصل .. الأغلببب أشاد الحضري ومحمد صلاح وإنبسط بالكلام ال إتقال عل الحضري .. رغم إنه كان في نسبة تخوف من مستواه لكن الكبير كبير بقى .. ♥ بالنسبة لمحمد صلاح في تطور لاحظوه إنه بدأ يجيد الضربات الحرة وأتمنى إنه يتطور ويتدرب فيها أكتر .. بالنسبة لأحمد فتحي وعبدالله السعيد ممكن في مبارة يظهرو بمتسوى أقل من المعروف ليهم لكن بالمقابل بيبدعو في مباريات كتيرة .. وباقي اللعيبة محدش إتكلم عنهم كتير .. وأتمنى إنه نشوف لعيبة أمهر بتاخد فرصتها منهم عمر جمال وباسم مرسي زيي ما قلت المهم الفوز الحمدلله .. والجاي أتمنى يتصحح إن شاء الله وبالتوفيق دايما لمنتخبنا .. تششكر عل الطرح يامحمود تـََـحياتي ليك يا كابتن ..

بالرغم من أن الحضري لم يختبر الاختبار الكامل في المباراه لكي نحكم
عليه من خلالها ولكن تبقي هذه البدايه مبشره للحارس الافضل في تاريخ مصر
لحين عودة حارس مصر الاول احمد الشناوي ويعود الحضري ليكون بديل
للشناوي أو يتألق اكرامي من جديد ويعود ليكون بديل للشناوي
الافضل في هذه الفتره لحماية مرمي منتخب مصر هو الشناوي

ومن الواضح أن خطة كوبر في الفتره الحاليه مبنيه علي محمد صلاح
وهذا قد يشكل خطورة علينا فيما هو قادم وإن دل علي شيء يدل علي
أن كوبر يلعب المباريات بدون فكر يليق بمنتخب مصر

يبقي عبدالله السعيد مهم جدا في تشكيله منتخب مصر في الفتره القادمه
أما عن احمد فتحي أرجو متابعة اللقاء كامل وهتتاكدي انه لا يصلح
لمنتخب مصر في الوقت الحالي بالرغم من تألقه مع الاهلي

الاهم من الفوز في الفتره القادمه لابد أن نلعب مباريات وديه قويه
ونبدأ ندخل اللاعبين المحترفين لاننا دخلنا في الجد

منوراني دايما سلمي
تسلمي علي مرورك

[محمود الصاروخ]

اقتباس حازم امام اساسى والمحمدى بديل !! كل كلامك صح وبالذات نقطة مروان محسن بس جنش والشناوى كويسين جدا بس اى ضربه ثابته بجول ودا مايخليهمش الاختيار الوحيد فى المنتخب معرفش بحس نفسى الوحيده الى بشوف على جبر ثغره فى الدفاع مهواش كويس ليه دويدار احسن منه بالنسبالى ويمكن حجازى كمان غير كدا كلامك تمام بس محدش هياخد بيه تسلم لمجهودك بالتوفيق

حكمت علي حازم بناءا علي مشاركته مع الزمالك في الفتره الاخيره
لو وجدنا بديل أفضل من حازم امام يبدأ اساسي مع منتخب مصر في
الفتره القادمه مفيش أي مشاكل ومن الممكن ان يبدأ المحمدي
كأساسي أيضا مش شرط حازم يبدأ اساسي وبالتأكيد اختي
الفتره القادمه قد تظهر لاعبين أفضل من حازم في الدوري

بخصوص مركز حراسة المرمي
الشناوي وجنش في الوقت الحالي هم أفضل حراس علي مستوي الدوري
بل الاقل اخطاء لانه لا يوجد حارس بدون اخطاء علي مستوي العالم
ولكن حينما يتم اختيار لاعب لمنتخب مصر يتم اختيار الاقل اخطاء
وبمتابعة مستوي الشناوي وجنش مع الزمالك بالفعل هذا المستوي
يؤهلهم لحماية مرمي منتخب مصر بعيدا عن الحضري لانه لم
يختبر في هذه المباراه الاختبار الكامل وماتنسيش ان اللي جاي
هيكون بمثابة كسر العظام والحضري الان ( 43 ) سنه
هل يمتلك الحضري اللياقه الكامله لإيقاف الهجوم
الشرس من مهاجمي افريقيا ؟؟؟

مش وحيده ولا حاجه في نقطه علي جبر وبالفعل علي قد يخطيء
ولكن هو الافضل والحكم هنا أتي بناءا علي مشاركته ايضا مع الزمالك
أما دويدار لم نشاهده من فتره مع الزمالك لأسباب الاصابه تقريبا والله اعلم
أما حجازي أرجو التركيز علي اداءه في الفترات الماضيه والمقارنه
بينه وبين علي جبر واختيار الافضل

ماهي الا وجهات نظر علي ورق فقط اختي
من أجل منتخب مصر ومش لازم حد ياخد بكلامنا
والكلام في الكوره عموما متعه بعيدا عن أي شيء

منوره من جديد بقي
^_^

[محمود الصاروخ]

اقتباس طيب انا بس ف كام نقطه منها احمد فتحي لو هتشوف هتلاقي ان فتحي كان لوحده ف وسط اتنين لان صلاح مكنش بيساعد والا حامد والنني كانو بيرمو علي فتحي فكان سهل الاختراق حازم امام مبقتنعش بيه مع المنتخب عمره ماكان ليه اي بصمه مع انه مع المنتخب من فتره خط الدفاع ربيعه و حجازي انسب مدافعين ف مصر ويدخل معاهم سعد و دويدار ومحمود عزت . تريزيجيه بيلعب برا مصر لانه سريع وكدا كدا انتا بتلعب علي الهجمات المرتده واهو جابلك فاول جبت منه الجول ودي كفايه مباراه نيجيريا هناك اخترق بكورتين كانو ممكن يعملو حاجا لو فاكر . مروان محسن مفيش مساعده انتا معملتش اي هجمه منظمه ومكنش ف اي تكتيك ف الملعب اساسا . انا عن نفسي مش مقتنع الموسم دا لا بباسم والا عمرو جمال ومايستحقوش الدخول ف المنتخب اساسا . اخيرا انا مع انضمام عمرو بركات لاعيب ممكن يخلصلك مباراه معقده لانه صاحب تسديدات ومفيش لاعب ف المنتخب بتشوفه بيسدد الفتره الحاليه . المهم وصلنا لكن الواحد مش مطمن .

انا هاخد من كلامك النقط اللي هعلق عليها بس لاني ممكن اكون متفق
معاك في بعض النقاط ودي معجزه عموما ان اتفق معاك في حاجه
وانت عارف ان النقاش في حد ذاته حاجه حلوه وبحبها فيك

بخصوص أحمد فتحي ياغالي
عاوزك تتابع اداء عمر جابر في المباريات السابقه
واداء احمد فتحي في مباراة امس امام تنزانيا والحكم صح
عمر جابر كان لاعب لـ لاعب مكنش حد بيعدي وكان بيقاتل علي كل كوره
وده اللي احنا محتاجينه في الفتره الحاليه في المركز ده بالتحديد بعد
عودة عبدالشافي لان في غياب شيفو كان الاختراق بيكون من الشمال
الان مع عودة شيفو وسد الثغره الموجوده في الشمال الاختراق هيكون
من اليمين وعشان كده بقولك عاوزين لاعب مميز في المنطقه دي
واما عن النيني وحامد ف حان وقت انضمام حسام غالي للمنتخب
ومع عودة حسام عاشور قد تتزن المنطقه تماما
بس نفسي اشوف المدرب بيلعب بخطه حلوه
مش باصي لصلاح وسيبها علي الله


بخصوص خط الدفاع
انت شايف ان علي جبر مستواه لم يؤهله للعب أساسي مع المنتخب ؟؟
قد تكون وجهات نظر ولكن انت حكمت بناءا علي ايه ؟؟

أما بخصوص تريزي وبالفعل هو من المواهب الموجوده في مصر
ولكن انت قولت بيلعب بره مصر قولي بقي ياغالي هو لعب كام ماتش
مع فريقه بره ؟؟ وعموما بيتم اختيار أي لاعب للمنتخب بناءا علي
مشاركته مع ناديه وتريزي مع فريقه وعدم مشاركته تدل علي انه
غير جاهز علي الاطلاق وعن موضوع السرعه عندك كهربا
سريع ومهاري في نفس الوقت ولو هتحكم بناءا علي كده
يبقي كهربا بقي اسطوره لانه بيخترق وبيعدي وبيضيع
مش كده ولا ايه ؟؟ طيب محمد ابراهيم ولا تريزي ؟؟

بخصوص خط الهجوم
باسم مرسي وكوكا هم الافضل في الوقت الحالي

بخصوص موضوع التسديد
يوجد عبدالله السعيد صاحب التسديدات القويه ينقصه فقط التركيز
والتدريب عليها بالرغم من انه لم يقنعني في المباراه

بالظبط وصلنا مورشو
ولكن الاداء مش مطمن تماما
وحاسس اننا هنكون حصاله في الفتره القادمه

منورني دايما ياكبير

[محمود الصاروخ]

اقتباس اولا كل سنه وانت بالف خير اخي الجميل محمود ورمضان مبارك عليك انت ومن تحب مبرووووك تاهل المنتخب .. للاسف كنت مشغول ما شاهدت مباراه الامس اولا تنزانيا مش فريق لاختبار قدره المنتخب ولكن اتمني يكون فيه فعلا اختبار قدره ومهاره اللاعبين واشكرك اخي الجميل علي التعليق والتحليل الجميل انت نجم من يومك منور والله

وانت طيب يابو قلب طيب
منتخب مصر لعب المباراه بلا اداء وبلا خطه
والاعتماد الكلي كان علي محمد صلاح فقط لاغير
وهذا ان دل علي شيء ف يدل علي اننا نمتلك مدرب
لا استطيع وصفه سوي بالفاشل

بالتوفيق فيما هو قادم
منورني دايما حازم باشا

[Stop Ana Eltop]

اقتباس المشاركة الأصلية كتبت بواسطة محمود الصاروخ حكمت علي حازم بناءا علي مشاركته مع الزمالك في الفتره الاخيره لو وجدنا بديل أفضل من حازم امام يبدأ اساسي مع منتخب مصر في الفتره القادمه مفيش أي مشاكل ومن الممكن ان يبدأ المحمدي كأساسي أيضا مش شرط حازم يبدأ اساسي وبالتأكيد اختي الفتره القادمه قد تظهر لاعبين أفضل من حازم في الدوري بخصوص مركز حراسة المرمي الشناوي وجنش في الوقت الحالي هم أفضل حراس علي مستوي الدوري بل الاقل اخطاء لانه لا يوجد حارس بدون اخطاء علي مستوي العالم ولكن حينما يتم اختيار لاعب لمنتخب مصر يتم اختيار الاقل اخطاء وبمتابعة مستوي الشناوي وجنش مع الزمالك بالفعل هذا المستوي يؤهلهم لحماية مرمي منتخب مصر بعيدا عن الحضري لانه لم يختبر في هذه المباراه الاختبار الكامل وماتنسيش ان اللي جاي هيكون بمثابة كسر العظام والحضري الان ( 43 ) سنه هل يمتلك الحضري اللياقه الكامله لإيقاف الهجوم الشرس من مهاجمي افريقيا ؟؟؟ مش وحيده ولا حاجه في نقطه علي جبر وبالفعل علي قد يخطيء ولكن هو الافضل والحكم هنا أتي بناءا علي مشاركته ايضا مع الزمالك أما دويدار لم نشاهده من فتره مع الزمالك لأسباب الاصابه تقريبا والله اعلم أما حجازي أرجو التركيز علي اداءه في الفترات الماضيه والمقارنه بينه وبين علي جبر واختيار الافضل ماهي الا وجهات نظر علي ورق فقط اختي من أجل منتخب مصر ومش لازم حد ياخد بكلامنا والكلام في الكوره عموما متعه بعيدا عن أي شيء منوره من جديد بقي ^_^

حازم امام ماينفعش الا انه يجرى ويسبق بس كتير من حركاته مش مظبوطه خصوصا فى الخطوه الاخيره

على جبر كويس مع الزمالك عشٱن كوفى بيغطى عليه مش كويس عشان هو كويس
يمكن اخطاء الدفاع فى الزمالك والالشات الى بتعدى بسلامه باعجوبه مرجعها لعلى جبر