عنتر وشوقية ( دويتو ساخر)

[د/ عبد الله]

م اليوم ده لازم تركعي
تاخدي الأوامر تخضعي
أأمر أُطاع...من غير نزاع
وإياك من أمك تسمعي

ف البيت ده سيدك عنترة
هتكوني جارية ومجبرة
جَدّ وهمام...عايزك تمام
وتكوني ثابتة ومسطرة

أديكي م المصروف جنية
عدّي ورايه تجيــبي أيـه
لحمة وخضار...لبّ وفيشار
وان فاض فلوس هاتي بانية

عايزك تكونـي منعنشة
أصلـي بحب الفرفشة
أسهر كتير...أدخل أمير
ألاقيكي واقفة بالعشـا



إياك فاكرني بخاف وأكش
ده أنت ما شوفت يا حلو وش
شوفت الدلع...جيت ف الطمع
من النهاردة هدوس وأفـش


أنا اللي كنت معاك كيــوت
من الناموسة بخاف وأموت
معرفتنيش...ولا شوفتنيش
هزاري بس يدوب شلـوت

مصروفـــي هو مرتّبـك
أحسن يا عنتر هفضحـك
وهقول بخيـل...وطلعله ديل
وخلــي بخلك ينفعــك

وإن جيت ف يوم بعد أما أنام
وتقولي أقوم.. من غير كلام
هدّيك ف وشك...أو أطير ف كرشك
وتروح على أمك كده باحترام


افتح ودانك يا حلو ليا
أنا سـت قادرة ومفترية
لو أنت عنتر...يا حلو سكر
هتبقى عبلة مراة شوقية

[ويبقى الأثر]

هههههههههههههه
والله جميله
قادره شوقيه دى وعنتر يستاهل احسن
حروف خفيفه وحلوه
يسلم قلمك ووجودك دكتور

[شاعر الحب الحزين]

الله الله الله الله الله الله

إيه التنوع الجميل ده والروح الحلوة دي يا دكتور

من أروع ما قرأت لقلمك بالعامية

متنظمة متنغمة بالإبداع متلغمة ..عيني يا عيني ما احلاها

امتعتني بجد يا دكتور

يدوووووم تواجدك يا غالي

ربنا يوفقك ويسعدك

[راجعة لحبيبى]

فعلا كلمات ساخره
وظفتها لتوصيل الفكره
الاروع حروفك شاعرناعبدالله
تسلم
لروحك السعاده

[.Lamar]

معرفناش عنترة هيعمل ايه
هيديها مرتبه و لا هيثبت على الجنيه

جميلة اخى عبد الله
و مختلفة عن كتاباتك
تحياتى و تقديرى

[ساحرة القلوب.]

جميل جدا تسلم ايدك

[*فجر الاسلام*]

هههه جميله اوى يا دكتور ربنا يسعدك يارب

[همس الكناريا]

هي دي الستات عجبتني شوقية

ماهو كمان رافع سيفه من اول القضية

وواخدها من الأول عافية

جميلة جداااا
تسلم ايدك دوك
احترامي

همس الكناريا

[αЛαstoOorα]

من آصعب الآساليب ف الكتابة هو الشعر الساخر
لآن الكلمة اللي بتخرج لازم يكون ليها معني ودلاله
ف القصة اللي بتسردها بخلاف آنك بتختار كلام
بيلونه المعني بالون وشكل كوميدي وعشان يخرج
للناس والناس تضحك آو تبتسم دا لوحده نجاح
/
آنت عملت دويتو ساخر من آرقي وآجمل المعاني
غير آنك آخترت فكرة ومضمون واقعيين ..
بخلاف الوزن اللي مشيت عليه مسطرة وخرجت
القصيدة بتسلسل لحني غنائي ودا شيئ
يُحتسبلك كا كاتب مُتمكن وخلينا نقول شاعر ^^
/
آحساس رائع
كلمة ورسالة
وزن وتمكُن
مقدرش آقولك غير آنك آبدعت ف الدويتو
وكمان لو آتجهت لكتابة الآشعار الساخرة
هتكون بطل فيها بصراحه لآن اللون منك
طالع ملهوش حل ...ومتهيآلي ملكش مُنافس
ف الحتة دي..
//
الله ينور ياكبير

[حازم34]

اولا ابارك لك الاشراف وهو فخر لنا استاذي وشاعرنا الجميل استاذ الكلمه ومن يظهرها بالجميل


اديب وشاعر طليق ما شاء الله حفظك الله ورعاك


تستاهل الجميل دائما


وعنتر بقي وشوقيه


كلمات جميله حلوووووووه


خفيفه ولون جميل نحبه بيحكي واقع برضك زي الراجل ابو كرش جوز سعديه ال كتبت عنه فجر الاسلام ولها مني التحيه


ما شاء الله تبحر بقلمك في عذب الكلمات وجمالها وتنسج لنا كل ما هو جميل


تسلم والله دكتورنا الحبيب ومنور دايما لاحرمنا الله تواجدك الراقي استاذي