..فـضـٌـفـض مَــع الًـآعضآء (1)الـخيـًآنه"

[حـيـــــآة ❤]

السلام عليكم ورحمه الله وبركاته

موضوع فضفضتتنا النهارده عن الخيانه مممن يكون شائك قليلا

لكن قبل ما ابدأ.. حابه اتكلم عنه بطريقتي

الخيانه:فعل مذموم له اسباب واطراف واساليب وانواع عديده

الخيانه لاتقتصر علي خيانه المرأ لحبيبه او خيانه الزوج والزوجه

الخيانه ممكن تكون من اي طرف قريب من الشخص



آنا بعتت للاعضاء السؤال دا "هل تعرضت للخيانة سابقا؟
طبعاً البعض مفهمش السؤال من اي جانب وحاولت معاهم وبرده مفهموش

وبعض الاعضاء فضلوا عدم الاجابه علي السؤال لحساسيته

والبعض امتلك الشجاعه وحكي.. وبعض الاعضاء مردتش اصلا

ف البدايه حابه اقولكم ان اي موضوع وله نهايه ونحن اقوي من اي تصرفات تجرحنا
انا شخصياً تعرضت للخيانه مره واحده لما حكيت سري، لواحده
وطلعت مش قد السر.. بالتالي خربت الدنيا اهي دي، خيانه الاصدقاء



تعالوا نشوف الاعضاء كان رآيهم ايه.

SaMa
ايوة اتعرضت لخيانة وكانت طعنة موش قادرة انساها
ولا لاقيا علاج للجرح دة ومخليني معنديش ثقة ف حد
من يومها..
بس سعات احنا بنكون السبب عشان بنعيش اغبيا
موش تفرق نوعها اية عشان لما بتحبي موش بتفكري دول بنسبالك اية


واد حبيب
مين يقدر يخون محمد رمضان اقتلها زي ما قتلت شهد هههههه
فعلا الخيانه انواع
ومفيش حد فينا مش اتعرض ليها
انا اتعرض للخيانه مره من زمان
وبسببها بكره البنت دي دلوقتي علي الرغم ان كنت بحبها اوي




ساحرة القلوب.
هههه الصراحة لسة متعرضش بس هتعرض اكيد هههههههه
انا اللي اعرفو اكتر نوع بيجرح الانسان
خيانة الحبيب اللي هو بيكون ف مقام صديقه واخوه
______________________________________
ههههههه ه دة اللي اعرفو




۩۩ elMagic ۩۩
لا مافتكرش
اها عارف انها انواع
تقدري تقولي كده مدخلتش ف العلاقه
اللى توصلنا لمرحلة ان وقت ما يبقى فيه غدر نسميها خيانه
عاادى علاقاتى باعرف احجمها كويس وكل شئ وله آخر
ولكل شئ حدوده وإيطاره اللى مبيخرجش عنه
وبالتالى دا شئ بيتوقف عليك .



دي عضوه طلبت عدم ذكر اسمها.. وكانت فضفضتها:

انا مش عندي حكايه خيانه عن صديقه او قرايب او كلام من دا
يمكن الخيانه اللي شوفتها ف حياتي كانت حب بس
عرفت واحد وبعدها بفترة حبينا بعض قعدت ف موضوع الحب دا حوالي سنه
خروجات .. كلام للصبح .. فيس .. اشوفه ف الراحه والجايه
حاجه كفايه انها تخلي الواحد مبسوط وبيقول انا شكلي بجد بحب
قبل م تعدي السنه بشهرين .. كلامه اتغير .. طباعه اتغيرت .. كل حاجه تقريبا
بقا عصبي جدا ..
انا عن نفسي م استنيتش
سالته ..
انت مش بتحبني .. قالي انا مش هكذب عليكي انا كنت بحبك
قلتله انت مش بتحب حد تاني قالي لا..
اجا اليوم اللي بعده وف المدرسه لقيت بنت اكبر مني بسنه جيتلي
بتقولي انا اللي كان "...." قايلك عليا امبارح
مستوعبتش نفسي الا والدموع ماليه عنيا
ورحت كلمته بعدها رد ببرود وقالي .."مش انا امبارح قلتلك"
معرفتش ارد غير اني قلتله ربنا يسعدكم ويخليكوا لبعض
ومن وقتها انا اللي بخليهم يتصالحوا لو متخانقين .. انا اللي بساعدهم انهم يكملوا
لحد ما هي اللي سابته ..
وحبت واحد غيره ..
اصله "كما تدين تدان "
....
القصه التانيه
حبيت واحد وكانت فترة قصيرة شهر بس
برده نفس النظام خروجات ومقابلات كل يوم وكدا
بعد الشهر بدا يبان نفس موضوع العصبيه وانا مش فاضي ووو
وسمعت اصحابي بيقولوا دا خاطب وبيتسلي
فكلمته قلتله انت خاطب صح
قالي لا هو انا لو خاطب هخاف منك
قلتله بس انت خاطب وانا مقتنعه بكلامي
وقلتله خلي بالك من نفسك وووو.
بعدها بفترة وصلني كلام انه بيتكلم عني ودي شمال وبتكلم كذا وبتروح وتيجي مع كذا وكذا وووو
مش عارفه ازاي فيه ناس كدا
بس كل اللي اعرفه انه كما تدين تدان ..




راجعه لحبيبي
هلافيك هاجر
منورانى ومفرحانى
الله يفرحك قولى امين
طبعااتشرف اشارك
انتى تامرى
الحمدالله ماتعرضت لخيانه الحبيب ابد
لكن خيانه صديقتى كنت اثق فيهامره
واحكيلهاكل اسرارى
واخذ شورتهاواعمل بيهادون تفكير
لكن اكتشف انهاتحقدوتغيرمنى بدون سبب
ويوم تشور علياكانت تشوربالغلط علشان تبغانى اخسر
واخرمره شارت عليا وقالت لازم تسوى شي
تخلى حبيبك مايتعذب
قلت واش اسوى
قالت تعرفينه انك اتخطبت وبعد انتى ماتتعذبين ولاهو يتعذب
وسويت بشوريتهاوكانت وبال عليا
الله لايسامحها



همس الكناريا
أكيد اتعرضت لخيانة صديقة ليا

كانت أعز أصدقائي وكانت أكبر طعنة ليا منها

الحمد لله علي كل حال




فصيح

في مجال الشغل حصل ، ودا بدرجه في خانة حب الوصل السريع
مثال نتفق على طريقة شغل معين في اجتماع مغلق فنلاقي
تفاصيل الاجتماع بالكامل اتسربت لمدير ما او
رئيس قسم منافس لينا ، دا قصدي
اما في جانب العاطفه بحسبها توفيق وعدم توفيق
والحمدلله لم يحصل ما يسمي خيانه بمعناها



معنا عضو طلب عدم ذكر اسمه ايضاًوكانت حكايته

الحقيقة أيوة إتعرضت لها
والسبب كان الثقة الزايدة فى الناس ..

هو موضوع محرج شوية بس حكون صريح معاكى
كنت إتعرفت على صديقة على الفيس
وكنا زى الاخوات تمام ومن كثرة ثقتى فيها
أمنتها على اعز سر ليا وهو إرتباطى عاطفيا
وبعد فترة وجدتها أصبحت صديقة للانسانة إللى حبيتها وكنت ناوى إرتبط بيها
وحصل سوء تفاهم مع الانسانة إللى كنت هأرتبط بيها وإدخلت هى ما بينا على أساس الاصلاح
بس للأسف الشديد كانت بتعمل العكس وتولع هنا وتولع هناك وتنقل الكلام للاتنين بالخطأ
فى إحدى المرات لقيتها بدون مناسبة إعترفت إنها بتحبنى رغم إنها عارفة إرتباطى وحبى بأخرى
وأحنا ربما تحل بعض العوائق ما بينى وبين حبيبتى
ويتم بعدها الارتباط
فوجأت بها تعلن حبها ليا .
الحقيقة إستقبلت كلامها بالصدمة والاسنغراب
وكررت عليها الكلام
فأكدت على حبها ليا رغم علمها بإرتباطى بآخرى ,, الصدمة وقتها لجمت لسانى وكنت فى شدة الحرج وبعد فترة إستجمعت قواى وفهمتها إنها اعز اخت ليا واكيد عارفة مشاعرى إتجاه حبيبتى وتمسكى بيها إلا إنها لم تمل ولا تكل ولم يغمض لها جفن
حتى أوقعت ما بيننا وفرقتنا بالاضافة إلى تشويه صورتى بسبب رفضى لها ..

إنتهت اكيد علقة الصداقة والاخوة
بالبلوك للاسف



ملك جبال الاحزان
خيانة حبيي لا
خيانة صداقه اه للاسف ومش خيانة غدر
بس تقصير من ناحيتهم بسبب انك ادتهم مكانه كنت فاكر انهم يستاهلوها
بس للاسف الاهتمام الزيادة بيتقلب الضد




مارد الغضب
السلام عليكم
انا لم اتعرض للخيانة و لكن حدث ان اتهمت بالخيانة
بعد تخرجي توسط لي احد اصدقائي للعمل في شركة كبيرة
كان والده هو الشيف الرئيسي فيها و صديقي كان المقرب
لصاحب الشركة
و لكن بعد التحاقي بالعمل نلت ثقة صاحب العمل
و كان يستدعيني كثيرا الي مكتبه
كنت سعيدا بهذا القرب و لكن بدا ان صاحبي كان غير سعيد
و بدأ يتغير من جهتي و لكنه لم يفصح عما بداخله
و ذات يوم فوجئت به يدعو كل الزملاء في العمل لحفل الخطوبة
الا انا..حدث هذا امامي
تألمت كثيرا و لكن قررت عدم سؤاله امام احد
و عندما انفردنا قلت له بألم ليه عملت كده
اجابني انا حر...كان غليظا قاسيا
ازداد حزني و المي
كنت الوحيد المسموح له بالنوم في الاستراحة الخاصة بصاحب الشركة
و كنت مقيم فيها بأمر صاحب الشركة
و كانت الطامة الكبري عندما زاد مرتبي للضعف دفعة واحدة
قاطعني صديقي تماما و بصورة معلنة بل انه اعلن عداوته
و ذات يوم اخبرني صاحب الشركة انه بلغه عني انني افحش في الاستراحة
حزنت و اغتممت و قلت له لم يحدث فقال لي اني اصدقك
و لكن ظل الجرح في قلبي مفتوحا لا يندمل
و لاني كنت شديد الحاجة الي المال فلم امتلك الشجاعة للاستقالة
و بدأ صديقي يحتك بي جسديا يريد شجارا رغم تيقنه من انني اقوي
منه بكثير فقد كنت امارس كمال الاجسام و التايكندو
و بدا واضحا ان احدنا يجب عيه الانسحاب و الاستقالة من الشركة
و كنت قررت تقديم الاستقالة و قمت بكتابتها بالفعل
و عندما قدمتها للمدير المباشر اشر عليها بالرفع لرئيس الادارة
و في اليوم التالي عقد اجتماع كانت قراراته كالتالي
رفض استقالتي...ترقيتي للعمل كمدير للفرع...نقل صديقي لفرع اخر
و هكذا لم اعد اراه و لكني لم اتخلص من نظرة الغيرة و الحقد
في عيون زملائي...بعضهم قالوا عني جاسوس...و البعض قال بصاص
و البعض قال سيكا
و ذات صباح دخل والد صديقي فرحبت به و مددت له يدي و لكنه رفض
و قال لي انا مسلمش علي خاين العيش و الملح
فقلت له انا عملت ايه يا عمي
فقال لي انت خباص و دحلاب ابني زرعك و انت قلعته
ثم خرج
و غادرت الشركة بعده و لم ارجع لها ثانية...بعد ان تركت رسالة اعتذار
لصاحب الشركة الكريم
و بعد اقل من سنة طرد الشيف و ابنه من الشركة
و بعدها بقليل استلمت وظيفتي و انا اليوم مدير ادارة بل قولي انني
اصغر مدير ادارة في الجمهورية بأمر من المحافظ السابق رغم انه
لا يعرفني و لا اعرفه و لكنه رأني في موقف واحد و رأي تصرفي
فأعد قرار بترقيتي لمدير ادارة رغم لحيتي الكبيرة
هذه حقائق حدثت معي بدون زيادة او مبالغة
بقي ان اقول لكي انني لم اذكر صديقي بسوء ابدا بل العكس صحيح
و لكن صاحب العمل حذرني منه كثيرا




Eng Esraa
بصي هو مفيش موقف حصل معايا قبل كده و سميته خيانة من حد
اي ان كان بانهي صورة .. بس انا بشوف انك لما تحتاجي لوجود حد
معين جنبك ف وقت معين و يمشي .. يمكن يكون اسمها خيانة !
لو كده فعلا ابقي انا اتعرضت لها و طبعا مواقف كتير لو فضلنا
نفكر فيها هنلاقيها ف اخرها كلمة خيانة بردوا ...
ربنا يبعدنا عنها جميعا ..




آعتذر آن اطلت عليكم.. دي كانت فضفضه الاعضاء ومشاركتهم معايا
وبجد اسعدتوني جدا بمشاركتكم الراقيه
اتمني انتوا كمان تشاركونا رايكم عن الموضوع دا

تحيــًاتي.. "
انتظروني مع فضفضه اخري باذن الله

[Eng Esraa]

هاجر .. التوبيك كان جميل جدا
و الاراء كلها كانت مفيدة بجد
تسلمي ع مجهودك ده ..
متابعاكي بقا
بالتوفيق

[همس الكناريا]

حلقة جميلة هاجر

رغم وجع الفضفضة عن موضوع أصعب ما يكون وهو الخيانة

في انتظار باقي الحلقات

ودمتي بخير حبيبتي

همس الكناريا

[حازم34]

ما شاء الله فكر جميل وراقي واسراء للفضفضه بكل ما هو مهم ومفيد


الخيانه هي اثقل شئ علي القلب وتؤلمه وتوجعه بمجرد ذكرها ونعوذ بالله منها


لان الخيانه ضد لاجمل كلمه ينشرح لها الصدر وهي الامانه


والخيانه هي خلق دنئ تقوم به النفس البشريه الحاقده التي لاتعرف معني التربيه والخلق الجميل


ولكني اقول بالنسبه لخيانه الرجل لزوجته او خيانه المراه لزوجها كما هو معروف فهذه تسميه خطا


لان الخيانه في ها الامر تكون خيانه لله سبحانه وتعالي


لان الله امر بامر ونهانا عنه فاذا اقترفته نكون قد خنا العهد مع الله


والخيانه تتاتي من الثقه الزائده كما سمعنا وراينا من كلام الاخوه والاخوات في حوارتهم التي هي فيها الافاده والدلاله علي

الثقه الزائده عن الحد


والكثير منا وقع في ها الامر فعلا


وكانت عاقبته شديده ولربما ادت الي المرض النفسي


كما نري من الحقد والحسد الدائر بين الاصدقاء في امر ما ويكون ها الصديق او الصديقه قد اخبر عن شئ في نفسه لمن


وثق فيهم وكامنت الطامه الكبري بافشاء ما كان بينهم


ولربما الثقه بين الناس ولربما زوج ياتي بصديقه الي منزله اي نعارف اسري ويبدا الشيطان الذي هو في صوره انسان


يتدخل لافساد حياه صديقه التي يراها مثالا للجمال او تتدخل زوجته وهذا يحدث خيرا


الخيانه ايضا حينما ياتمن الرجل صديقه ويدخله بيته وتتعدي نظرات الصديق ويخرج من بيت صديقه


يتكلم عن اشياء لربما رائها صدقه


الخيانه سوء خلق وادب ولا يرتكبه الا قلب حاسد بغيض


نسال الله العفو والعافيه وان يحفظنا ومن نحب من ها الخلق السئ


موضوع جميل والله اختي الغاليه حياه


ربي يحفظك ويسعدك ويبارك في عمرك


وتحياتي الي الاخوه والاخوات المشاركين فعلا موضوع وبرنامج يستحق الاشاده


لكم مني خالص التحيه والتقدير

[راجعة لحبيبى]

تسلمين هاجر
مره حلوالبرنامج
تجارب الاخرين نتعلم منهااكيد
تسلمين
ويسلنواكل المشاركين

[ساحرة القلوب.]

جميل يا حياة
تسلمي ع المجهود الراقي تبعك

[شاعر الحب الحزين]

برنامج جميل يا هاجر

مارد الغضب انت رجل والرجال قليل

ولأن نيتك صافية ..ربنا هو اللي رفعك وعلا شأنك سبحانه وتعالى

سر فأنت في الطريق الصحيح..ولا تهتم بالحاقدين والحاسدين..كن مع الله ولا تبالي

واوعى تخسر عملك عشان أي مخلوق بعد كده..لأن اللي هتخسر عملك عشانه..هو عايز خسارتك بس


وبالنسبة للعضوة اللي رفضت ذكر اسمها ..واتخدعت مرتين

بقولها اصبري وان شاء الله ربنا يعوضك ب ابن الحلال اللي يسعدك

ما تيأسيش من اللي حصلك..وف نفس الوقت متأمنيش لأي حد


والباقيين بتمنالكم كل خير وسعادة ..وربنا يبعد عنكم الخاينين ويبعدهم عنكم


هاجر برنامج مميز ..بحييكي على موضوع الحلقة

بالتوفيق ليكي وللجميع

ربي يوفقكم ويسعدكم

[۩۩ elMagic ۩۩]

مقتطفات طيبه
ربنا يكرم الجميع بقى
الله ينور هاجر
مجهود مميز منك
تسلمي بقى

[فصيح]

برنامج مميز وفضفضه صادقه
تسلم الافكار والنشاط المميز
تحيه لكي وتقديري
احترامي

[Lamees]

برنامج جميل واراء كلها مفيدة
ومجهود مميز منك هاجر
تسلمي