اعذريني يا حبيبتي...

[مارد الغضب]

ياللي بتقولي حتحلا
و تبقي عال
ادي المرتب
و ادي مصاريف العيال
..
الديك بيدن
و الادان له صوت كئيب
بيقولي اصحي
ابتدا اليوم العصيب
نفس اسطوانة كل يوم
ح نفطر ايه ؟
نفس الاجابة كل يوم
انه الفول العجيب
ابني الصُغير العنيد
يصرخ ف امه
ليه يا ماما ؟
مفيش جديد؟
نفس المرارة ف وشها
مع ابتسامة مشوهه
تقوله نفسك تفطر ايه؟
يسرح خياله للبعيد
و هي بكل عزمها
بتهرس الفول المجيد
..
بعد الفطار اللي اتمسح
ابدا ف توزيع المنح
يا بابا عايزة مذكرة
و انا عايزلي مسطرة
ح نعمل ايه علي الغدا
و ابني الصغير ع السرير
بيقولي بالله يا بابا
نفسي ف بيانو م الكبير
و انا كل كلامي حاااااااااضر
لما ارجع
كل شئ حيبقي حاضر
و البيانو؟
حيجي ف العيد الكبير
..
ابغض انواع المرار
لما تشوف الحاجة ف عيون الصغار
لما بتبص ف عنيهم
تلتقيهم محرومين
لما بيشوفوا صحابهم مبسوطين
لما ابنك الصغير
يبقي نفسه ف جزمة فوتبول
ولاّ علبة جل يفرد شعره بيه
و كل يوم تكذب عليه
بكرة تبقي الجزمة عندك
بكرة تبقي الكورة عندك
بكرة يبقي الجل عندك
و انت عارف ان بكره زي بعده
و ان ابوه مش حيوفي يوم بوعده
و ان اهم حاجة عنده
هما اخواتو الكبار
لما ابص ف عين صغيري
ببقي مخنوق بالمرار
بس هو ازاي حيفهم
ان جوايا انفجار
بكره يعرف الحقيقة
بكره يرسي
ع اللي صار

..
هي ليه الدنيا عتمة
و كل حاجة مش تمام
كل لحظة ف عيني حلوة
تختفي و تروح اوام
حتي انت يا حبيبتي
يا اللي كنتِ كل متعب
تدفعيني للامام
لما بقعد جنب منك
ينخرس بينا الكلام
اعذريني العيشة صعبة
و المشاعر
سلعة بايرة ف الزحام
..
المرتب...
حاجة تحسر
و الضغوط فوق الخيال
الاجابة طين و حنضل
بس ايه كان السؤال

[همس الكناريا]

شفت أنا يوم جزار وعاتبته
كيف اللحمة هتبقى ب100
قالى يا صاحبى بكل صراحة
سعرها سهل على الحرامية
أما إن كنت مواطن عادى
فاسأل ياابنى عن الطعمية
ولاشوية فول مع زيتهم
مع سلطتهم على العربية
واتخيلهم وانت بتاكل
حتة من الكندوز مشوية
عينك لوهتفكر لحظة
تعلى الحاجب تبقى غبية
قلتله حتى الأكل ياصاحبى
فيه درجات وجهات معنيه
قالى طبيعى تكونش ياجاهل
فاكر إنك ليك أهلية
تاكل من وجبات أسيادك
أوتساويهم بالطبلية
آخرك مرقة ولوهتلاقى
واعمل (سيرش ) عن الملوخية
قلتله بعد سنه هنتقابل
يمكن أكون قابض الجمعية
قالى ساعتها هتكون غليت
خُدلك صورة بإخلاص نية
واكتب فوقها دى مش تذكارى
بس دى لمحة عن الطبقية
.............................

أبدعت شاعرنا
وفيت وكُفيت
كلمات فيها رسائل
ومابينها رصاصات
أصابتني
تدل علي الواقع المرير اللي أغلب االناس عايشه فيه
غرد و حلق منفرد فى أعالى سماوات الحروف و المعانى
سلم الفكر والقلم وصاحبه
إحترامي لشخصك الكريم

همس الكناريا

[ندوشه 2011]

....هكذا حال الدنيا ....معلش يا عم المارد حي هههههههههه بقولك صحيح انت منزل عروض فظيعه لشبكتكوا مش انت بردوا المارد بتاع فودافون. .قشطه. ....علي فكره انا بهزر

[العاشق الذى لم يتب]

والله انت وهمس عملتو اللى عليكم وكفاية
ونورت الدنياندى
صحبى الغالى
وجشنى
وتسلم الايادى
وقول ياباسط تلاقيهاهاصت

[د/ عبد الله]

ما أروعك يا سيدي
أنت فنان بجد
سلمت أيها المبدع من كل سوء

[إيلاانا]

قال عليه الصلاة والسلام (من أمن قوة يومه وأمن في داره فكأنه ملك الدنيا وما فيها )
اخي الكريم كما كانت كلمات اصابت القلب وجعلتني اقرأ كلماتك واسرح بها وبتلك العائلة وكأنه مشهدا امامي وهنا تكمن قوة الكاتب المبدع
لكن يا اخي ليس المال كل شي الرضا والقناعة بالعيش اي ما يكون فيه الراحة هناك من يملك الكثير ومع هذا لا يشبع بل يريد المزيد فالمال فتنة كما انه زينة الحياة لكنه فتنة لا تستطيع شراء السعادة ولا الصحة ولا الراحة بالمال أمور كثيرة لا نستطيع جلبها او عودتها بالمال علينا ان نغرس في الأبناء
الرضا وان نرضا بما قسمه الله لنا وان لا نظر الا من هم احسن منا في الدين في الأخلاق
اخي الكريم هذا هو حال الكثير من الأسر الان فكم يحزن الأب والام في عدم تحقيق وجلب ما يحتاجه اطفالهم لكن ان ترى اولادك أمامك بصحة
وهم حولك فيه السعادة
راقت لي حروفك كثير أخي
رزقك الله الصحة ورزق كريما مبارك وأسعدك بأطفالك
وكتب لك السعادة وفرج هم كل مهموم
لك خالص تقديري واحترامي
دمت في حفظ الله
إيلانا

[راجعة لحبيبى]

كلمات روعه
والعشق فيهازين معانيها
تسلم شاعرنا
لروحك السعاده

[فداااااااااااء]

كلمات بالألم سطرت
وآه موجوعة داخل السطور
هو صحيح الحال ضيق
لكن فى اكيد أمور أخرى متنعم بيها
ماهى الحياة مش مال وأنواع طعام بس
لكن نقول الله كريم وقادر يغير الحال لأفضل
سلمت اخى مارد كلمات معبرة وصادقة
تسلم ايدك ويدوم نبضك القيم
خالص احترامى

[دمعه حائره]

احييك على تلك الرائعه الواقعيه
التى تعبر عن حال مجتمع مؤلم اصبح لايطاق
تسلم اخى