فين يابني راحت دموعك

[ايمان طلعت]

ليا عمر عشت بيه

وليك عمر اتولدت فيه

يبقي عمري وعمرك عمران

ودة اسمك يوم ميلادك

اللي ربنا سماك بيه

احلامي رسمتها فملامحك

ايامي حلاوتها في لعبك

طفولتي رجعتها شقاوتك

دموعي مسحِتها ابتسامتك

نقشت في كفوفك طريقك

بس ايه ياعمري يفيدك

روحت منك بقصف غادر

ومش بايدي يابني اسيبك

روحي طلعت قدام عينك

وشايفه دمك سايل في عينك

وايدي مش طايله تضمك

و لا قادرة اجي اطبب جرحك

مش وجعاك كل جروحك !!!!

فين يابني راحت دموعك

ولا الغدر قوى ملامحك

برة طفل وجواك رجولة

راحت منك فين الطفولة

عشت وشوفت حاجات مهولة

اكبر وعلمهم معنى البطولة

و روحي جنبك عليك تطبطب

واصبر يابني رحمة ربك

[.Lamar]

اللهم انا لا نسالك رد القضاء
ولكن نسالك اللطف فيه

كفيتى ووفيتى
و مش لاقية كلمات ارد بيها

[a7med -3del]

والله الواحد تعب
والله العظيم اني لو سبت نفسي وقلمي لاحساسي
لاخرج عن النص واتوقف لاني مش هاعرف احافظ علي كلامي
تسلمي يارب
ويارب هوون علينا
تحياتي

[حكاية حب]

معبره كلماتك ايمان

رغم الالم كان للابداع حضور طاغي

ابدعتي واجدتي العزف علي ايقاع الكلمات

مودتي

[شاعرة الرومانسيه]

ياااااا الله والله يا ايمان قلبى اتوجع

عبرتى بألم والله

الله المستعان

[همس الكناريا]

اللهم انتقم ..ممن ظلم
والله الذى لاإله إلا هو حتى الدموع تحجرت
وكأنهاتعزم على زيادة الاأم أضعافامضاعفة

كنوز الدنيا ماتساوى
دموع نازلة ف خدود تكوى
وحُرقة قلب من ألمه
تحس النبض فيه يشوى
و ليه بنيان بأحجاره
على راس الصغير يهوى
لكن بكره الحساب يجمع
وينشر ربنا ويطوى
----------
.........اه بالمناسبة محدش شاف النخوة انهاردة؟؟؟؟؟؟؟

جميل حرفك حبيبتي
رغم الألم والوجع الذي يسكنه
سلم نبض قلمك
مودتي

همس الكناريا

[Aya 7ekaya]

ابدعتى ف التعبير ي ايمان
ربنا ينتقم من كل ظالم ويخرجنا منها على خير

[شاعر الحب الحزين]

حسبنا الله ونعم الوكيل..حسبنا الله ونعم الوكيل

تسلمي يا إيمان ويسلم نبض قلبك

ربنا يحفظ الاسلام والمسلمين ويصلح حالنا جميعا يارب

مشكورة ايمان على احساسك وانسانيتك

ربنا يوفقك ويسعدك

[حازم34]

ادمعتي عيوننا يا ايمان


بكلامك الي حبيب القلب عمران


يااااااااااااااااااااااااااااااااااااااااااااااااا اه علي كلام ام لابنها


شاف الهول ولسه ما عارف ايه ذنب الطفوله ايه


وليه يا اسد عليك اللعنه تعمل كدا ليه


كرسي زايل وتقابل الرب يوم الهوايل هتقوله ايه


ربي يحفظك ويكرمك يارب يا ايمان واسال ربي ان يبارك في عمرك ويحفظك واسرتك


كلمات مؤثره

[Eng Esraa]

حسبنا الله و نعم الوكيل !
تسلمي ايمان ع كلماتك