قضايا الدم

[ahmed 22]

المفروض بعد ما مر سنتين او تلاتة علي اخر ثورة نكون قادرين علي تحليل الاحداث بشكل اكثر واقعية بس دايما هيكون في تشويش وخلل في رؤيتنا للامور لان في بلدنا كل واحد مهتم باللي اتقتل من فصيلة دمه ... تلاقي اللي قاموا بثورة يناير مطالبهم هم دم شهداء احداث يناير وما يتبعها من احداث في محمد محمود وماسبيروو وغيره .. الاخوان قضيتهم في اللي انقتل في رابعة والشرعية .. الالتراس وقضيتهم في بورسعيد والدفاع الجوي .. الجيش والشرطة قضيتهم في اللي اتقتل منهم علي الحدود او في المظاهرات وغيره ..وكل حادثة بتحصل جديدة بتكون مبنية علي هوي نفس كل فرد وليها انصارها اللي بتكون ليها جبهة دفاع وبتروح معاها سواء حق او باطل تبعا لاحتياجات كل فرد .. يعني فيه اللي اتاخد منه حكم وفيه اللي اتاخد منه ابن وفيه اللي اتاخد منه امن سواء احتياجات مادية او معنوية فكلها اختيارات متاحة امام كل شخص وبيختار حسب وعيه .. مع ان مفروض الموت مالوش هوي يعني .. بس ما علينا

المهم ان كل واحد مهتم بفصيلة دمه ... وكل واحد من الشعب ليه قضية او موقف شايف ان المذنب هو الجيش متمثلا في قيادته او الداخلية متمثلة في رئيس الدولة ووزير الداخلية في كل القضايا دي ... يعني عندنا 10 قضايا ومتهم واحد وهي الدولة متمثلة في قيادتها اللي بتملك القوة التنفيذية تحت ايديها عموما ..

تيجي علي سبيل المثال تقول ان الجيش اللي قتل في رابعة .. تقول مين في الجيش يقولك المجلس العسكري .. اللي هو ايه المجلس العسكري يقولك قيادات الجيش .. طب لما تيجي تحاكم قيادة جيش وده مستحيل عمليا في بلادنا... فانت اثبت انه اعطي اوامر قتل ... هيقولك ما هو عمل انقلاب علي السلطة .. هيرد الجيش ويقولك الغلط علي اللي عمل ثورة واعطت شرعية للجيش انه ينزل ويتعامل .. طب انت اتعاملت وقتلت .... هيقولك ما انت اللي اتسلحت وعاندت وعطلت مصالح الدولة ...

هتقوله مئات ماتوا وفرضا هتحاكموا.. هيقولك طلع اي دستور وشوف بيقول ايه في التعامل مع المظاهرات وتعطيل العمل العام ولو اثبتت ان اي دستور غلط واجهضت حجته.. هييجي يقولك كله بتفويض الشعب لما الدستور اتلغي بشرعية الشارع زي ثورة يناير قبل كدا الدستور سقط في اقل من 15 يوم من تجمهر الناس بالشارع واسقط رئيس .. يعني قارن الاحداث والوقائع وقول امين وسلم بالواقع .. واكيد انت مش هتفلتر كل حدث علي مزاجك الخاص وتفصله عن غيره .. لازم تربط الوقائع بالتاريخ ...

فهل هنا هتلوم الجيش ولا هتلوم الشعب اللي نزل ضد الاخوان واللي هتلوم اللي كانوا في ميدان واتقتلوا باسم ربما الشرعيةاو التغييب او ربما ارهاب ؟؟
والله بالمنطق .. هتحس انه مافيش منطق .. وعموما انا حابب اكون محايد حاليا ومش عاوز اجزم برأي ..

تيجي تقول الداخلية ... يقولك ما هي بتقدم الادلة للقضاء ... فهل هي هتقدم الادلة اللي تدينها وتدين قيادتها .؟؟ .. فرضا هتقول العسكري اللي قتل ... هو العسكري بيقتل بمزاجه .. هيقولك دفاع عن النفس لما لقي اندفاع ضده وهو بيتعامل بالقانون في المظاهرات طبقا لاوامر قياداته .. تيجي تقول للضابط اللي فوقيه .. يقولك اسأل اللواء .. تروح للواء يقولك اسأل العميد .. تروح للعميد .. يقولك مساعد الوزير .. تروح للمساعد يقولك الوزير ... تروح للوزير يقولك اثبت اني اديت امر بالقتل .. انا قلتلهم اتعاملوا علي مستوي المظاهرة واساسا المظاهرة طالعة من غير تصريح والمفروض احنا في دولة قانون ولا احنا هنقري الغيب باللي جاي وان دي ثورة وهتنجح .. فبنطبق القانون سواء الاول بالهراوات او خراطيم المياه او الغاز او اخيرا القوة الغاشمة لما الامر يخرج عن السيطرة وطبيعي تلاقي في ظل الفوضي ضحايا.. ترجع تاني لاسفل الهرم .. هيقولك احنا شفنا التعامل الانسب واتعاملنا بيه ... اثبت مين اللي قتل ... والله ما هتعرف .. وفي الاخر العسكري هو اللي بيتقتل ويتهان في الشارع ... والشباب بيموت بقضيته !!

والدولة بتحاكم نفسها وبتبرئ نفسها بقوانين انشأتها في ظل موافقة علي دستور من شعب بيحكمها
.. مين السبب .. والله ما هتعرف تثبت بالقانون من الدائن والمدين والفصيل اللي اتقتل منهم واحد هيشوف نفسه مجني عليه وصاحب قضية يجب ان يسعي فيها .. والدولة هتشوف نفسها بتقوم بدور وانها بتعمل الصح للمحافظة علي وطن مهدد بالافلاس ومعاه فزاعه الانهيار والامن دايما بتصدرها للفئة البسيطة من الشعب... وهي بامانة فزاعة مقنعة لكل صاحب اسرة فقيرة او حتي متوسطة مطالب انه يوفرلها عيشة كريمة في ظل مجتمع صعب ونسبة الفقر فيه تتعدي ال 50 في المية.. وبالتالي ماقدرش احاكمه علي قراره طالما مش هقدر اوفر لاسرته شئ تعينها والا هكون ظالم ..

تيجي تقول نلجأ للقضاء .. يقولك القضاء فاسد ومسيس لصالح الدولة ..
ترضي وتقول القضاء شامخ باحكامه ... مع الوقت تقول بعد ثورة ان الادلة اختفت والداخلية بتحاكم نفسها والادلة بتنطمس لانها هي اللي بتجمع الادلة للقضاء اساسا...
وغير كدا انت عندك وزراء العدل لحد قريب ما شاء الله عدوا الكباري .. مش عاوز اقول فجروا... فيهم ناس كانوا بيقولوا علي جثتي لو دول ما اتعدموش ونسي انه في قضية وقاضي وعدل وانه المفروض عشان اسمه وزير العدل يبقي يجنب نفسه اي صراعات سياسية ويخليه علي الحياه ... وده طبعا حسب كل فترة وحسب مين في السجن ومين بيحكم ومين بيحبه وبينتمي لفصيله.. .. لانه اصلا بيتعين من الحكومة وبالتالي محسوب عليها .. وفي ايده سلطة يعزل قاضي وينقل قاضي ويلعب بأي شئ.. طبعا مش بنطعن في القضاء ... لان المحترمين فيه اكتر من 90 المية .. بس العشرة في المية بيتلعب بينا وبينهم اتاري او سباق عربيات .. بيتم استخدامهم من كل شخص صاحب هوي في السلطة وشايف ان اللي بيعمله هو الصح من اجل الوطن واستقراره والبوءين دول ... وزي دايما ما بقول مع نفسي ان فيه ناس عندهم حب للوطن بس بطريقة مرضية او فيها علة ومصلحة شخصية و بتحلل الحرام وتحرم الحلال ويقولك الوطن فوق كل شئ ولو يقتل البشر كلهم ... المهم ان احنا بعد كدا بنعمم وبناخد الصالح بالطالح..

تيجي تقول يا ريت لو كنا عملنا محاكم سياسية من الاول خالص بعد ثورة يناير .. يعني من الاخر نقوم قايلين بلا قضاء بلا داخليه ... وتقوم جايب كله وتعلقه علي المشنقة زي الثورة الفرنسية كدا .. وفي الاخر برضه هيبان علينا الهمجية وهنرجع برضه خمسين سنة وراء ...

بمعني اخر ان الفوضي في الشارع بتسبب فوضي في النفوس .. وبمعني اخر احنا بنعيش في الدنيا دي لنختبر اشد التفاصيل تحيزا .. وعندما نختبر التحيز ( مع \ضد ) فاحنا بنختار الصد .. ولاننا اخترنا الصد .. فنكتشف الالم .. ولذلك يصطادنا الجهل ونعيش الخوف والشك ..

وده كله في وقت في ناس عندها ايمان بمبدأ الفوستاشيا وهي احدي المصطلحات القديمة التي يبتناها البعض دون ادراك منهم ولديهم وجهة نظر فوضوية فمن اجل الوصول للسلام يجب ان ينعم المجتمع بالفوضي .. واكيد ما اكثر مصطلحات الفوضي البناءة التي ترسخت في عقول بعض المفكرين سرا وجهرا .. واكثره جاهلين وبالتالي لا تستطيع ان تحاكمه علي حبه لوطنه في مجتمع يتفاوت فيه مستويات النماء ...

فعشان كدا احنا دولة هانت عليها نفسها لما حكمت علي نفسها بالتخلف من تعليم عقيم خلت حكمها علي الامور متخلف وتراكمت عليها العقليات العقيمة سنوات طويلة جدا .. فاصبحت لا تعي من المذنب او من البرئ او تجد ما تستند اليه لاثبات الحقائق ومعاقبة الجناة او حتي تثبت او تجمع علي موقف بين نخبتها وشبابها وقيادتها ... فهانت ابنائها .. فهانت قضاتها ... فهانت شرطتها ... فهانت رئيسها .. فهان الشعب كله ...

وبالتالي بلدنا شكلها هتقعد كتير في خانة اتنين عمالين يقولوا لبعض ( كما تدين تدان ) وواحد بينهم يدخل يعمل قافية .. علي سبيل المثال الاعلام كان بيقول علي موضوع حرق مجند في سيارة الاسعاف اللي عمل الموضوع ده ليس له ملة ولا دين ... واحد معارض يقولك طب كنتوا فين ايام موضوع سيارة الترحيلات واللي مات فيها ولا ده عشان من الجيش .. واحد تالت يتريق و يقولك ايه اللي دخله هناك سيارة الاسعاف وبيعمل اسقاطات علي احداث قديمة ... وطبعا الآية بتتقلب من وقت للتاني من حيث مكان كل واحد ومركز قوته وكل واحد فيهم خد دوره انه يقول الكلام اللي فوق ده وخد وقته انه يكون مركز قوة في وقت ما ( معارضة ونظام حاكم و ثوريين ) او تسموهم ( انقلابيين واخوان ومخربين ) كل واحد بيقول حسب اهواءه يعني .. المهم ان علي الباغي تدور الدوائر .. واللي اكتشفته ان الظاهر ان ماحدش في البلد ده الا ماكان باغي او ظالم ..


ملحوظة / الموضوع ده كان عبارة عن مجموعة بوستات كنت كتبتها علي حساب الفيس بوك الخاص بيا ودمجتهم وبلورتهم علي شكل موضوع وخليته زي ما هو بالعامية .... بالتالي الموضوع حصري للمنتدي وحتي مش موجود علي محركات البحث لان حساب الفيس بوك الخاص بيا معطله من فترة كبيرة...

[حـيـــــآة ❤]

اصبت والله
هو الغريب ان احنا اصلا ضد انفسنا وآراءنا
اكتر مانكون ضد، اي فعل او شئ سلبي
احنا حياتنا اصبحت مجموعه من السلبيات
اللامتناهيه ولاننا ضد نفسنا مش لاقيين حلول
للي احنا وصلنا ليه..
في النهايه مش هتكلم في حاجه او جانب سياسي
سلمت اخي
نورت المنتدي
في حفظ الله

[۩۩ elMagic ۩۩]

ماهى دي المشكلة
بتنزل وانت نفسك مش عارف نازل ليه
تخلف وجهل بقى مسيطر
والناس شبه استسلمت للواقع وخلاص كدا سايباها زي ماتيجي
ربنا يهدي الاحوال بقاا
تسلم لطرحك الطيب ،،

[ابو نصير]

حبيب قلبى أبو حميد
تلك القضيه الشائكه التى طرحتها عن نبذه صغيره فى حال البلد التى تمر بها من قضايا الدم وقضايا ألام وعذاب الشعب
الذى يعانى من حرب نفسيه داخله لا يستطيع أن ينتصر عليها تقع تحت مسمى الفكر ..........
إذا أغتصب الفكر وقبر الضمير فى هذه الدوله لن ترتقى شعوبها وتعيش تحت سيطرة الجهل ..وإذا أنتصر الجهل على
الفكر فسوف نعيش جميعا فى هذه الأمه كالشجره الخاويه إذا هب فيها الريح تتساقط جميع أورافها وتتناثر
ونذهب جميعا إلى مزبلة التاريخ ..........
أبو حميد
أصعب شىء فى الوجود أن تجعل من نفسك منتصرا وتجعل لحزبك هو الأفضل وتحكم على الباقى بالتخلف الفكرى .....
ولكن لماذا الحجر على أفكار الأخرين ...........
ولكن إن لم نفكر فى تلك الأحداث التى مر عليها أكثر من ثلاث سنوات ولن نتكاتف على إحياء الفكر سوف نصاب بعطب فكرى لا يبنى وسوف يهدم.........
الدول المتقدمه تبنى الأفكار والفكره والفكر فى عالمهم الذى يحث الشعب على التقدم والرقى ... وأما الذى يجهل الفكر
فى محاربة الجهل مازال يتربع على عرش الدوله التى إنهارت وأنهار معها مفكريها لأننا الذين أعطينا للجاهل أتخاذ القرارت فجعلنا أضحوكه وسط الأمم..
وعندما تكون أضحوكه وسط الأمم كلاعب السرك فسوف نسقط جميا من على مسرح الدوله الذى يلعب دور المفكر
الذى قتل بجهله الناس جميعا
ابو حميد
موضوع راقى يحق التقدير ولكن مازالنا نعيش فى مستنقع إلا فكر ومعزره للأطاله
اخوك ابو نصير

[Eng Esraa]

هي الفكرة كلها محدش عارف هو عاوز ايه !
او بمعني اصح بقوا بيخافوا يفكروا هما عاوزين ايه
او يختاروا .. ! و ف الاول و الاخر الظلم موجود
نتيجته الناس اللي بتتوفي كل يوم دي بسبب اهمال
من اي حد او اي حاجة ! .. ربنا يصلح الحال
تسلم يا احمد لطرحك

[Aya 7ekaya]

انت جبت الخلاصه
احنا مش عارفين رايحين ولا جايين منين
عملنا ثورة وبعد شويه لا مش عاجبنا نعمل ثورة تانيه وبعدين مش هنخلص
وماتنساش الاعلام اللى بياثر فى ناس كتير
بقت الناس مش بتفكر بتسمع وتصدق لانها عايزة تصدق اللى ع مزاجها

موضوع قيم
تسلم اخى