أبــويا مات بس قــال .))

[همس الكناريا]

أبويا مات بس قال ===== مات أبويا الله يرحمه بس كلامه فيا حى قال يابنى خلى بالك من كلامى اللى جى الدنيا بنت بس خاينه لا ليها أب ولا ليها خى ولو فيها ألفين قمر ليلة ضلمه مافيها ضى جيت فيها عريان بتبكى بالرغم إنك ماتوعى شى وعليك هيبكوا ماشى منها وناعى هم كل شى بكيت وقلت يابا تُهت رسينى فين بر الأمان؟ وقولى يابا ياحكيم أزاى أعيش من غير هوان؟ وأزاى أقدر أرضى ربى وانا متحدينى الشيطان؟ بيزين لى كل المعاصى ويصعب لى الإتزان وعلشان مطرود من الجنه مش عاوزنا بالجنان قالى متخفش كيده ضعيف سيبك انت م الشيطان ابن آدم منه ألعن أصل منه صنف أرعن مش أمان صنف واطى ساعات يطاطى ويعمل مع العفى جبان ولما يُملك يدوس ويهلك ويبقى أبشع م الشيطان وصنف جنب الحيطة ماشى فكره عايش كده ف أمان وصنف عايش وبكرة ميت كأنه عمره فى يوم ماكان وصنف أنعم من الحرير بس ليه سم التعبان وصنف أصفر يطعن ويغدر ولا يظهر ولا يبان قالى شوف احذر من اللى يركب كل موجه لا له مبدأ ولا أمان وتلاقيه فى كل هوجه والكِبر صدقة على العويل أبو رقبه عوجه واعبد ربك يفك كربك ويحوش عنك شراك منسوجه واوعاك تفكر لو الموج طواك إنك أضعف من أى موجه واعواك تحس لو يوم إداك الزمان ظهره رخيص ولا العواجز عدوا الحواجز دا مهما عليوا هما صيص أما اللى واخد الدين سُتره وشُهره أحذر ده العويص ساعتها أقعد فى بيت أبوك وخليك مع ربك تهيص الدنيا ست واحدة بتحلف إنك مافى قلبها غيرك وهى خاينه ميه بتجرى تروح أنت ويجى غيرك خليك مع ربك تلاقى الشر إندحر وزاد فى خيرك مُت يابا وبيجرى فيه لحد ما أموت كلامك وباعت لك ليلاتى دعوة وبحس إنى بسمع سلامك الله يرحمك يابا :::::::::::::::::::::::::::: همس الكناريا

[شاعر الحب الحزين]

يعني لما همس بتكتب

بلاقيني عاجز عن الرد

مع إن كتير ناس بتكتب

بس ف ابداعك ما شفت حد

كلماتك تطرب للقلب تعجب

انا بستمتع بكتاباتك بجد


ربي يحميكي ويحفظك

انتي تستاهلي التحية والاحترام همس

كتاباتك يوم عن يوم بتحلى ودايما تعبيراتك قوية

انا بستمتع بقرائتي لكلماتك ..انتي مبدعة همس

كل الاحترام والتقدير مبدعتنا وشاعرتنا الراقية

[حـيـــــآة ❤]

الله يرحمه حبيبتي
ويسعد مثواه بما كتبتي
في حفظ الله ياروح قلبي

[العاشق الذى لم يتب]

الله يرحمه
تسلمى همس
جميلة كلماتك

[العاشق الذى لم يتب]

الذين يشاهدون محتوى الموضوع الآن : 15 ( الأعضاء 1 والزوار 14)

[فداااااااااااء]

الله يرحمه
كلمات قيمة ورائعة فى مضمونها
احسنتى همس ودام نبضك المميز
ودى لكى

[ahmed 22]

الله يرحم جميع اموات المسلمين يا رب

في ناس بتكتب بدون هدف
وناس بتكتب عشان تعمل كل يوم هدف
وهي انها تطور من كل عمل سابق ليها
ويكون الجديد افضل من القديم وانضج ...
وتقدم منتج ارقي واجمل ...
وده اكيد حلاوة الابداع ..
وده دايما اللي بلاحظه لما اقري نصوصك ..

شكرا للنص القيم والمميز
كل التقدير

ملاحظة بسيطة بس
كلمة اوعاك عاوزة تتعدل في الشطر ده ..
واعواك تحس لو يوم

[Eng Esraa]

ربنا يرحمه ..
كلمات جميلة منك همس
ربنا يحفظك
تسلمي

[مهيب الركن .]

روعه كلماتك اختى الكريمه
تجيدين صياغة أفكارك بمنتهى الرقى والأبداع
تسلمى على هذا النص الراقى
تقبلى فائق احترامى

[a7med -3del]

ابداع
بس خلاص