رساله الى كل عضو ف المنتدى

[توحد ارواح]

اقتباس المشاركة الأصلية كتبت بواسطة ڪــــبرياء الروح اسباب ركود المنتدى بسبب الانشغال بحياتنا كل واحد وظروفه يجي من العمل تعبان ويدوبك يلحق ع يومه يعني انا بس اروح لغرفتي بفتح المنتدى بصراحه له ذكرايات عندي واحب اتواجد باستمرار بس الظروف وان شاء الله افضي من وقتي للمنتدى اما افكار لتجديد ماعندي والله 😥

تمام يا قمر ليت فعلا يكون المنتدى متنفس لنا بعد تعب اليوم
وندخل كل يوم كدا ونشارك
تسلمى ع مروركِ يا قمر

[توحد ارواح]

اقتباس المشاركة الأصلية كتبت بواسطة ahmed 22 اولا في عيب موجود فينا كأعضاء لازم ناخد بالنا منه .. وهو الروتينية في الردود انا بدخل مواضيع كتيرة .. بلاقي غالبا الردود والتعليقات شبه بعضها .. وبنفس الرتم ومش بتتغير غير بكلمات بسيطة ... وده بيخلق الملل في النفوس اللي بيكتب واللي بيقري من غير ما نحس .. وبيخلق حالة الخمول .. احنا بقينا بنعلق كنوع من الروتين مش لحالة ابتكار او خلق ابداع فينا .... لان اصلا التعليق هو روح اي منتدي .. مش الموضوع بالدرجة الأولي وده لازم اللي نفهمه كويس جدا .. كله ممكن يكتب كويس .. بس مش كله عنده القدرة علي ابتكار ردود قد تفوق الموضوع قيمة وده مايقلش من صاحب الموضوع .. بس بيخلق حالة جديدة من الترقب والاهتمام ... وبيخلق نوع من الشغف .. وده شئ ناقصنا جدا .. ومطلوب جدا .. والمفروض الناس تجرب تدي قيمة لردودها وتعليقاتها اكتر من موضوعها هيحسوا بفرق كبير جدا ... لاني كنت بستشعر ان كتابة الردود فيها متعبة اكبر من المواضيع .. ولان الناس هنا بترد لمجرد الرد .... مش ان تعليقهم يخلق حالة نقاش او حالة تعمل لموضوع الطرح ابعاد جديد ويفتح مجالات اكتر .. ويكون في رد ورد فعل ... سواء ادبيا او فكريا .. ثانيا : فيه فرق بين ان احنا عاوزين نشجع بعض .. وبين ان احنا بنجامل بعض بمعني انا مثلا ممكن ارد علي موضوع شخص لمجرد انه رد عليا ليس الا فبيكون رد مجاملات اكتر منه تشجيع او تصحيح ... فبيخلق حالة روتين برضه ثالثا : عشان تحبب ناس في مكان لازم تحسسهم انهم جزء منه ... بمعني دور مشرفين الاقسام مش بالدرجة الأولي مسابقات وتحفيز بقدر ما هما يعطوا الاعضاء القدرة علي عمل قوانينهم الخاصة وبينفذوها وبيحسسوهم بقيمة المكان اكتر .. بمعني وعن تجربة انا كنت مشرف لساحة الفكر الحر قبل كدا اول ما بقيت مشرف اول حاجة عملتها .. عملت وثيقة الفكر فتحت موضوع للاعضاء يقدموا فيه اقتراحاتهم لقوانين القسم وكل عضو شارك بقانون يخصه او النقطة اللي تهمه وبعدين النقط اللي عليها اختلاف فتحتها في موضوع تاني للنقاش حواليها بنعم ولا وبعدين جمعتهم في موضوع واحد ... وعملت عليه تصويت بين الاعضاء وحرصت ان الكل يشارك وبعدين قدمناها لادارة المكان وتم اعتمادها كقوانين للقسم وعملنا تجربة ديموقراطية جميلة جدا ...وكان حوار لذيذ عمل حالة وبعدين حتي لما كنت بعمل اختيار لافضل عضو في القسم كنت بعمل تصويت عن طريق موقع يخص الاستبيانات وكدا .. والاعضاء هما اللي يختاروا الافضل مش المشرفين.. طبعا انا مش بقول ان الفكرة تتنفذ او كدا انا بقول ان فيه طرق كتيرة قادرة تخلي المشرف قادر يخلق حالة تستفز الاعضاء ويخلوهم يحبوا المكان اكتر وكأنهم فعلا جزء منه عن طريق المشاركة ... مش المسابقات بس .. رابعا : في واقع جديد اسمه مواقع التواصل .. ليها طرق اسرع لعقليات الناس لأن فكر معظم الناس المنتديات مابقتش تواكب بطئه ... ومش اي حد حاليا يفكر يسجل في منتدي ... لازم المنتدي يلغي فترات التسجيل وقوانين المشاركات بالموافقة دي والمشاركات تنزل في وقتها ويجازفوا بده ..لانه بقا امر واقع في ناس ممكن تكتب تعليق وماتلقهوش ظهر فتمل بسرعة وتمشي من قبل ما تفكر تشارك بسبب الاجراءات الرسمية دي .. لازم الامور الروتينية دي تتلغي وعواقبها نتحملها ... بس يكون فيه اتفاق بين المشرفين او ادارة المكان انه يكون في تنظيم لتواجد المشرفين بشكل مستمر اللي قادرين يمسحوا اي حاجات خارجة ودي هتكون بنسبة 5 المية مش كتير وهتفتح للناس فرصة اكبر لمشاركة اعضاء جدد .. دماغي مش معايا دلوقتي بس لو في نقط تانية هضيفها مع الوقت ان شاء الله..

برده ناخد نقطه نقطه كدا

اقتباس اولا في عيب موجود فينا كأعضاء لازم ناخد بالنا منه .. وهو الروتينية في الردود انا بدخل مواضيع كتيرة .. بلاقي غالبا الردود والتعليقات شبه بعضها .. وبنفس الرتم ومش بتتغير غير بكلمات بسيطة ..

بالفعل النقطه دى مهمه
ولازم كلنا نقرا الموضوع كويس وبتمعن
وتكون الردود مجديه وتدل ع قراءتك للتوبيك

اقتباس فيه فرق بين ان احنا عاوزين نشجع بعض .. وبين ان احنا بنجامل بعض بمعني انا مثلا ممكن ارد علي موضوع شخص لمجرد انه رد عليا ليس الا فبيكون رد مجاملات اكتر منه تشجيع او تصحيح ... فبيخلق حالة روتين برضه

لا طبعا المفروض الردود تكون بحياديه بعيدا عن اى مجاملات
ليت كلنا ناخد بالنا من النقطه دى

اقتباس عشان تحبب ناس في مكان لازم تحسسهم انهم جزء منه ... بمعني دور مشرفين الاقسام مش بالدرجة الأولي مسابقات وتحفيز بقدر ما هما يعطوا الاعضاء القدرة علي عمل قوانينهم الخاصة وبينفذوها وبيحسسوهم بقيمة المكان اكتر

تمام دى نقطه مهمه


والنقطه الاخيره انا موافقه عليها
لانه بالفعل ممكن العضو يزهق ويمشى

شكرا لرايك ا/ احمد

[واد حبيب]

دلوقتي اقدر اقولك ان المنتدي هيرجع زي ايام طارق
واحسن كمان

[محمود الصاروخ]

خلينا نتكلم بصراحه وعلي المكشوف
انتي عمرك سالتي نفسك ليه المنتدي اتدهور والناس بتسيبه ؟

هكلمك عن نفسي كـ محمود
لما أضيع وقتي هنا واعمل كل حاجه للمكان اللي موجود فيه
ويوصل الحال ان الاداره تحسسنا اننا شغالين عندهم
ويتقال ارتقو وكلام فارغ من ده ف طبيعي لازم هسيب المنتدي
ولما يكون فيه قضيه أو مشكله والاداره تميز عضو عن عضو
طبيعي ان لازم اسيب المنتدي ولما الاداره تكون خط احمر
وممنوع الانتقاد او الاقتراب منها طبيعي ان لازم اسيب المنتدي
سياسة المنتدي في الفتره اللي فاتت عموما
هي سبب تدهور المنتدي والغريبه ان الاداره عارفه الكلام ده كويس
وفي النهايه نتمني كل شيء يتغير ويكون فيه عدل بين
الاعضاء وبعضها في كل حاجه
..

حقيقه وكانت لازم تتقال
وأتمني مشاركتي ماتتحذفش لو كانت الاداره بتقبل النقد برضه ومش خط احمر