فن الذاتية

[ahmed 22]

حبيت أغير في القلوب
منهج .. سلوك
ابعت سلام و ارسم كلام
حرفي يثور بلغي الوشوش
دايما حلنجي ومش بخاف
ومش بناكف من فراغ
اصل الصراحة .. الصنعة فيا
والعقل قادر مش هفية ..

فجأة بتقلب وش تاني
و الصراع بقا مني ليا
اصل الحياة دي مشتهية تهد فيا..
دايما أنا هي الحكاية ..
محترف فن الذاتية
والحرفة بقت ازاي افوز بدور الضحية ..

ولقيتني واقف فوق لوحدي
والقلب تايه مش هناك ..
والبحث قايم .. مين يدل
أو يرسيني لجواب ..
ارمي علي مين اللوماية
اصلي وحدي ده معايا ..
وفجأة هتكون النهاية
ومش هعيش غير لما أموت ..

لفيت كتير بس لقيت
وفجأة حسيته هناك ..

ولقيته ساكن من زمان
في جنينه فاضيه ..
مافيهاش ورود
والزرعة صايده ..

فيها شئ غريب للبعيد...
وفي وقت تقرب تستريب ..
ثمرتها بايرة اوقات كتير
ولما تنضج مش تطيب

وفي وقت جيت .. قمت انحنيت
لقيتها صحرا .. بستانها رملة
وبقيت في أزمة ومنها لازمة ..
من بره شايف بس اعمي ..
وهدية النية في طيبتها
ما بقيتش حاضرة ..

مش عملة صعبة
ده السواد بقا يبيعوه
والشاري ده إنسان مريض
مش هتلوموه ..
كله مشارك في الحكاية
والنهاية مش دي البداية ..
والمغزي مش هنزوروه
الا في لفة ملاية ..

[ندوشه 2011]

الله عليك ايه الحلاوة دي انا أسفه مش فاهمه حاجه

[السفيره عزيزه]

لالا ما بلاش التشاؤم
صدقنى لازم يكون العدل قائم
فى كل ناحية.

وال جاب ليها الخراب .عارفينوا
اسمه الغراب. زعق باعلى صوت. الكل
هنا لازم يموت وانا بس ال اعيش.

ويقووول مفيش .منين اجيب وانا معيش
ياعيش ياعيش ياعيش .ال اختشوا
ماتو وال عاش ما بيختشيش .

وقبل ما يكون فى الملايه بدمو
كتب الوصايه .يا بلادي انت اغلى
منى وابنك هو ال خانى .ولسه
بتقولى دا حته منى.

حته منك طب ما يرجع وصوت على صوت
الكل يسمع .ان ماعاد احتمال اصل
يا ناس سايق فى الخبال.
ولو جه لنا وقال .يقول مفيش
دا انت صحيح غراب ما بتختشيش.


دمت بخير والقلم الحي

[ندوشه 2011]

كدا انا فهمت قصدك ربنا يهديكم ويهدي الجميع

[ahmed 22]

طبعا بشكرك ندوشة وسفيرة علي وجودكم الراقي
وبعتذر ان كان الغرض من النص مش واضح او حصل تشويش بالمقصود منه ..
وان كان لكل الشخص الحق انه يفهم الكلام علي حسب ما يرتأيه اكيد
او حسب ما وصله ..

بس انا بأمانة انا مش كاتبه لأي غرض سياسي او تشاؤم
النص عبارة عن توصيف لحالة ويمكن هو نص مٌركب الي حد ما
فيه شكل وجداني اكتر منه شكل مادي ملموس عشان كدا خليت العنوان ( فن )..
او ده اللي كنت بفكر فيه وانا بكتبه ..

الموضوع بيكلم باختصار وببساطة عن ( حب الذات )
واعتقد انه لما تقروه بعد الكلمة دي هتبان الدنيا اكتر
وهيكون النص منطقي ..

والنص بيشرح الموضوع علي شكل رحلة بين تكبر العقل
وخضوع القلب للواقع ...
بمعني ان الانسان لما بيحب ذاته بزيادة
الناس بتنفض من حواليه ...
وقلبه بيقوم برحلة او صراع مع نفسه
بتوصله لاجابات في الاخر مليانة تناقضات ..
وانه محترف يعمل من نفسه ضحية
عشان يلقي اللوم علي الناس كلها الا نفسه ..

او نهايات صعبة بيوصلها قلبه كخيال وسيناريو
لما يبدأ عقله يخضع لأقصي سيناريو وهو الموت
وان الاوان ما يفوتش بالنسبة للشخص ده
وانه يبدأ يفهم الناس بتنفض حواليه ..
او عايش لوحده ليه ..
قبل ما السواد يسيطر عليه ..

اتمني تكون الصورة واضحة بشكل افضل ..
والنص يتم قرايته بشكل مختلف ...

[فصيح]

النص واضح م البداية مش محتاج توضيح
ووصفك لصاحب الشخصية كان دقيق
وفعلا النوعية دي كتير جدا المعظم

عايش فيها دور ضحية
والحقيقة هي هي
مسرحية كانت أو تمثلية
حب الذات انانية

رائع باسلوبك يا أبو حميد وبشكرك
وكل التقدير لك وخالص تحياتي

[دمعه حائره]

حب الذات والاعتزاز بيها لازم يكون بمقدار معين
اللى بيه مايتحولش لمغرور او متكبر
يرفض النصيحة اوالتضيحة
وفى النهايه بيكون انسان مرفوض من الجميع
بيعيش ويموت لوحدة
عبرت عن الحاله بمنتى الجمال والاختلاف
قلمك مميز وبيقدر يجذب كل من يمر بمتصفحك
تسلم

[αЛαstoOorα]

آسلوب وفكرة ووزن وآلقاء مبهر بصراحة
آنت قلمك كبير ولازم تستمر ف الكتابة
وتخرجلنا آفكار آكبر وآجمل..
حقيقي آستمتعت بيك وبتمني آشوف
ليك توبيكات آكتر..
تقديري..!

[ahmed 22]

اقتباس المشاركة الأصلية كتبت بواسطة فصيح النص واضح م البداية مش محتاج توضيح ووصفك لصاحب الشخصية كان دقيق وفعلا النوعية دي كتير جدا المعظم عايش فيها دور ضحية والحقيقة هي هي مسرحية كانت أو تمثلية حب الذات انانية رائع باسلوبك يا أبو حميد وبشكرك وكل التقدير لك وخالص تحياتي

انت الأروع دايما بحضورك المميز فصيح
وجودك ثراء للموضوع بكل تأكيد ...

كل التقدير والاحترام لشخصك ..

[ahmed 22]

اقتباس المشاركة الأصلية كتبت بواسطة دمعه حائره حب الذات والاعتزاز بيها لازم يكون بمقدار معين اللى بيه مايتحولش لمغرور او متكبر يرفض النصيحة اوالتضيحة وفى النهايه بيكون انسان مرفوض من الجميع بيعيش ويموت لوحدة عبرت عن الحاله بمنتى الجمال والاختلاف قلمك مميز وبيقدر يجذب كل من يمر بمتصفحك تسلم

التميز فيكم ومنكم أكيد ..
اشكر لكٍ حسن حضورك وطيب كلامك ..

كل التقدير والاحترام ..