قال بحبك :))

[همس الكناريا]

/ قال بحبك بس ودنى مسمعتهاش قال بحبك بس لسانى مكررهاش قال بحبك بس قلبى لسه مجاش راح وياه مشوار العمر ومسألهوش مسألش فين هيروح وهيرجع ولا بلاش / قال بحبك كل أراضى الكون أخضرت وطرحت ورود قال بحبك مسمعتهاش بودنى لأنى حسيت بيرددها الوجود قال بحبك بس لسانى مردش لأنى بكلى أنا المردود وشوية كلمة بحبك أرد بيها / بدور على كلمة تطرح ورود بدور فى كل قاموس يمكن بكلمة تساع حبى أعود ليه الكلام سهل نقوله ووقت ما نحسه ننساه تانى ليه لما نحب نعبر صح بتضيع فينا المعانى ليه / لما قالها كلمه بسيطة ليه اتهز لها كيانى حسيت إن رب الكون مخلقهوش إلا عشانى وإن الحلم ببكرة جديد معمول ليه وكل أمانى حتى حاسس كل الحب أتقال لى وأى أغانى وأى شاعر هزه الحِس وقاله قصيدة وصف وجدانى / وانى ياما كتبت كتير مسكت قلمى عاجز يازمانى خانى كلام الحب اللى اتعلمته واللى كتبته راح فى ثوانى آآآه ياكلمة لما بتتحس بيبقى ليها مليون حِس .. وتملى كل الكون ده معانى.. حاسس لما قالها إن الكون رددها وإن الليل لما أخدها راح وبعتها كوكب تانى / نفسى أقول اللى أنا حاسه بس خاينى كلامى وحسه نفسى ارد نفسى أقول أنى اتهزيت واتزلزلت مجرد كلمة طلعت من حد لا مش حد ده ملاك حتى حنانه وكل كيانه فاق الحد لايقبل وصف ولاينفع يحويه مكان ولا زى الناس يتعد يجرى بجسمى ويغزل أسمى ولا يفرقشى مكان ولا بُعد / آآه يازمان لما بتضحك يوم لقلوبنا بتخلى القوة معاها برج حديد يتهد معاها كل رياح وزوابع مجرد نسمه مش هطير شعره بجسمى ولا هتهد ولا علشان الريح أطاطى هفضل عمرى رافع راسى ولا حتى عينى ليها تتسد حتى النار ممكن أمسكها أو اعديها أصل نار الشوق جوايا أكبر منها تفوق الحد / وتقرب لي الصحرا بطولها ولا احس بغربة لياليها وأحس أنى بخطوة أطويها مش أحلام ده جد الجد وشوف كل الصحرا دى خضرا واشوف كل أشواكها زهور واخده عطرها منى حتى من مية عينى وشريان قلبى بتتمد / كل ده دى شىء مر بلحظة قال فيها بحبك بس ودانى مسمعتهاش وبحمد ربي جانى زهول زى المسطول وإلا كنت رحت بلاش هو شوية إنى اتحب من حد استنيته سنين وانى أحس كل كلام الحب واكتر منه شوق وحنين / وبسمه تضحك كل كيانى وادى وجدانى كإنه ماعرف مرة انين قال بحبك بس لسانى مكرررهاش نفسى يقولها تانى وتالت ونفسى ودنى متسمعهاش هرد بكل كيانى عليه وأقول لسانى مايقولهاش / مجرد حالة ::::::::::::::::::::::::::: همس الكناريا

[حـيـــــآة ❤]

جميله حالتك
تسلمي
في حفظ الله حبيبتي

[محمود الصاروخ]

حب ايه اللي انت جاي تقول عليه

تسلم ايدك همس

[طبيب الهوى]

أبنتي همس الكناريا

تصوير مشاعر الحالة التي تخيلها ذهنك علىَ الورق

كان رقيق وعذب وَمَس قلوبِنا لأنه نابع من قلبك يا بتي

والحُبَ كما ذكرتي ووصفتِ يا همس

لكن نشعر بِه ليس فقط حين نسمع المُحِبَ يُرَدِدُها لـ مَحبوبَتِه

بل تشعر بِها المحبوبة من لمسة يد حبيبها

تقرأها في عيناه تشعر بقلبه يَنطِقُها

لكن الحُبَ الحقيقي يا بتي الذي يتلو النُطقَ بِه افعال تؤكِده

تقييمي البسيط + ***** 5

تحياتي لقلمك المُبدِع العذب

أبو عصام

[ahmed 22]

حلوة الحالة وجميلة
وحاسس فيها التلقائية بصورة اكبر

شوفي يا همس

مش هختلف أنك من افضل الناس اللي بتكتب هنا ادبي
وممكن نقول الأفضل كمان وعندك موهبة وقبول ما شاء الله..
ربنا يزيدك يا رب

بس عندي نقطتين بساط اعتقد أنك لازم تراعيهم ولاحظته في اكتر من نص واتمني تاخدي نقدي بصدر رحب :

1 - الايقاع او الموسيقي أو الرتم بتاع النص بيقع منك أحيانا في اجزاء .. وخصوصا في الوسط
ويجب تراعي النقطة دي بالذات لأنك من النوع اللي بيحب يكتب نصوص ادبية طويلة
وبالتالي لما حد بيقري وبيفقد رتم القراية مرة واحدة وخصوصا بعد اول فقرة .. بيحصله تشويش
الي حد ما ..

يعني زي هنا علي سبيل المثال .. انا حسيت بتشويش او بتقل في لساني وانا بقري
وفقدت رتم القراية

قال بحبك مسمعتهاش
بودنى لأنى حسيت
بيرددها الوجود

هي جملة بسيطة يمكن .. بس اعتقد هي تقيل في نص المفروض سهل ممتنع
كانت ممكن تتبدل بصورة افضل ..

وعلي ذلك المنوال في كمان جملتين كمان بس بصورة أخف ..او وطأتهم مآثرتش

2 - اعتقد برضه عشان طول النص المفروض تراجعيه اكتر من مرة املائيا وتراعي
ومثلا في حرف زي ( الواو ) , او جمع كلمة ومفرد .. او تأنيث فعل وتذكيره


يعني عندك الشطر ده علي سبيل المثال

كل أراضى الكون أخضرت
وطرحت ورود

لو بقت كدا

كل أراضي الكون اخضرت
طرحت ورد

او مثلا

قال بحبك

لو خلتيها

قالي بحبك

دول علي سبيل المثال لا الحصر

انا كمتلقي هحس بفرق كبير جدا وخصوصا في الشعر العامي ...
ويمكن الحاجات الصغيرة والبسيطة دي بتفرق جدا في شكل ووزن الكلام والجمل ..

والخلط ده بيحصل يمكن عشان بتكتبي شعر قوافي ومتعمقة فيه الي حد ما
وبالتالي من غير ما تحسي في كلمات مش بتقدري تفصلي مكانها ما بين العامية والفصحي
وبتحسيها طبيعية وانتي بتقريها لأول مرة بس لو دققتي فيها تاني
هتحسي ان في كلمات و جمل بتخونك في بعض الأوقات ...

وطبعا ده رأيي .. اتمني مايكونش سبب ليكي ازعاج


شكرا لهذا التميز الدائم
ولابداعك خالص التقدير والاحترام ...

[توحد ارواح]

بوح جميل عذب

سلمتِ والنبض

[فداااااااااااء]

رائع هو احساسك همس.. حالة جميلة من قلمك المتألق
دام نبضك المميز
و اسعدك ربي بما تتمنيه

[شاعرة الرومانسيه]

حبيبتى الحب مش كلمه تتقال ولا غنوه نرددها

لاء الحب موقف وافعال وطبعا مفيش حد بيعمل كدا

الا من رحم ربى

اياكى تنساقى خلف كلمات مزيفه تحت شعار الحب

ربى يسعدك حبيبتى

[SaMa.]

همس العسولة كلامك حلو اوووي

[دمعه حائره]

رائعه ومبدعه فى تصوير اى حاله بمنتهى الاحساس
تسلمى همس ابدعتى ويدوم التميز