ملاحظات ادارية من اداري متقاعد :)

[SiLver Spectra]

السلام عليكم
صباح الخير عليكم جميعا
الموضوع مكانه في صوت الاعضاء لكني اثرت اني احطه في النقاش عشان يوصل لاكبر عدد ممكن للاعضاء بظهوره في الصندوق فوق بهدف اننا نتناقش في بنوده بشكل بناء سواء بالقبول او بالرفض
هي فقط ملاحظات و بعتذر عن الاطاله فيها و لكن اتنمى القراءه بعنايه لها و للأعضاء كمان بالمشاركة في اراءهم


1) الموبايل !









استايل الموبايل سيء جدا و بيفتقد لكل خصائص المنتدى خلافا لشكله العشوائي اللي يطفش أي شخص كان ممكن يسجل جاي من الموبايل ..
طبعا أنا عارف ان محمود اللي مركبة بحجة انه متوافق مع الموبايلات اكتر فهيجيب زوار و خلافه من الكلام ..طيب الاستايل اخد وقته هل في تحسن في كدا ؟
ممكن بسهولة تتعمل دراسة جدوى من احصائيات لوحة التحكم و تتم المقارنة بين فترات قبل و بعد
أغلب مستخدمي النت الان بيدخلوا من الموبايل . الديسك توب انقرض و اللاب توب في طريقه للانقراض بعد ما انحسر على الناس المتخصصه (بارقام المبيعات)
طريقة فتح الاستايل الشامل غير موجوده الا في جوجل كروم و انا مثلا موبايلي ايفون التصفح بيكون عليه سيء جدا و لا يقارن بكفاءة سفاري

الخلاصة ان الاستايل بيخليني و اكيد بيخلي اي حد يخش منه عالموبايل يبقى مش عايز يفتح المنتدى لانه مش هيشوف الامكانيات اللي بتتشاف بالاستايل العام . فما اظنش حد هيخش المنتدى من الموبايل لاول مره و هيسجل . و ما اظنش كمان اي حد من اللي بيشاركوا بيخش من الموبايل او بيعتمد على انه يشارك كتير من الموبايل خاصة من الادارة و الا كان هيلاحظ الضرر و هيلغي الاستايل في اقرب وقت


2) رسالة الترحيب




رسالة الترحيب الاجبارية لازم يكون ليها علامة close حتى لو بتختفي بعد فترة .. وظيفتها لفت الانتباه انا عارف كدا كويس و بالتالي يكفي انها تظهر للمستخدم فاكيد بتلفت انتباهه ..لكن فكرة ان الرسالة دي ماتتشلش فدا بيكون استفزاز للمستخدم و الزائر عموما اللي ممكن يكون عضو نشيط بس داخل كزائر ..هيلاقي الرسالة دي بضايقه في انه يعرف يقرأ . فالأفضل يكون في اغلاق للرسالة تحترم الزائر في انه يعرف يقرا بدون مضايقه . لو عايز تجبره على التسجيل ففي طرق اخرى من اخفاء المحتوى لكن انا مش بحبذها لانه مش هيفيدك و افضل شيء تكسبه و هو عضو مسجل بارادته

3) ما هذا الشيء !؟





ال msn اتلغى و الياهو كمان انتهى و لسه القسم موجود
أنا شايف انه قسم فكرته قديمة جدا جدا انتهى زمنها من زماااان
أغلب مواضيعها اصلا صورها واقعه ..بمعنى اصح القسم دا وظيفته هو ان العضو اللي حابب يزود مشاركاته يخش يرد هناك (تسلم ايدك و مجهود رائع) لمواضيع اصلا مالهاش صور ((مكان مهجور و حلو برضو تغربل براحتك))


4) ألوان المجموعات





أنا سجلت في المنتدى هنا و كانت الالوان اخضر (عضو) و أزرق (مشرف) و بنفسجي أو بني (مراقب) و (احمر ادارة) فقط
زودنا عضوية التميز (برتقالي) ثم مشرف مميز (روز) و مشرف سابق (اسود و كان لبني في الاول)
أي زيادة عن كدا كنت بعترض عليها لانها بتفقد للألوان أهميتها . بمعنى لما تخش منتدى و تلاقي الالوان فيها محدوده بتقدر تفهمها بسهولة و بتديلها اهتمام اكبر من انك تلاقي كل عضو ماشي بلون فيه




دي صورة للمنتدى زمان 2010 بتبين اد ايه اللون كان مميز لانه كان قليل ..يعني لما واحد يبقى مشرف ازرق كان بيبقى ميت من الفرحة لانه فعلا هيكون مميز بين الاعضاء
أنا عارف مشاكل المنتدى و التسجيل و ضخ الاعضاء الجدد و ان فكرتها تشجيعية ..بس تفتكر لما يترقى مره و اتنين مش هيبقى عايز يترقى كمان مره رابعه وخامسة و سته ؟ و سبعه و تمانيه و تسعه ؟ يبقى اكيد في طرق تكريم اخرى غير اني اديله لون ((تعملوها بقى رتب عسكرية لواء و ملازم اول و نقيب و مقدم و جوكر اول و جوكر تاني ههههه)) أنا بتكلم عامة . الالوان كتير اوي بدون داعي بالاخص مجموعة الاداريين السابقين مالهاش داعي و حتى لو حابب يخصصلها صلاحيات فتقدر بنفس اللون الاسود و تبقى مجموعة مستقلة . أنا عارف انها نوع من التكريم لكن المشرف السابق كمان المفروض انه مكرم بااللون الاسود ...
جوكر المنتدى ! لون مخصص لعضو واحد ! مبدعين الاعضاء (سبق و ذكرت ان المضاف اليه بتحذف منه النون (مبدعي الاعضاء)

طبعا كل الكلام دا عارف انه هري لان صعب تنزع الالوان دي من اصحابها )
انا بتكلم عموما فكرة الالوان الكتير مش حلوة . حتى فكرة تمييز العضو المميز (البرتقالي) كنت ضدها
مش معنى كدا اني بقول ماتلونش . بس لون لحاجات مختلفة . يعني المميز و المبدع هل في فرق بينهم ؟ ..لكن مثلا لو مميز و اداري منتخب او نائب برلماني ؟ اه انا كدا فهمت فرق اللون اهميته ايه ((دي الفكرة اللي اقصدها من انك بتفقد الاهتمام بالالوان لما تزيد و تبقى بدون معنى أو بمعاني متشابهة مش مختلفة)

الصور الشخصية
شوفت موضوع مطروح من كام شهر من اداري بيتكلم فيه عن ان الصور الشخصية مخالفة

http://forums.banatmasr.net/msryat547351/

دا قانون قديم من ايام ظهور المنتديات و سبق و كنت طرحت فكرة الغاءه و لقى اعتراض كبير فكبرت دماغي ...
تفتكروا ليه (عصر المنتديات انتهى ؟ ) ممكن تعمل بحث على العنوان دا و تشوف اراء الناس في كدا عن اسباب سقوطها بعد ازدهارها في الاعوام 2007 الى 2011
و هحاول اسرد بعض الاسباب اللي خلت المستخدم يلجأ لمواقع التواصل الاجتماعي و ينفر من المنتديات

1) مواقع التواصل عالمية في حين المنتدى محلي جدا و عمر ما حد يقدر يجيبك من عليه خاصه و انه بيعتمد على اسماء و رمزيات مستعارة

2) انت ملك نفسك على مواقع التواصل ماحدش بيعدل على مشاركتك و لا بيحذف كلامك . و بالتالي بتحس بحرية اكبر بكتير من المنتديات اللي بتكون مراقب فيها

3) بتختار الناس اللي على مزاجك في مواقع التواصل و بتدي بلوك للي مش عاجبك بينما الناس بتفرض على بعض في المنتدى

4) مواكبة العصر اللي المنتديات تخلفت عنها . اخر تحديث كان في الجيل التالت للمنتديات لنسخة ال vb كان 3.8.7 بتاريخ 2009 ..و دا اللي المنتدى شغال عليه لحاد النهارده ..اتعمل جيل رابع باصداراته و لم يلقى قبول و لا نجاح زي الجيل التالت و اخر متابعه ليه ان كان في جيل خامس و اكيد طلع من زمان و فيه المنتدى بيتحول لحاجه شبه الفيس بوك و شخصيا ماشوفتش او ما اخدتش بالي من حد مستخدمه ..و لو جيت تطور المنتدى للجيل الرابع او الخامس انتوا كاعضاء قدام مش هيعجبكم و هتحسوه مكان مختلف و مش مريح و كل حاجه فيه اتغيرت و في نفس الوقت مش بيجيلك اصلا اعضاء جدد بسبب اهتمام المستخدم بمواقع التواصل و عزوفه عن فكرة المنتديات اللي اصبحت قديمة لاسباب سبق ذكرها . و كمان المنتديات ما قدرتش تواكب الموبايلات الحديثه بتطبيقات

5) و دي نقطة مهمة جدا و هي الظهور بشخصيتك الحقيقية على مواقع التواصل من اسم و صور و خلافه و دا بيديها واقعية اكتر على خلاف المنتديات اللي كلها اسماء و صورمستعارة ..لحاد دلوقتي مش عارف ايه العبرة من اني امنع الناس انها تحط صورها الحقيقية و اللي مش عايز هو حر برضو ؟ الحجج كلها انا بشوفها فكر قديم جدا (اصل حد هياخد صورتها و معرفش ايه) و كأننا لسه عايشين في عصر الكهف . الموضوع حرية شخصية ليك مش اجبار ..واحد حابب يحطها او واحده و شايف انها مش بتعمله ضرر ايه المشكلة ؟ بدل ما كل واحد بيحط ممثل تركي ) أنا بشوف الرمزيات الحقيقية بتعمل نوع من النضوج و الواقعية و كمان مسؤولية . كل ما تكشف شخصيتك الحقيقية اكتر كل ما هتكون مسؤول اكتر عن افعالك و تصرفاتك لانك معروف مش لابس قناع و مجهول

===============

دي بعض الملاحظات اللي تقدروا تقولوا انها فضفضة
في انتظار تعقيباتكم
و شكرا للقراءة و الاهتمام

[دمعه حائره]

اولا عودة مميزة منك دكتور ودايما منك بنستفيد
اتفق معاك فى نقطة استايل الفون وسبق وطلبت من محمود
انه يخليه مش اجبارى لانه فعلا ببيفتقد خواص كتير وشكله غير مشجع
لكن هو وضح الحل فى اختيار وضع الديسك توب
وفيه متصفحات غير كروم متوفر فيها زى دولفين مثلا
لكن انا نفسي يرجع زى زمان كان مفيش فرق بينه وبين الاستايل العادى
الا فى منع الصور والبنرات والاوسمه
وكان مريح جدا بيوفر الباقه ومشجع
لان غالبيه الناس بتدخل موبايل وتاب دلوقتى

رساله الترحيب فعلا محتاجة تتقفل يدوى لانها شاغله مكان كبير
وياريت تكون على شمال الشاشه

اما المجموعات والالون وبما انى انا ومحمود
اللى عملنا مجموعه المبدعين
مش معاك فى ان مافيش فرق بينها وبين الاورنج
لان ماينفعش تساوى بين مميز ونشيط فى المنقول
بنفس لون اللى بيكتب حصري
وانا شايفه انها فرقت كتير
من يوم مااتعملت فى تشجيع الحصريات فى المنتدى
عارفه من يومها وانت معترض على الالوان
بس افتكر بعد مابقى لونها سماوى مااثرتش كتير على زيادة الالوان
ويمكن لما الادارى بيفكر فى عضويه جديدة او ترقيه بمنصب جديد
بيكون حل لعلاج الملل وتشجيع للعضو القديم انه يستمر
الالوان اللى زادت افتكر هى الجوكر والادارى السابق
بس محتاجين نفكر فعلا فى طريقه تكريم
حتى لو ألقاب مصورة تمنحها الاداره فقط
للاعضاء اللى مروا بترقيات وماينفعش نزود عضوية جديده ليهم
كنا زمان بنعملها بس اوسمه افتكر اللقب هايظهر اكتر

الصور الشخصيه متهيالى معنديش مشكله ان يبقى مسموح بيها
دى حريه شخصيه وكل واحد ادرى بمصلحتة
غير انهم بيحطوها على الفيس عادى
الفيس وتويتر دلوقت واخد اكبر اهتمام من الناس
ولما تخلى المنتدى فيه اكبر عدد من خواص الفيس بيكون احسن
ده فيه ناس بيسالونى ازاى نعمل بلوك لعضواو اقفل عضويتى
يعنى بيدوروا على ان المنتدى يبقا زى المواقع دى
منور المنتدى دكتور
وشكرا على النقاش ان شاء الله هايكون فى مصلحة المنتدى

[حـيـــــآة ❤]

السلام عليكم

اولا حضرتك نورت من تاني أ/طارق

ويارب دايما موجود بيننا

ملاحظات كلها واقعيه بجد، واهميه

بس اسمحلي اعترض علي نقطه الصور الشخصيه دي

لان مالها اي داعي ان حد، يتزل صورته ف منتدي

وطبعا دي حريات كما تفضلت حضرتك..

ومع حضرتك ان ستايل الفون مش حلو

وبالنسبه لنقطه الالوان الكتيره اوي دي

فهي يعتبر تشجيع للعضو

يعني العضو مش هيفضل اخضر سنه

هو ممكن يتم استبدال الالوان بعبارات تحت الاسم تدل ع انه مميز

بس زي ماحضرتك برده تفضلت مش هيتم سلب الالوان دي من الاعضاء دلوقتي اكيد..
بس انا بعتبر موضوع الصور الشخصيه دا مرفوض
لانه هيكون في علاقات بعيدا عن مستوي المنتدي هتزداد اكتر

وهيكون في تشهير ومعاكسات
ودا شفته حقيقي هنا
من عضو وعضوه

فدا كله مالوش داعي جوا المنتدي

آراء جميله وواقعيه استاذنا
في حفظ الله

[BaAnoOta]

جمميل جدآآ وفعلا المشكلة بتاعت الفون دي مستفـزة جدا
يعني أنا اغلبيـة وقتى كنت بقضيه ع الفون ولمآ عملوه الاستايل الجديد
بقيت فعلأأ محبش ادخل المنتـدي لانه بيفقد من قيمته
هتقـولي دوسي علي سطح المكتب بقا وبتاع ، معلش انا واحده جاهله ومبفهمش ف الحاجات دي

وبخصوص رسالـةة الترحيب ف انا باييدك لاني ف اي منتدي بتصفح عليه غير ده بيقا عندي الحرية اني اشيلها او لاء

نيجي بقا لحكـآية الالوان ، محدش يجي جمب البرتقاني بتاعي انا بقلوكو اهو
أنا شايفه ان الالوان كون أنها تتشال وتبقي الوان محدده بجحم الرتب فـ ده ممكن يبقا ايجابي بردوو

سؤال بس هووا كان ف فترة من ألفترات المنتدي كان بيشغي زباين كده ؟
إن شاء الله مع الطاقم الجديد وتفاعل الاعضاء هيرجع زى مآآ كان
تسلم ايدك ع ألتوبيك

[واد حبيب]

موضوع جميل منك يا طارق
بنسبه لموضوع التلفون ده هيه فعلا متعب جدااا انا فضلت اكتر من 4ايام مش عارف ادخل من التلفون بسبب ده لحد ما محمود عمل موضوع ووضح وعرفنا بندخل ازاي لكن فعلا العضو الجديد مش هيعرف يعمل حاجه والكل دلوقتي بيدخل من التلفون
اما عن الالوان هيه فعلا كتيره اوي كان الاول 5الوان بس دلوقتي الله واكبر كل عضو بلون
اما عن الصوره الشخصيه وده فعلا حريه شخصيه للكل ولزم كل واحد يكون واخد حريته علشان يعرف يستغل وهوه مبسوط
في اعضاء كتير اوي سابو المنتدي وموجدين دايما علي الفيس علشان في حريه اكتر

تسلم يا عريس علي موضوعك

[Aya 7ekaya]

نقطه الالوان فى اعضاء هى الل طالبت بيها فى الاول انا فاكرة
ويمكن هى تتوه فعلا اى حد جديد مش عارف المنتدى كويس
لكن انا شايفه انها ف الوقت الحالى ايجابيه مع قله عدد الاعضاء وده شىء متفق عليه كل عضو بعد فترة بيحتاج تكريم كتشجيع ف الرتبه دى بتفرق جدا مع الاعضاء
وانا حبيت فكرة منه ان يبقى فى القاب من الادارة للاعضاء المميزيين

فكرةالصور الشخصيه ، فى فرق كبير بين المنتدى والفيس
لما يحصل مشكله بسبب صورة شخصيه مع عضوة مثلا مش هتروح تقول لمارك العضو ده عمل كذا وكذا
لكن هنا هتلاقى شكاوى ووجع دماغ
ف مالهاش لزمه اعتقد

نورت بقا ^^
وعايزين مواضيع نقاشيه كتير

[الفيلسـوف]

ألسلام عليكم وعرحمته وبركاته يادكتور طارق
اكيد سمعت عن حضرتك كتير وشوفت مناقشات كتير لو حنسرد نقطه نقطه من اللى حضرتك بتكلم عليهم
بالنسبه لاستايل الموبيل انا متفق معاك ف النقطه دى وكلمت الباشمهندس محمود ف النقطه ديه
ويمكن كان ليه راى طبعا ولكونى مش بفهم ف قصه الديزن قولت يمكن تكون ليه وجهه مختلفه ف القصه ديه

نقطه رقم 2
حكايه الالوان انا مش معاك فيها القصه ديه وارجو ان تقبل نقدى طبعا كون ان يبقى فيه لون جديد
ده بيبقى فيه تشجيع لان فيه ناس كتير بيبقى ليها نشاط معين ولكن لازم تبقى تحت المكيرسكوب
حبه لانى بيبقى ليهم حريه بس بيستخدموه فى قصص تانيه واعتقد انى شوفت ده بعينى من اعضاء
مشيت من المنتدى تانى لانى ساعات بتبقى ليها اغراض تانيه ف بالتالى انا بعمل اللون ده الاول
تشجيع وعلشان اشوف الانسان ده حيبقى التعامل الفعلى والعملى انا من وجهه نظرى شوفت انى اللون البرتقالى هو محطه قبل الاشراف ده اللى انا فهمته بس السوال يادكتور طارق من معنى انا حضرتك مش فهمته من كلامك وهى يعنى ايه كثره الالوان بيفقد الى الالوان قيمتها اذا كان كل لون ليه مهمه مختلفه
وارجو انى حضرتك انك ما تنسى انى التجديد احياناً بيلغى نظريه الملل احياناً

نقطه 3

طبعا بالنسبه للصوره الرمزيه انا متفق معاك فى شى ومختلف معاك فى شى
طبعا من حق الانسان وليه مطلق الحريه فى قصص كتير لانى هو داخل موقع اجتماعى
وليس سجن اجتماعى ولكن انا بقول الفئه استغلت موضوع الصور ده استغلال سيى
لانى فى ناس كانت بتستخدم الصور الرمزيه فى الاسلوب المبتذل الذى لا يوصل الى شى
وطبعا اللى قرر ده كانت د اسماء قبل تركه للاداره داخل بنات مصر واعتقد انها
كانت لها نظره صائبه فى كثير من الامور
ولكن طبعا لو فيه حل عند حضرتك يادكتور طارق مناسب للحاجات ديه بحيث لايكون
فيه ضرر لاى انسان وفى نفس الوقت فيه حريه اكيد مرحب بيه
لانى حضرتك كنت مشهور هنا بحسن الاخلاق وظاهر اوى حب الناس ليك ولفترتك الاداريه
اكيد اتشرفت بوجودك وبكلامك الذى يعبر عن وجهه ليس لها غرض الا الاصلاح
تقبل مرورى وفائق احترامى لحضرتك ولشخصك الكريم

[ahmed 22]

انا بتفق معاك بنسبة 100%
كل كلامك صح جدا

ومع ذلك أنا ماقدرش اتجاهل ان المنتديات مفروض يكون ليها شخصيتها المستقلة
بعيدا عن مواقع التواصل زي الفيس وتويتر ... لأان المنتديات بتدي مساحة أكبر وكينونة أقل لكل شخص
والعضو قادر يوصل برأي ليه بصورة فضفاضة وسط اهتمام اكبر وجو الي حد ما فيه حميمية شوية ..
والناس تاخده بعين الاهتمام مش مجرد رأي اتقال علي الفيس واتنسي
وسط الاف التعليقات في حسابات خاصة بمواقع مشهورة زي اليوم السابع وغيره ..

وان تطوير المنتديات وقفت عند الجيل التالت مش معناها بشكل اساسي
ان المشكلة في تطوير الموقع نفسه وانها محتاجة رابع وخامس
.. المشكلة بتنبع من تطوير العضو لنفسه وده اللي كل اصحاب المنتديات وقفوا عنده
وبالتالي تلاقي معظم المنتديات قفلت .. وده دايما اللي بركز عليه ..
بسبب التعود وأن كل واحد بينافق ذاته حبتين ..
ومافيش انفتاح مع كل ما هو مخالف لرأي اغلبية الموجودين في المكان ...

وده السبب الرئيسي في هجر المنتديات عموما
لأن ماحدش بيساعد حد أنه يبقي أفضل .. كل الاعضاء
بيوصلوا لنقطة محددة من التطور وبيملوا وده أمر طبيعي جدا
لأنك بتحس بالرضا عن نفسك طول الوقت فكل اللي تكتبه والاعضاء بيساعدوك علي كدا
من خلال ردودهم ..وده شئ مش كويس طول الوقت ..

وماحدش فكر في يوم مثلا بدل ما يدي الاعضاء هنا حافز مشاركات زيادة
واللي لحد دلوقتي مش عارف ايه فايدتها ولا ايه البراق في كدا اني ابقي عند 30 الف مشاركة من لا شئ
... ولا مسابقات من يرد اكتراو تنشيط المنتديات .. او أنك تصحي اقسام ميتة بدون داعي
او أنك تحدد نشاط وطاقة بعض الاعضاء في حاجات مالهاش عازة زي تنشيط الاقسام دي ...

وبعدين انا ليه اصحي في قسم ميت ..
في حين أني قادر انشط القسم الحي واركز عليه بصورة اكبر طالما الميول ليه اكبر
هو انا مطلوب مني كعضو مثلا أني اخالف طبيعتي وارد علي اقسام
ماليش ميول ليها ... واكتب تسلم ايدك من غير ما اقري الموضوع
ايه الاستفادة هنا ؟؟؟ ده 90 % في المية من اقسام المنتدي
أنا واحد من الناس مفكرتش حتي ادخلها

لو كانت الاستفادة انك بتكتب مواضيع الطبخ والماسنجر او غيره
عشان تقدر تجذب الناس من خلال محركات البحث في جوجل
لما يبحثوا عن طبخة او تنزيل فيلم ولا مسلسل... فيلاقوا المنتدي ..
فيدخلوا ويسجلوا وتعمل ماركتنج
فده مش هعارضك عليه مع انه اهدار لطاقة العضو اللي المفروض داخل يبدع ويطلع مواهبه
مش انه يفرغها بالكوبي بيست وانت بتساعده في كدا ..
بس أنت ممكن تعمله بألية بعيدة عن الاعضاء
وتسوقه من خلال الموقع الأم نفسه اللي بندخل عن طريقه للمنتديات ..

لو انت عندك عضوين بس مهتمين بالمجال ده .. فهما مظلومين جدا في مكانهم والتفاعل معاهم قليل
وهيخليهم حاسين طول الوقت ان الناس مش مديينهم قدرهم بكل النشاط اللي بيعملوه ...ومع الوقت هيملوا برضه وهتخليك طول الوقت تدور علي اللي ينشط وفي الاخر هتفشل ..

ولو عاوز تعمل قيمة اكبر وتتطور تقدر تعمل للمنتدي آلية أنه يكون ليه علاقة
بدور نشر للكتب مثلا ويعمل علاقات معاهم
ويقول للاعضاء هنا أنهم من خلال تطورهم قادرين مع الوقت
انهم يعملوا ديوان شعر .. أو كتاب او كتيب ايا كان.. ويكون للمنتدي نسبة من النجاح
وده اكبر تسويق للمنتدي ..
والناس هنا تساعدهم للوصول والمتابعة معاهم حتي يصل ما يكتبوه للنور
وده من رأيي التطور الطبيعي المطلوب من المنتديات كمجتمع مصغر ..
مش الشكل الخارجي ليه او غيره .. أنك تستغل موهبة الناس
والناس يكون ليهم طموح أكبر للكتابة ..

وبرضه تخيل أنك كل ما تكتب موضوع تلاقي نفس الرد بيتقالك في كل موضوع
ومش منتظر تسمع من حد اي ما يخالف ولو حتي المخالف غلط ..
مش شرط اللي بينقد دايما علي حق ..
بالعكس اللي بينقد ده بيديك الفرصة أنك تدافع عن اللي بتكتبه وقيمته لو بيكلم غلط
وبيعلمك شئ مهم أنك ليك لسان وقلم تقدر تدافع بيهم عن موهبتك
ولو بيكلم صح تقدر تستفاد منه وده مش عيب ماحدش فينا كامل ..
وده الشد والجذب اللي يخلي استمرارية للمكان ...
مش أنك موضوع لطيف وحلو . . سلام
ولو موضوع في نقاش .. ماحدش عنده نفس طويل
انه يدافع عن وجهة نظره للاخر .. كله بيرمي كلمتين وبيروح ....ماعرفش ليه

بس كله مستعد يسمع صوت نفسه ليس الا حسب ما اتعود ..
وبتعتبرها اهانة بحسب التعود لو الكلام اختلف ..
وبالتالي القائمين علي المنتدي نفسه محتاجين يضعوا نقاط جديدة
للتواصل بين الاعضاء ....

ويخلوا التميز او اللون ده شئ الناس تسعي ليه ..
مش تدرج عدد المشاركات مين اكبر.. فنطوره ..
ونديله تميز ... او مبدع .. لازم نسمي كل شئ بمسمياتها ..

جمعة مباركة ..

[ايمان طلعت]

استايل الموبايل

هو فعلا استايل مالوش اي لازمه ولما دخلت منه مفيش اي حاجه عرفت اعملها
فبدخل علي اصدار الكمبيوتر عشان اقدر اشتغل
طب دة انا اعرفه الزائر الجديد هيبص مش هيعرف يعمل حاجه هيقفله ومش هيفكر يدخل تاني

فالافضل يتلغي

*********
رساله الترحيب

حاجه كويسه اننا نرحب بالزائر
بس الزائر يستني دقايق عشان الرساله تتشال دة ممل وهيخليه يقفل
مأخدتش بالي منها غير دلوقتي لاني مش بدخل زائر
فالحل
تظهر ثواني وتختفي او يتعملها اكس قفل

************
الاقسام القديمه

فيه اقسام فرعيه كتير تعتبر مالهاش لازمه ومنها القسم اللي تفضلت بطرحه
الافضل يبقي قسم للكمبيوتر وقسم للموبايل وقسم ستالايت واعتقد ان الستالايت كمان مالوش اهميه

**********
الالوان

هي تعتير ترقيه للعضو وتحفيز ليه مش هيفضل اخضر علي طول لو ممسكش اشراف مثلا
فكون ان عضو اخضر قديم واترقي للون تاني يفرقه عن عضو اخضر جديد فدة حافز ليه
وفيه فرق بين البرتقالي و اللبني
اللبني للحصري والبرتقالي للنشط
اللون اللي مالوش لازمه هو الجوكر

************
الصور الشخصيه

قانون عدم ادواج صورة شخصيه ممكن يتعدل و يكون
مسموح بادراج صورة شخصيه للعضو مع تحملة مسؤليتها اذا حدث بسببها اي مشكلة
يعني يحطها براحته دي حريه شخصيه ليه بس لو اتعمل بسببها مشاكل دي ترجعله بقي
يعني يتحمل سبب حريته الشخصيه

نورت والله دوك وملاحظاتك مهمه فعلا
ولو فيه اي ملاحظات تاني تفضل بطرحها لان كله بيصب في مصلحه المكان

تحياتي

[.Lamar]

طبعا حضرتك نورت بيتك يا دكتور طارق

و الف مبروك على الجواز

انا مع حضرتك واغلبية الناس ان استايل الجوال سىء جدا

و يا ريت يتغير او حتى يكون فيه اختيار اننا نستبدله من الرئيسية

بالاستايل العادى للى يحب

بالنسبة للالوان شيفاها معقولة ما عدا عضوية الجوكر

اللى فيها عضو وحيد وصلاحياتها كانت نفس صلاحيات المراقب

و عجبتنى فكرة منة جدا تبع الالقاب المصورة

هتدى مجال للتنافس و هتكون نوع من التشجيع

بالنسبة لنقطة الصور الشخصية

هى حرية شخصية اه

بس انا ضد تطبيقها هنا

على الفيس كل واحد مسئول عن نفسه يمكن

لكن هنا بحس ان الادارة ليها دور

فى الحفاظ على امان الاعضاء

و فيه بنات صغيرة اوقات بتتواجد

و مش كل النفوس بتكون سوية

فالافضل فى رأيى المنع

النقاط اللى حضرتك ناقشتها مهمة
و بتمنى تتواجد معنا كل ما تسمح ظروفك اخى
ربى يجازيك كل خير

تحياتى وتقديرى