نفسي أرجع زي زمان

[شاعر الحب الحزين]

القلب فيه اللي مكفيه

نفسي أرجع زي زمان

ولد وأبسط أمانيه

يلعب مع ولاد الجيران

حضن حبايبه يدفيه

يملاه سعادة وأمان

الكل يشوف دموع عنيه

ما يداريهاش بين اربع حيطان

لو يتعب يلاقيهم حواليه

أصحاب وحبايب أهل وخلان

يسألوا ويطمنوا عليه

ما يبقاش تايه ف أي مكان



لا شايل حمل ولا عنده أي هموم

على كيفه ينام على كيفه يقوم

شايف كل الناس طيبين

ل لعبته ومدرسته الحنين

عايش بمزاجه ولا تحت أي ظرف محكوم

ضحكته ودمعته ليهم تمن

ذكرياته باقية ف كل زمن

حياته تهمهم حكاياته تلمهم ملوش أي خصوم

ولد صغير كل طموحه إنه يكبر

ولما كبر بقت همومه منه أكبر

ناس اتغيرت وناس اتكبرت وهو اللي بينهم مظلوم

نفسي أرجع زي زمان

وقبل ما اكبر يقف الزمان

رحمتك يارب بتغنيني رحمتك باقية ف دنيا مش هتدوم



شـــــــــــــــــــــــــــ . حـــــــــــــــــــــــــــ

[ندوشه 2011]

كلنا عايزين نرجع لزمان يالا لم شنطه هدومك عشان ترجع لأيام زمان إذن فلناخذ من كل رجلا قبيلا فاكر البلي واستغمايه والرفه ولما الكهربا تقطع بليل كنا بنخبط عالبيوت ونجري وكنا ناخد العلقه التمام.

[دمعه حائره]

قول للزمان ارجع يازمان
كلمات جميله ربنا يريح بالك خالد

[حـيـــــآة ❤]

الله يسعد ايامك خالد
اهو احنا ياصغيرين عايزين الزمان يرجع

[العاشق الذى لم يتب]

خليك على كده
ولسوف يعطيك ربك ويرضيك
دعواتى
واطيب المنى

[توحد ارواح]

فعلا كل حاجة زمان احسن من دلوقتى

جدا جميل
سلم نبضك

[Doaa Hammam]

ألا ليت الزمن يعود

أجمل شئ بالدنيا هي الطفولة

ومفيش أجمل من انك تلعب مع طفل وتعمل عقلك بعقله وتعيش ولو سويعات قليلة كأنك طفل

بالفعل عالم جميل خالي من التعب والهموم

سلمت يمناك ولك مني أجمل التحايا والمنى

[Fatma eissa]

كل مراحل الانسان
ليها أوان وايام
جميله علي نفس الواحد
عشان يكون عارف الفرق
ويكون دايما مشتاق ليها
وتكون ذكري عالقه في للأذهان
وهي فعلا الحياة في صغر احسن
الواحد لا بيه ولا عليه
ونتمنى نكبر عشان نعرف الحياة اكتر
ولما نعرفها تمام المعرفه بتمنى برجع
للصغر ولايام الحلوه
ولكن الزمان لا يرجع
بل يمضي للإمام
دائما
وهنا ممكن نقول الحنين
للماضي الجميل
ويسلم قلمك المبدع
الذي خطي هذه الكلمات
الجميلة
ودام قلمك المبدع
من كل شر

[شاعر الحب الحزين]

اقتباس المشاركة الأصلية كتبت بواسطة ندوشه 2011 كلنا عايزين نرجع لزمان يالا لم شنطه هدومك عشان ترجع لأيام زمان إذن فلناخذ من كل رجلا قبيلا فاكر البلي واستغمايه والرفه ولما الكهربا تقطع بليل كنا بنخبط عالبيوت ونجري وكنا ناخد العلقه التمام.

هههههاي كانت ايام حلوة

قبل ما نفهم حاجة وقبل ما نعرف واخدانا على فين

تسلمي ندوشه منورة الدنيا

ربي يوفقك ويسعدك

[شاعر الحب الحزين]

اقتباس المشاركة الأصلية كتبت بواسطة دمعه حائره قول للزمان ارجع يازمان كلمات جميله ربنا يريح بالك خالد

ارجع يا زمان

تسلمي منة الاجمل تواجدك اكيد

اسعدتيني بحضورك الطيب منة

ربي يوفقك ويسعدك