قصيده بلياتشو جبان بقلمى

[fanaa]

بلياتشو جبان
أيامه بتشبه بعضيها
وحياته عايشها مقضيها
بيوزع فرحه على وشوشهم
وجراحه ومين حاسس بيها
بلياتشو جبان
عايش يتمشى على المسرح
بتشوفه الناس تضحك تفرح
وهمومه أوام فى عيونه تطرح
فيخبى دموعه فى الالوان
بيخدع جمهوره بالضحكه
ويقولو الله على حركاته
يعمل مبسوط وسط السقفه
ويدارى فى الضحكه أهاته
بلياتشو جبان
بيلون نفسه بلون الصيف
مع ان عنيه بتموت م البرد
يرسم ع المسرح ألوان طيف
بس الالوان جواه بتتهد
وشه الزعلان يحكى حكايه
فى وشوش الناس عينها مرايه
بتبين من جواه روحه
وبتكشف زيف الضحكايه
بلياتشو جبان
بيلون عينه بشمس نهار
مع ان الليل حابس روحه
ودموعه بتجرى كما الانهار
بتلطم فى القلب جروحه
أنا والبلياتشو منفرقشي
كان هو الاصل وأنا الصوره
أنا والبلياتشو مفرقتش
نظرتنا السوده المكسوره
شفت البلياتشو فى مرايتى
وأزازها الباكى البهتان
وهتفرق أيه لو ع المسرح
أو كنت انا وسط الجمهور
هفضل بلياتشو بيدارى
من غدر الدنيا فى ألوان
بلياتشو جبان
بقلم /آيه ابراهيم يوسف

[.Lamar]

بس انا شيفاه غلبان مش جبان يا قلبى

محبوس جوة الوجع

مش. قادر حتى يشكى همه

بيضحك و هو من جواه بيموت

حلوة فنا جداااا
بس صعبة

ربنا يبعد عنك كل حزن
و يسعد قلبك

[كـريـم الحـفنـى]

قلم فى منتهى الرقى
وقصيده تم نسجها بأنامل تجيد الأبداع
فكره ومضمون وطريقة سرد ولا اجمل
تقبلى تحياتى لقلمك الرائع

[نجاة حسام]

مهو لزم يضحك غيره لو يقدر كفايه الحزن كسره لوحده اصلى اللى انكسر بيحب يشوف غيره سعيد لو يقدر لو قلبه حتى بيتقطع بس يرسم ضحكه على وش غيره بيحس بمعنى لحياته
اغلبنا نفس البليتشو

[قلب وكلمات]

الله الله
الله يا فناء روعه في تجسيد الصورة
لبلياتشو قادر على اضحاك الناس لكن داخله يبكي
ابراز الجانب النفس لشخصية يظنها الجميع أنها تسبح في السعادة
كل الشكر لكِ وتحياتي

[رعد السـماء]

الله يا آية
بجد أبدعتي .. كلامك لمسني من الداخل
كلنا جوانا بلياتشو "غلبان" على رأي لمار

مين فينا بلا أحزان ؟؟؟
ولكن النسبة بتختلف من شخص للتاني

تسلمي آية
متألقة كعهدي بكِ دائماً ..

[الوحدانى شعلان]

دوماً تسعدني كلماتك
وتدل على رقي قلمك
تحية لعبق حروفك

[العاشق الذى لم يتب]

الله الله
روعة آية
كلمات ومعانى
ومشاعر فوق الروعة
ماشاء الله عليك
قلمك يصعد الكمال بسرعة
تسلمى

[دمعه حائره]

ومااكثرهم من يفنوا حياتهم لاسعاد الاخريين
ومن جواهم الم وحزن كبير
كلمات رائعه تسلمى حبيبتى ابدعتى

[fanaa]

اقتباس المشاركة الأصلية كتبت بواسطة .lamar بس انا شيفاه غلبان مش جبان يا قلبى محبوس جوة الوجع مش. قادر حتى يشكى همه بيضحك و هو من جواه بيموت حلوة فنا جداااا بس صعبة ربنا يبعد عنك كل حزن و يسعد قلبك

بالعكس يا لمور دا جبان بيخاف يبين احزان قدام حد
جبان لانو بيخاف يبكى فبيكدب بضحكه
جبان عشان بيخاف يبين مشاعره قدام حد
نورتينى يا جميله