الفضول

[اندرسون]

سلام عليكم
الفضول نعمه مش ممكن تتخيل تعمل فيك ايه
معظمنا شوفنا فيلم The Shawshank Redemption ؟
إيه رأيك فيه؟
- اكيد هتقول فيلم جميل وطلعت منه بمعاني عظيمة منها الصبر والكتمان وإني مفقدش الأمل
طاب تعرف يعني redemption؟
- لا
من الأمور المهمة علشان تتعلم أي حاجة جديدة في حياتك هو الفضول، وأنت ماشي في الطريق وقابلتك يافطة مكتوبة بالإنجليزي متمرش عليها علطول، سجل الكلمة واعرف معناها وساعتها عمرك ما هتنساها لأنها ارتبطت في ذهنك بالموقف ده.
مثلًا هنا كلمة redemption تعني الخلاص و shawshank ده اسم السجن اللي كان فيه مورجان فريمان وأندي دوفرينس، بالتالي معنى عنوان الفيلم الخلاص من سجن شاوشنك، الكلمة بالمناسبة كمان عنوان لأغنية شهيرة لبوب مارلي اسمها Redemption Song.
طاب لو أنت بتذاكر وعرفت معنى الكلمة دي ممكن تطنش أو تنساها، بينما لأنك ربطها باسم الفيلم يستحيل بعد كده تنساها في حياتك وهتفضل في بالك علطول.
.
- في مرة كنت ماشي في شارع وبصيت على شمالي لقيت مسجد مكتوب عليه: مسجد المستعلي بالله، وكنت أول مرة أسمع الاسم ده، رجعت البيت كتبت على جوجل المستعلي بالله، الكلمتين دول بس، عرفت إنه هو تاسع الخلفاء الفاطميين في مصر، وحكم البلد لمدة سبع سنين ومات سنة 1101، المستعلي ورث الحكم عن أبوه المستنصر بالله، المستنصر ده يبقى حفيد الحاكم بأمر الله، صاحب مسجد الحاكم في شارع المعز اللي كلنا بنروح نتصور عنده، أبو الحاكم بأمر الله يبقى العزيز بالله واللي ليه شارع كبير باسمه في حي الزيتون بمدينة القاهرة، أبو العزيز بالله يبقى المعز لدين الله الفاطمي مؤسس القاهرة وأول خليفة فاطمي فيها وهو اللي أرسل القائد جوهر الصقلي للقاهرة، بمناسبة القائد جوهر، في آخر الشارع اللي فيه جامع المستعلي بالله شارع كبير باسم جوهر القائد واللي فيه الجامع الأزهر والحسين.
أما الشارع نفسه اللي فيه الجامع، فاسمه المنصورية، المنصورية دي كانت عاصمة الخلافة الفاطمية في تونس.
كل ده بضغطة زر واحدة، لما فتحت ويكبيديا لمجرد إني كتبت المستعلي بالله لقيت تاريخ مصر كله قدامي، وده شيء أشبه بالخيال إن بالسهولة دي نقدر نتوصل لمعلومات كنا بنقطع ليها مسافات طويلة في الماضي.
.
بيُقال إن أينشتاين لما اتسأل عن سر عبقريته قال جملة واحدة: أنا لست عبقريًا بل فضولي.
الفضول هو اللي هيخليك ناجح في أي حاجة عايز تتعلمها، متخليش أي معلومة أو تفصيلة تمر عليك بدون ما تعرف سببها وسرّ تسميتها ومين اللي وراها، ولو بتتعلم إنجليزي متسيبش كلمة قريتها في أي مكان أو عنوان فيلم أو مسلسل غير لما تكتبها على موبايلك واستغل جوجل واسأله مش هيزهق منك وهيجاوبك، وهتعرف معناها ومع مرور الوقت هتقدر تتعلم أي حاجة جديدة بدافع واحد بس: الفضول

[Eng Esraa]

صح جدا ..
بس لما بيكون فضول شخصي
بيبقي شئ مستفز جداا ..
تسلم ع التوبيك بقا

[اندرسون]

دا بيقي مرض
نورتي التوبيك

[Abdallah]

و عليكم السلام

تفكير مميز و موضوع رائع

تسلم الأيادى ...

[اندرسون]

اقتباس المشاركة الأصلية كتبت بواسطة abdallah و عليكم السلام تفكير مميز و موضوع رائع تسلم الأيادى ...

مرورك الاروع
و بلاش تسلم الايادي دي