الحلقه ١٨ من استضافه ومعانا قلب وكلمات

[واد حبيب]

السلام عليكم ورحمه الله وبركاته
اهلا بكل اعضاء المنتدي الموجدين ومنورين دايما هنا
النهارده حلقه جديده من حلقات استضافه ولكن حلقه غير عاديه
لانها حلقه مع مبدع ، بجد مبدع في كتاباته ومبدع في ردوده
مبدع في اخلاقه واحترامه،رائع له بصمه جميله في الاقسام الادابيه
وانا من أشد معجبيه وبتابع كتاباته باستمرار
معانا في الحلقه الضيف الجميل المبدع

قلب وكلمات

منتديات بنات مصر - مشاهدة الملف الشخصي: قلب وكلمات
اهلا بيك منور المنتدي طبعا

أهلاً بيك يا محمد ، وشكراً على الكلام الجميل اللي فوق ، طبعاً من زوقك

ايه السر في تسجيلك بأسم قلب وكلمات

الأسم له معنى عندى إن القلب بيحس والكلمات بترجم الاحساس

قولينا عرفت المنتدي ازاي

من خلال الراقي عاشق ولهان

ليه الغياب الفتره اللي فاتت ده كلها

ظروف يا محمد وفترات كتير كنت بين مصر و****************** فما كان فيه مجال لا للكتابة ولا الدخول

انت من اقدم اعضاء المنتدي شايف ايه اللي حصل للمنتدي

بعد طارق حتى في اخر فترة ليه كان فيه انانية ونفسنه من البعض وتعمد
في عمل المشاكل وما كان فيه الحكنة في الأحتواء من قبل الإدارة الجديدة
وبئا فيه أحزاب ، كل دى عوامل هدم وتطفيش يا محمد

ايه الفرق بين المنتدي ده وايه منتدي تاني

أنا مرتبط بالمنتدى دا ،فيه ناس بحبها جدا والحمدلله هم كذلك

شايف انك واخد حقك في المنتدي بما انك عضو قديم وصاحب نشاط عالي

الحمدلله يكفيني الاحترام المتبادل

ايه الفرق بين اداره المنتدي دلوقتي والمنتدي زمان

ادارة زمان كان عندها الخبرة والحكنة وجات في ظل استقرار وازدهار في المنتدى
الإدارة الجديدة كانت جديدة فكان عليةا حمل كبير غير كدا جات في ظل عدم استقرار
يعني أنا بعذرهم فعلا

وايه التغيير اللي حصل في المنتدي

غياب كتير لأعضاء مهمه ومؤثرة وقلة نشاط ، وإن شاء الله الجميع يرجع

مين الاعضاء المظلومين في المنتدي من وجهه نظرك

مش أنا اللي أقول ، اللي وقع عليه الظلم أحق برفع الظلم اللي وقع عليه والمطالبة ، لا يضيع حق وراءه مطالب

نفسك مين من اعضاء زمان يرجع ويفضل في المنتدي علطول

كتير ( سكره ، قلم رصاص ، ساحر الأحزان ، بحر ولكن ، ضياء ، قلم ، دكتور سما ،،،، كتير )

موهبتك كبيره في الشعر دي هوايه ولا درسه

هواية جات فترة اصبحت دراسة لكن لم تكتمل لانشغالي وسفري

سمعت انك اخد جوايز في مسابقات في ****************** ايه هيه

ههههه أنت فاكر أهو يا محمد يومها عزمتكم صح ، الحمد لله كنت في المسابقة الأدبية
لأجمل خاطرة في فعاليات ( ****************** عاصمة الثقافة ) كانت الجايزة كبيرة وكنت سعيد أكتر
بالفوز لأني ما كنت متوقع خالص والسبب إني وافد مش كويتي

عزمت مين يا عم يوميها جراح المشاعراللي جاب الكنتاكي علي حسابه واحنا في نادي اليخوت

ليه طلبت انك تنشال من الاشراف وانت مبدع في الادبي

كنت ناوي على فترة غياب وكان لازم اعرف الإدارة وأطلب منهم دا
ليظل الاحترام متبادل ، ودا من اساسيات العمل الإداري

لو طلب منك ترجع الاشراف تاني ايه هيكون ردك

معنديش مشكلة أرجع مشرف تاني ، لكن يا محمد خلينا نرجع النشاط تاني
ونرجع الناس اللي مترددة في الرجوع للمنتدى تاني ، وقتها اللي حابب يبقى
مشرف وشايف نفسه أهل لذلك ، الإدارة تزكيه أو هو يطلب وهيكون من حقه

ايه افضل الاقسام لقلب وكلمات

الأقسام الأدبية

مين اقرب الاعضاء ليك في المنتدي

كتير جدا ولله الحمد ، مش عايز أقول حد بعينه وهو عارف مكانه عندي

كلمه انت مبدع تقولها لمين وليه

لكل انسان بيتقن ويبتكر ، ليه : لأنه أجتهد وأصر

شايف مصر ازاي دلوقتي

اتمني من الله ترجع أحلى ويصلح حالها وأهلها

ممكن يقوم ثوره جديده بسبب غلاء الاسعار

لا

بما انك في ****************** ايه الفرق بين مصر ****************** غير الحر طبعا

هههههههه ، هنا اللي بيجتهد وينجح بيوصل ، هنا تقدر بكل سهولة
تقابل وزير ورئيس وزرا ، لكن يظل العشق هي مصر

لو اخدت القرار انك تنزل تعيش في مصر شايف انك هتقدر في غلاء الاسعار دي
بما انك شاب ايه طموحك في الحياه

أنا شايف القرار دا هيتأخر وكل بإذن الله ومشئته ، بص يا محمد مصر في دوامة اقتصادية
صعبة دلوقتي محتاجة لولادها وأنت وأنا وغيرنا لازم نساعد وكل واحد بطريقته وأنا والحمدلله
بعمل كدا وأنا في ****************** لكن هيبقى صعب عليه داخل مصر
أما عن طموحي فهو كبير جدا ، لكن طالب من ربنا الستر وما احتاج لحد

ندخل علي المدونه

امته عملت المدونه

الجديده من فترة لكن مشاركاتي كانت قليلة ودلوقتي بحاول اشارك بشكل أكبر

ليه اخترت اسم دقة قلب

لأن كل مشاركة هي دقة من احساسي والاحساس منبعه القلب

شاايف ان المكان ده ممكن تقول فيه اسرارك

بشكل عام صعب اتكلم عن نفسي واسراري بتكون جوايا لو طلعت بره مش تبقى سر

ايه اللي بيميز الصفحات عن اي قسم تاني

ما شاء الله نشاطها أولا ، ثانية هنا أي عضو بيكتب اللي حابب يقوله مش متقيد
لا بنص أو حتى ترتيب افكار ، فضفضه باشكالها المتنوعة

حصلك مشاكل قبل كده في الصفحات

لا ابدا

ايه رايك في الاعضاء اللي بيلقحو كلام علي بعض هنا

دا تصرف مش كويس خالص ، وكل واحد بيعبر عن تربيته وفي الاخير احنا هنا للترفيه

مين اكتر عضو بعتلك تقيم

الغالي طبيب الهوى وصديقي احساس صحيح والخلوقه دمعه حائره

اخر تقيم كان من مين

من طبيب الهوى كان بيصرخ فيه ياعم أنت عايز التقيمات عشان اعلن نتيجة مسابقة
العيد في قسم الإبداعات الأدبية هههههههههه

مشاركاتك هنا بتكتبها لحد معين ولا ليك لوحدك

الاتنين لإني عندي رساله بحاول اوصلها

قولي افضل مدونه من وجهه نظرك

كتير والله بجد مش عشان أهرب من السؤال ، فيه اللي بستفيد بمعلومة ، فيه اللي بيضحكني من قلبي وبفصل بجد ، فيه اللي بيحكي واقع بيعيشه فبتأثر معاه

وافضل اسم مدونه

كتير برده

مين الاعضاء اللي بتبعهم باستمرار

الفترة دى ( الجميع بلا استثناء ) لأني باستفيد من الجميع زى ما قلت

كلمه لاعضاء القسم

كلكم ما شاء الله مهذبين محترمين أنا بستمتع بكل ما تكتبوه
يا ريت نعرف احنا هنا للترفية فقط اما الحياة الواقعية هي الاساس
فابعدوا عن أى مشكلة ممكن تضايق ترفيهك دا


سعيد جدااا بوجودك في الحلقه
نورت يا غالي

[الفيلسـوف]

مجهود جميل ومميز يامحمد سلمت يداك
اشرف من الناس المحترمه جدا اللى انا بحب اتابع قلمها شخصيا لانها تتميز بلون اسلوب مختلف
وانا يكفينى فخراً انى بتعلم من كلماته

[.Lamar]

دايما كنت بحب اتابع كتابات اخى اشرف
لانه بيتمتع باسلوب مميز و سلس فى توصيل الاحساس و الفكرة

انهاردة انا بشكرك اخى ابو اياد على الاستضافة المميزة
لانه عرفتنى حاجات كتير

و فعلا فترة ادارة دكتور طارق كانت من انجح الفترات
كلنا بنتمنى انه يرجع تانى و الله
و نكون حتى مجرد اعضاء معاه
اثرت نقاط كتير و منها الناس اللى اتظلمت او زعلانة او ممتنعة

اللى بيحب المكان بتمنى يرجع و نفتح صفحة جديدة
و ان شاء الله نحاول نحسن سوا وضع المنتدى
اللى المفروض انه ملك لينا كلنا

كل الشكر للاستضافة الجميلة

تحياتى و تقديرى

[Lamees]

ربناويسعدك اشرف ويحقق امانيك
انسان خلوق ومحترم
وحضرتك مكسب للمنتدى
شكرا ابو اياد

[*فجر الاسلام*]

منور الاستضافه استاذنا
جميله اجاباتك ربنايحفظك يارب
تحياتى ليكم

[fanaa]

شخصيه جميله جدا وواضح من الاجابات
والفتره الا قريت فيها للضيف كنت بحس اصلا بلحن فى كلامه
وقلمه متمكن جدا وحروفه راقيه
استضافه جميله يا حبيب مع ضيف أجمل
يدوم النشاط

[احساسى صحيح]

قيصرنا الغالى وصديقى المحترم
ردودك بتعبر عن شخصيتك المتزنة والمحترمة
ودا مش جديد عليك
وجودك فى أى مكان إضافة بلا شك للمكان
كنت احب اشير لشىء سقط ربما سهوا من الادارة
إنك لم تكن من ضمن المكرمين فى الشهر الماضى
على رغم تواجدك الكبير والمميز وكنت أنتظر ان تكون ع الاقل مع فجر
ممن حصلوا على وسام الابداع وهذا اقل شىء كنت تستحقه
على العموم ملحوقة وإن شاء الله يتم تدارك الامر فى القادم
شرفت الحلقة اخى الغالى
تسلم يا حمادة على الاستضافة
تحياتى لكما ..

[دمعه حائره]

من اجمل الحلقات فعلا من زمان منعرفش اخبارك وبتغيب كتير
اكيد غنى عن التعريف عضو مبدع قيصر الشعر وامير الشعراء
ذكريات كتير مش هنقدر نحكى ولا نوفيك حقك
اتمتى تفضل متواجد ومتغيبش تانى لانك اضافه كبيرة للمنتدى
نورتنا اخى والحوار كل رائع بالاسىئله والاجابات
تسلم محمد

[الوحدانى شعلان]

لقاء ممتع واجابات مميزه سعدنا بها كثيرا
تحياتى لقدومك اخى الغالى منور منتداك من جديد