اتصرف ازاي

[سهـــر]

من سنتين كان ليا صاحبه العمر
اللي هيا كنت ببات عندها والعكس
واهالينا عارفين بعض كويس
ونسافر سوا 
وفي السعوديه كنا سوا 
كل حاجه كانت سوا 
لحد ما 
حصلي ظرف ما وكنت محتجاها اوي 
واختفيت من كل حاجه 
فيس واتس موبايل مقفول 
بس كانت ممكن تكلم اختي وتسال عني
تكلم ماما تكلم بابا كانت عتوصلي باي طريقه
لو كانت حابه توصلي فعلا 
واتخطبت وعرفت صدفه 
ومرحتش الخطوبه
ويومها كنت في معرض الكتاب
والحقيقه خليتها بطريقه ما 
تعرف اني كنت في معرض الكتاب
ومحضرتش عشان مش عايزة احضر
ماهي اللي استغنت في الاول يعني
المهم من فتره حلمت بيها 
حلم وحش اوي 
فقلت لتقى اختي اطمني عليها 
فهي طلبت من تقى انها تكلمني 
في الاول مكنتش عايزة 
بس لما كلمت تقى وقالتلها انها محتجاني 
مقدرتش مكلمهاش 
معرفش عشان متعودتش حد يكون محتاجني ومقفش معاه
وهيا مكنتش اي حد 
ولا عشان حاجه تانيه 
كنت شايله هم المكالمه دي ومقلقه منها
وهايفه ومش عايزة اعملها 
مش عايزة اعاتبها متستاهلش 
ومش عايزة اضعف واحن برده متستهلش 
المهم كلمتها 
في الاول معرفتش صوتي 
ودي حاجه فلقتني نصين 
تاني حاجه مكنتش عارفه تتكلم تقول ايه 
ولا انا كمان 
سالتها عن احوالها 
قالتلي لو حابه اكلمك تاني اكلمك ع الرقم ده
قولتلها لو عندك حاجه عايزة تقوليها قوليها دلوقتي 
سكتت شويه وقالتلي ادعيلي 
قولتلها باي وقفلت 
بعدها بخمس دقايق اتصلت تاني 
مقدرتش ارد عليها 
مش عارفه اسامحها 
ومش عارفه اكرهها 
ومش عارفه اعمل ايه 
لانها طلبت من اختي تكلمني تاني 
من فتره كنت بتصل عليها 
عشان اسمع صوتها عشان كانت وحشاني 
وكنت بقفل مكنتش بتكلم 
بسمعها تقول الو واقفل 
مش عارفه اتصرف 
بس حقيقي مضايقه اوي منها 
ومش متخيله اني ارجع اتعامل معاها تاني عادي كدا
مش هقدر هبقا بنافق 
اعمل ايه 
اكلمها ولا لأ
من اصعب مواقف حياتي بجد 
-_-

[.Lamar]

الموقف صعب يا سهر
و انا حاسة بيك
عشان الوجع اما بيجى من حد قريب
او مش متوقعاه مش بيكون سهل
بنفضل مدة صعبان علينا نفسنا
و مش مصدقين ان دة حصل
و على ما نستوعب بنوقع فى حيرة
بين انك تحنى لهم و بين انك تكملى حياتك من غيرهم
و اما بيظهروا تانى فى حياتك
حتى لو ندمانين
بتحسي ان حاجة اتكسرت و مش هتتصلح تانى
و تفضلى حاسة بالذنب خايفة تكونى ظالمة
حاسة بيكى اوى
و محدش هيعرف يقولك اتصرفى ازاى
لان الثقة اما تنهار
صعب تتبنى تانى
فخدى وقتك يمكن مع الايام تقدرى تسامحى
بس متلوميش نفسك

[^^khL oUD]

بصي هو الموقف غريب اصلا وحيره جدا
بس الواحد مبيعرفش يرجع يتكلم مع حد هو قفلل منه خلاص
لان العلاقه مبقتش زي الاول
ف انتي اقعدي مع نفسك وشاوري نفسك و اكيد انتي هتعملي الصح
ربنا يوفقك ويقدملك ال ف الخير

[Fatma eissa]

لأول
ايه الي حصل
الي خليها
تاخد موقف وتتغير كدا
سواء اه ولا لا
انت اعملي باصلك
وساعديها وادعلها
فأنت في النهايه بتعملي ربنا
وربنا بيقول انا في عون عبد
مدام العبد في عون أخيه
فأنتي اعملي الي يريح بالك
وربنا يجزيكي كل خير

[*فجر الاسلام*]

الموقف حصلى كتير اى نعم مش بنفس الكلام لكن بيحصل لكل حد فينا
وانا لما محدش بيسال فيا حتى لو سال بعد فتره بتكلم عادى لكن مابرجعش زى زمان
لان اصلا احنا مش على اد اديهم يرجعوا يرجعونا ويسبونا زى ماهم عاوزين
من استغنى فنحن عنه اغنى
فدى حاجه ترجعلك لو شايفه انك هتقدرى ترجعى اذا كانت ندمانه وبجد هترجعلك
دى حاجه ترجع لاحساساك انتى

[Doaa Hammam]

شوفي هو اللي اتكسر صعب يتصلح تاني

بس عامليها كويس لله .. ولو كانت في مشكلة ساعديها

انتي بتعملي بأصلك

ومفيش مشكلة لو كل فترة كده تتصلي وتسألي عليها

خلي قلبك كبير وربنا هايديكي على قد الخير اللي بتعمليه

[سهـــر]

شكرا ي بنوتات
اراءكم الى حد ما ساعدتني
اني اخد قراري كنت محتاره جدا
^_^

[طبيب الهوى]

بسم الله الرحمن الرحيم

وَسَارِعُوا إِلَى مَغْفِرَةٍ مِنْ رَبِّكُمْ وَجَنَّةٍ عَرْضُهَا السَّمَوَاتُ وَالْأَرْضُ

أُعِدَّتْ لِلْمُتَّقِينَ الَّذِينَ يُنْفِقُونَ فِي السَّرَّاءِ وَالضَّرَّاءِ

وَالْكَاظِمِينَ الْغَيْظَ وَالْعَافِينَ عَنِ النَّاسِ

صدق الله العظيم

شوفي يا سهر

مفيش مؤمن يبيع عشرة سنين عشان غلطة

أكيد لها مواقف كتير كويسه معاكِ

وأكيد برده أنتِ لكِ معاها مواقف كويسة برده

الصداقة يا بتي مش بتتبني إلا على المواقف

وعشان ننهيها لابد من أن يكون الانتهاء على مواقف

وليس موقفاً واحدا

أعذريها يا بتي وأعطي لها 1000 مبرر ومبرر

يكفي أنها قالت لكِ أنها تحتاج إليكِ

كلميها يا سهر وصفي قلبك من ناحيتها يا بتي

حتى إن لم لتكن تستحق

تذكري الآية الكريمة التي كتبتها لكِ

أفعلي الخير يا سهر فالخير أبنتي يبقىَ ولا يضيع

ستجديه في حياتك وستجديه أيضا بعد وفاتك

إن لم تحصي ثماره أنتِ سيحصد ثماره أبناءك وأحفادك

أستغفري الله من الشيطان يا سهر وأتصلي بصديقة عمرك

والله المستعان

فقط كوني بخير أبنتي الحبيبة

أبو عصام

[Suspect.Hero]

متسبيش حد محتاجك عشان انتي نفسك هتدايقي لو كنتي محتاجه حد وملقتهوش
بس دايما خليها حلقه في ودنك راحتك وسعادتك اهم من كل دا اصلا
كلميها وبليز متضغطيش عليها مش هينفع تقول كل حاجه مره واحده
مره ف اتنين ف تلاته هتجيب كل الى عندها وساعتها هيكون قرارك انتي برضو
اقري التعليقات بس اوعي تاخدي بنصيحه حد
فكري كويس وخدي قرارك بنفسك عشان انتي الوحيده فينا الى هتعيش بنتايج القرار دا
حلوه وحشه كله هيجي علي دماغك انتي بس
خدي وقتك

[ايمان طلعت]

بصي سهر
هو اللي حصل منها حاجه توجع اوي
بس مادام بتحاول تكلمك تاني كلميها وافهمي منها ايه اللي حصل وليه بعدت
عاتبيها عشان اللي في قلبك يصفى لانها زي ما قولتي مش اي حد وكانت قريبه اوي منك
قدرتي تسامحي و ترجعوا تاني خير و بركه
قلبك مش قادر يسامح عرفيها بردوا انك متضايقه منها ومش قادره تسامحي