من قال أن الشعوب على دين ملوكها؟؟؟؟

[مارد الغضب]

ندوشه 2011
*****
ارحمينى من مداعبادتك و شقاوة ردودك
و ابعدى عنى للنار تطولك ههه..هه..ههه
***
تحياتى لسموك ندوووووووووش

[ahmed 22]

طبعا انا من الناس اللي بتحترم فكر حضرتك
وارائك اللي دايما بتكون قيمة يا مارد ..

انا معاك طبعا في نظرتك للحكام
واكيد مش هتلاقي اختلاف من اي حد

بس خلينا نخرج بره الصندوق للحظة
ونكلم بأمانة مع انفسنا ..

هو الحاكم بيجيب ناس يحكمهم
وبيفرض عليهم ارائه وهما مسلوبين الارادة والدافع ؟؟

ولا المحكوم اللي بيجيب الحاكم
وقادر أنه يصنع قوانين تغير من مفاهيم العبودية اللي اتصنعت ..

الناس اللي شايفه المشاكل في الحكام بس
اتمني يكون ليها نظرة للشكل التشريعي المتمثل في مجالس الشعب والشوري
الشكل التنفيذي المنبثق من الحكومات والمحليات
الشكل القضائي في المحاكم و الشرطة والجيوش

دي كلها مؤسسات دولة متواجدة بشكل دائم وفيه جزء كبير من اختيار الشعب برضه وتكوينهم برضه من ناس بينا وفينا
وعمرنا ما حسينا منهم بجزء من التغيير ...

وبالتالي هي مشكلة ثقافة شعب بيخرج منها حاكم ومجلس وقاضي
فبيفرض ثقافة الشعب علي جهله .. فبيظهر لينا شكل مشوه
والحاكم هو الواجهة بتاعته ليس اكتر ..


وبالتالي هي ثقافة الحاكم بتتبني من صندوق خارج قاموس شعبه
ولا ثقافته بتكون من دوافع وارادة شعبه و وعيه و رؤيته للمواقف ؟؟

وبالتالي بيحدد مواقفه طبقا لميول شعب مش شرط تكون متقالة
بقدر ما هي بداخل كل واحد وصعب انه يصرح بيها

الشعوب حالا مفاهيم الجهاد والكفاح من أجل قضية بقت امور
غير مترسخة فيهم ...

الشعوب العربية اصابها الخمول من زمن طووووويل ودي حقيقة
وعشان تخلق الحمية من جواها مرة تانية محتاج ادراك اكبر
من أنك ترمي الحمل كله علي مسؤلية حاكم او شعور شعب بدون وعي
بمسؤلياته الحقيقية ...

انا بالنسبة ليا الحاكم مجرد صدادة اطلع عليها غيطي ليس الا
انما انا عارف أن المشكلة قبل ما تكون في حاكم
هي ارادة شعب محتاج يصلح من داخله بنوايا التغيير الحقيقية
أو انه شخص يطلع من وسط شعب عشان يغير فيه
بس التغيير هيكون ابطأ مما احنا ندركه

احنا فجأة في يوم بعد عشرة ولا عشرين سنة من دلوقتي
لأما نلاقي نفسينا احسن ناس في الدنيا من غير ما نشعر
او برضه هنخلينا عالم نحس من غير ما ناخد بالنا ..

بس برضه هيكون كل نظرتنا للحياة مبنية علي الامان الاجتماعي
والهدوء النفسي لنظرتنا لبكرة عشان نقدر ناكل وننام ونعيش ونجوز ولادنا...

مش نظرة مبنية علي الزهد في الدنيا اللي نقدر من خلالها نصنع جيل
قادر انه يبني عشان قضية مؤمن بيها ..
ويقدر يصنع لنفسه هدف مبني علي ايدلوجية موحدة لأمته الاسلامية
مش نظرة مبنيه علي براغماتية شخصية

ولازم نفكر نفسنا انه زمان ايام الرسول عليه الصلاة والسلام ..
لما فكروا وغزوا الروم والفرس بجيوشهم وقلاعهم
ماكنوش اقوياء بسلاحهم ولا بعددهم ولا عتادهم في المقام الأول ...

كانوا اقوياء برسالتهم وايمانهم واستيعابهم التام والكامل
للتضحيات اللي هيقدموها بدون تردد ولو بانفسهم
عشان هدف سامي وعالي هما ماعندوهمش شك فيه
وهو نصرة ورفعة الاسلام ..

فيا تري احنا عندنا نفس القدرة والاستيعاب دول والاهم
عندنا الدافع التام ان احنا نتوحد علي هدف نكون مرضيين
اننا نضحي بنفسنا من اجله او سبيله لو انطلب منا كدا .؟؟

التغيير احيانا مش بنستشعره لأننا عمرنا ما هندركه
واكيد في يوم هنوصل اننا نستوعب ده لان ده وعد ربنا اولا واخيرا
بس المطلوب مننا حاليا ان احنا نفهم احنا عايزين ايه حاليا وايه اولوياتنا
يا هل مطلوب مننا أننا بكرة الصبح نجمع الجيوش ونروح نحرر القدس ؟
ولا مطلوب اننا نعرف حقيقة وضعنا ودوافعنا ونصلح منها ونعزم النية الحقيقية
ويكون عندنا ايمان أنه في يوم ما جيل ييجي يحرر القدس بعد ما نمهدله الطريق
بأننا نحرر نفوسنا بما فيها من سوء وتشوهات خلقتها عوامل الزمن ..
بحيث بقينا ناس متآثرين من ثقافات الشعوب الغربية سلبا وايجابا بدون فلتر
وبقينا بدون اي تأثير نفسي ايجابي عليهم ونسينا ان المفروض الاسلام ليه
رسالة بيصدرها للعالم كله ...
بالعكس احنا خلقنا عندهم مفهوم الاسلاموفوبيا بالصراعات اللي داخلنا
واللي صدرناها ليهم بمخاوف أكتر منها مجاذب ...

بيقولك ميت سنة في عمر الشعوب قليلة
بالتالي المفروض نعرف أن اصلاح دواخلنا وافكارنا وما ذات بيننا
محتاج اكتر من عمر ...
محتاجين نهدم تماثيل متركزة جوانا ونهدم افكار اشخاص
بنعتبرهم رموز للبناء في حين انهم رموز للهدم ..
عقولنا محتاجة نفهم تاريخنا بشكل مختلف وصريح ..
عقولنا محتاجة انها تقدر تميز الصح .. عشان تبني فكرة اصح
لأنه فعلا اللي جوانا فسد بشكل كبير ..

[طبيب الهوى]

منذ عهد الخديو إسماعيل سامحه الله

وبعد أن دخل مصر قنصل فرنسي وأخر إنجليزي

وأصبح الأجانب في مصر لهم أُسَرْ وعائلات

بدأ الشعب المصري بل والعربي في التغيير للأسوأ

بحثاً عن التطور تقليداً للغرب في ملابسهم وتبرجهم

وكذلك في علمهم وابتكاراتهم لكن العلم والابتكار

أصبح يتلاشىَ شيئاً فشيئا ولم يَيقىَ لنا

سِوىَ تقليد الأجانب في الملابس والموضة

وأسوأ ما في هذا إنجذاب المرأة المُسلِمَة للتطور الغربي

تحت مُسَمىَ حقوق المرأة والمساواة بينها وبين الرجل

وتم إنشاء جمعيات نسائية متعددة

وتركت المرأة المُسلِمَة ملابس الحشمة والوقار

شيئاً فشيئا حتى أصبح التبرج أمر عادي ومستحب لهن

حتى وصلنا للعصر الحالي وما نشاهد فيه من تبرج وفجور

من المرأة ولامُبالاة فظيعة من الرجل

الذي قال عنه رسول الله أنه راعٍ ومسئول عن رَعيَتَهُ

لهذا أخي العزيز ما يحصل لنا الأن نتيجة طبيعية

لما تنازلنا عنه قديماً

فذهبت روح النخوة والغيرة على الدين والوطن

وذهب زمن الجهاد ولن يعود إلا بعد أن نعود إلىَ أنْفُسِنا

وَنَتقي الله في أعمالِنا

هُنا فقط سيعود زمن الجهاد في سبيل الله

أخي العزيز مارد

ترددت كثيراً قبل أن أنثر ردي على ثورتك النابعة

من قلبك الغيور على الإسلام

يمكن يكون ردي مُفاجيء للبعض أم أن يكون ليس له علاقة بفكرتك

لكني أؤمن أنه الداء الأساسي لما يحدث لنا الأن

تحياتي لشخصك وأسرتك الكريمة

أبو عصام

[Doaa Hammam]

رأي استاذ احمد يمثلني تماما

انا شايقه ان المشكلة لا تقتصر على الحكام

الشعوب دائما هي الاقوى وتستطيع فرض ارادتها ان ارادت

المشكلة ان الشعوب نفسها تحتاج للتغيير يعني اصبحنا نعشق الشعارات والهتافات

ولكن ليس لدينا اراده ورغبة حقيقية في فعل شئ ..

[مارد الغضب]

ahmed 22
*****
صديقى أحمد...
دعنى فى البداية أشكر لك هذا الرد الرائع و المميز
الذى أعتبره من أروع الردود التى تلقيتها فى جميع
المنتديات التى اشتركت بها على الاطلاق....
ثم اسمح لى بعدها أن أعبر لك عن مدى استمتاعى
بلغتك السليمة أولا ثم أسلوبك الشيق السلس...
و أخيرا سردك التحليلى المنطقى الغير متحيز-الحيادى-
الذى راق لى بشدة...
*****
فى الحقيقة أننى وقفت طويلا أمام ردك متحيرا...كيف يكون الرد
على هذا التعليق المبهر منك
هل أكتفى برد تقليدى؟ أو أرد على تساؤلاتك؟أم أناقشك فى
بعض نقاط الإختلاف؟
حتى اننى أجلت الرد حتى اتفرغ له
*****
فى الجزئية الأولى فى ردك أتوافق معك جدا من الناحية
النظرية فقط...و لكن أنظر إلى التطبيق على الأرض أهو
متوافق مع النظرية أن الحاكم يتبنى ثقافة شعبه لأنه منهم
أم أنه يحكم بما يحافظ على عرشه فقط للدرجة التى تجعل
مؤسسات الدولة -حسب قولك-تعمل جميعها من أجل الحاكم
لا من أجل الشعب...
مثال ذلك قانون الخدمة المدنية-قضيىة تيران و صنافير
*****
فى الجزئية التالية من ضياع مفاهيم الجهاد و البعد عن المنهج
الإسلامى فأنا متفق معك تماما
ولكن نحتاج إلى حرية أكبر لإتاحة مساحة كبيرة للدعاة الغير
مسيسين لنشر الوعى الدينى كما كنا قبل الثورة
*****
بعد هذا أنا لا أتفق معك فى جزئية أننا ممكن نصحى بعد
عشرة عشرين سنة نلاقى نفسنا أحسن ناس
و ليست مسألة نحس كذلك إنما المقدمات هى التى تبشر
بالنتائج فأى نتائج ترجى فى ظل هذا التخبط على مستوى
الأمة العربية كلها
*****
أتفق معك تماما بأن الدافع الدينى و العمل من أجل رفعته
هومنهج لابد أن نعود للعمل عليه حتى نصل لما وصل اليه
الأقدمون مننتائج مرضية للهو رسوله و المؤمنين
*****
البقيةمن كلمتك الرائعة أتفق معها كل الإتفاق و اهنئك على
هذا الفكر الناضج جدا
*****
فى الختام أنا سعيد أن مثلك بيننا بهذا الفكر المستنير و هذه
الحيادية المفقودة لدى الكثيرين و كذلك ثقافتك الظاهرة الجلية
و أيضا غيرتك على الإسلام
من أجل كل هذا أتمنى أن تتقبلنى صديقا لك
فهذا سيحقق لى سعادة كبيرة
أتمنى أن تمنحها لى
تحياتى لسموك المحترم

[مارد الغضب]

طبيب الهوى
*****
صديقى الحبيب أبوعصام
يا من تروقنى كلماته على الدوام
و أنتظر ردوده الناضجة الواعية التى
و كما يقول المصريون
بتجيب من الاخر
أتفق معك تماما تماما
فما نحصده اليوم هو ما بذره الاخرون
ونزرعه نحن بنفس طريقتهم لذا ظل الحصاد متشابه
و ما ضيعنا إلا تضييع الرجل لمسؤليته و تفريطه فى
قوامته
و كذلك بعدنا عن المنهج الاسلامى فى التربية
الذى أخبرنا به المولى عز و جل
{إن تنصروا الله ينصركم}
*****
و لكنى أنكر عليك ترددك
فما عهدنا منك إلا الرأى السديد و الذوق الرفيع
و كذلك الغيرة و الحمية لرفعة دين الحق
و أنت أصبت كبد الحقيقة بقولك أن أم المصائب
هى ترك الجهاد فى سبيل الله
امتعنى ردك صديقى الحبيب
دمت فى حفظ الرحمن
تحياتى لسموك المحترم الخلوق

[مارد الغضب]

Doaa Hammam
*****
أختنا الفاضلة دعاء
أنا أيضا أتفق مع الأستاذ أحمد
و كل ذى عقل لابد أن يتفق معه
و لكنى أرى أن الخوف هو أمر غريزى فى البشر
و هو وحده ما يدعو الناس للإستكانة و الخضوع
و لكن القلوب تغلى بما يدور رغما عن الانوف
لذلك أنا أعتبر كل من يجهر برفضه بطل
أتفق معك
أننا لابد أن ننتبه أن الحكومات لن تمنحنا فرصة
للتغيير فيجب علينا نحن أن نغير أنفسنا نحو
الأفضل فربما اطلع الله على قلوبنا فرأى فيها خيرا
فيهدينا جميعنا إلى الخير
سعدت بمرورك و تفاعلك المثمر
تحياتى لسموك

[ahmed 22]

حبيبي يا مارد والله ...
واكيد انا شرف ليا صداقتك
ومعرفة شخص محترم وخلوق زيك..
وبشكر فيك تواضعك اللي بأمانة
اعطي لكلامي اكبر من حقه ..
وشهادتك اعتز بيها وافتخر اكيد ...

وبلاش استاذ دي لانها كلمة كبيرة جدا الصراحة هههه
لأن فعلا انتم كلكم اساتذتنا وبنتعلم منكم ودي حقيقة ..

لو تسمح انا حابب اناقش الجزئية الأولي من ردك باستفاضة
لأن انا بقصد هنا بتبعية الحاكم لثقافة الشعب
هو قلة الحيل بسوء الادارة لقلة الحلول
بسبب ضعف الامكانيات في التأسيس الاكاديمي والتعليمي كعقلية ..
ومافيش ميزان للوسطية تقدر تستخدمها عند اصدار قرار لاما تدبح لاما تذعن ..
وبالتالي ضعف الحجة عند القيادة وتأثرها بالعاطفة أكتر من الثقة
في العقل والتخطيط فبيهدم أكتر ما بيبني وهو في تخيله انه بيبني بدون وعي
فالجانب العملي بيكون منبثق من خلفيته اللي بتكون شخصيته
المبنية علي شوية عواطف مدموجة بشوية قيم وتقاليد موروثة مش مكتسبة
مدموجة بضعف ايمان او فهم خاطئ مدموجة بمجتمع يغريك بالسلطة
مدموجة بضعف انساني بيغريه الطابع المادي لما بياخد صلاحيات من شعب
استشعر في نفسه ضعف الحيلة ...

و الانسان لما يكون ضعيف الحيلة بيلجأ انه يحتمي بضهر السلطة
ويفوضها زمنيا انها تحل مشاكله وتتحكم في مقدراته وبيديها الثقة العمياء
انها تكون الحاكم بأمره .... ودي ثقافة اتفرضت في قرون منذ عهد السلاطين
وبالتالي السلطة لو ماكنتش معتدلة نفسيا وعقليا ... بتفرض مرضها علي المجتمع
زي الفيروس لما بينتشر لحد ما شخص يظهر في ايده العلاج .. والعلاج اتأخر بأمانة ..

لان البديل مُر بسبب تشوه المعاني والمصطلحات قدامنا وتسييسها خلال الكام قرن اللي فاتو
او حتي وضعها في مسمي انها ضد الدين او ضد التطور ..
مع أننا مش مجبرين علي أخذ المسمي بالشكل
اللي يناسب مفهوم الغرب ما بين ديموقراطية او ليبرالية ..
بقدر ما احنا نستطيع ان احنا نشكل
المنهج المحدث الخاص بينا وفتح باب الاجتهاد عموما
اللي لا يعارض ثوابتنا ولا يحد من تطورنا ...

ومع تغير الزمن .. الفكرة القديمة لسا ليها جذور .. لانه ما تنشأش لحد دلوقتي
فكر جديد يقوده شخص ذو ثقة بشكل يواكب الحالة الموجودة دلوقتي ...
وبالتالي الناس في حالة اضطراب لانها مشتتة ما بين ماضيها ونظرتها لمستقبلهم في تقدم غيرهم ...
لأنه حاسين اد ايه هما صغيرين قدام نفسهم .. بسبب غياب الرضا
مع انه حاليا الموضوع مش متعلق بالرضا بعكس ما هو متعلق بقفزة الطموح
في عيون الناس من رؤيتهم لغيرهم .. في شكل مش شايفينه في نفسهم
وانه شايفين انه حق ليهم يعيشوا بشكل أفضل ..
ومتعطشين للي يسمعهم واللي يواكب حالتهم دلوقتي ...
الناس متعطشة لواحد يقدملهم الحلول بشكل مختلف .. مش علي طريقة فرعون
ولا حتي طريقة موسي ... لاننا لا في عصر انبياء ولا عقولنا مهيأة مرة تانية
انها تعيش في حضرة دكتاتور ..
وبالتالي بيقاوموا الفكرة بس مش لاقيين السكة
وفي نفس الوقت خايفين يخضعوا ليهم مرة تانية في عقلهم الباطن ..
وحاسين ان الوقت اكبر عدو ليهم ..

النفس البشرية صعبة لما تكون في حالة هياج وريبة ..
في بلاد الغرب .. الغلط بقا ليه قانون بيحميه فحاليا بتلاقي
تشريعات لزواج المثليين او ترخيصات في بعض الدول لبيع الماريجوانا وغيره
بس التطور بتاعهم والنظام بيديهم غطاء لطيف مع أن المستقبل
مفكرينهم متخوفين منه وخصوصا انه بيمس منظومتهم الاجتماعية ..

في بلادنا الناس بقت من حيرتها بتحاول تستحضر الغلط وبتفكر في اللي يحميه
لانها مش قادرة تتمسك بثوابتها بسبب محنتها الموجودة فيها طول الوقت ...
وهنا مافيش غطا ولا نظام وبالتالي كل شئ بالنسبة لينا بيكون ليه شكل فج
فبنتعب نفسيا فمش بنكون قادرين اننا نكمل ..

وانا كنت اقصد برضه ان المؤسسات التشريعية او غيرها تنفيذية
بتخدم الفكرة اكتر ما بتخدم الحاكم ... لاآن لولا حبهم للفكرة واستفادتهم منها
ماكنش تبعيتهم للحاكم .. وبقا هو الغطا ليهم بسكاته عنهم ..
و في نفس الوقت تاييدهم ليه ..
كأنها مصالح وصفقة غير معلنة لأن اطرافها متراضيين
بدون شروط مسبقة ولا حتي جلسة قعدوها واتفقوا علي شروطها ..
وكأن كل واحد بيتهيأله الظروف انه يفسد ..
بتكون خلفيته هي السبب اللي بيسهل ليه الطريق أنه يستحل الطريق السهل
وبالتالي تلاقي في مصر اكبر نسب فساد عموما مش في السلطة بس ..
وطبعا كله الا ما رحم ربي يعني ..

بس مثلا قضية زي تيران وصنافير دي ..
دي قضايا جدلية مالهاش علاقة بثقافة شعب
بس تندرج تحت بند تزييف التاريخ ونقص المعلومة واخفاء وثائق ...
اللي بتمتلكها السلطة وانت كواحد من الناس طالع من ثورة
وعندك قلة ثقة في السلطة عموما
وبالتالي اتحطيت بين خيارين اصعب من بعد وهو أنك تثق او تخون ..

وانت ما عليك غير أنك تكون لاما واثق في وطنية السلطة رغم عيوبها وتتخلي
عن جزء من وطنك وانت كنت متخيل انها جزء من بلادك لمدة 70 سنة منهم
حوالي 67 سنة ماكنتش تعرف اصلا ان في جزيرتين اسمهم تيران وصنافير لحد
الوقت ده
لأما داخل طول الوقت في تشكيك دايم لكل مواقفها وبالتالي من الموقف ده بتكون معارض طول الوقت بشكل سافر فلا أنت بقيت تعترف بايجابيات ولا سلبيات ..

لأن ديول الخيانة اللي انت حطيتها ليهم بقت هي اللي بتقودك فبقت الكراهية بمثابةاسلوب حياة ليك ..

و في وقت انت كواحد من الشعب مجرد دمية بيتم اللعب بيك وبيتم استقطابك ليس اكتر ما بين سلطة مؤيدة وحزب معارض ليها لخدمة اغراض حزب وحاكم ...

انا كل اللي كان مضايقني في موضوع تيران وصنافير
شئ ممكن يبان للناس انه سطحي يعني بالنسبة ليها كقضية كبيرة
وهي ان الدولة خلت مواطن من الشعب سعي انه يطلع ادلة وبراهين ان ارض كان متخيلها ارضه يبرهن انها بتاع السعودية
لمجرد انه بيحب السيسي
وعاوزه انه يكون صح مش لان الارض دي بتاعة بلده او لاء
العقلية اللي كانت تعباني مش الموقف نفسه ....

قضية زي تيران وترسيمات الحدود عموما بين العرب
ممكن اكلملك فيها ساعة وبشكل مختلف
بس الناس بتحدد رأيك اللي بتكونه علي هيئة كلمتين لاما خاين لاما وطني
والناس مش هترضي تسمع غير اللي يرضي ودانها ليس اكثر ..

وفي نفس الوقت مش عاوز اطول اكتر من كدا
عشان انا رغيت كتيررر الصراحة ههههه

[فداااااااااااء]

الشعوب في وادي والحكام في وادي اخر
نادرا ما تجد الحكام يسيرون في اتجاه الشعوب
ولكن المخجل اكثر ان الشعوب تفوق عددا
ممن يحكموهم ولكن تجدها اضعف لانها جبانة
ليس هناك نظام يستطيع ان يقمع شعب ان اراد
ولكن لو الشعب لا يمتلك الشجاعة فعليه الرضوخ

[مارد الغضب]

ahmed 22
*****
صديقى احمد
ما هذا الاسلوب الاحترافى فى تفنيد العناصر
وما هذا الابداع فى عرض المسائل المعقدة
بهذه البساطة العميقة مع عدم تخليها عن
الاسلوب الاكاديمى و كأنك أستاذ دكتور متمكن
من أدواتك...
*****
قد أكون قد تأخرت عليك فى الرد و لكن يعود هذا
لكونى موظفا و قد أسندت الىّ مؤخرا مهمة تستهلك
منى وقتا كبيرا ..لذا أرجو من سيادتك العفو و المعذرة
*****
قلت لك اننى استمتعت كثيرا بردك الاحترافى
و يعود ذلك الى تقمصك دور المفكر و المحلل النفسى
التى جعلتك تصف حالة الحاكم و الشعب بكل الابعاد
المكونة للشخصية من تأسيس و نشأة و استقبال
و تفاعل مع الوسط المحيط
قمت بقراءة كلماتك أكثر من مرة ...
و الحقيقة اننى أستطيع أن أزعم أن الرد على كلماتك
يحتاج إلى كتاب كامل بلا مبالغة فأنت قد وضعت نواة
لكتاب جيد أراه قيما فى قراءة الواقع المصرى بكل حيادية
و بتعقل و احترام لجميع العقول و الاتجاهات
هناك بعض نقاط بسيطة لن أعلق عليها لكونها قناعات
شخصية قد أكون أنا فى الجانب الخاطئ منها
و لكن على وجه العموم فأنا متوافق مع جميع ما جئت به
ولكن عندى رجاء....
قم حضرتك بتبسيط هذه الاراء ونشرها فى موضوع مستقل
فمن حق الجميع أن يطّلع على هذا الفكر الناضج الذى يجلى
الغشاوات عن الاعين التى ملأها القذى بفضل الاعلام المُسيَس
*****
كذلك كلامك عن تيران و صنافير الحق اننى كنت سعيد جدا
بكلماتك و أنا أؤيدك جدا و أحييك على هذا الوعى الفريد و قد
استفدت شخصيا من كلماتك و كونت صورة جديدة أكثر نضجا
بناء على شرحك البسيط المذهل
رجاء اخير ...قم بكتابة هذه الجزئية عن تيران و صنافير فى
موضوع مستقل حتى يتعلم الجميع ما يجب تعلمه
*****
أخى أحمد
اسعدك الله كما أسعدتنى
شرفت كثيرا بالحوار معك فقلما يلتقى الانسان بمثقف
ناضج محايد مثلك
رجاء أخى لا تحرمنى من أفكارك و أسلوبك المحترم
تحياتى لسموك المبدع