¨°o.O نصائح "نانيس سليم" للعروسة O.o°¨ملف كامل

[فرحة]

السلام عليكم و رحمة الله و بركاتة

في البداية في شوية نصائح عايزة أقولها لأي بنت عندها فرح أو خطوبة وهي:

ـ أولا: استشيري حد متخصص
ياريت لو رايحة فرح أو خطوبة تستشيري حد يكون بيفهم قوي في الميك أب لأن المحترف هيعرف يستخدم المكياج وهيعرف الوش المليان محتاج إيه، والوش الرفيع محتاج إيه، والوش اللي فيه عيوب محتاج إيه وهيعرف إزاي يداري العيوب دي. كمان أنا مش بانصح أي عروسة إنها تفكر في إن الميك أب يكون خفيف لأن بكده المكياج مش هيطلع في الصور خالص.
ثانيا: اختاري اللبس قبل المكياج
ياريت قبل ما تختاري مكياجك، تشوفي هتلبسي إيه الأول. وعلى فكرة اللبس بتاع السواريه كتير قوي وخاصة للمحجبات، في حاجات كتير زي الباديهات والإيشاربات المطرزة بالإضافة إلى الفساتين طبعا.
كمان بانصح كل عروسة محجبة إنها تخليها محجبة في نفس اليوم واللي مش محجبة تبقى مش محجبة ومش بانصح العروسة المحجبة إنها تقلع الحجاب لأن فعلاً شكلها بيتغير خالص، يعني مش بس إنها مكسوفة شوية إن حد يشوفها أو إنها لابسة مكشوف لأ هي كمان بيبقى شكلها متغير بالميك أب والطرحة والشعر والشكل فعلاً بيفرق جداً..

كمان باقول لها ماتقلقش أبدا من موضوع الحجاب في الفرح لأن دلوقت بقت فساتين المحجبات كتير قوووي.

ياريت كمان تشوفي هتلبسي لون إيه والعريس كمان هيلبس إيه ولون القاعة إيه ولون الورد والميك أب كمان والطرحة كمان. كل الحاجات دي بتشغل بال العروسة جدا لأن ده أهم يوم في حياتها وبتلاقي إن العروسة بتستعد لليوم ده من قبلها بكام شهر يعني 5، 6 أشهر أو أكتر، بتحضر وتعمل في الشقة وبيبقى شكلها مجهد ومش مهتمة بأظافرها ولا بشعرها علشان كده بانصح أي عروسة إنها تروح لحد متخصص قبلها بشهرين على الأقل تنقي شكل الطرحة والميك أب المناسب ليها.
ثالثا: حددي الاستايل بتاعك يوم الفرح قبلها بفترة كبيرة
ياريت برضه إنك قبل ده كله تحددي الاستايل اللي هتعمليه يوم الفرح لأن الاستايل ده بيحدد شكلك يوم الفرح.
يعني مثلا لو

• عاملة فرح كبير
يبقى لازم شكلها يكون زي الأميرة وميك أب كتير قوي بحيث احنا نبقى قاعدين في آخر القاعة وشايفين العروسة من بعيد ومكياجها واضح وظاهر.
• عاملة فرح في البيت أو عاملة احتفال صغير
يبقى الميك أب يكون بسيط قوي لأن الناس اللي هتشوفك وجها لوجه مش زي اللي هيشوفوكي من بعيد مش زي الكاميرا والفيديو ما بيطلع الصور خفيفة شوية، لأن مهما تحطي ميك أب بيطلع في التصوير خفيف شوية وده نتيجة الفلاش بيضرب على الوش ونتيجة الفوتو شوب لما بيتعمل.

فلازم كل ده يبقى مرتب علشان تعرفي أنتِ هتظهري في شكل عامل إزاي والإضاءة عاملة إزاي علشان تعملي الميك أب على أساسها..
بس دي كانت نصيحة "نانيس"

{}{}{}{}{يتبع}{}{}{}{}

(*_*) مكياج سواريه (*_*)

قبل ما نعمل المكياج
قبل ما نعرف إزاي نعمل المكياج السواريه في بنات قالت لي عايزة تعرف أنواع الفرش واستعمالاتها..
استخدامات الفرشاة الكبيرة
الفرشاة الكبيرة ليها 3 استخدامات وهي:
1- مع البودر، فممكن نمسح بيها
2- بعد ما نحط البودر بنشيل بيها الحاجات الزيادة
3- كمان بنسخدمها في توزيع الروجاجو

استخدامات الفرش الأخرى:
• فيه فرشاة تانية بنستخدمها للتسريح بيبقى وشها عامل زي الشعر الصناعي وساعات الطبيعي.

• وفيه فرشاة كمان للرموش ودى بتساعد إن احنا نطلع الرموش لفوق وفي نفس الوقت بتشيل الزيادة من الماسكرا.

• وفرشاة الحواجب اللي بنملا بيها الحواجب، بتبقى ناشفة شوية وشعرها مائل شوية علشان تكون سهلة الاستخدام.

• أما فرش الايشادو ففيها الصغيرة والكبيرة والصغيرة تستخدم لتحت العين.

وعلى فكرة فيه ناس ما بتستخدمش فرشاة خالص وتستعمل صوابعها زي ما عملنا من شوية. والناس اللي عندهم شوية خبرة هيقدروا يحددو اللون ويعملوا ميكس كويس باستخدام أيديهم.

دلوقت هنبدأ نعمل مكياج سواريه..
لو أنتِ رايحة فرح أو مناسبة بسيطة ممكن تزودي شوية على المكياج اللي عملناه للصبح، لأن المكياج السواريه بيكون أقوى من المكياج العادي بتاع "الصبح"، فبتلاقي إن خاماته أكثر والفرش بتزيد شوية وشكل ورسومات العين وألوانها هي كمان بتبقى أكتر.. يعني من الآخر كده بيبقى حاجة جامدة جدا...
تعالوا نشوف الخطوات
• دلوقت هنستعمل الفرش بتاعتنا علشان نزود مكياج الصبح وبالتالي الأساس لازم يبقى أكتر شوية.

• بنتقّل الفونديشن شوية اللي تحت العين علشان يعمل طبقة فاتحة شوية تحت العين. وعشان تعمليه كويس لازم تفضلي باصّة فوق شوية لأنك لو بصيتِ لتحت هيبقى جزء تحت العين مش معمول فبتضطري تعملي فونديشن تاني وبودر تاني.

• الفونديشن والبودر نعمله بالبدارة زي ما اتفقنا وممكن بالفرشاة زي ما اتفقنا.

• وبعد ما نزود الأساس والبودرة، بنشيل الزيادة بالفرشاة علشان الميك يبقى مافيهوش بودر كتير وكمان ممكن العروسة أو اللي رايحة الفرح تعمل حاجة ثانية بعد ما تحط الفونديشن ممكن تحط تلج على وشها. ولو بتستعمل فونديشن سائل، ماينفعش خالص أحط عليه تلج لأنه بيضيع المكياج وكأنك حطيتِ مياه. لكن الميك أب اللي أنا حطاه مخصوص للسينما يعني ضد المياه ومش بيروح نهائي سواء مع التلج أو العرق. وده اللي كل الفنانين بيستعملوه. وبيكون الفونديشن بتاعه تقيل شوية والبودر تقيلة شوية فبيثبت معاها تمام.

• بنزود كمان الكحل اللي جوه العين بالقلم الأسود علشان يديني رسمة مختلفة عن الصبح ونحط تحت العين أيشادو.

• وممكن نمشي بالقلم الأسود فوق الرموش على طول بخط رفيع. وجوه الرموش كمان ممكن نزود الأسود عشان يدينا نظرة عميقة.

• بنحط أيشادو فاتح تحت العين عشان يديها شوية نور جوا العين. بعد كده نحط عليه جليتر لأنه موضة السنة دي. بس بنحطه في مناطق معينة.. تحت العين بس.. وبعدين نحط الماسكرا وتبقى تقريباً خلصت العين.

الماسكرة والرموش

أولاً: الرموش
الرموش بتشغل بال ناس كتير جداً وخاصة العروسة.. يعني مثلاً مفيش عروسة إلا وتقولي انتي مش هتحطيلي رموش؟ لازم أحط رموش للعروسة في الفرح مهما كانت رموشك طويلة أو خفيفة لأنها بتفرق أوي مع العروسة علشان كمان شكل الصور. لو استعملتي فعلاً الرموش بتدي شكل حلو أوي للعين وفي نفس الوقت بتفرق جداً مع الرسمة وبتفرق نفسياً..

• احنا النهاردة هنحط الرموش كلها حتة واحدة. وهي على فكرة بسيطة مش صعبة أبداً ممكن تحطيها لنفسك وتضبطيها وانتي باصة أمامك في المرايا.

ثانيا: بالنسبة للماسكرا
في بنات بتحط ماسكرا ملونة، والماسكرا الملونة ممكن تنفع مع حفلة أو مناسبة عادية. لكن أي حاجة رسمية أو فرح لازم تحطي سودة أو بني. والبني ده أنا بعتبره مع الشقر اللي عينيهم ملونة وشعرهم فاتح وحواجبهم كمان فاتحة فلازم يستعملوا ماسكرا بني وقلم كمان بني بدل الأسود لأن الأسود معاهم هيبقى صريح أوي لكن البني ساعات بيبقى شكله لذيذ.
• ممكن نزود من فوق العين شوية بني عشان نعمل ميكس شوية مع الذهبي. والذهبي اللي حطيته بيدي ضوء وبيدي كمان نور للعين وشكله ظريف. بعد كده بنحدد الحواجب بالبني ونبقى تقريباً خلصنا مكياج العين.

• وبعد كده نزود الروجاجو، وهنحس فعلاً إنها اتغيرت وعينيها ظهرت شوية وفي نفس الوقت شكلها ظريف.

• هنحط الروج زي ما اتفقنا بالفرشاة الخاصة بيه.

• بنحدد شكل الشفايف وأنا بنصح باللون الفاتح لأن احنا دائماً ما نكثر في مكياج العين فاللون الفاتح معاه بيبقى شكله ظريف أوي. وممكن بقى بالليل نكبر شفايفنا شوية علشان التحديد يبان. وبعدين بنحط حاجة بتلمع شوية على الروج علشان يبان ويبقى بسيط أوي وفي نفس الوقت ماخدش معانا وقت وغير شوية في الشكل.
ده الشكل في النهاية


وسهرة سعيدة

(*_*) ربطات سواريه (*_*)


"نانيس" هتقدم لنا دلوقت أكتر من طريقة للربطات السواريه..
نشوف مع بعض
في البداية عايزاكي تاخدي بالك إن الربطات السنة دي بتاعة السواريه على حسب اللبس اللي أنتِ هتلبسيه. يعني مثلاً لو هتلبسي أسود خالص ومش عارفة تدخلي عليه فهتلاقي في عندك اختيارات إما تدخلي أبيض وأسود معاكِ ويتعمل ميكس بين الأبيض والأسود بالشكل اللي احنا هنشوفه دلوقت.
أو تدخلي ذهبيات مع أورانج أو أحمر والأسود ملك الألوان زي ما بيقولوا بس لازم كمان تظهريه بميك أب حلو، فبعد ما تعملي ميك أب تلبسي وبعد ما تلبسي تبتدي تعملي الربطة بتاعة الإيشارب.

ولازم ناخد بالنا إن شكل الإيشارب المربع أو المستطيل بيختلف في الربطة. الإيشارب اللي بيتلف أسهل تربطيه إسبانش أو أي حاجة. لكن المربع أو المثلث بيكون صعب شوية في اللف.
الربطة الأولى
• الربطة اللي هنعملها دلوقت المفروض إننا هنستخدم فيها لونين هما "الأبيض والأسود".. الأبيض الأول وبعدين بنعمل حتة أسود علشان نبين الميك أب.

• وبنربط من وراء خالص ونشد. وكمان بنلف الأبيض تاني علشان نعمل تدويرة شوية للوش. الربطة دي تنفع للوش الصغير قوي والرفيع.

• بعد كده بتعمل بالإيشارب شكل على جنب واحد. بس علشان ميبقاش كثير قوي على الوش ونلمه كله بالشكل ده.


• ما أخدتش وقت.. وبنلبس حلق كبير عشان الإيشاربات الإسبانش بتحب الحلقان الكبيرة.

• وممكن نزود إكسسوارات من عندنا. فلو أنتِ مثلاً لابسة أبيض في أسود، أو أبيض في تركواز، أو أبيض في لبني أو أبيض في أي حاجة، الدبابيس العادية اللي احنا بنحبها ممكن نعمل بيها شكل كأنها في الإيشارب.

ولو عندك الإيشارب سادة ومافيهوش أي حاجة وعايزة تعملي فيه شكل بتقفي أمام المرآة وتحطي دبابيس بألوان مختلفة أسود أو ألماظ أو ملون زي مثلاً الموف، الأورانج.. أي حاجة احنا حاطينها فيها بيبقى شكلها بسيط مع الربطة وبيبقى شكلها جميل.


_ _ _ _ _ _ _ _ _ _ _ _ _ _ _ _
الربطة التانية
• هنعمل ربطة تانية ملونة والميك أب اللي احنا عاملينه يليق عليه كل حاجة والألون اللي احنا عاملينها ميكس. وتقدري توفقي بين الربطة والمكياج فمثلاً لو أنتِ خمرية فالذهبيات هتليق عليكِ قوي. ولو هتدخلي روز في الربطة، يبقى تزودي شوية الروز اللي في الأيشادو، ولو الموف يبقى الروج فيه لمحة مووف.

• هنستخدم لون مووف صريح في الربطة. واللون ده بيمشي قوي مع البشرة الخمرية. بس لازم يبقى الميك أب خفيف لأن الميك أب الكتير مع الموف مع الألوان الصريحة بيخلي الشكل مش بسيط وكأنك رايحة فرح. والألوان السادة حلوة في السواريه علشان شكلها بيبقى أبسط. لكن الحاجات المنقوشة مع الفستان المنقوش بتكون كتيرة قوي. وماينفعش تلبسي منقوش وتبقى ربطة طرحة كمان منقوشة!

• هنعمل الربطة على الجانب.. وممكن نعمل شكل بطرف الطرحة لما يكون فيها شراشيب أو تطريز ممكن تستغليها شوية.

• بنجيب الربطة من الناحية الثانية مع الإيشارب الأحمر اللي هيتحط معاه. وبعدين هتلميه كله من تحت وتبقى على جنب واحد ونثبتها.

• وعلشان نعمل ربطة إسبانش لازم تبقى الكولة عالية شوية. لكن لو الكولة مفتوحة أو فستان سواريه مثلاً وجبتيه من غير بادي مقفول لازم تعملي الربطة على قدام.

• الربطة دي بسيطة قوي ومش محتاجة حلق علشان ده هيبقى كتير مع المكياج اللي احنا عاملينه.


_ _ _ _ _ _ _ _ _ _ _ _ _ _ _ _
الربطة الثالثة
• هنعملها من الكحلي والأبيض لو أنتِ لابسة أبيض وكحلي مع بعض. لو في الإيشارب تطريز معين أو جزء مثلاً مكتوب عليه -زي ما هو واضح في الصورة- ممكن نستخدمه. الإيشارب مستطيل وهنربطه ربطة عادية مع الإيشارب التاني المربع. ونشبكهم بدبوس ونربط الإيشارب.

• ودي زي الربطة الخليجي شوية وتنفع للوش المليان. تحطي المربع بعد ما تتني جزء منه فيبقى مستطيل. تسيبي منه حتة وتعمليه من الجانب الأيمن علشان يبقى شكله حلو في التصوير.. وبكده عملت ميكس بين الاثنين وفي نفس الوقت ممكن تبقى لابسة اللونين.
_ _ _ _ _ _ _
الربطة الرابعة
• هنعمل ربطة داخل فيها اللون الذهبي. والذهبي مع الأسود اللي في العين مع الميك أب مع اللبس بيدي تناسق حلو. هنجيب الإيشاربين من تحت على شكل حرفX ودي تنفع للي عندها قورة عريضة.

• بننزل الطرحة على جنب الحواجب وبيكون شكلها جميل لأن دي منطقة الجمال... وياريت مانرفعش الربطة فوق قوي علشان تبان حلوة في التصوير. ومع الذهبي هندخل اللون البني وبيكون لايق قوي.. والإيشارب اللي بيكون حرير بيكون صعب شوية في ربطه فلازم تلبسي تحته بندانا.

• بنجيب اللون البني فوق الذهبي ونلفه عليه -زي ما هتشوفي في الصورة- وهنا مش محتاجة حلق لأنها مطرزة. الربطة دي بتكون لذيذة مع الوش الرفيع واللي قورتها كبيرة.


_ _ _ _ _ _ _ _ _ _ _ _ _ _ _ _
بانصح البنت القصيرة شوية إنها تعمل حاجة عالية شوية علشان تعليها وتلبس كعب عالي. والإسبانش محتاجة واحدة رقبتها طويلة شوية فتعمل الإسبانش على تحت.. والربطة دي تليق قوي عليها لو لابسة سواريه.

[Silver Flower]

,موضوع رائع ونصائح روعه
موضوعك يستحق التثبيت

[امير المصريين]

طب و ايه مافيش نصايح للعريس ولا ايه

يعنى نربط الكرفت ازاى نقعد على لمين الكوشه ولا على شمالها

الكلام ده يعنى

ولا احنا ندفع و بس

[فرحة]

اقتباس:
المشاركة الأصلية كتبت بواسطة flower
,موضوع رائع ونصائح روعه
موضوعك يستحق التثبيت



يسلموووووووووو
للرد الرائع

[فرحة]

اقتباس:
المشاركة الأصلية كتبت بواسطة امير المصريين
طب و ايه مافيش نصايح للعريس ولا ايه

يعنى نربط الكرفت ازاى نقعد على لمين الكوشه ولا على شمالها

الكلام ده يعنى

ولا احنا ندفع و بس



هههههههههههههههههههههههههههههههههههههه

اه طبعا لازم تدفعو ولا هتاخدو العروسه ببلاش

نورت التوبك ياجميل

[نوركمال]

مشكوووووورة والله يعطيك الف عافيه

[عيون فلسطينية]

مشكورة بجد شي حلو كتيررررررررر

[فرحة]

اقتباسالمشاركة الأصلية كتبت بواسطة عيون فلسطينيةمشكورة بجد شي حلو كتيررررررررر
يسلمووووووووووو المرور الجميل
ياعسوله

[مسلمة]

ميررررررررررررررررسى حبووووووووووبة

[مشاكس واحب اعاكس]

موضوعك رائع thanks