ومع انى

[fanaa]

ومع انى
بعيد عن زحمه الايام .
شايل فوضى بضلوعى
عيونى لما تيجي تنام
بتروى الخد بدموعى
وبسهر برثى افراحى
وهمى بالجفون صاحى
بدارى الكسره فى الضحكه
وتغرق روحى فى جراحى
ساعات بسألنى هو أنا ليه
فاضلى أنا ايه فببكى عليه
وليه قلبى شاغلنى فى ناس
سابوا الحزن فى حيــاتى
فى ليل الوحده والضلمه
ينوح قلبى وينزف ويل
فنشتاق من الوجع ضمه
تطيب خاطرى وتراضى
وسنين عدت على الفاضى
ورافض قلبى مش راضى
يصدق ان هما سابوه
وعايش لسه ع الماضى
فى وسط التوهه بنسانى
لا بلقاهم ولا ألقانى
لروحى كنت انا الجانى
وكان الهجر صوت قاضى
ورعشه قلبى بين ضلعى
وصرخه قلبى لما اتساب
محدش شاف ياناس دمعى
دا من وجعى صبح فانى
وبكتب ع الاراح مواويل
وصوت الحزن زى الناى
وبسمع جوا منى عويل
بيسأل ضاعوا ليه و أزاى
وليه طبعى مهوش قاسى
ياريتها القسوه كات طبعى
مكنتش يوم اشوف وجعى
وكسره قلبى قدامى

بقلم / آيه ابراهيم يوسف
3/4/2018

[ahmed 22]

ما شاء الله
نص سهل وممتع جدا
قريته اكتر من مرة

دام التميز والابداع
ودايما للافضل

[يحيى الفضلي السودان]

بقلم اعضاء بنات مصر
لم لم ترفع لوستاتي

نغيب ونرجع

تزيد الاها فوق الاها

لكم شكري وتمنياتي لكم بالتقدم

[يحيى الفضلي السودان]

صوت الاهة داخل الجوف
تبكي للعيون تدمع

جميل ماخط بنلراسكم

[.Lamar]

اصعب حاجة ممكن تعيشيها
اما تلاقى حتى قلبك واقف ضدك معاهم
كانه مش كفاية وجعك و ألمك
مبتعرفيش تهربي فين
و لا حاجة بتهون

بجد حلوة جدا يا اية
انتى مبدعة مفيش كلام
و بتمنى اشوف دايما قلمك وكتاباتك
تسلم ايدك واحساسك

[دمعه حائره]

الله عليكى مبدعه برغم الألم رائعه

[*فجر الاسلام*]

بيسأل ضاعوا ليه و أزاى
وليه طبعى مهوش قاسى
ياريتها القسوه كات طبعى
مكنتش يوم اشوف وجعى
وكسره قلبى قدامى

يارتها
بجد حلو اوى ربى يسعدك

[fanaa]

الله يخليكوا ليا يارب نورتونى وكل عيد وانتو بخير

[قلـــــــــــــــــم]

ابدعتِين السرد

بين السلاسة والانسيابية يطفو الحزن
لكن ما أسرع ما يتلاشى
فالحياة كتلة ضباب تحتاج للضوء الشديد للرؤيا

تحيتي اليك

قلم

[fanaa]

اقتباس المشاركة الأصلية كتبت بواسطة قلـــــــــــــــــم ابدعتِين السرد بين السلاسة والانسيابية يطفو الحزن لكن ما أسرع ما يتلاشى فالحياة كتلة ضباب تحتاج للضوء الشديد للرؤيا تحيتي اليك قلم

مرورك زاد الابداع استاذى
لا تحرمنا طلتك
انرت