ظواهر ادبية في المنتديات

[ahmed 22]

بسم الله

انا الصراحة مش لاقي حاجة اعملها .. فقلت اتسلي ..
أنا طبعا ماليش في الكلام العميق بتاع الادب والشعر
والبحور .. الكلام ده ليه ناسه .. انا كلامي اللي هقوله
ممكن نقول عليه مجرد ظواهر سطحية بعين القارئ
برصدها عموما من خلال قراءتي في المنتديات .. سواء هنا او غير هنا ...
ممكن تكون ماتكونش ليها اصول في الادب .. بس ممكن يكون ليها معني ..

وهبدأ بظاهرتين و هحاول اختصر كلامي وبشكل بسيط علي قدر ما استطيع
يعني لو اتضح ان كلامي فيه شئ من الصح من خلال الردود هكمل في موضوع منفصل ظواهر تانية ..
وطبعا ماحدش يربط الكلام اللي هقوله عامة بهنا
لأني بقوله والله من خلال قرايتي في اماكن كتيرة ..
الظاهرة عامة مش منفصلة ..

1 - التطور

دايما بلاحظ في المنتديات ناس كتيرة ومش قليلين
عندهم ملكة الاحساس وبيكون عالي ..
وده بيخليهم الي حد كبير مسيطر عليهم اللون العاطفي ...
واللون الوطني والديني فيما ندر .. مناسبات يعني في اللذيذ كدا
بحكم أنه اقرب شئ ليهم هو اللي يمس قلبهم
ويقدروا يعبروا عنه .. الكلام ده في البداية بيكون جميل جدا ..
وحقيقي بيكون صادق من القلب للقلب ..
بس بعد كدا بيكون مجرد شئ روتيني للي بيقرأ
ومجرد عبث من الكاتب ... لأن اللي داخل يقرأ
هو عارف غالبا البوقين اللي هيقولهم عن النص قبل ما يقراه ..
وماحدش بيصارح حد بشئ غالبا ..

الناس دي دايما بستشعر فيه كتير منهم الموهبة
يعني عندهم نص الطريق ممهد ...
بس حصروا نفسهم في زاوية او كورنر ومش قادرين يخرجوا منه
ومع الوقت بيستهلكوا مفرداتهم اللغوية اللي بيدوروها في نصوصهم
بمعني أنك مع الوقت بتلاقي معظم النصوص فيها نفس الكلمات
القريبة لقلب الكاتب ولما بيحاولوا يدوروا علي كلام جديد
بيلاقوا نفسهم مش قادرين .... ومع الوقت بتستشعر
ان كل النصوص شبه بعض ... بس بتكنيك مختلف ..
ومع الوقت حتي الأسلوب تلاقيه بيكرر ..

الواحد بيكون نفسه يقول ليهم بطل كتابة لمدة اسبوع ..
افصل نفسك عن اللون الرومانسي فترة ... اكتب في الاجتماعيات اكتر
اقري أكتر في النصوص الفكرية والسياسية بس بشكل غير سطحي ..
استوعب المفردات الكبيرة واللي فيها اختلاف .. جرب قوالب جديدة في كتاباتك ...
ماتخافش من ردود الأفعال اللي هيقرالك .. لأنه كدا كدا هيقولك غالبا لطيف وجميل ... لانه ماكنش عنده القدرة أنه يواجهك وانت بتكرر نفسك ..
فما بالك وانت بتختلف ..

وهو مش مهتم عامة .. علي فكرة معظم الناس مش في دماغها انك تكون كويس
ولا وحش .. معظم الناس بتجاري الروتين اليومي اللي مواضيعك اصبحت جزء منه ليس اكتر
.. فطلع دماغك من الوهم أنك بتكتب عشان تسمع رأي حد
اكتب عشان نفسك وبس اولا .. لو انت فعلا بتحب ده .. ماحدش غالبا
بيحب حد اكتر من نفسه ... وفيه ناس طول ما هما شايفين انك شايفهم
احسن في المستوي منك .. فهما حابين دور الوصي عليك ..
مع أنك ممكن تكون افضل كتير .. لأنه لو كان بيقدرك
كان قالك انت ممكن تكون افضل في ايه .. بس هو طول
الوقت سايبك متعمي ... وبينافقك .. وماصارحكش ..

وبرضه لو بتكتب عامي .. اكتب فصحي ..
ولو بتكتب فصحي جرب تكتب عامية ..
لو مالكش في النقاش .. جرب تتناقش .. وجرب تقول اللي عندك ..
ده كله مجرد خزين في دماغك وتراكمات في دماغك هتفيدك فيما بعد ..
وتقدر تستخدم فيه ادوات المنتدي اللي انت مسجل فيه ...
المهم تغير عن اقتناع .. وتتكلم بقلب .. طالما انت موجود في المنتدي ده ..

وبعد شهرين ارجع تاني اكتب اللون الرومانسي اللي بتحبه
او اي شئ يمس مشاعر الحب والفراق والحاجات دي وشوف الفرق ..
وشوف انت قدرت تكون مختلف ازاي 180 درجة ....
لان ده كله عمل عندك مخزون متنوع تقدر من خلال تستخدم
الفاظ مختلفة عن الشكل الرومانسي مثلا وتطوعها فيه ..
والاختلاف غالبا بيكون بداية لشكل جديد .. بطفرة جديدة ..

علي فكرة
كتير من الناس مثلا متخيلة نذار قباني شاعر الحب والغرام بس ,, يعني بالتخصص
علي فكرة نزار قباني كان البعض بيصنفه انه شاعر السياسة الأول
يعني ماتعودش نفسك علي لون واحد .. واعرف انه في الوان تانية
ممكن تعزز فيك حاجات اكتر واكبر ...


2 - النحت

النحات ده برنس .. والله استاذ ورئيس قسم ..
خصوصا أنه غالبا بيكون ذكي ... وفي نفس الوقت متكيف مع وضعه
يعني عايش دوره صح ..

غالبا احنا مثلا ممكن نكتب نصوص ادبية
وتلاقي بعض العبارات تتشابه مع بعض ..
او مثلا تلاقي نفسك متأثر بشاعر ما .
.. فممكن بتستشف كلمات او تعبيرات ليه بدون
وعي في نصوصك .. وده طبيعي عادة ..
المهم ان اسلوبك واضح ومعروف للكل ..

اما النحات فاسلوبه مختلف في المنتديات عموما ..
ده واحد غالبا هو عنده القدرة أنه يكتب ..
بس طموحه أعلي من اللي بيكتبه ...
لانه عنده شهوة أنه يسمع اد ايه هو مؤثر .. والناس تتوهم بيه ..
لأنه عنده القدرة انه يخلي الناس تثق فيه ..
وبالتالي لازم يكون علي قدرة الثقة دي ..
والله اعلم بما داخله يعني .. لأنه عاوز يصل للناس بسرعة
عشان يحقق اهداف ليه بشكل اسرع ..

وده يخليه يلجأ للنحت ..

الواحد من زمان بيقدر يميز النحاتين عموما وهما كتير غالبا في اي منتدي ..
اولا بيكون عندهم طاقة كبيرة بتكون نابعة من حبه انه يسمع المديح غالبا
واحيانا تانية بيكون فيه اهداف انه يستغل سذاجة البعض اللي بيتأثروا بيهم ..
فلما تلاقيه مثلا بينزل مواضيع كتيرة في القسم الأدبي خصوصا في فترة قليلة
وتلاقيهم كلهم علي نفس النسق .. اعرف ان هناك شئ ما ..
هو صعب أنك تقفشه يعني .. بس شوف ابرز جملة تحسها فوق مستواه
في النص او شاذة عن مستوي النص واعملها بحث في جوجل هتلاقيها
مسروقة يعني ..

المهم
انه بيروح منتديات مختلفة وبيختار نوعيات محددة من النصوص
وبيحاول يبعد الي حد كبير عن المنتديات المشهورة اللي هي
علي اول سلم البحث بتاعة جوجل ..

وبعدين لاما بيعيد تشكيلها من جديد بأسلوبه ...ويمزج كلماته
مع كلمات الكاتب الاصلي للنص ....

لاما بعد ما يكتسب الثقة من الناس
احيانا الكلام بيعجبه جدا وبيقول يا سلام الجملة دي حرام تتشكل تاني
ولازم اجيبها كدا بشكلها كدا .. لانها هتعمل عامل جذب للي هيقراها
هتسمع يعني وهيبقي ليها اثر..
وهنا أكبر غلطة ممكن يعملها اي نحات ..
لانه بيتخيل انه اكتسب الثقة من الكل .. وبالتالي ماحدش هيبحث وراه
وبالتالي بتلاقي النص عبارة عن مزيج بين تشكيل لأفكار غيره
مع جمل مميزة للكاتب اللي بيشكل النص من كلامه
مع طبعا اضافات منه اكيد .. عشان يخرجه بشكل مختلف ..
وعلي فكرة مع الوقت بتكون اسهل ما يمكن لاي حد بيتمرس في الحوار ده
ممكن يعمله في اليوم قصيدتين او تلاتة بسهولة .. يعني اسلوب حياة ..

يعني ناس كتيرة ممكن تستغرب اسماء بتنحت ..ويتصدموا فيها ..
وشوفت نماذج لده كتير عموما ...
ونفسي النماذج دي تفهم
انك تستطيع ان تخدع الناس بعض الوقت
ولكن ليس كل الوقت ..

بس هو اولا واخيرا دي اكبر ظاهرة مستفزة بالنسبة ليا ...
لأنه بتعطي فضل وثقة لمن لا يستحق ..
ولكن ستظل العبرة بالخواتيم ..

[.Lamar]

ردى على موضوعك ممكن يطول
بس هحاول اختصر على قد ما اقدر

فيه ناس فعلا بتحب المدح و بتكرر نفسها
و ناس حاطة نفسها فى قالب معين
و دة بشوفه قصور فى الابداع
لان الكاتب معينه لا ينضب من الافكار و المفردات
فيه ناس هنا بتكتب فى مواضيع مختلفة
و بتشدنى كتاباتهم جدا
فاكيد مش الكل زى ما انت قولت

بالنسبة للنحاتين برضو صادفت منهم
و فيه ناس كنت منبهرة جدا باقلامهم
و اكتشفت بعدها ان كله ملطوش بحرفنة عالية
وقتها قولت زيك كدة
ليه الانسان ينسب حاجة مش بتاعته لنفسه
طب ايه الرضا الذاتى اللى بيحصل عليه
طب اللى بيصقفوا دولى
مش ليك لانه مش مجهودك و لا كلماتك
انت فرحان بيه ليه
بس اكتشفت ان كل واحد عقله مريحه

انتقادات حقيقية و صادفتها
مجهود طيب
و متابعة اكيد اخى
تحياتى

[د/ عبد الله]

اللي بيعجبني فيك يا احمد انك بتقدر تكتب عن الحاجات اللي المعظم مبيتكلمش فيها
رصد السلبيات والكلام عنها ومحاولة حلها دايما بيكون رد الفعل عليه هو الغضب والكلام بيتاخد ع الصدر..واسأل مجرب.

متفق معاك جدا في اول نقطة
اما تاني نقطة فأنا مش شاغل نفسي بيها خالص ومجربتش أدور فيها قبل كده غير مرة لما كنت مشرف والكلام كان كتير عن حد معين وطلع فعلا بيسرق.
تحياتي وتقديري ليك يا بطل.

[w7dane]

بصراحة اخي اجدت في الشرح و التفصيل

موضوع جيد للنقاش والتحاور واعتقد اني اول مرة الاقي حد بيتكلم فيه

واكيد ان الكل هنا متفق علي ان النوع اللي ( بيلطش ) اللي سميتهم

نحاتين هو الاشد استفزاز و قهر و عن نفسي قابلتهم في كذا منتدي

وكان من الاسباب اللي بتخليني ما اطول فيه

اما النوع اللي محتاج يطور نفسه فقد ابدعت في سرد الخطوات

اللي ممكن اي حد يبدأ يطبقها ويطور اسلوبه ومفردات لغته ومواضيعه

موضوع قيم ومفيد

تقديري واحترامي

[ahmed 22]

اقتباس المشاركة الأصلية كتبت بواسطة .lamar ردى على موضوعك ممكن يطول بس هحاول اختصر على قد ما اقدر فيه ناس فعلا بتحب المدح و بتكرر نفسها و ناس حاطة نفسها فى قالب معين و دة بشوفه قصور فى الابداع لان الكاتب معينه لا ينضب من الافكار و المفردات فيه ناس هنا بتكتب فى مواضيع مختلفة و بتشدنى كتاباتهم جدا فاكيد مش الكل زى ما انت قولت بالنسبة للنحاتين برضو صادفت منهم و فيه ناس كنت منبهرة جدا باقلامهم و اكتشفت بعدها ان كله ملطوش بحرفنة عالية وقتها قولت زيك كدة ليه الانسان ينسب حاجة مش بتاعته لنفسه طب ايه الرضا الذاتى اللى بيحصل عليه طب اللى بيصقفوا دولى مش ليك لانه مش مجهودك و لا كلماتك انت فرحان بيه ليه بس اكتشفت ان كل واحد عقله مريحه انتقادات حقيقية و صادفتها مجهود طيب و متابعة اكيد اخى تحياتى

اكيد بشكر حضورك واضافتك للموضوع ..

و طبعا انا بأكد من خلال رد حضرتك
اني اكيد مش بعمم ..
واكيد مش مخصص الكلام عن المنتدي هنا ..
لأن اكيد الكل مش زي ما انا قلت في الطرح ..
ده اول هام ..

ثانيا

هو اللي بيحط نفسه في قالب معين
مش شرط دايما يكون عنده قصور في الابداع
يمكن يكون ضعف في التوجيه ..
تضليل ابداعي ممن حوله بيسبب ليه حالة رضا
بيخليه مش بيبحث عن الافضل ..
مع الوضع في الاعتبار برضه ان
الانسان فينا مش شرط دايما يظهرله الحافز في توقيته هو محتاجه
اللي يفجر فيه قدرات هو ماكنش يعرفها عن نفسه ...
لأن الحياة اولويات .. وفي اشياء بتكون في الهامش في وقت ما
واوقات تانية بتكون هي ذروتها بالنسبة ليك ..

في ناس بتنجح في حياتها بعد سن الستين ..
وفي ناس بتنجح بعد سن العشرين ...
بس اللي اقدر اقوله ان فترة الفرح واحدة .. بمعني ان الفرح بياخد
وقته لأن الانسان مش بيعيش كل حياته في نجاحات ولا فشل ..
بيكون فيه وقت للذروة في حياة كل واحد ... بتمثل ليه افضل لحظاته
في مجال معين ... سواء اسرته او عمله او هوايته ...
غالبا الذروة دي مش بتتشارك في وقت واحد ..

الفكرة ان مش كلنا بنكون في الظروف او البيئة الصح
اللي بتهيأ لينا اسباب النجاح وبتتفاوت الظروف دي من
شخص للتاني ... ومن وضع نفسي للتاني .. في ظرف معين
وزمن معين ومكان معين ...

بس في نفس الوقت احنا في ايدينا نفتح شرارة واحدة في عقول شخص
ينبهه لما يملكه ..
بس مش بنعمل كدا .. بداعي ان الموضوع بقا مجرد نهج كلنا ماشيين عليه
وماحدش بيتمرد وبيحاول يعمل العكس ...

[ahmed 22]

اقتباس المشاركة الأصلية كتبت بواسطة د/ عبد الله اللي بيعجبني فيك يا احمد انك بتقدر تكتب عن الحاجات اللي المعظم مبيتكلمش فيها رصد السلبيات والكلام عنها ومحاولة حلها دايما بيكون رد الفعل عليه هو الغضب والكلام بيتاخد ع الصدر..واسأل مجرب. متفق معاك جدا في اول نقطة اما تاني نقطة فأنا مش شاغل نفسي بيها خالص ومجربتش أدور فيها قبل كده غير مرة لما كنت مشرف والكلام كان كتير عن حد معين وطلع فعلا بيسرق. تحياتي وتقديري ليك يا بطل.

حبيبي يا دوك ..

عارف يا دكتور بما انك اكلمت في الاشراف ولو علي الهامش ورصد السلبيات ..
فأنت فكرتني بحاجة
هو اصلا المنتدي ممكن يكون ليه دوره في تدعيم الافراد هنا بشكل غير مباشر
ويوصلهم منهج في طريقة تعاملاتهم عموما وتعزز ثقتهم في مشاركتهم
عن طريق الادارة .. بس بطريقة كرياتيف شوية ..

هقولك مثال كفكرة في وسط موقف ..
هوصل عن طريقها حاجة تانية ..
واتمني ماخرجش عن هدف الموضوع الاساسي

لو تفتكر ايام الثورات والكلام كان النقاش
حاد طبعا والنقاشات كلها صعبة وكلها تجاوزات ...
فأنا في الفترة دي مسكت اشراف عن ساحة الفكر
اللي هي زي منتدي النقاش والحوار الجاد هنا ..
وماوافقتش غير لما اخدت صلاحيات كاملة من الادارة ..

اول حاجة عملتها لما بقيت مشرف هناك
عملت موضوع للاعضاء قلتلهم هنعمل حاجة زي الدستور كدا
والكل هيشارك فيه ...
وهنسميه ميثاق الفكر الحر ..
وقلتلهم كل عضو يدخل يقول اقتراحاته عشان كلنا نكون مشاركين
فيه .. وفعلا دعيت الناس كلها ودخلوا وعملنا الميثاق ده بقلم الاعضاء ..
وبعدين كان فيه 3 نقاط عليها اختلاف
عملنا عليها سيرفي في موقع كدا خاص باستطلاعات الرأي
وعملت ليه رابط .. الكل دخل وفلترناهم برأي الاغلبية ..
وبعدين المنتج النهائي .. عملنا عليه استفتاء عن طريق نفس
الموقع الخاص باستطلاعات الرأي ده ..
واتوافق عليه من الكل وبالتالي بقا هو الشئ اللي بيحكم تعاملاتنا
مع بعض من خلال القسم بين الادارة والاعضاء ...

وبالتالي اول موضوع كان فيه خلاف وتقريبا كان الكاتب ليه فكر
وكان معظم الاعضاء ضده .. اللي كان بيحصل ان الموضوع بيتحذف او بيتقفل

بس انا قمت مثبت الموضوع .. ومتابع .. وبشارك علي فترات
مع اني ضد .. بس كنت في صف ان صاحب الموضوع ليه رأيه
ولازم يتبروز .. بالميثاق اللي اتعمل ..
وكان كل همي اني ابرز الفكرة المختلفة
عشان الكل يكون عنده القدرة انه يرد علي الشبهة
مش يهرب منها ....

كان في نقاش طويل استمر بتاع 70 صفحة بنجاح

ده كان توجه انا حبيت ارسيه بين الاعضاء
وهو انك بتضع كل اسباب النجاح للنقاش عشان تعلي قيمته ..
وتوصل بيه لبر الأمان ... وتعطي الحرية بقوانين احنا عملناها بنفسنا ..
وبعدين تقدر بعد كدا تحكم فيما احتكم الاعضاء لنفسهم بكل اريحية ...
قانونهم وهما احرار فيه ..

اانا بقول المثال ده لسبب

وأنك كإدارة هنا في المنتدي دايما نهجها هنا من ساعة ما دخلت
ان تركيزها علي النشاط... وده بقا ميثاقها ودستورها مع الاعضاء
مش قيمة المحتوي اللي بيتقدم .. وده اترسخ في ناس كتيرة ..
وعلي فكرة كان ليه اثر سلبي علي كتير ...
دايما كان الهم ان الناس تشارك كتير لان المنتدي نايم ..
ودايما حتي لما بشوف تكريمات شهرية او غيره
بلاقي التركيز علي النشاط مش اللي بيكتب شئ قيم ..
فرغت المنتدي من مبدعيه .. لما لاقوا المنافسة محصورة
للي يكون ليه تواجد اكتر وردود اكتر مش شئ قيم ..
لأن مش كتير اللي بيكتب للمتعة الشخصية
ومش بيهمه ردود من قلتها او زيادتها ..
في ناس بتكون محتاجة الحافز انها تستمر
وانها تعلي اكتر وتبقي احسن ..

ولما يكون فيه مسابقات ... باجي اتفرج علي النص الفائر
بلاقي غالبا حاجات غريبة الشكل عكس اللي بنتذوقه من قرايتك للنصوص
بحس ان الهوي بيحكم شوية ...
بحس ان المسابقات تأثيرها علي المدي البعيد سلبي اكتر منه ايجابي ..

ده كله بيكون ليه اثره علي العضو اللي بيكتب عموما ..
انت بترسخ مفاهيم غلط عند اللي بيكتب ..
مش مركز علي الجودة مركز علي الشكل الخارجي ..
وده مع الوقت انتزع من التعليقات قيمتها وبقت شكل واحد ولون واحد ..
وانتزع من المواضيع قيمة المنافسة .. وبقا في ناس بتكتب عشان بتكتب
وناس بتشكر وبس واحيانا حتي بتكون جافة ..

انا متخيل ان ممكن اقلام مميزة قد تكون بطلت تكتب هنا
لأنها شافت ان المنتدي بقا مجرد ارشيف لما يكتبوه
مش بيزيد اضافة ليهم ...

انا مش بهاجم حد علي فكرة او حابب انه يكون فيه غضب
انا بالعكس بحترم الناس كلها وربنا يعلم ..
انا بقول شئ انا شايفه من وجهة نظري
يمكن يكون صح او غلط او توجه هما ممكن يكون ماحدش خد
باله من اثاره فيما بعد ..

انا بقول ان المكان اولا هو اللي بيعلي من قيمة النصوص اللي بتنكتب
عن طريق انه يعلي بطموحاتهم شويتين ..
ويكون قادر انه يقدم الاضافة للي بيكتب ..

[w7dane]

كلام يوزن بالذهب

متابع

[ahmed 22]

اقتباس المشاركة الأصلية كتبت بواسطة w7dane بصراحة اخي اجدت في الشرح و التفصيل موضوع جيد للنقاش والتحاور واعتقد اني اول مرة الاقي حد بيتكلم فيه واكيد ان الكل هنا متفق علي ان النوع اللي ( بيلطش ) اللي سميتهم نحاتين هو الاشد استفزاز و قهر و عن نفسي قابلتهم في كذا منتدي وكان من الاسباب اللي بتخليني ما اطول فيه اما النوع اللي محتاج يطور نفسه فقد ابدعت في سرد الخطوات اللي ممكن اي حد يبدأ يطبقها ويطور اسلوبه ومفردات لغته ومواضيعه موضوع قيم ومفيد تقديري واحترامي

وانا اكيد تقديري لوجودك المميز يا حجيج
وان شاء الله تمتعنا دايما بجديدك ..

[د/ عبد الله]

والله يا عم أحمد نفسي فعلا نقدر نطبق كلامك
وده هو اللي احنا محتاجينه على مستوى المجتمع
وهتكون بدايته من التجمعات اللي زي المنتدى
وفعلا أنا متفق معاك في كلامك وسعيت قبل كده لتحقيقه
لكن ف الغالب بتلاقي الردود ان المنتدى للترفيه مش أكتر
فريحت دماغي.
أتمنى يكون نفسك أطول وتقدر تحقق تغيير ايجابي
سواء هنا أو في أي مكان تاني
لاني شايف ان المجتمعات لن تنهض الا بفكر أشخاص زيك

[fanaa]

مش بشوف ديما الانحصار بقالب معين قصور
انت ممكن كشخص تكون ماشاء الله عندك القدره للكتابه فى اى حاجه
لكن ليك لون واحد بس فيهم الا بيتكون مميز بيه
لما تهتم باللون دا اكتر وتطوره وتتعرف بيه وتركن الباقى فدا مش قصور
انابرسم وبكتب قصص ورويات وشعر عامى وفصحى وخواطر .....الخ
رغم انى كنت مميزه جدا جدا بالرسم وهنا ع المنتدى كانلى اعمال الا انى اتخليت عنه.. لما لقيت ان الكتابه لونى الاقوى والمفضل والاقرب لروحى حتى لو هحصرها فى اتجاه واحد
انا فعليا معاك فى جزء لازم ننوع مش هنقضيها رومانسيه. لازم حبه واقعيه
للاسف مش الكل هيتقبل دا.. انا تقريبا معدتش بقرأ الرويات العربيه الحاليه لانى زى انت ماقولت بقيت مميزه نفس البوقين الاهيقلهم!!!! فبقيت اقرء لناس اجانب
التنوع فعليا واجب بس بشرط... هل انا فعليا هقدر ع التنوع دا وهبدع فيه بنفس القدر الا انا عليه فى الاتجاه الاخترته
اين كان بقى نوع الكتابه...انت ذكرتنى بموقف مع شخص عزيز جدا بقصر الثقافه روحت عرضت عليه روايه اول حاجه قالهالى " ايه يابنتى دا هو مافيش اى محن"
قالى الجمهور حاليا نسبه 98 عاوزين المحن والعك دا طورى نفسك.. بس انا فضلت احصر نفسى لل 2 الباقين... هى الفكره انى لما بحط نفسى فى نمط ومبيغروش فبيكون هو الا واكل الجو للاسف..
طبعا النحاتين كتير ياما......
والانيل منهم الا بياخد بقى مجهودك كوبى باست من غير اى تاتش لاء ويبجح فيك ويقولك لاء دى بتعتى ودا بيحصل معايا ومازال .. ودول كتير اوى متعدش
فبالتالى الواحد ميهتمش ليهم اصلا... لانى مثلا زى ماقدرت اكتب ااقدر اعمل الاقوى والافضل والمختلف فمش هيفرق عندى...
وفى عالم المنتديات هتقابل حرميه ياما وسبحان الله اشخاص بتبهرك ومتكنش متوقعهم
موضوع راقى تسلم ايديك