تعاطفك لتليفونك ؟

[ahmed 22]

لو عاوز تقلل التعاطف مع شخص ما
خلي الناس تقرف منه ( بأنك تجبره
انه يعمل أفعال الناس تشمئز منها ) ..
ومع أن الناس عارفه أنه مجبر
برضه بينفروا منه
فلما تؤذيه .. ماحدش يزعل عليه ..

ده كونسيبت لطيف كدا ليه مدلول علمي ..
سمعته من احد الشخصيات اللي بتقدم برامج
علي اليوتيوب النهاردة ...

لفت نظري الصراحة ..
و خلاني اركز اكتر في الإنسان ككائن ذو برواز مشاعر هش ..
ممكن يتم التأثير فيه بسهولة ويتم تحويل مسار مشاعره
بطريقة انسيابية وسهلة بطرق مختلفة ...

وبالتالي اسهل طريق لتدمير أي شخص
أنك تخاطب مشاعره مش عقله ...
لأنك لو هتهز مبادئه هتحتاج خطوات
ونقاش هتحتاج فيه المنطق والاقناع
والجدال وهيأخد منك وقت كتير ..

والعقل ممكن يتم تسكينه .. ممكن يتم غسله
ممكن حاجات كتيرة .. بس أولا وأخيرا
العقل مالوش ضمير يحكمه ..
الضمير بيكمل الاعتقاد اللي هو بيعتنقه ..
علي ما أظن .. بعد ما يتم برمجة عقله ..

فالانسان ممكن يعيش
بضمير مرتاح علي مبادئ زايفة ..
بدليل وجود داعش والقاعدة
وفي ناس معتنقين أفكارهم وتداخلت
بضميرهم وكونت شخص جديد ...
بأفكار جديدة ..

بس أكتر خطيئة ممكن يرتكبها الانسان
بدون وعي منه .. انه يتم برمجة عواطفة
علي أنه يشوف أوضاع انسانية محتاجة تعاطفه علي الأقل
ومش بتتوجد .. بالعكس ممكن يشوف موقف صعب
ويقول لا حول ولا قوة الا بالله كعادة متبعة
ويروح ينام عادي ..

لأنه علي فكرة في ناس كتيرة اصواتها عالية
بس عواطفها نايمة ...
مش شرط اللي بتنادي بيه يكون نابع من تعاطفك مع موقف او شخص

الحقيقة هنا اللي لازم تسألها فيها نفسك

يا هل انت متعاطف ؟ ولا مكسوف من نفسك أنك مش قادر تتعاطف
فبتعلي صوتك وبتحاول توصل للناس أن ليك مشاعر وقلب ؟
وبتبذل جهد كبير أنك تكون مقنع لنفسك وللناس ومش بتعرف ؟


ومن الجهة التانية
أن اصلا اهتزاز مشاعرك وعدم انتباه الغير ليك وقلة تعاطفهم معاك
هو ممكن يكون سبب رئيسي في غسيل مخك من أي حد
هيفتح ليك دراعاته ويسمعك بكل صدر رحب ..
وانت هتحب تسمعه مع الوقت ..
لأنه شاركك وجدانك ..
وبالتالي قلة تعاطفنا مع بعض كان سبب رئيسي في ظهور التطرف
بأشكال اكثر عنفا وبالأخص أخر 10 سنوات ..
وايضا وجود عدد كبير من الممكن العبث بأفكاره
لأنه مشاعره ارض خصبة لزرع افكار الشيطان فيها ..

الفكرة اللي وصلت ليها
أننا ممكن نكون عادة ..
بنمثل أكتر ما بنتعاطف ..
وبالتالي صوتك مش بيكون ليه صدي
لأنه صادر من زيف جواك .
مش ألم بيظهر علي ملامح وشك
او صادر من قلب بينزف وجع
بيخليك توصل للناس بسرعة ..
الناس بتبذل مجهود كبير بدون وعي منها
تبرمج مشاعرها أنها تكون صح لأن منطق العقل
لسا بيقاوم و بيحاول
يوصل ده للقلب ..
بس تحس ان برمجة الواقع أقوي من ذاتنا
وقدرتها علي اصلاح نفسها بنفسها ..
او عجزها انها تكمل عقلنا بقلبنا
فبيظهروا منفصلين الي حد ما
لما نيجي حتي نكلم عليهم ...

وبالتالي السؤال بقا اللي عاوز اوصله لهنا

هو ازاي مشاعرنا اتبرمجت بدون وعي منا
انها تفقد كونسيبت التعاطف مع الغير من الاساس مع الوقت ؟

ممكن اي شخص يقعد يفتكر اخر مرة ممكن يكون أتاثر فيها
بس أتاثر بشكل يخليه معتنق ألم التعاطف مع حد لفترة طويلة
مش مجرد لحظة وخلصت ..

هيلاحظ أنه غالبا هيكون ألم نفسي ..
هتشعر أن كل ألم غالبا هيكون متعلق بيه هو وحياته ..
حبيبته سابته .. مراته خلعته .. وهكذا يعني ..
هتستشعر أن الموضوع دايما متعلق بالشخص نفسه
محور حياته هو نفسه ... مشاعره تكفيه فقط ..

وبالتالي سبب قلة التعاطف
ان الإنسان العربي في القرن الواحد والعشرين
وصل انه بقا شخص أناني ..

ولما تيجي تبحث عن أسباب انانيته
هتلاقيها نابعة من اندماج أفكار عصرية بحتة
برواسب أفكار متعفنة او متخلفة بداخله
هي أصلا تصف حاله ..

الاتنين اتقابلوا مع بعض
انت اعطيت التكنولوجيا الرقمية علي طبق من ذهب
لشخص لم يخترعها بل يقتنيها فقط ..

فعملت شخص مشوه او روبوت
قادر أنه يعيش حياة مزدوجة
حياة يرضي فيها عن نفسه بسبب سوء الاوضاع
لبضع ساعات كل يوم
وحياة هو اصلا عايشها بكل ما فيها من قرف ..

بسبب استقباله كل يوم افكاره تجعله يظن أنه الأميز
والافضل .. وأنه قادر أنه يكون شخص
ليه كينونة في عالم موازي للحياة الواقعية ..
ولكن سيظل يقول ان الواقع قرف ...

وبالتالي ممكن نعدل الكونسيبت اللي فوق
بما يناسب واقعنا

لو عاوز تقلل التعاطف مع شخص ما
خليه يعيش حياة الكترونية سعيدة
فلما يتعايش مع الواقع يقرف منه
فيقلل تعاملاته مع البشر ..
ويخلي مشاعره لتليفونه .. فالناس تنفر منه
فيكون منعزل عنهم ..بعد ما انعزل عن قضاياهم
وبالتالي لما يموت ..
ماحدش يزعل عليه ...

[Abdallah]

موضوع قيم و تسلم أيديك .

[دمعه حائره]

اعتقد ان التأثيرعلى المشاعر لازم يبقى موازى للتأثير على العقل
يعنى تأثرعلى مشاعرة وتقعنه باسلوبك وافكارك
كان زمان سهل اوى تحرك شعب كامل بكلمة من زعيم او غنوة
مع انحدار مستوى المعيشة وزيادة الفقر المشاعر تقلصت بقت الناس
تتحرك لما تحصل كارثة بس
مفيش شك ان ظروف الحياة والتكنولوجيا خسرتنا علاقات ومشاعر كتير
ولو هيكون فيه تعاطف يبقى تتعاطف مع نفسك اولا
ولو حصلت حاجة اوجريمة مثلا التعاطف بيكون مؤقت
ولو طالبت حد بالتحرك هيقول مش قادر
مقالك قيم جداويطول الحوار فيه
وفيه نقاط كتير واضح منها مدى درايتك وإلمامك بالفكرة
تسلم

[.Lamar]

عن نفسي بحس اننا فقدنا جزء كبير
من انسانيتنا مع كل ارتباط بالتكنولوجيا المحيطة
بقينا عايشين فى عالم وهمى
و بنرمى نفسنا فيه عشان نهرب من الحقيقة
لاننا مش قادرين نتحمل او نواجه
و مع الوقت بنفقد الاتصال بالعالم الحقيقى
و بيزيد ارتباطنا بالعالم الوهمى دة
فبيقل الاحساس و التفاعل مع اى موقف
او بمعنى ادق بيكون اقل من المتوقع
و دة اصبح حال معظم البشر للاسف

اخى الفاضل لك رؤية و ترتيب للاحداث
يثير فى العقل الكثير من التساؤلات
سلمت يمينك
تحياتى و تقديرى

[CAN _ 7LM]

اتفق معاك جدا وهذا اللى يعرف بالنظام السياسى بيأثرو ع العواطف لتحقيق أهدافهم من خلالك مبيسبوش فرصة بعقلك للتفكير اهم حاجة انها بتأثر ع عواطفك ويتكون مبسوط وانت ماشى وراهم وفى أسلوب تانى أنهم بيدوك الفكرة وبينفذوها من خلالك وبيقنعوك أنها نابعه من جواك
موضوع قيم 🙂

[يــزن]

الله عليك تحليل منطقي وفعلا اتفق معاك
حتى في عالمنا العربي كان للآسرة ترابط واضح دلوقتي كل واحد في معزل عن الاخر
متابع وكلي شغف
تحية تليق بك أخي الحبيب أحمد
مع فائق التقدير ومزيد من الاحترام