الكيس مخروم (صورة فى رباعيه)

[*فجر الاسلام*]

بسم الله الرحمن الرحيم


اليوم قافل مكتوم وبدأته انا مشؤوم
مشوار اخر الشهر منه بعيش مصدوم

راجع تايه محتاس ومعبى الراتب فى اكياس
بخبيه من عيون الناس بس الكيس طلع مخروم

دفعت الكهربا والمايه والبقال اخدله شويه
والجمعيه كانت منسيه ومعاد الدفع اليوم

والواد بيطلب فلوس قال ايه رايح درووس
هو مرتب بقا منحوس ومالوش اى لزوم

غير انبوبة البوتجاز والبت على وش جواز
وامها عوزه الجهاز وانا بقيت خلاص معدوم

اجيب ده كلو منين انتو فاكرينهم بقو ملايين
ده انا غرقت فى الدين ويارتنى بعرف اعوم

*فجر*
26/9/2018

[يــزن]

هههههههههه
يخربيت كدا مخروم ايه دا منه للشارع
تسلمي يا فجر والله لخصتي
تحياتي وصباح الخير

[*فجر الاسلام*]

هههه لا ما احنا بنحطه فى الكيس شويه
بيبقى عندنا امل نخبيه ^___^
تحياتى ليك
صباح الفل نورتنى والله

[فداااااااااااء]

الحل اننا نخرم كيس الحكومة علشان يعوض ما نفقده احنا
جميلة الكلمات عزيزتى
بالتوفيق لكِ

[*فجر الاسلام*]

اقتباس المشاركة الأصلية كتبت بواسطة فداااااااااااء الحل اننا نخرم كيس الحكومة علشان يعوض ما نفقده احنا جميلة الكلمات عزيزتى بالتوفيق لكِ

الحكومه مش واحده بالها مننا اصلا
انتى اجمل ربى يسعدك

[دمعه حائره]

ههههه والله هم يضحك وهم يبكى
بجد تحفه تسلمى فجر

[.Lamar]

مش هنلاحق على الشعب عوامات
و كله بيغرق
و محدش حاسس بيهم

جميلة يا فجر
تسلمى

[ساحر الأحزان]

ربنا معاه
دة كلة فى أول الشهر
آمال بقى
حيعمل اية بعد كدة
أحسنتى فجر

[ahmed 22]

اصلا اللي بيقع من الكيس بيروح الحصالة
البلد بتحوشلنا

نص جميل ومميز
تسلم ايدك فجر ..

[محمد العبادله]

المشكله انه مسلسل طويل
كل شهر نفس الحكايه
يعين الله
سلمت الانامل