الامهات و المدرسة

[.Lamar]

صباح الخير

طبعا الدراسة بدأت و بأة فيه مواعيد للصحيان
و مواعيد للنوم و كل حاجة الاهل بيحاولوا ينظموها
بحيث يكون الوضع احسن لاولادهم

بشوف امهات بتمنع عنهم كل حاجة لمجرد ان الدراسة بدات
لحد ما الولاد بيحسوا انهم دخلوا المعتقل مش المدرسة
حتى لو خلص واجبه ممنوع يلعب او يتفرج على التلفزيون
بشوف الام بتحاسب ابنها و تعاقبه لو نقص نص درجة فى امتحان
او لو ابن صاحبتها جاب درجة احسن منه
يا ترى دة هيخلى الطفل يحب الدراسة ؟

ليه كل ام بتحاسب ابنها و بتنسي ان يمكن هو قدراته العقلية كدة
ليه مش بتتقبل حقيقة ان ابنها مش عبقرى
و لا ان ربنا مخلقناش زى بعض بنفس درجات الذكاء

يا ترى ايه رأيكم فى تصرف الامهات
و هل العقاب هيجيب فايدة ؟
او هيخليه مينقصش فى الامتحان تانى ؟


تحياتى للجميع

[fanaa]

الاسلوب دا خلى اطفال كتير اوى يكرهوا فتره الدراسه
كل طفل ليه وعى وقدر معينه
كل طفل ليه ذكاء فى حاجه معينه وممكن متكنش فى دراسته
وفعليا حركه ان احط طفل مع مقارنه بطفل جاب اعلى منه درجات
فانا بقلل منه ومن قدراته وبخليه يفقد الثقه بنفسه
لانه ممكن يكون متفوق فى حاجه تانيه وناقصه بس فيها شويه اهتمام
اتذكر وانا فى سته ابتدائى كنت ااقل وحده بدرجات عيلتى " دا بالنسبه لاهلى"
بس مقارنه بحاجات كتير لقيت نفسى فيها اتفوقت بحاجات كتير
واى طفل كدا. مش المدرسه ولا جو المعتقلات الا بنحطه للطفل هيخليه احمد زويل
بالعكس هيطلع حمو بيكا فى الاخر
حلو الموضوع الموور

[د/ عبد الله]

طبعا ده أسلوب تربية غلط
مش معنى ان الدراسة بدأت ان الطالب ينعزل عن العالم
لازم يمارس أنشطة ورياضة وزيارات ويتعلم حاجات مفيدة ويلعب كمان وبرضو يذاكر
مش كل حاجة مذاكرة
كمان لو كل أم أو أب عايز ابنه يطلع الأول ويزعقله عشان فلان جاب أكتر منه بنص درجة
طب مين اللي هيبقى التاني والتالت؟
هو الفصل كله هيبقى الأول؟

المفروض تربي الطفل على انه يجتهد ويعمل اللي عليه وبس
النتيجة هتكون على حسب الاجتهاد

[سهـــر]

انا ضد العقاب
بكره اوي الأسلوب ده
عندي مثل حي في البيت
انا كنت شاطره يعني انا اشكر حد في اخواتي
ماما عايزة اخواتي ميقلوش عني
عيزاهم في نفس مستوايا
مع ان دي قدرات
بتزعق لاختي الصغيره لما تنقص
وبتفضل تسلم فيها وده كمان اسلوب غلط جدا
وفي ناس بتاخد موبيلات ولادها عشان في اعداديه 😂
وكانوا قايلين لماما تعمل كدا
بس لسا محصلش
مع انها ممكن تاخده قبل الامتحانات لأسبوعين مثلا
او ممكن تحدد وقت للموبايل
بس لا بياخدوه ويدوهم النوكيا المعفن القديم
بس ساعات بحس عندهم حق
لان الجيل الجديد ده الموبيلات والنت واكله دماغهم
انا كنت بذاكر مكنتش بمسك الموبايل
دلوقتي بيذاكروا في الموبيلات

[دمعه حائره]

اكبر غلطه بتقع فيها الام اسلوب الترهيب والعقاب الشديد ده
انما لما تحبب ابنها فى المذاكرة وتكافئه لما يكون شاطر ده الاهم من العقاب
فالنهايه دى قدرات ومحدش بيحصل فوق طاقته
لكن باجتهادها معاه والمتابعه هيكون فى نتيجة كويسه
والاهم فتره راحة يمارس اى هوايه بيحبها عشان يقدر يكمل
موضوع جميل لمار تسلمى

[countess doha]

طبعا غلط ، لان كدا بتكرههم وبتعنفهم مش بتخليهم يلتزموا
زي مابنظم وقت للصحيان ووقت للنوم نظبط وقت برده للترفيه ، عشان يكون عندهم الشجاعه انهم يخلصوا كل مذاكرتهم ع اكمل وجه عشان يلحقوا يرفهوا عن نفسهم
خاصه طالب المرحله الابتدائيه ، ممكن بقي من المرحله الاعداديه تبدا تشد عليه شويه بحيث يتعود بقي انه يلتزم واكبر وقته يكون لمذاكرته ، (بقول شويه مش دايما)
لحد ما يتعود هوا انه يروح لمذاكرته لواحده ، لان الطفل عنده طاقه ولازم يخرجها ، لان نتايج الكبت بتكون سلبيه
دمتي بود
سلمتي.💛😍

[فداااااااااااء]

وعلي ايه كل دا فى دولة خرجت من التصنيف العالمي يعنى
كان زمان الامر دا مقبول ونقول لان الابن هيكون حاجة كبيرة
لكن التعليم دلوقتى بقى فى الحضيض

العقاب والانعزال والترهيب من اكبر اسباب كراهية الاطفال للمدارس والتعليم

لكن من تطبع على شيئ صعب تغييره
سلمتى لمار

[عهود~]

أمممم

المفترض تنظر الى الأمور بواقعية مع الأبناء ..

عليها تنظر الى انها تقوم ببناء انسان متعلم وليس رسم انسان

وبناء الانسان المتعلم يحتاج الى نظرة واقعية حتى
تساعده على تطوير قدراته وتنميته تدريجا

اما أسلوب المنع فهو أسلوب ليس مربي ولا منمي
بل العكس حيصل وتكون العواقب غير حميدة

تناول جميل جدا

شكرا لدياتك

[غدي فلسطين]

برأيي لاتجعل يدك مغلولة في عنقك ولاتبسطها كل البسط ..
ولايكلف الله نفسا إلا وسعها ...
بداية موفقة للجميع .. والله يكتب النجاح لطلابنا وينفع فيهم الأمة. .

دام حسن انتقاؤك سيدتي

[ahmed 22]

غالبا كل الناس اتكلمت عن اللي المفروض الأمهات تعمله
بس ماحدش اتكلم عن المصدر اللي هتعمل كل الحاجات الحلوة دي من خلاله
لأن التعنيف وغيره .. مبني علي ضعف الحيلة وعدم امتلاك
الادوات اللازمة من أجل جعل ابنائهم افضل

فايه الخلفية الترباوية اللي عند بعض الأمهات عامة
ولا ايه اللي توارثوه من اللي قبلهم يوازي سرعة العصر الحالي في اساليب التربية
ولا ايه اللي اتعلموه في مناهجهم العملية في المدارس
عشان يكون عندهم القدرة علي الصبر والتعامل مع ابنائهم بأسلوب علمي تربوي حديث
القائم علي الحوار مع الطفل بمستوي يوازي سرعة تعلمه
ولا ايه اصلا المستوي الثقافي والحضاري في المجتمع عامة ..

وبرضه العتب مش علي الأمهات ولا الأهالي عامة بس ..
الفكرة أنك ممكن تخرج للمجتمع طفل صالح ومحترم ..
بس لما يختلط بزملائه بره يرجعلك ملوث ...

يعني هي دايرة عاوزة تتبني من اول وجديد ...