random variable

[ahmed 22]

i prefer listening to covers more than original

is that makes me fakiginal ?

[ahmed 22]

كله بقا بيحب ياخد اللقطة .. لانه مابقاش فيه صاحب ليها ..

[ahmed 22]

لقد هرمنا


تعالي احكيلك قصة بائسة حصلت معايا اخر 4 دقايق
كنت قاعد فاضي لا بيا ولا عليا
افتكرت المنتدي .. قلت اسجل دخول
والله ما عارف ليه سجلت دخول اساسا
وانا ماعنديش حاجة اكتبها ولا اقولها

قلت ادخل الصفحات المكشوفة وادروش بأي كلمتين فاضيين
جات في دماغي جملة

لقد هرمنا

وقلت احط جمبها 2 ايموشن حسن كسل وعدم اهتمام
قمت كاتبها واديت الايموشن المتين ... قبل ما ابعت ارسال
مش عارف ليه كتبتها علي جوجل سيرش
تقريبا قلت جوا نفسي اذ ربما معناها اتغير ولا حاجة

لقيت اول نتايج البحث طبيعي ان يظهر الرجل التونسي اللي قالها

لقد هرمنا من أجل تلك اللحطة

المقولة دي اللي خلدت الثورة التونسية طبعا ..
وكانت بداية الربيع العربي كما يقال وكان فيها حرقة جامدة

وبعد 10 سنين تقريبا ومن 3 دقايق فقط عرفت اسمه ..
وهو الشيخ احمد الحفناوي ..

المهم لقيت عاملين معاه مقابلة من كام شهر علي هيئة تقرير دقيقتين
طلع بيقول ان الجزيرة كانت بتتاجر بمقولته دي وتم ذكرها اكثر من 3000 مرة
علي القناة
وراسلهم عشان يلغوا الاستعانة بيها
وبيستنكر يعني ده ... وانه ماخدش من الثورة
غير ان مكان اكل عيشه اتحرق وكدا يعني

والناس حواليه في التفرير وقدامه بيسألوهم عن المقولة
فقالوا المقولة المفروض تكون

لقد ندمنا من اجل تلك اللحظة

والرجل الحفناوي قاعد يضحك في الخلفية ..


بس كدا .. وقام ايه بقا
المسلسل خلص بنهاية سعيدة وبتاع ..
للاسف المخرج عاوز كدا

[ahmed 22]

بما اني كنت من محبي الانمي وقصص المانغا ومازلت الي حد ما
فأكيد الواحد فيه شخصيات في الانميات دي معلقة معاه من الطفولة

مثلا هتلاقي ايتاشي من انمي ناروتو ..
اللي هو قاتل ومنقذ .. خاين ومخلص .. مجرم ومضحي ..
كل ده في نفس الوقت

تركيبات للشخصيات عامة صعب تلاقيها خارج عالم الانمي
يعني فكرة ان شخص بيقتل كل عشيرته
بما فيهم امه وابوه عشان يمنع حرب اهليه داخل قريته
هتتسبب فيها عشيرته لانه عااني في طفولته من وجود حرب عظمي
شاف فيها الاف من الناس بيموتو فهو اختار انه ينحاز للكيان الاكبر
المتمثل في قريته ويتحمل عبئ الكراهية وانه يكون مطارد طول حياته
وانه يملئ اخوه اللي ماقتلوش بالكراهية تجاهه عشان يكون اقوي
لا ويقتله كمان لما يكبر وحوار كبير كدا ..
وفي الاخر هتلاقي نفسك لا اراديا شايف ايتاشي ده
حاجة كبيرة مثلا او متعاطف معاه ومتأثر بيه جدا ..
تخيل ان ده انمي المفروض للاطفال مثلا ..
كمية المشاعر المعقدة في الشخصية او اللي اتكونت من خلالها
صعب انك تفهم تأثيرها بشكل كامل علي عقول متابعينها علي ما اعتقد
او تفهم ابعادها او المفروض ايه اللي تحسه تجاهها ..

بالتالي اتوجد اجيال كاملة عنده فضول كامن تجاه الشخصيات الشريرة
وهتلاقيها دايما مصدر الانتباه او التشجيع في عقولهم وهتلاقي ده واضح جدا
افي احاجة زي لعروض المباشرة
زاللي هي زي عروض المصارعة في ال wwe لو بتتابعها
هتشوف الهتاف بقا بيتجه دايما للشخصية الشريرة
الناس بقا عندها ميول فضوليه تجاه الكاريزما دي
بتمثل الابهار ليهم
... او الغير متوقع ...
وهي ممكن تتحول ازاي او امتي ا
و بعد ما تقتل كام شخص.. او ايه السر او التضحية اللي بتقوم بيها
انها مثلا تتحمل اعباء الكراهية دي ..
الحاجات دي هي اللي بتغير الكيمياء بتاعة الدماغ علي ما اعتقد


نفس الحال هتلاقيه بالنسبة لسيفيروس سنايب في هاري بوتر يعني الي حدا ما
فكرة القاتل المضحي .. او المجرم المنقذ ..
يعني اعتقد اللي متابع لحاجات دي من صغره زي حالاتي كدا يفهم قصدي اكيد ..


وممكن كمان يشوف كمية التعقيد في المشاعر اللي ممكن تأثيرها
بيختلف من شخص للتاني ... وبتغير من تفكير اشخاص واحكامهم علي الواقع

[ahmed 22]

اقتباس المشاركة الأصلية كتبت بواسطة ahmed 22 مقال كنت كاتبه الشهر اللي فات عن سد النهضة بتاريخ 14-6 يا تري رايحة بينا علي فين يا اثيوبيا بعيدا عن اي افلام سياسية وتحليلات استراتيجية وافلام هندية او فكرة ان احنا اتعاملنا في الموضوع ده من الاول بسبب ظروفنا كان فيه اهمال وبعد ما انتبهنا لخطورة الموضوع مشيناها بالحب والحلفان .. خلاص الموضوع بالنسبة للجانب الاثيوبي خرج عن سيطرة انك تعمل اتفاق بشروط فيها نوع من التكافئ او التوازن او حتي انك تخرج باتفاق فيه 40 / 60 حتي لصالحهم.. والله مش بعيد فكرة انهم عاوزين يطلعوا باتفاق يتم فيه استغلال كافة مواردهم المائية اللي فعليا انتبهوا انهم قادرين يقولوا كمصب ان احنا في ايدنا نعمل كل حاجة وكل يوم الكفة بتاعتهم بتزايد لأن الكل بقا كل يوم هو اللي بيسعي يحاورهم ويسترضيهم ودي اصلا لوحدها تخليك متعجرف في قراراتك لان حسيت ان اللي حواليك انعم من انهم يوجهوا ليك كلام قوي حتي.. الرجل رئيس الوزراء بتاعهم دماغه عالية وقدر يجر الكل في السكة اللي هو عاوزها من الاول بسبب فهمه لعقلية االقائمين علي الدبلوماسية المصرية.. دبلوماسية دون لجوء لحلول اعنف.... يعني ممكن المعادلة توصل انه عشان يكون فيه اتفاق يقولك الدفع مقابل المياه كحل وسط بالنسبة ليهم علي اساس انت بتصعد فواحد يدخل في السكة يرمي كلمة تعويض مقابل تأخير الملي .. لأن خلاص كل يوم الحدود بتعلي .. لازم تقدمله اللي يخليه يأخر مليه للسد .. يعني اصلا موضوع الاسباب الفنية مابقاش ليه قيمة في الوقت اللي انت بدأت تتفاوض معاه علي ان السد يتملي في 3 سنين ولا 7 سنين .. وبالتالي ده اعتراف انه جاهز .. بس انت عاوز تحدد يجهز امتي وده في عرفه مرفوض .. لانه مش مضطر .. ولانه بقا قادر . بس كله مثلا متجه لفكرة ان اثيوبيا مدعومة من اسرائيل او تركيا او قطر .. ودول اللي مقويين شوكتهم ... ده كنظرية مؤامرة ممكن .. بس فعليا اللي مقوي شوكة الحكومة الاثيوبية هما الشعب الاثيوبي وده اللي احنا مش حاطينه في المعادلة بتاعتنا خالص .. دايما بنبص الامور من وجهة نظرنا .. بس ماحدش فكر يبص للموضوع من الطرف التاني شكله ايه ... وخصوصا النظرة الشعبية يعني اساسا فكرة ان الحكومة تتراجع عن شئ هما شايفين ان بقا ليهم السيادة الكاملة عليه في الوقت الحالي عكس اي وقت قبل كدا في القرن الماضي .. وانهم خرجوا من عباءة اتفاقات استعمارية وتاريخية وان قبل كدا في سعيهم لبناء السد تم ضرب الامدادات اللي بتبنيه في السبعينات تقريبا مننا وكل شوية لما يحصل تراجع في البناء بيتشبثوا بالموضوع لحد ما بقا قريب منهم .. ودي كلها رواسب تاريخية محسوبة علينا كدولة مصرية من وجهة نظرهم.... وبنت نوع من الضغينة داخلهم .. فطبيعي عاوزين يحسوا بانتصار عليك ولو معنوي .. وانت مانبتهتش للنقطة دي من الاول اساساا وفاكر انك بتتعامل مع اخوك ... مع انك يعني عارف ان الاخوات ساعات بياكلوا حق بعض عادي .. لأن فكرة الاستفادة من السد باسرع وقت كمصدر طاقة بقا كل يوم ويزيد ويمثل ليهم امل نهضة بقا اكبر من اننا نتعامل معاه بالطريقة اللي احنا ماشيين بيها دي .. الحكومة والاعلام في البداية صدروا العامل الوطني في الموضوع .. والشعب الاثيوبي دخل عالموجة فبقا اكبر دافع تجاه احلامهم واكبر ناقض لحكومته لو اتخلت عن اي شرط من شروطها او اي تأخير ل 3 او 4 سنين .. وشايفين ان اي مساس بالحلم ده من اي نوع فيه اعلان حرب علي بلادهم .. وبالتالي دايما تصريحاتهم مبنية علي ان في عداء بتصدره مصر ... مع اننا كحكومة ماجبناش سيرة ضرب السد اطلاقا .. بالعكس يمكن ده كان في الاول حسم الموضوع لو كان فيه تنويه ليه بطريقة ذكية .. يعني بتوريله العين الحمرة بس بالبلدي كدا .. بس بالعكس تلاقي في عز المناقشات والمراحل الاخيرة منها من كام شهر .. وزير الري طالع في لقاء يكلم فيه عن اجراءات الدولة بتاخدها في مجال الزراعة وترشيد المياه في حال فشل المفاوضات ... وده بيتنافي مع ارادة الشعب انه شايف ان الموضوع ده خط احمر وبالنسبة ليه حياة او موت ... وصدروا دعاية سلبية عننا اساسا .. واديت انطباع انك مسلم بس بتقاوح وخلاص .. وبأكد تاني ان لاثيوبيين الي حد كبير كشعب مش حابينا اوي كمصريين.. وفكرة انهم شايفين امل يخرجهم من الفقر الي التنمية عن طريق مشروع قومي الكل التف حواليه .. ده هيخليهم اشرس علي طول الخط ... والاعلام بتاعهم هيكون زلزال عالحكومة في اي قرار لانه مسنود بدعم شعبي .. وده مخلي الحكومة حاليا اقوي في قراراتها وحتي الجيش بتاعهم بقا بيصدر قرارات باسم الشعب يقولوا ان الشعب الاثيوبي عنيد ومعروف بجبروته وافلام كدا .... من الاخر الحكومة عندنا حطت نفسها في موقف ضعيف جدا سواء في المفاوضات او حتي في اخذ قرارات اصعب من أنك تتعامل مع نتايجها من وجهة نظرك .... وقت الشعارات بقا مالوش مكان حاليا في كلامنا... وقت الاحلام بيزيد عند الاثيوبيين ... فالمفروض انت هتخرج من المأزق ده ازاي كدولة ... مع العلم انك حتي لو فكرت تتعامل عسكريا عشان حتي توجه ضربة جوية للمطار محتاج قاعدة ليك في دولة قريبة وده مش متوفر وعنصر المفاجأة راح ..وانت ماكنتش تقريبا مرتب ليه..وحتي الموضوع ليه نتايج اكبر من اننا نتعامل معاه لو حصل . و فيه كلام انه تم استخدام ميليشيات مسلحة معارضين للحكومة الاثيوبية من الجانب المصري بشكل خفي وتم احباطهم اكتر من مرة اثناء محاولتهم مهاجمة السد .. وتم توجيه اتهامات مبطنة من الحكومة الاثيوبية بالموضوع ده ... وطبعا ماحدش قدر يثبت حاجة .. بأمانة حاسس انه هنرضي بأنصاف حلول بتفكير القائمين علي صناعة القرار.. وهنضطر نتعامل بمنطق اقل الخساير ... الا اذا حصلت مفاجأة ذات طابع استراتيجي ويتم النظر للموضوع بتوابعه اللي هتكون غير متوقعه وفيها عامل المجهول .. انه فيه مكسب شعبي من خلالها القائمين عالحكم يكسبوا ثقة الناس من جديد .. وعامة انا نفسي قبل ما اموت نكسب حاجة في حياتنا غير ماتش كورة الصراحة

لاقيت نفسي فاضي قلت اكمل علي البوقين اللي فوق دول
اللي كتبتهم السنة اللي فاتت

لأن السنة اللي فاتت في شهر 7 برضه زي اليومين دول
كانوا ذروة الكلام عن سد النهضة
تقريبا كانت قراءة المشهد واضحة للكل ..
وخاصة توجه الجانب الاثيوبي ..
وكان واضح ان دور الدبلوماسية انتهي
واللي كان بيحصل مجرد مط للاحداث
حتي موعد الملئ الثاني ..

اتجاه الجانب الاثيوبي واضح
وقراراته كانت نابعة في الاساس من ضعف الدبلوماسية المصرية
اللي اشعرته انه اقوي في ظل حالة توتر كنا بنمر بيها ..
بس هما داخليا برضه ماكنوش احسن حاجة .. وعندهم نزاعات
وحروب اهلية وافلام ... ومع كل ده ماظهرش في حديثهم عن الموضوع اي ضعف ...
بالعكس كان احيانا كلامهم فيه عنف مبطن تجاه مطالبنا ...
واحيانا استجداء دولي اعلاميا تجاه ان احنا ممكن نضرب السد وغيره ..
يعني بيضرب ويلاقي في نفس الوقت ..
ايا كانت الدوافع بقا ولا الخفايا ولا الدعم اللي كانوا بينالوه
من بعض الدول في الخفاء ويمكن ده الي حد ما ظهر جزء منه في مجلس الامن من كام يوم ..
بس مش موضوعنا .. مش حابين ننجر لجو المؤامرات دلوقتي..

المهم انا كنت غالبا لما بكلم عن موضوع سد النهضة
كنت بشوف الرواية دايما عند الجانب الاثيوبي اللي هو الفعل وكنت بكلم دايما عن هما ليه كدا
او ليه متعنتين وبعرض اسبابهم او هما اتجاههم هيكون ايه ايا كانت مبادراتنا او توجهاتنا ..

وكنت بتجاهل الي ما حد ااني اتكلم عن الجانب بتاعنا اللي هو المفروض رد الفعل ..
لسبب بسيط جدا .. انك ماتقدرش تحكم عليه الا في اخر لقطة من المشهد ..
لاننا بنكلم عن رد فعل المفروض بتاخده بحكمه ... وفي نفس الوقت انت
مش عايش لوحدك في العالم ... وانك تكون معرض لعقوبات دوليه ده امر سهل جدا ..
وحتي مع اني بنقد الدبلوماسية المصرية وغيره ... بس لحد اللحظة دي ماتقدرش
تدينها بشكل كامل حتي تظهر الكواليس في ختام المشهد ..
لان لقطة واحدة بس ممكن تغير المشهد بالكامل في عيون الناس
ومش شرط تكون ضربة جوية علي فكرة او حرب بس .. كل شئ موجود عالطاولة

احيانا لما كنت بتفرج لبعض مقاطع للمعارضة علي الفيس بوك ولا غيره
اللي حابة تستغل موضوع سد النهضة في الهجوم علي السيسي ولا الحكومة
كنت بشوف ان جزء من استراتيجيتهم غبية الي حد ما ... لان الطاولة ممكن تنقلب عليهم في لحظة
وكنت بتلاقي في معارضة ذكية جدا ... وبتكون متحفظة في الحديث عن السد ..
لانها عارفة ان موضوع فيه مجازفة في الرهان علي فشل الحكومة في التعامل معاه ..
لانه امن قومي .. وبالتالي منتظرة بفارغ الصبر النتيجة النهائية للموضوع ...

بشوف ان من الغباء ان الناس تستبق النتائج عامة في الموضوع ده بالذات ..
في وقت المفروض ان رد الفعل مننا كمصريين
لو فيه ضربة جوية او غيره بيكون ليها تجهيزات فيها عامل المفاجأة
وبيكون فيه تجهيزات دبلوماسية ... يعني اكيد عندنا مصريين في اثيوبيا
حياتهم مهمة ... وبالتالي ماحدش يقولك اضرب السد ولينا ناس هناك وسفارة
وغيره .... لان رد الفعل في حالة ضر ب السد هيكون شعبي من الاثيوبيين كبير
وهيكون فوضوي وهيحصل مجازر وغيره ...
وبالتالي لو حصل اللي المصريين بيتمنوه هيكون انتصار شعبي للحكومة والسيسي
هيكسب بيه جزء كبير من التأييد .. لان الكل هيشيد بصبره واستراتيجيته
وانه لجأ لكل الحلول السلميه عشان يكسب التأييد الدولي بحيث انه لما ينفذ
ماحدش يلومه ... وانه لما يجهز للضربة من السودان ...
اكيد يعني مش هيطلع في برنامج احمد موسي ويقول بكرة الصبح هنضرب السد
الموضوع اكيد بيكون ليه خبايا وتجهيزات ...وعلي فكرة ده
سبب من الاسباب ان الاعلام بتاعنا مش هايج اوي ..
لان الاسكريبت بيقول انه مش لازم نهيج الجانب الاثيوبي بخطاب عدائي موجه
يعني الخطاب الاعلامي المصري تقدر تقول عليه وسطي فيما يخص حوار سد النهضة
لا هو فيه هجوم علي الجانب الاثيوبي ولا دفاع عن الجانب المصري

ومع ذلك ومع الهري ده كله ... انا لحد اللحظة دي مش شايف ان الموضوع ده نهايته
هتكون بضربة جوية عالسد ... وهتنتهي علي طاولة المفاوضات بتنازلات من الكل ..
وهنكون مضرورين برضه بنسبة ما .. وده اللي بتراهن عليه الحكومة والسيسي ..
والاعلام هيطلعنا منتصرين ...
لاننا من 3 سنين زي ما قلت قبل كدا من سنة احنا بنصدر صورة للناس
ان احنا بنطبن ترع وبنعمل محطات تنقيه وغيره عشان نقلل نسبة الهلك من المياه
ودي النسبة اللي هتفقدها مصر في طاولة مفاوضات سد النهضة وبنراهن علي تعويضها مش اكتر
بالمشاريع اللي بتحافظ علي المياه وكدا
نقدر نقول ان احنا بنراهن علي ان لو حصتنا 55 مليار مثلا
فبالنسبة للحكومة لو فقدت 10 ولا 15 مليار في سنين الملئ
ده انتصار ... وده مجرد رزع وهبد مني ..

واحشني انا الرغي في السياسة مع نفسي كدا

[ahmed 22]

تعالي احكيلك الفصل الاخير في قصة حلا بعنوان

حلا في حواري المعز

طبائع البشر بتتغير من زمن للتاني ...
ولكن اصعب شئ بيواجهه اي انسان خاصة في الزمن ده لما يحاول ان يلتزم هو الثبات
ودايما الدعاء المتكرر هتلاقيه علي السنة الناس ( ربي اسألك الثبات )

ناس كتيرة شايفة قصة حلا شيحا مسلسل بايخ ومتكرر

يعني قصة اركانها معروفة ومش جديدة
فنانة .. اتجوزت ... اتحجبت .. اتنقبت ... اعتزلت .. لاما ربنا يثبتها
لاما اطلقت .. فعادت من الاعتزال عشان يكون ليها مصدر دخل ..
فخلعت النقاب فالحجاب .. فرجعت تاني تعمل افلام حب ورومانسية

بس يمكن اللي ماكنش عادي في القصة دي هو ظهور عامل جديد
وهو الداعية سابقا و الميجا مزواج حاليا المعز مسعود

ده وجوده عمل كارثة في مكانه
وهو الاحتباس الايماني ..

وهو زيادة درجة النفاق العام مع زيادة كمية ثاني اكسيد التنظير
لدرجة انك تمنع الناس من حرية السعي لطريقهم وانهم يحاولوا يشوفوا مخرج لشئ
عملوه ممكن يكونوا فعليا بيحاولوا يتخلصوا من ذنبه بطريقة ما .. ايا كان تقديرك لشكل الطريقة دي صح ولا غلط .. بس الانسان لما يكون يائس احيانا من ايجاد مخرج بيضطر يضرب في سد ...
وبالتالي تظهر بعض الاراء الشاذة اللي مالهاش اي لازمة في الكون من شوية عالم كل مفهومها عن الحياة
هو ازاي تدعم لقمة عيشها حتي لو علي حساب دينها فتستغل وجود الشيخ في المعادلة
في انها تهين موقف واحدة كانت زميلتهم في يوم ما ..

نرجع للمعز
لان فكرة انك تكون شخصية افعالك تناقض اقوالك ومعتقداتك اللي صدرتها للعالم والناس
بشكل واضح علي مدار سنين ...
بتعمل منك وجبة دسمة للهري المجتمعي الغير صحي بالنسبة للمجتمع ككل
اللي انت بتفتح ليهم طريق التبرير لكل خطأ ممكن يقوموا بيه ..
لانك كواحد المفروض كنت محسوب كداعية بقيت مصدر جذب للشبهات وبتجر نفسك والناس ليها

ومع ذلك في تناقضك ده الكاريزما بتاعتك قادرة انها توصلك للبعض ويكون ليك اتباع ...
و انك تكون مؤثر في عقول البعض وقادر تقنعهم بكل تناقضاتك ويؤمنوا بيك وبأفكارك .
وكمان يقدر ربنا انك تجوز واحدة والتانية والتالتة بتناقضاتك دي وهما شخصيات عامة ...
فتقوم تظلمهم معاك ..
لأن افعالهم وكلامهم محسوبة علي طريقك .. وحمولهم بتزداد الضعف ..
لان كل خطوة بيقوموا بيها بتبقي محل الاهتمام بشكل مضاعف بوجودك..
ومحل السخرية بشكل اكبر من الناس .. وكلامهم بيتاخد بشكل هزلي ودون محمل الجد
وبيتحسب علي انها مسرحية هزلية . في قرارت وافعال هما يمكن اصحاب الشأن قرروا يخدوها بنفسهم ويمكن تقدير الموقف فقط كان خطأ منهم ..
ومع اول منعطف هتنقطع علاقتكم ببعض ... هتسيبها
متشعلقة في الهواء بدون اي علاقات مع الناس .. وهتكون اضعف بشكل اكبر ..
ومش هتكون سند ليها في علاقتها لا مع الناس ولا مع ربنا اكيد ..

يعني انا بالنسبة ليا حلا دي شخصية ايا كان ما يظهر للناس فالباطن بتاعها مع ربنا
يمكن هي بتحاول تجاهد نفسها علي قدر ما تستطيع .. يعني تابت عن التمثيل
وانتكست مثلا وفرضا لقت طريق انها من خلاله تتوب تاني .. وتحاول تعمل الصح ..
ده مش بيعيبها بقدر ما يعيب الناس اللي مش قادرة تتفهم التشتت اللي هي فيه
او يستوعب مكانها حاليا .. او طريقها ... ماتقدرش تحكم علي نوايا شخص بيحاول .. المهم انه بيحاول
كتير من الناس ربنا ساترها في غلطها .. وبالتالي ماحدش يقدر يحط نفسه مكان حد كانت شغلته
ان الناس تتفرج عليه كل يوم في التليفزيون ولا السينما وبيحاول انه يخرج بره الدايرة دي
ايا كانت الطريقة اللي بيتبعها ..

[ahmed 22]

get rid of what makes u off

[ahmed 22]

2012

كانت سنة مليئة بالأحداث
ولكن كان من الاحداث المهمة بالنسبة ليا كشخص دماغه فاضية وقتها
كان السيناريو بتاع cm punk وفينس ماكمان في wwe
مصارعة المحترفين وكدا لو مش واخد بالك بكلم عن ايه

عامة ماكنتش بتابع المصارعة نفسها بشكل خاص
بس كنت احب اتابع السيناريوهات اللي بتتقدم بين المصارعين والادارة
او المصارعين وبعضهم وبتاع ... يعني كان سيناريو تحدي السلطة
بتاع cm punk ده وقتها كان ومازال الافضل بالنسبة ليا ..

المهم هو كان حوار طويل .... الفكرة انه كان من ضمن السيناريو
ان الحاج بانك عقده هيخلص وكان المفروض معاه ماتش عالبطولة مع جون سينا
انه يفوز بالحزام وبعد كدا فينس ماكمان اللي هو صاحب الاتحاد
يتحايل عليه عشان يرجع ويعمل معاه عقد جديد ...
وبالتالي رجع بانك بدخله جديدة باغنية جديدة بوضعه الجديد ..
وكانت الدخلة دي باغنية من التمانينات اسمها cult of personality

ودي كانت بداية التعارف بيني وبين الاغنية ..
انا حبيت احكي القصة بدون اي هدف غير لاني حابب اكون ممل مش اكتر

المهم

عدت السنين وراحت الايام وجات ... وبقينا في 2021 زي ما احنا شايفين كدا
قوم ايه احنا في تالت ايام العيد وبكرة جمعة والدنيا نوم اصلا
فقلت اشوف اي كلمتين اكتبهم عن الاغنية دي
لما افتكرت اسمعها النهاردة .. حظك يلي وصلت لحد هنا
انك تقرأ الكلام ده كله ...نصيبك بقا ...
لو انا منك انا استغفر ربنا واقفل المتصفح و اروح نام

المهم علي ما تصحي

الرجل اللي قام بتأليف الاغنية دي وراه قصة للاسف .. مشكلتك انك ممكن
تصحي ومش هتقراها لاني مش هكتبها لانه حظك اني زهقت في الثانية دي...
ابقي ادخل وابحث علي ويكيبديا انجلش ..
ماحدش قالك تنام في نص الفيلم

بس الخلاصة
ان الاغنية بتكلم عن القاسم المشترك بين الخير والشر او بالادق ايه اللي ممكن يجمعهم سوي
بمعني ايه اللي ممكن يجمع بين غاندي وستالين .. داعي للسلام ودكتاتور

وهي فكرة عبادة الشخصية .
فكرة انك ممكن تتبع شخص كالاصنام لانهم متصلين برسائلهم اللي بيدعوا ليها بشكل قوي فوق العادة
فكرة انك ازاي ممكن تحب شخص سواء للاسباب الصح او الغلط بسبب الكاريزما بتاعته
فكرة انك بتشوف في عينيه غضبك .. احلامك .. او كل شئ كنت هتكونه وماكنتوش وبالتالي تتبعه ..

المهم
الكلمات قوية


Look in my eyes, what do you see?
The cult of personality
I know your anger, I know your dreams
I've been everything you want to be
I'm the cult of personality
Like Mussolini and Kennedy
I'm the cult of personality
The cult of personality
The cult of personality
Neon lights, a Nobel Prize
Then a mirror speaks, the reflection lies
You don't have to follow me
Only you can set me free
I sell the things you need to be
I'm the smiling face on your T.V.
I'm the cult of personality
I exploit you still you love me
I tell you one and one makes three
I'm the cult of personality
Like Joseph Stalin and Gandhi
I'm the cult of personality
The cult of personality
The cult of personality
Neon lights a Nobel Prize
A leader speaks, that leader dies
You don't have to follow me
Only you can set you free



You gave me fortune
You gave me fame
You gave me power in your own god's name
I'm every person you need to be
Oh, I'm the cult of personality
I'm the cult of, I'm the cult of, I'm the cult of, I'm the cult of
I'm the cult of, I'm the cult of, I'm the cult of, I'm the cult of personality

[ahmed 22]

let me introduce you to the world that u claim
u dont belong to

look at the mirror
and u will find that u made it


مافيش احسن من الانجليزي بتاع تالتة اعدادي ده والله

[ahmed 22]

تيجي تسأل نفسك فجأة
ايه الفرق بين الحقائق والوقائع ؟

فتجد ان الفرق جوهري جدا
الحقائق هي معلومات مؤكدة مئة بالمئة ولكن قابلة للتغير طبقا لظهور دلائل جديدة
ام الوقائع فهي حقائق فعليا حدثت وتم توثيقها ..

احدي الحقائق عن الشعب المصري انه فيه نسبة منه مدخنين قد تصل ل 30 %
ودي حقيقة قابلة للتغير طبقا لاجراءات قد نقوم بيها تحد من زيادة المدخنين
او زيادة نسبة المدخنين نتيجة عدم وجود ما يمنع ذلك


واحد الوقائع عن الشعب المصري
ان علي مدار تاريخه لم يأتي شخص ليعبث في سعر رغيف عيشه
عشان شايف ان نسبة لا تزيد عن الثلث بتشرب سجاير
السجارة فيها بسعر 20 رغيف عيش ...
متناسي الاطفال والنساء اللي هما جزء من عيلة
مش ذنبهم ان رب الاسرة ممكن يكون مدخن
علي اعتبار ان النساء في مصر لا يمثلوا 3 او 4 في المئة
من نسبة المدخنين ...


يا ريت حتي حد عمل دراسة عن الطبقات الاجتماعية للمدخنين دول
يعني لما تيجي تضرب مثال ساذج زي ده
فعلي الأقل دلل واكدب عليا
وتعالي قول مثلا ان في 25 مليون مدخن مصري فيهم 20 مليون تحت خط الفقر بيشربو سجاير
فحرام عليهم رغيف العيش ابو شلن وصعبان عليك ان جزء منهم بيرمو احيانا العيش للفراخ ...
لما تضرب مثال بقرار .. اعرف المنتفعين من سعر الرغيف ابو شلن ده
ايه اللي ليهم .... وايه اللي عليهم ....

يا اخي ده البوقين دول غلوا السعر الدقيق 3 مرات في اسبوع واحد
المفروض الواحد لما يكون صاحب قرار وكلامه محسوب عليه
يدرس كلامه قبل ما يقوله .. مش عنتريه هيا

ادرس معدلات السعادة عند المصرييين
واعرف ان سبب زيادة المدخنين بسبب انخفاض معدلات السعادة بسبب ضيق الحالة والعيشة ..
فبيحرق روحه بنفسين عشان يكمل يومه ...

ادرس حال الناس قبل ما تطفيهم بكلام عبيط زي السيجارة تحت رجليك
ولا احنا مش فالحين غير في دراسات الكباري اللي كل يوم نسمع عن هبوط
كوبري فيها بسبب المسابقة اللي عاملينها علي مين يبني كوبري اسرع ..
فنضطر نصرف علي الحاجة مرتين في المستقبل ... وبدل العطلة تبقي اتنين
وهيظهر عيوب ورا التانية ورا التالتة مع مرور الزمن ..
عشان احنا في بلد بننفذ من غير ما نفهم
ولو حتي عارفين ان فيه غلط .. مش هننقده
عشان خايفين من الذات الرئاسية ... لتقول ان احنا شعب كسول
ولازم نكربك الناس بالخرزانة عشان تشتغل زي الحمير في الساقية
من غير مخ ...


مبارك بني جزء كبير من البنية التحتية للبلد بعد ما مسك الحكم
ومع ذلك النهاردة وماكلمناش 30 سنة اهو وبنعيد بناءها تاني من جديد
وشكلها كمان بعد 30 سنة زيهم هنقعد نعيش في دايرة مفرغة كدا
تحس انه عايشين في مسابقة احنا ...
المفروض في حاجة اسمها دراسة جدوي .... دراسات لام القروض دي
وكل حاجة يقلك احنا فاهمين كل حاجة
ايش فهمك انت ....

فتقوم عشان مافيش موارد للبلد بسبب ام مافيش دراسة
يقولك الدراسة هتبدأ .. والعيال عاوزين بسكوت وتغذية في المدرسة
وعاوزين نوفر كام مليار عشان مافيش موارد
فتبص علي رغيف العيش ...عشان استحليت دم الناس
وشفته اسهل الحلول


عشان كل واحد بيمسك البلد دي
شايف في نفسه الكمال الالهي وانه الوحيد اللي بيفهم
وان الدنيا من غيره مش بتمشي ..
ولازم يكتم علي نفس الناس عشان في خيالاته شايف انه المنقذ الوحيد للبلد
كله بدون استثناء بيفكر بنفس الغباء .. وكله بيقع في نفس الفخ

عشان كله شرب من نفس النيل اللي تراكمات زبالته صنعت مجتمع
مش شايف غير عيوب الناس وناسي عيوبه اللي من عيوبهم

الفكرة انه لما تحب تكتم علي نفس الناس
حاول تسيب ليهم منفذ يلجأوا ليه ..
انما لما تقفل علي كل المنافذ ..
فأنت غالبا هتقضي علي كل امل في الاستثمار في الناس
انت هتستثمر في حجارة بس .. ومش هتلاقي ناس تستخدم
الحجارة دي في المستقبل ...

الموضوع اكبر من قرار قيد التنفيذ او الدراسة .. الموضوع اسمه حياة
لازم تتعاش من الصغر صح .. عشان تبني نشأ سليم قادر يغير من مقدرات البلد دي
مش ناقم عليها لأن اهله متضررين فيها ... فبشوف دايما ان اسهل الحلول
انه يهرب منها او يعيش فيها من غير انه يكون في طفرات تطلعنا قدام
فنكون طول الوقت زي اللي بيرقص علي السلم