روحك ع الرف

[د/ عبد الله]

بمنع نفسي إني أفكّر
وبفكّر..
في حاجات تشغلني عن التفكير
لكن..ولأن الممنوع أكبر
فبيفرض نفسه التغيير

عارف...

روحك ف بداية تكوينها
من أول لحظة عرفت الروح
من أول لهفة نطقها البوح
كنت أنت الشاهد والأول
والآخر
ولغاية ما تروح
وعرفت أكيد كان ايه لونها

وتلاقي الأيام بتعدّي
وبتاخد وف وقت بتدّي
وتساير
وتقول أهي بكرة هتتعدّل
وتغيّر من خططك وتعدّل
ومطرح ما هترسى تدقّلها

ولأنك وف عز الزحمة بتنسى
فركنت حاجات ع الرفّ
وهترجع..
بس أمّا الرجل تخفّ
وتروح مشوارك وتخلّص
والحاصل..
إن المشوار مخلصش
واتحشرت جوّاك مشاوير
ومشيت محشور ف طابور
ونسيت اللي ركنته وجفّ

وف وقت الهدنة اللي قليل
بتبص بعينك وتميل
بالعافية بتلمح شئ متغطي
متكوّم ع نفسه ف ركن بعيد
مش عارف إذا كان فيه حركة
ولا دي حركة عزل جديد
وبتيجي الفكرة انك ترجع..
فتلاقي الرجل مخفتش

ولأن الوضع عليك مش سابق
بتخاف..
وبتهرب وتحاول وتملّ
وبتوصل لحقيقة وحيدة
إنك لازم تلقى الحلّ

والحلّ ف طريقين مش تالت
إمّا هترجع تاخد روحك
أو هتكمل..راضي وساكت
ولأنك محشور ف طابورك
مش فاهم,
لكن بتحافظ ع دورك
فبتقبل عزا بارد من طيفك
وبتعلن روحك ماتت.

فتلاقي طباعك مختلفة
مستغرب من نفسك فيها
بتقاوح..
وتشدّ وترخي
تهرب منها وتلاقيها
بتصدّ وترضى
تصرخ منها وتناديها
وف عزّ هوانك وشرودك
بيجيلك من اخر أنفاسك
مبحوح ملكوم بينادي
روحك ع الرفّ لاقيها.

[ملك جبال الاحزان]

والحلّ ف طريقين مش تالت
إمّا هترجع تاخد روحك
أو هتكمل..راضي وساكت

شدتنى اوى تسلم ايدك يا غالى

[فداااااااااااء]

جميلة كلماتك اخي عبدالله
دمت مبدعا

[د/ عبد الله]

اقتباس المشاركة الأصلية كتبت بواسطة ملك جبال الاحزان والحلّ ف طريقين مش تالت إمّا هترجع تاخد روحك أو هتكمل..راضي وساكت شدتنى اوى تسلم ايدك يا غالى

تسلم يا طيب
يسعدني انها عجبتك
نورتني يا غالي

[د/ عبد الله]

اقتباس المشاركة الأصلية كتبت بواسطة فداااااااااااء جميلة كلماتك اخي عبدالله دمت مبدعا

شكرا ليكي فداء
تسلمي لتواجدك الراقي

[دمعه حائره]

كلمات رائعه دكتور تسلم ويدوم الابداع

[شاعر الحب الحزين]

رغم الكبير من الألم إلا أن الكلمات
شملت واقع الكثير منا وكانت معبرة جدا
أبدعت دكتور عبدالله قمة الروعة والواقعية
شكري وتقديري وامتناني

[❤ ملكة حساسه ❤]

جميلة كلماتك استاذ عبدلله
دم الابداع

تحياتى
ملكه حساسه

[د/ عبد الله]

اقتباس المشاركة الأصلية كتبت بواسطة دمعه حائره كلمات رائعه دكتور تسلم ويدوم الابداع

شكرا ليكي يا منة تسلمي
الاجمل مرورك الراقي
خالص تقديري

[د/ عبد الله]

اقتباس المشاركة الأصلية كتبت بواسطة شاعر الحب الحزين رغم الكبير من الألم إلا أن الكلمات شملت واقع الكثير منا وكانت معبرة جدا أبدعت دكتور عبدالله قمة الروعة والواقعية شكري وتقديري وامتناني

حبيبي يا خالد تسلم يا غالي
شكرا لذوقك وكلامك الجميل
وشكرا للتثبيت
تحياتي وتقديري