العالم بيتطور

[ahmed 22]

بسم الله الرحمن الرحيم

أنا حابب أكلم زي ما العنوان مكتوب كدا عن العالم وازاي بيتطور
بس هيكون الموضوع عشوائي .. يعني من غير قواعد واضحة ..
وربما من غير هدف واضح ... أو لسا هحاول اكتشف الهدف الصراحة ..

بس عندي كلام عاوز يتقال .. ممكن الكلام لما تقرأه تشوفه بديهي
أو تحسه كلام عادي ..
بس الفكرة أصلا أنك تربط الكلام بالواقع بسهولة
يعني نحاول نخرج عن المألوف شوية ...

وبالتالي الموضوع هيكون طوووووويل علي حد الأفكار اللي في دماغي يعني
وبالتالي هنزله علي هيئة بوستات كدا هنا

والكلام اللي فوق ده مجرد مقدمة
والموضوع هينزل علي هيئة ردود كل ما يتاح ليا فرصة
بداية لما الموضوع يتقبل وينزل ...
وبرضه عشان اللي يجذبه فقرة معينة ممكن يقراها
من غيره ما يتعب نفسه بالباقي ..

وهنتعب بقا ياسر وهنزله هنا في الخواطر
واستأذنه ينقله قسم قلم الأعضاء ...

[ahmed 22]

العالم بيتطور .. فشئ منطقي أنك ترتاح أكتر ..
شئ طبيعي أن جهدك هيقل .. وطاقتك بتتراجع ..
ومع ذلك أنت من جواك حاسس أنك بتهد الكون كل يوم وتبنيه
وحاسس أنك مقهور ومظلوم في المجتمع ..

لأنه عامة أنت مقهور ومظلوم بمعايير المجتمع بتاع النهاردة
مش معايير كانت من 200 او 300 سنة مثلا ..

أنت مرفه عامة بالنسبة لأجيال كتيرة قديمة ..
يعني شوف أنت أتوفرلك ايه زيادة .. غيرك ماكنش يملكه في اجيال فاتت ..
و التطور البشري في التقنية قدر حاليا ينتجه ويخليه في متناول الجميع ..
والآلة خلت الحياة أسهل وأسرع ..
حتي أقل الناس فقرا حاليا عنده بعض الرفاهيات ماكنتش متوفرة لأجيال قبل كدا
بمعاييرهم هما ولو كانوا أصحاب قصور ...

الخبرات الحياتية اللي عندك هي تجارب الأف السنين ..
المفروض وصلتك لمرحلة أنك قادر تشوف الحياة بشكل أكثر نضج ..

مع أني أحيانا بشوف ان الإنسان الغير قادر علي معرفة النتائج بسبب خبرات سابقة
هو أكثر شجاعة من الإنسان اللي مفروض ناضج ويمتلك معرفة أكبر بفعل انتقال التجارب ليه ...
لأنه قديما كان بيعامل المجهول
عشان يكتشف شئ مش موجود ...
في حالتنا فاحنا أصبحنا أكثر جبنا ... لأن المعرفة باتت نقمة للبعض ..
وخليتهم أقل اقداما للحياة ... وحساباتهم أكتر ..
وبالتالي أهدافهم أقل .. حبهم للحياة أقل ...

يعني مثلا أرجع بالزمن وحط تليفزيون فجأة في طفولة الإسكندر الأكبر يتفرج عليه
وشغله أحمد موسي في قناة صدي البلدي .. كان زمانه قعد جمب أمه بيعمل ورق عنب ..

فكل حاجة في الكون بتتحدد بميعاد
و الظرف اجتماعي بيتحدد بتطور الحياة في المعاد ده ..
أو الشكل اللي عليه الحياة في الوقت ده ..

طبعا المعايير دي تقدر تحطها في مقارنات من بداية الخلق ...
بمعني أن كل 100 سنة مثلا بينضاف ليك حاجة ماكنتش متوفرة لناس قبلك ...
يعني اللي انا بقوله النهاردة .. غيري يمكن كان بيقوله من 100 سنة علي الجيل اللي قبله ..

يتبع ..

[ahmed 22]

فاهم أن البعض هيقول في دماغه
ان مقابل كل شئ اكتسبته بفضل التطور .. فيه أشياء كتيرة فقدتها في المقابل ..
وربما تكون أكثر قيمة .. فأنت مش أحسن من اللي قبلك ..
لأن الحاجات اللي أنت فقدتها معنوية أكتر منها مادية ..
أخلاقية أكتر منها تقنية .. ...

وده خلي أن طبيعتك بتتغير من غير ما تشعر .. جهدك وطاقتك بتقل مع الزمن ..
بتتغير بسبب قلة استخدامك لدماغك بسبب كل العوامل المساعدة اللي خلقها التطور حواليك
بتخلي حياتك اسهل ...
مش عاوز برضه أقول قلة استخدام دماغك بمعني سئ ..
قصدي تغيير اتجاه أفكارك في عقلك لما هو أقل دافع من النضال من أجل الحياة ...

قلة نضالك .. بيقلل ارادتك فبتخلي قراراتك المادية أسرع ولو علي حساب الأخلاق أو الراحة النفسية ...
لأنك بقيت شبه الماكينة أكتر من الإنسان .. اللي حياته متحددة اقامتها ..
وروتينها معروف علي حسب مكانها اللي اتحدد ...

مش كتير اللي بيجيلهم الفرص أنهم يستمتعوا بالحياة كما يجب أن تكون ..دول الاستثناء مش القاعدة ...

بمعني أن الحياة حاليا بقت مبنية علي هدف واحد رئيسي لكل شخص
و بيترتب عليه مجموعة أهداف فرعية ... يعني الأغلبية هدفها الأساسي ..
وهو ازاي اقدر اجيب فلوس ... تفكير متحدد علي هدف واحد ..
هيترتب عليه كل الكماليات التانية .. بالفلوس هتقدر تعيش .. تقدر تجوز .. تقدر تأسس أسرة
تقدر تبني حياة سعيدة لأسرتك ...
يعني العائد المادي بتاعك هو اساس أتبنت عليه كل حياتك ..
بورقة اتعملت في بنك .. حياتك كلها اتمحورت عليها ..

زمان أنا بدور علي الأكل وبدور علي أماكن الشرب .. ولسا هصنع هدومي بنفسي من غير ماركات
المهم ما يستر .. لسا بفكر اخترع الكهربا ازاي ...
وعلي ما وصلت لمرحلة الكهربا دي اللي غيرت لشكل العالم الجديد قعدت كام سنة ..
يعني الناس قعدوا اكتر من 7000 سنة بخطوات الديناصور عشان بس يخترعوا الكهربا ...
ولحد اختراع الكهربا كان العالم يعتبر مازال في شكل بدائي ...

بس بعد اختراعها العالم أصبح كما لم يكون من قبل وبشكل جذري في أقل من 100 سنة بس ..
في تطور كل يوم .. بس فيه تطور جذري بيتمهد ليه الاف السنين ..
عشان عقلك يكون قادر يستوعب انه في حاجة ممكن تكون اسمها كهربا اصلا ..
حاجات عقلك ما بيتخيلش أنها ممكن تكون موجودة اساسا ...
بس تراكمها بطئ جدا .. الأساس بتاعها بيتمهد ليه ببطئ غير عادي ...
بس الإنطلاقة أسرع من الصاروخ ... بشكل ممكن عقل الأجيال اللي استقبليته
ماتكونش قدرت أنها تواكبه ومازلنا نعاني من آثاره الجانبية حتي الآن ..
الكون كان واخدك علي الهادي ... وفجأة صعقك بما يفقدك عقلك ..

يعني بسبب أن فيه واحد قدر يبني سد أو ناعورة
وأتعمل بسببها بطاريات ومنها سنون الماكينات اللي بتتربط بيهم
قدرت تخلق دورة جديدة للايدي العاملة و
شكل جديد للجهد البشري والصحة النفسية والجسدية ...
وهنا نقطة التحول الأكبر في حياة البشر ..

يتبع ..

[ahmed 22]

الحياة بتعمل علاقة تراكمية للخبرات والاكتشافات اللي وصلت العالم لشكله حتي الآن
عشان يقدر يوازي استيعاب البشر المحدود ..
يعني أصلا علي ما اتذكر ان الانسان ربنا خالقه قادر علي استخدام 10% فقط من قدراته الدماغية
زي ما شوفت في فيلم كدا من كام سنة وده لحكمه أنا يمكن لسا مستوعبها وانا بكتب حالا ...

يمكن تكون صح أو غلط ..

وهو ان الانسان لو اتولد وهو قادر انه يستخدم 100% من قدراته الدماغية
كان قادر يوصل للشكل الحالي للعالم من حوالي 4000 سنة مثلا
وبالتالي كنا النهاردة زماننا بنحتفل بدمار الأرض يعني ..

بسواء بسبب بقا التلوث او مثلا زي الأفلام الاجنبية كدا ما بنشوفها أن الأرض غير صالحة ب
الحياة بسبب الاشعاعات اللي هي اتعملت بسبب الحروب او غيره ..
طبعا الحاجات دي بشكل افتراضي خيالي
ما بكلمش دينيا يعني ...

الانسان عامة أبدع عن طريق قصص الخيال العلمي أخر قرنين في كافة الأشكال اللي ممكن تدمر الأرض
يعني اعتقد قدرة الدماغ ربنا خلقها محدودة عشان عمر الأرض يزيد ..
لأن فضول الإنسان تجريبي تدميري أكتر منه خلاق ومبدع ...

لأن أقصي خيال ابداعي للانسان ممكن يحققه هو وصله حاليا ... يعني قدر يطلع القمر او وصل المريخ ..
مش ناقص ليه غير الخيال الغير ممكن تحقيقه لأنه اختراق لحدود الزمان والمكان ..
و مستحيل عامة سواء بالسفر عبر الزمن أو السفر عبر الثقوب السوداء لمجرات مختلفة وغيره ...
لأنها مغامرة زمنية ..
ممكن تستهلك قرون من عمر البشر بسبب قوانين الفيزيا والفضاء ...
يعني استثمار بعيدددددد الأمد .. وغير مضمون أو مأمون اصلا التجربة فيه ..
لأنه الضياع وارد فيه أكتر من النجاح .. بنسبة كبيرة ...

ومقابل أنك توصل بخيالك لحدود بعيدة ده معناه أنك لازم تطور من حدودك العقلية العلمية

لأنه لو هنكلم بمعايير النهاردة فهتلاقي أن الشخص الجاهل أو الآمي بمعايير 2000 سنة فاتوا ..
هو من لا يستطيع القراءة والكتابة ...

أما الشخص الآمي في عام مثلا 2050 هو الشخص اللي مش هيقدر يتعامل بلغات البرمجة والاكواد .

يتبع ..

[ahmed 22]

في قصيدة اسمها البنكنوت ... لمصطفي ابراهيم
انا بعتبرها احسن قصيدة اكتبت اخر 100 سنة مثلا ..
علي حسب ميولي انا طبعا .. كل واحد ودماغه ..

فيها كلام كتير يفتح دماغك لحاجات أكبر
مثلا جزء منها بما أننا بنتكلم عالتطور

“العالم بيتطوّر” ..
يمشي إسم مسرحية..
أما الحقيقة المضحكة المُبكيّة..
العصاية اللي بتوقّف و بتدوّر.. بتمشي..
من إيد صحاب الجنة..
لصباع صحاب البندقية..
لجيوب صحاب البنك…
دم الغلابة بيتحرق ف التانك…
شامم ريحتهم و انتا بتفوّل ؟…
الغرب هيموّل..
إعمار ِبيار النفط..
لضمان زيادة منسوبات الشفط…
و ضمان بقائك عبد متسوّل…


احنا قلنا ان المعايير بتختلف من زمن لزمن ..
بس بمعايير الزمن اللي احنا فيه ...
فزي ما هتلاقي منتفعين من التطور ..
هتلاقي ضحايا ليه .. ...
بمعني ... أنك عايش في عالم رأسمالي ...
في عالم مصغر هدفك الرئيسي زي ما قولنا أنك يكون معاك فلوس
وعليه بيترتب كل شئ تاني ...

أما في عالمنا الكبير
بيتحكم فيك اصحاب العالم اللهم أصحاب الاقتصاديات الكبيرة وبيدورو حياتك ..
هما معاهم فلوس وبالتالي باستخدام سلطتها بيترتب عليها كل شئ تاني .

زي ما القصيدة كانت ما بتقول كدا
التطور بقا شبه مسرحية .. ابطالها حاليا صناع حروب في زي صناع سلام
بما أنك في ايدك التقنية فأنت في ايدك تصنع السلاح
وعشان تصنع السلام فأنت لازم تملك الموارد اللازمة ليه
وعشان تملك الموارد لازم تسيطر عليها
وعشان تسيطر عليها فلازم تكون تاجر حروب
وعشان تكون تاجر حروب لازم توزع السلاح علي المختلفين
وعشان تكون تاجر سلام لازم تصلح بينهم
وعشان تصلح بينهم لازم تدخل دولهم
وعشان تدخل دولهم لازم تاخد مقابل
وعشان تاخد المقابل لازم تتشرط انك تملك موارد
او تستولي عليها بمجرد دخولك ...
ولما تستولي عليها...
اعمل قاعدة ليك هناك ... عشان تحميهم
تخرج منها .. تصنع فقر في البلد
وبعدين من الموارد اللي امتلكتها منهم
اديهم معونات ... اعطف عليهم ... خليهم يشكروك
خلص دور السلاح ...
صدر ليهم بضايع ...
وكمان خلي اقتصادهم يقوم عليك ...

اهلا وسهلا بيك في العالم التالت ...

يتبع ...

[ahmed 22]

من الآخر .. المهم تكون دارك أن العالم هيتغير ..
بس يا أهل أنت بقا بتفكر من دلوقتي تعد أولادك للعالم ده ؟
يعني أنت كدا كدا بايع القضية ... أنت عايش النهاردة .. بس ناسي أن فيه بكرة
بكرة ده أبنك هيعيشه .. و
الزمن بمعاييره الجاية هتكون أصعب من أن أي حد يعيشها ولو حتي قادر يكلم عنها ....

العالم بيتطور ... بس عندك حرب مع الاوزون
العالم بيتطور ... بس عندك حرب المناخ
العالم بيتطور .. بس عندك حرب المياه
العالم بيتطور ... بس عندك الرعب النووي
العالم بيتطور ... بس عندك خطر حرايق الأمازون
العالم بيتطور ... بس عندك الجليد بيذوب في الاقطاب الشمالية والجنوبية بيهدد بغرق العالم
عندك الحاجات اللي فوق جزء منها مترتب علي التاني ..

اسباب كان يمكن معالجتها ... بس تفاقمت وخرجت عن السيطرة
وغير قابلة للاصلاح ... لأنها تخص عبث في موارد ...
وبالتالي الأهم من ده كله
العالم بيتطور ..
واللي فوق ده كله بيقول أنك عندك حرب غير متكافئة مع الطبيعة
أنت لحد دلوقتي مش مستعد ليها بالعكس أنت كل يوم بتعادي فيها زيادة
وبتعمل حرب مع نفسك تلهيك عن مستقبل كل اللي فيه مظلم ..

العالم بيتطور .. يمكن !
بس يا هل فعلا أنت شايف العالم بيتطور ؟
العالم كل يوم بيقترب من شكله البدائي تاني وانت مش عارف .. أو مش فاهم .. او بتستبعط

ولكن في النهاية

سيصدق الناس اي كذبة ويقعون تحت تأثير أي خدعة لكي تبرر كسلهم
وهذا ما لم يستطع اي تطور ان يغيره ...

[دمعه حائره]

بحييك على الموضوع الشامل والعميق لتفسير تطور العالم
حقيقي بيطور بشكل فظيع ويخوف بالمقارنه بتطور الانسان بنفسه
المشكله ان التطور التكنولوجي مش موازي بنفس القيمه لكل الفئات
والاجيال اللي فاتت رافضه ده او بتتعامل معاه بخطوه بطيئه
والاجيال الجديده من هم واطفال عندهم شغف للتطور ده وقادرين يستوعبوه
دورنا احنا نعلمهم ومنقصرش معاهم وفي نفس الوقت نتابع ويكون الامر تحت السيطره
في مقابل التطور زي ماقولت فيه خساير بتحصل وواجب الجميع انه يلاقي حلول لكل
مشاكل البيئة اللي بتحصل
معرفتش اخد اقتباس لان الموضوع كله قيم ورائع تسلم

[Bito]

بلاش تضيع وقت اتبلاش تضيع وقت اتعلم انجليزى بجد ببلاش واشترك فى قناة ع الدكة كلاود قناة جديدة بتهتم بانجلبزى أهل البلد اتعلم انجليزى عن طريق الافلام
انجليزى حيفهمك حاجات مش بتدرس كلام نجليزى بيتقال فى الافلام والبرامج والشوارع الأمريكية لو تابعت القناة بعد فترة حتحس بفرق كبير القناة مهتمة بالكلمات والمصلحات والافعال المركبة والعامية الأمريكية اللى حتفيدك جدا وحتنقل مستواك فى اللغة الإنجليزية لحتة تانية حتميزك بين الناس جرب وشوف مش حتخسر حاجة بالعكس حتستفيد جدا
https://youtu.be/QWzJ4139lVo

[اميره باحجابى]

غريب موضوع شغال تسلم ايدك