الاجابة ترامب

[ahmed 22]

بسم الله الرحمن الرحيم

كتير الاحداث اللي بتحصل وخصوصا مع بداية العام الجديد ..
العالم بقا أصعب مع أنك تتعامل مع معطياته الظاهرة ..
يعني تحس أن الأحداث بتتم ادارتها من خلف الكواليس بشكل مثير للغيظ .

يعني لو هنكلم بالبلدي كدا علي سبيل المثال اخر حاجة اللي هو قرار ارسال تركيا لقوات في ليبيا
لدعم حكومة الوفاق او السراج او ايا كان المسمي ضد عفتر بتاع مش عارف الجيش الوطني ولا اي ..
مسميات كتيرة ماتفهماش ... المهم

فاكر أنا من 3 شهور بالزبط لما كان ترامب بيقول لأردوغان في خطاب لا تكن احمق لما كان عمل ضربات
علي الأكراد في شرق سوريا ... وانه هيعمل علي افلاس تركيا لو استمر ..
فاكر برضه من شهرين لما اردوغان أذعن للتهديد الامريكي
وفاكر برضه انه وقتها كان ترامب هدفه انه الغارات لا تصيب القوات الامريكية المتواجدة في سوريا
عشان ما يحصلش خساير في ارواح امريكان تعمله مشاكل في بلده
وفي نفس الوقت عاوز يعمل ضغط علي تركيا
عشان عاوز اردوغان يلغي صفقة سلاح تقريبا عملها مع الروس وقتها ويستفيد بيها هو لصالح امريكا

بيزنس مان ترامب ... كل تفكيره صفقات ما شاء الله .. دماغ كلابي بامتياز .. وفاء غير عادي للفلوس
وفاكر من شهر لما اردوغان زار ترامب وعملوا مؤتمر صحفي وانهوا الخلاف
وفاكر من كام يوم لما اردوغان فجأة اخد قرار من البرلمان وقالك هيدعم حليفه حكومة الوفاق
وسامع صوت صرصور الحقل من ترامب ... وبدل كلمة (يهدد) الي (ينبه)
عادي ازدواجية في المعايير .. يعني اكيد معايير احكامهم مالهاش علاقة بالانسانية ..

المهم في مشكلة ليبيا كل واحد بيحمي منطقة نفوذه ومصالحه في ليبيا... لانها غنية بكل شئ
يعني مثلا تلاقي في اوروبا اختلاف بسبب المناطق اللي موجود فيها الغاز او النفط
يعني مثلا تلاقي فرنسا بتدعم حكومة الوفاق عشان المنطقة اللي هو فيها يعتبر الخوف علي مصالحها
وبالمثل ايطاليا وانجلترا وروسيا في دعمهم لحفتر ... هنا تجاهلوا مسميات الثورة المضادة وان كل اللي مع حفتر تبع القذافي وليهم سوابق مدابح وكلام من كدا
وفرنسا تجاهلت مسمي المليشيات والجهاديين والاخوان مع حكومة الوفاق
وبالنسبة لمصر مشكلة حدود .. لأنه بينا وبينهم حوالي 1200 كيلو حدود
وبالتالي احنا كان الاتجاه الأكبر لدعم حفتر الأقرب لدعم قوة الحدود بين البلدين ...

وطبعا تركيا مصلحتها انها تفك الحذر الاقتصادي علي موارد المتوسط من خلال اتفاقها
مع حكومة الوفاق وعمل اتفاق بينهم يسمح ليهم بالتدخل عسكريا زي ما حصل كدا ..
وتقدر تدخل الاتفاق اللي من خلال تستفيد بموارد البحر اللي اتقسم ما بين دول البحر المتوسط ..

يعني الصراحة الوضع معقد في ليبيا ... الا ما فيه حد عدل تقدر تقول انه صح هناك ..
الحكومتين هناك يشوبهم اتهامات .. ولو انا واحد سوي بختار ...
لا هختار انحاز لده ولا لده ...

بالتالي الموضوع فيه مصالح والكل بيدور عليها في بلد تايه ...
نفوذ والكل بيحاول يفرضه ...

طيب ليه الاجابة ترامب ...
لأنه ترامب هنا فايز في كلا الحالتين ... لانه لم ينحاز لاي جبهة ..
وهو قاصد ده ... لأنه بيلعب مع روسيا لعبة القط والفار ...
عارف أنت لما تحس أنك في بلد بيتم استخدامك كلعبة ..
احساس ابن كلب الصراحة ..

امريكا في اوطاننا العربية ... اسمها كلب النفط
اينما تواجد فرصة الحصول علي البترول تواجدت امريكا ..
وبالتالي فهي عملت احتواء للجبهتين .. سواء الجيش الوطني او حكومة الوفاق
يعني قررت تلعب علي الوينجين ....

لما خليفة حفتر استولي علي منطقة الهلال النفطي اللي مليانة بترول من داعش او الجماعات الجهادية ... اتصل بيه ترامب ودعمه عشان يشد ناعم ... الكلام ده تقريبا من سنة او سنة ونص ..
بعد ما كانت امريكا بعيدة عن القضية من فترة طويلة اللي هي اتقتل فيها السفير الامريكي
هناك من جماعات داعش علي ما اتذكر في 2011 ....
اللي من ساعتها امريكا كانت بتنسق مع كل الجبهات في ليبيا سواء جيش وطني او حكومة وفاق او غيره
عشان تعمل ضربات عسكرية جوية فقط علي مقرات داعش واماكنها للانتقام ...
وده كان كل صلة امريكا بليبيا في عهد اوباما ... صلة انتقام

لحد ما تولي ترامب الرئاسة اللي لو شاف المصلحة مع الشيطان بيتحالف معاه ..
وبالتالي كان البعض في الخارجية الامريكية غاضب لأنهم كانوا مايلين اكتر لحكومة الوفاق
فاستقبلوهم هما كمان واكيد يعني بمعرفة ترامب ... وبقا فيه زي ما قولنا احتواء مزدوج للجبهتين ..

ده كله حصل فجأة بسبب ازدياد النفوذ الروسي في ليبيا ..
هنا اي مكان تتواجد فيه روسيا ... امريكا لازم تحشر نفسها فيه
روسيا في سوريا ... امريكا لازم تتواجد هناك ويكون فيه تكافئ مصالح..
لأنهم طول الوقت في حرب باردة سواء اقتصاديا او استراتيجيا في الحصول
علي دعم للقوات المتحالفة ليهم ...
فما بالك بقا ببرنامج روسيا والنفط وهواك ... التلاتة مع بعض ...

نرجع بقا لمرجوعنا
امريكا في العلن وبشكل لطيف رفضت اتفاقية اردوغان مع السراج ممثل حكومة الوفاق
بشأن التدخل في ليبيا ..... وبالتالي ما يزعلش حفتر ..
بس في السر ترامب عمل صفقة مع اردوغان عشان يتدخل في ليبيا في مقابل
تعاملات اقتصادية مستقبلا ... وده اكيد سبب نبرة امريكا اللطيفة لحد دلوقتي
لأنه برضه عاوزاه يكون عقبة للنفوذ الروسي ..
وبالتالي اردوغان يشوف مصلحته ... وفي نفس الوقت امريكا
تحط حاجز لروسيا هناك وبأقل خساير .. وبأقل تكلفة للارواح ... بسبب العداء التاريخي
بين تركيا وروسيا وبالتالي يضعفوا بعض ... لو تطورت الأمور
لأن سياسة ترامب وتحسبله انه يقلل من خساير ارواح الامريكيين
في خارج البلاد ... او من الاخر للي يدفع اكتر .. زي ما قالها لبن سلمان في السعودية صريحة كدا

يعني ابجني تجدني ...

وبالتالي وقع دول في دول ... وفي الاخر هو مستفيد ... وبيتفرج ...

السؤال المهم ... يا هل هيكون فيه حرب ؟

اوعي حد يضحك عليك ويقولك ان تركيا رايحة تحارب ... تركيا رايحة تهايط .. او تزيط في الزيطة
مين اصلا قالك انه معني ان تركيا هتبعت قوات في ليبيا معناها انها هتعبت
جنود بالألاف مثلا ... اخرها تبعتب ناس يدربوا وخبرات وحوالي 200 ولا 300 بالكتير الف عسكري
مع شوية مدرعات علي كام طيارة وتحت مجال حماية مصالح حكومة الوفاق ..
يعني هتقول احنا مش هنبتدي
بس انت لو تعديت علي مجال نفوذ حكومة الوفاق كأنك بتتعدي علي تركيا
كأنك بتحاربني ...
يعني كأن واحد بيتخانق معاك
فأنت روحت تجيب واحد كبير كدا وقوي يتصدر ... فيقوم قايل للي ضربك
اللي هيضرب صاحبي ده كأنه ضربني .. بيصدر نفسه يعني .. زي الافلام العربي
بتاع البلطجة بتاعتنا دي ..

اصلا اللعبة دي بتتلعب من زمان ... وهتلاقيها في كل بلد عنده محنة
وكانت ظروف ثوراته اقوي من أن البلد تتحملها بسبب كترة الطوائف والتعددات الدينية
اللي بيسهل العبث فيها او كترة الجهل في مجتمع موارده أكبر من عقوله ... او بلد فلوسه وثرواته لعبة دكتاتوره ... يعني يعيش شعبه في غني بس في نفس الوقت في جهل وخوف
سواء العراق او سوريا او اليمن او ليبيا او غيرها...
كل بلد وليها حالة مستقلة بذاتها بتتشابه الظروف في بعض الاحيان وتختلف في اخري
بس النتيجة واحدة ..

كلها بلاد بيقوم فيها حروب بالوكالة
سواء حروب استخباراتية او حرب الحصول علي موارد وصفقات ...

تركيا كل اللي عاوزة تعمله محرد شو ... او مسلسل ..
عشان تقدر تكتسب شوية مصالح .. وتفرض نفسها في الاتفاقيات البحرية
وتزيد تعلق الاتجاه المحافظ ليها المتعلق بالجماعات الاسلامية حول العالم
وماكنتش تقدر تعمله الا بدعم امريكي ولو خفي ...
اللي تصادف ان الامر في مصلحتها ..
وهتدخل في الوقت لمناسب انها تنهيه برضه ...
عشان امريكا ماتفقدش مصداقيتها ..

يعني ليبيا المسرح... تركيا الشو اللي بيتقدم عالمسرح .. امريكا المتفرج ..
روسيا هتكون الناقد ...
ومصر كل دورها في الليلة دي تقطع تذاكر للي رايح يتفرج ..
مصر وجودها وكلامها ... هيحفظ وجه ماء تركيا لما تنسحب بمكاسبها اللي من تحت طرابيزات التفاوض...
والاعلام بتاعنا هيخلونا المنتصرين بشكل لطيف ..
كل الاطراف هتطلع ربحانة ما عدا ليبيا للاسف ..
اللي التعقيد اللي فيها هيزيد ...

[big bốss]

الموضوع معقد و الى بيتحكم فيه مصالح كل دوله

و الاطراف المتداخله متعدده

وزى ما انت تفضلت لن تحدث حرب

[Totoa top]

كلامك صح
تسلم ايدك

[سيناا]

ياصديقي ليبا بقت تورتة والكل يتقسمها

زي نفط العراق

ومثلهم ايضا في سوريا

ماذا نتج عن كل الي صار بالوطن العربي

الجيش العراقي الي كان مهيمن ايام التسعينات بقى مفيش

سوريا كسروا ارادتها وهلكوها لان الاغلبية تدخل في سوريا

مصر لولا الخليج مادعم الاقتصاد كنا حنشوف مجاعة

ف المخطط له صار بالنسبة للاجانب والفرس والصهوين

[Totoa top]

كلام جميل ورائع جدا احسنت النشر
ربنا يحفظك يابلادي

[وتـر]

المصالح يا عزيزي وما أدراك من المصالح ولا أي حساب لبشرية أو حتى انسانية
كما تفضلت كلُ يسعى ورا ليلاه ، والرابح أمريكا وروسيا لأنهم الاقوي والأكثر نفوذا
أما تركيا ومصر كومبارس مع بعض المصالح الصغيرة والمكاسب المحدوده
والخاسر الأكبر هي ليبيا ومن قبل الشعوب العربية العراق اليمن سوريا لبنان مصر الجزائر تونس
ودول الخليج البقرة الحلوب لترامب تقوم بدفع التكاليف
حقيقة واقع مؤلم ولا عزاء
شكرا للطرح مع الود والتقدير

[اميره باحجابى]

موضوع جميل بس انا مليش فى السياسيه
خلاص
تسلم ايدك

[SiLver Spectra]

تفتكر ايه دوافع مصر في اللعبة ؟

[ahmed 22]

كل التقدير لتواجدكم جميعا
شرفتوا الطرح ...


تفتكر ايه دوافع مصر في اللعبة ؟


هو ممكن تسأل عن دوافع دولة لما تكون فعل
انما انت كدولة مجرد رد فعل ..
فمالكش دوافع .. انت ليك حقوق فقط بتحاول تحافظ عليها
او مخاوف فبتحاول تظهر قوتك عشان اللي قدامك يعيد حساباته مش اكتر ...

وشروط اللعبة عند اللي قادر ياخد قرار وينفذ
انما مصر ولا تركيا هي أدوات ... مصالحها احيانا
بتتوافق مع اصحاب الفيتو ... فتلاقي الي حد ما تجاهل زي ليبيا
واحيانا لا تتوافق فتلاقي رد عنيف زي ما قال ترامب لأردوغان في موضوع سوريا
زي ما ذكرت في بداية الطرح

أنت مكانك من اللعبة بيتحدد بتوافق واحد من القوي العظمي معاك ..
علي فكرة عشان ماتفهمش غلط لأني قررت كلمة لعبة ومسرح كتير ..
ان معني كدا اني اقصد ان زعماء العالم حاليا بيقعدوا مع بعض يقسموا التركة بتاعتهم

انا مش بحب اخضع لنظرية المؤامرة ولو فيها احيانا جزء من الصح ...
لأن غالبا مش بتديرها دول وحكومات بقدر ما بتديرها جماعات ومنظمات عالمية
وبرضه ماينفعش نخضع ليها .. لأنك انت مالك قرارك في بيتك .. فلما حد يؤثر عليك
ويسببلك فوضي .. فأنت اللي ساذج .. مش هو اللي قوي ...

[SiLver Spectra]

ماهي المحافظة على الحقوق زي ما ذكرت هي بحد ذاتها دوافع
مصلحة مصر الى حد ما محققه بسيطرة حفتر على الحدود الغربية
. دا اللي يلزم مصر و خوفها في ان حفتر يضعف او نفوذه يقل فلمصلحتها
ان حفتر يكون قوي لانها محتاجه حد شبها و الخطر بالنسبالها ان حد مش شبها
و مختلف معاها يكون على حدودها او حتى جماعات متفرقه يصعب السيطرة عليها .
دي هي دوافع مصر و بناء عليها بتقدم دعم لوجستي لحفتر .
لكن زي ماذكرت هي مش اللاعب الوحيد المؤثر . في ممول و مسلح .
القوى العظمى مش فارق معاها غير ان مايبقاش في جماعات متطرفة
و هجرة تاثر عليهم . غير كدا منفضين لحوار ليبيا .
و اللي سخن الجو هو التدخل التركي اللي خلاهم يعيدوا الاهتمام بيها
خوفا من تعاظم النفوذ التركي اللي بعد كدا مثلا بتستخدم المهاجرين كورقة ضغط عليهم زي سوريا