متحرش ولكن !

[ahmed 22]

لما الناس بتتناول قضية التحرش مع كل حدث جلل بيتم تداوله عالسوشيال ميديا
بتلاقي كل شخص وليه مدرسة بيتبعها في تناوله للموضوع
طبقا اكيد لطريقة تفكيره او تجربته او استيعابه..
هي كل حاجة في الحياة عامة كدا مدارس .. ماحدش بيتفق علي مبدأ ..
لأن الناس بقت معدومة الثوابت بالفعل .. هي عندها ثوابت بالقول بس ..
والحياة حاليا جرتنا للحظة دي ...

المدرسة الأولي : مدرسة (و لكن) ... شايف ان التحرش ده شئ مذموم
(ولكن) ايه خرج البنت متبرجة ولابسة ملزق ومش محجبة
ومعني انها خارجة كدا انها بتدعي الناس للتحرش بيها .. وشايفين ان البنت شريك في الجريمة ...

المدرسة التانية : لا للتبرير( لا تعني لا ) ... شايف ان التحرش ماينفعش معاه ولكن ..
هي جريمة محتاجة نبترها من المجتمع.. هو مرض في الاساس ....
وماينفعش تحط اللبس كمبرر .. لأن ما هو في منقبة بيتم التحرش بيها
او حتي اطفال بيتم التحرش بيهم او اغتصابهم ..ودي وجهة نظر مقبولة .. ببساطتها ..

تمام .. انا فعليا مع المدرسة التانية قلبا وقالبا..
وفعليا شايف الامور من سكة مختلفة شوية وهو انه لازم تتعامل مع الواقع بمعطياته ..
وماتديش سكة أنك تختلق مبرر في مجتمع فعليا بقا مفتوح ومش هتعرف تقفله ..

وعلي فكرة في ناس بيعتنقوا ديانة تانية في بلدنا اسمها المسيحية ومش قليلين ..
وهما لا تملك تقولهم البسوا حجاب ولا نقاب ولا جيبة ولا بنطلون ..
لانك ماتملكش تكلمهم باسم الدين و عندهم بعض التحرر زي ما واضح..
وليهم حق الحماية وماتقدرش تختلق معاهم سكة جدل في المنطقة دي ..
فدول لما يتم التحرش ببنت من عندهم.. هتقول برضه لابسة كدا ليه ؟ ولا ايه ؟

وعامة لو الناس لبست في الشارع فهي قالعة في التليفزيون..
ده واقع و في ناس بتقدر تجاهده لانها تمتلك ما تجاهد بيه ولو مش بتدخل جامع ..
وناس تانية مريضة محتاج انك تعاملها بواقعها ده ولو مقطعة السجادة ..
لأنه فعليا العقول متشبعة افكار غير سوية ..ويمكن من منبع واحد
بس في اللي بيقدر يعمل كنترول وفيه اللي مش بيقدر ...
لأن في ناس بتصلي وبتتحرش عادي..
الموضوع مش مربوط بمظاهر التزام او وضع اجتماعي او حتي انك متعلم او لاء ..

بس النفس هي اللي محتاجة للتهذيب .. النفس محتاجة انك تجاهدها ..
واللي بيحصل في الحياة وبيقودك انك تتحرش هي اختبارات زي اي اختبارات في الدنيا بنمر بيها ..
في ايدك تنجح فيها وفي ايدك تسقط ....
انت في ايدك تكون حرامي وفي ايدك تكون انسان كويس ..
في ايدك لما تلاقي حاجة تكون امين وترجعها لصاحبها او شيطانك يغلبك وتاخدها لنفسك ..
في ايدك تكون متحرش .. وفي ايدك ماتكونش ..
لو اتعاملت مع الموضوع انه اختبار من ربنا بيتقدملك عشان يشوف هتنجح فيه او لاء ..

الشاب لما يكون متحرش .. محتاج شئ واحد بس او شرارة تظهر معدنه ليس اكثر وهي (الانثي)
ايا ما كانت عليه وايا كان لبسها ...
محتاج حد يفرغ فيه افكاره غير السوية اللي اختارها تتحكم فيه وانتجت ما هو عليه كشكل نهائي ...

المنتج النهائي للمتحرش مش بنت لابسة مقطع ..
ظهور البنت عامة هو اخر خطوة في تنفيذ سلسلة افكاره اللي قادته للحظة اللي هيتحرش فيها ..
هي مجرد الحظ السئ اللي هتنال حصتها من التحرش
عشان مزاج واحد في اللحظة دي وصل انه عاوز يعمل كدا .. بكل بساطة ..

انا مش هنكر ... في متحرش بيختار يتحرش بمين .. ممكن يسيب واحدة محترمة
ويختشي منها او يقول بنت حتته حتي لو قالعة في الشارع
وممكن يختار يتحرش بواحدة تانية عشان لبسها او اي سبب جيه في دماغه في الوقت ده ..
و في متحرش تاني برضه بيتحرش بأي فرخة ماشية عالأرض ...
فاللبس هنا مش هيكون علاج لمرضه .. لانه هيظل موجود ... بس الضحية هتختلف ..

انا المفروض مش هدخل في دماغ كل واحد عشان اعرف سلسلة افكاره هتقوده في النهاية لايه ..
انا فقط لازم اتعامل انه هيظل في ضحية ايا كانت ظروفها وفي متحرش ايا كانت اسبابه...

نرجع ونقول ان التحرش مرض والمرض علاجه دواء ...
مش أنك تخلق مرض جديد اسمه انك تبرر للنفس سلوكها ..
ودواء التحرش هو القانون مع تغيير في افكار المجتمع ..

تغيير الأفكار كالتالي :

1 - في اهالي بتتعامل مع التحرش انه وصمة عار وانه شئ لازم يكون مخفي ..
2 - وده بينعكس عالبنت اللي ممكن فعليا التحرش يصيب جزء من نفسها بالضرر وتكتمه لانه خايفة تقول لاهلها برضه ...
3 - ولو دول اتغيروا وانفتحوا وسعوا ورا حقهم قضائيا بييجي شاب واهله بيخافوا يتقدموا لبنت لانها ممكن تكون عملت قضية ضد متحرش عشان تجيب حقها .... عشان السمعة والكلام اللي بيطلع من ورا القضايا اللي من النوع ده ...

الناس محتاجة تنفتح تجاه انها تجيب حقها اساسا ...
فما بالك في متحرش شايف انه في وضع مسيطر ووضع اقوي ..
لانه كل شئ ممكن يتحل في قاعدة عرب او قاعدة خوف ....

تجارة الخوف للاسف هي اللي مسيطرة علينا ..
عندنا في التجارة مثلا .. تلاقي الناس ممكن تبيع البضاعة اللي عندها بالخسارة واقل من سعرها
عشان تتجنب خسارة اكبر لأنها سمعت انه في سعر هينزل اقل ...

برضه هتلاقي نفس المبدأ في مجتمعنا ...

هتلاقي ناس ممكن تبيع حقها وتتنازل عنه عشان تتجنب خسارة مستقبل بناتها
في جوازة او تأخير في نصيبها عشان رواسب فكر متأخر ..

لازم نعرف ان حياتنا مش تجارة ... عشان نفهم ان فرص ان احنا نعيش حياة سوية لسا موجودة ...

في جدلية تانية ظهرت بسبب الرأي العام اللي اتخلق بسبب قضية التحرش اللي ظهرت عالرأي العام
بس هعرضها في الموضوع الجاي بشكل منفصل ... وغالبا برضه هتجيب عن تسائل
ممكن ينطرح هنا لو حصل نقاش يعني ..

[جنون قلب]

بص انا ردي كان في الموضوع بتاع حضرتك التاني
هو نفس ردي علي الموضوع هنا

بس حابب اضيف حاجه بسيطه
الشارع الايام دي مناصفه بين واحدوواحده


بكل صراحه انا مع رقم واحد وبشده

حرامي اما سرق كان جعان
فسرق
فهو حرامي وقدام ربنا حرامي ومش هشفعله جوعه
لكن في ناس تانيه سبب وهيتخاسبوا عليه


انا ضد اي حاجه تمس الدين



ملحوظه
الناس اللي بترمي العري سبب كامل للتحرش فهو انسن معقد نفسيا ومفيش اي حد قال كدا بصوره واضحه
في اسباب


احنا لما بنحب نهاجم حاجه تمس الدين بتبقي حاجه صريحه وواضحه
اما بقي لما حاجه بتدافع عن حاجه في الدين
بنقولها بخوف وحذر

انا هقولك حاجه اخويه
انا مش شيخ ولا متدين
انا يمكن عاصي اكتر منك بكتير
بس سايب باب موارب بيني وبين ربنا
عباره عن غيره علي دينه
ومخلطش الامور الواضحه الصريحه
برد بين البينين

انا ميهمنيش راي اي حد فيا بعد الكلميتن دول
غير ربنا سبحانه وتعالي وانا بتحاسب


انا اما بعمل حاجه غلط بندم عليها وبعترف انها غلط
مبكابرش وبحاول اعمل لها حيثيات تانيه
عشان ابان شبه صح


شكرا ليك

[د/ عبد الله]

انا معاك يا احمد ان التحرش جريمة لازم نحاربها
لكن انا مع رأي متحرش ولكن...
لان اللي بعد لكن مش حاجة بسيطة ابدا
التحرش جريمة والسرقة جريمة
في عام الرمادة سيدنا عمر بن الخطاب عطل حد السرقة
لان الناس كانوا في مجاعة واللي بيسرق بيسرق عشان هيموت من الجوع
مع بعض الاختلاف انا شايف ان التحرش الايام دي في شبه من السرقة عام الرمادة
لان شهوة الجنس متقلش عن شهوة الاكل خصوصا عند الشباب الصغير
يعني متجبليش بنات ماشية شبه مش لابسة وتعدي قدام شاب ١٧ سنة وماشية تتكلم بمياصة وصوت عالي وتقولي ان غريزته مش هتتحرك
فيه اللي محترم وميبصش وفيه اللي بيبص ويسكت وفيه اللي بيقول كلمتين وفيه اللي بيمد ايده
لكن في مجتمع تقريبا الاخلاق انعدمت فيه وكل البيئة اللي حواليك بتدعو للانحلال هتلاقي متحرشين كتير.
كل اللي قلته مش تبرير للتحرش لكنه نتيجة منتظرة من مقدمات كتير
انت متبقاش بتحارب النقاب والحجاب والحشمة وبتسهل العري والدياثة وتيجي تصوت لما التحرش يحصل.

[فداااااااااااء]

شوف اخى معروف ان شيء يحدث له اسباب وكل داء له سبب ادي الى وجوده
فمينفعش اجي انا واقول علاج لشيء واتجاهل اسبابه لان طالما السبب لم يتم معالجته
فلن ينتهي الامر بل سيتوسع بشكل مخيف
في اوربا مثلا التحرش نسبة عالية جدا رغم ان هناك قوانين حازمة وفي ايضا حرية العلاقات
ورغم ذلك لم ينتهي الامر ، اللي بيقول اننا ندين المتحرش ولا نضع اسبابه ، هم اكثر الناس
معذرة يعني سببا في تفحش هذا الفعل واكثر الناس مساعدة له في تواجده
لان الامر لا يختصر فقط على العقاب وانما ايضا على معالجته ولا يمكن المعالجة بدون معرفة السبب هذا فكر اى شخص ذو عقل ناضج وسوي ويسعي للاصلاح
التي تخرج شبه عارية هي مشاركة بالفعل في هذه الجريمة لانها بخروجها بهذا المنظر دعوة غير مباشرة لها والا فلماذا تقوم بارتداء اللبس الفاحش هذا ما غرضه ولا تقل لي جملتهم الساذجة لكي ابدو جميلة
ستقول وماذا عن المحجبات التين يتعرضن لهذا الفعل ؟
هم قلة من يتعرض ذلك اولا ، وهنا اتكلم عن المحجبات وليس من تضع قطعة قماش على الرأس ، انا محجبة ونادرا ما اتعرض لهذا الامر
هذا الفعل يذكرني
بشخص ظل يبث سمومه لاذن شخص ما ضد اخر حتي جعله يقوم بقتله
الشخص الذي قام ببث سمومه لم يقتل ولكنه كان سببا في قيام هذا الشخص الاخر بالجريمة
الذي فعل الجريمة مجرم ويعاقب ولكن ايضا لاتتجاهل من اودي به لذلك
وتذكر نحن بشر

[دمعه حائره]

اتفق معاك في الرأي ولو هندور على اسباب او مبرر
فهي في المتحرش نفسه في أخلاقه وعدم صلاته وغض البصر
ومش لبس البنت السبب لاننا شوفنا حوادث زي اغتصاب طفله البامبرز وزينه
والبنت اللي اغتصبت في الجامع من المدرس بتاعها وغيرها كتير
ومنهم بيكون متزوج مفيش اي مبرر خارجه هو واخلاقه وتربيته
والمتحرش الاخير ده لاهو غير قادر علي الزواح ولا عنده كبت
ده واحد من الأثرياء وعايش في اوروبا
يعني كان يقدر يتزوج ولبس البنت هناك ده عادي مش تبرج ولا غير العادات
واقصي تحرش هناك هو لفظي ميقدرش يتعدي حدوده معاها
عالجوا المشكله في نفس المتحرش اولا
واعملوا عقاب رادع يمنعهم من الاستهانه ببنات الناس
شكرا علي الموضوع

[ام فيصل الخالدي]

مجهود مشكور وموضوع مميز جدآ

[Aya 7ekaya]

انا سمعت آراء كتير على الموضوع ده لكن رد واحد اللى كان مقنع ومرضى بالنسبالي ان التحرش جريمه وذنب ومن ابشع الذنوب لانه الشخص بيه بيستحل عرض شخص ٱخر
فكرة اننا نلوم الضحيه على ملابسها فكرة مستفزه من الدرجة الاولى اختيارها لملابسها شىء تحاسب عليه و مفيش شك أنه خطأ و ذنب وتقصير فى حق الله لكن هى هتحاسب عليه مش شخص تانى كذلك اختيار شخص لفعله التحرش ذنب و اختيار وحده يحاسب عليه و مفيش اى مبرر قدام ربنا ليه
لكن احنا ف مجتمع يميل لاخفاء الأخطاء اللى تشبه التحرش وده لأسباب تانيه كتير
ومش غريب أن فى واقعه شبه دى لو البنت طالبت بعقوبة المتحرش تلاقى امراه اخرى بتستنكر اللى بتعمله وكأنه العار أصبح طلب الحق مش استحلال الحقوق
و للاسف بسبب العقول دى هنستمر كمجتمع معاق فكريا الا من رحم ربى ٠٠٠

[جنون قلب]

ايه حكايه
كل الردود هنا مقتنعه اقتناع تام
ان التحرش جريمه يعاقب عليها القانون في الدنيا
غير عقاب الاخره كمان
بس معلش حضرتك والله العظيم كل حاجه ليها اسباب
اما بقي ان البنات بتستنكر دا مش عشان المجتمع


البنت بلبسها الغير شرعي مش مبرر خالص ل متحرش
احنا بنقول ان في اسباب كتيييير جدا

والتحرش مش ناتج من يوم وليله دا مجتمع بيحاول يتفتح غصب عن العالم
ولا هو من تربيتنا ولا دينا
حصرتك واخده الموضوع بشكل تاني

[جنون قلب]

احنا مش في حرب
احنا في ثقافه مختلفه عن زمان
بس حضرتك الثقافه دلوقتي بقيت متفتحه زياده عن اللزوم
بقينا واخدين الحريه بشكل غريب
حريه يعني اقلع برقع الحيا
والشاب يشرب ويبعد كل مسميات الرجوله والنخوه
الاسره تبعد عن العيال تحت مسمي التربيه

اللي عاوز اوصله.. ان احنا عشان نحط كل واحد في مكانه دلازم احنا الاول جوانا نرتب اولوياتنا



اسف لو ردي مخالف ليكم

[شروق محمود]

انا من رايي ان ضعف الوازع الدينى هو السبب
من الطرفين
سواء الولد يبيح لنفسه الفعل ده
لانه بعيد عن ربنا وعنده فراغ كبير
يعنى لو كان بيصلى ويقرا قران و يتقى الله
عمره ما هيعمل كدا
ونفس الكلام ع البنت لازم يكون عندها حياء
وتتقى الله ف لبسها وكلامها
مع اسباب تانيه كتير
ولكن لو عاوزين ندور على حلول
هو حل واحد وهو تقوية الصله مع ربنا