شفقة ولا مشاركة

[ahmed 22]

empathy
sympathy

الكلمتين دول لو حطتهم علي جوجل ترانزليت هيدوك معني واحد في البداية وهو (العطف )..
بس فعليا اللي بتوحي بيه كل كلمة مختلف تماما .


الكلمة الاولي : التمقص العاطفي
الكلمة الثانية : الشفقة

انت مثلا لما بتيجي تتعامل مع شخص بيعاني من التنمر
بيكون المفتاح القادر علي تحسين المزاج الخاص بيه هي واحدة من الكلمتين دول ..
والكلمة التانية قادرة تدمره وده علي حسب وعيك وفهمك ...
لأنك ممكن ما تكونش عندك ادراك باللي بتصدره للي قدامك ..

لأنك لما تشفق عليه بتدمر حياته
ولما تعامله بنوع من التقمص العاطفي بتحييه من جديد ..

الاتنين تعاطف .. والاتنين فيهم نوع من الاحسان
ولكن الاحساس اللي بتصدره للشخص اللي قدامك بيختلف باللغة اللي بتخاطبه بيها ...
يا هل انت بتصدر ليه احساس بالشفقة .. ولا احساس بالمشاركة ...

احساس انه مستضعف
ولا احساس أنك بتفهمه انه مثلا لو انت مكانه هتصرف كذا وكذا
وبتحسسه انه قوي وقادر انه يتخطي الفترة دي من حياته ..

علاقة التنمر دي موجودة علي مستوي اكبر في بعض البلدان اللي بتنتمي للعالم التالت
بس الفكرة ان بعض الحكومات بتتنمر وفي نفس الوقت بتعطف _ اضرب ولاقي _..
فتلاقي الحكومات بتعامل الفئة المستضعفة من الناس بشفقة
اكتر منها مشاركة واحساس بيهم وبمشاكلهم ...

عاوزة الناس تطلع ليهم .. مش هي اللي تنزل للناس ...
دايما بيفكروا الناس بفضلهم عليهم .. مش ان لو شئ كويس حصل فده حق ليهم ..

الشفقة دي بتكسر الناس وبتخليهم طول الوقت راضيين بالأمر الواقع ..
احساس انه بيترميلك لقمة واحنا بنتفضل عليك بيها هي النقطة اللي بتكسر الطموح عند الناس ..
وبتعمل ليهم احباط بأنها تواصل للامام .. وان الوضع دايما يبقي علي ما هو عليه ..
... لأنك مهما كنت بتبني في حجر .. مش بتبني في ناس .. البشر اساساته واقعة .

مفتاح المشاركة او حلقة الوصل والامان بين المواطن وبلده في العصرالحديث
اللي المفروض ادارتها بشكل صحيح بيكسر الشفقة هي شبكات الامان الاجتماعي ..

شبكات الامان الاجتماعي .. عبارة عن مثلا نظام معاشات قوي او بدل البطالة
او زي حتي ما بنسميها عندنا في مصر تكافل وكرامة او البرامج الموجهة لصالح الفقراء وكدا ....
واكيد بتكون نسبية بين كل بلد والتانية ... مش هقولك ان مطلوب مثلا تكون تنزانيا زي المانيا ...

بس الفكرة انك تكون مبرمج اقتصادك من سنين تراكمية طويلة انه تكون الاولوية لخدمة المواطن
ده شئ بيصنع التطور والحافز في الناس .. اقتصاد تراكمي فيه جيل بيكمل التاني ..
ورئيس بيكمل رئيس ..مش مجرد انك طول الوقت كل ما حد جديد ييجي عمال يهد ويبني ..
واللي بعده يهد ويبني .. وتخصص كل اقتصادك في انك تبني وتهد طول الوقت ..
المشكلة انك عمال تبني وتهد في مدارس مثلا..
وناسي الناس اللي عمالة تتهد جيل ورا جيل في افكارها .. كأنك حافظ مش فاهم ..

وعمرها ما اتغيرت ببناك لمباني بعكس المفروض توجهك يكون بناء لحياتهم وافكارهم
وهما بعد كدا هيقدرو يبنوا مرة واحد من غير هدد ...

عامة فيه احصائية في الخارج بتقول ان حوالي 36 % من البشر بتتغير حياتهم للافضل
وبيخرجوا من خانة الفقر بسبب شبكات الامان دي .....
لانها بتخلق الحافز للاستمرار .. لأن جزء كبير منهم بيكون جزء من اساس وتطوير البلد ..

هنا الامان مش بيكون بداعي الشفقة بتكون بداعي البناء
وانك ماتخسرش في انسان قادر بعقله انه يقومك بعد كدا ويساعدك بدماغه ...
ومش مجرد بتديله فلوس .. في برامج للتغذية وبرامج تعليمية وحاجات كتير بتأسس لبناء مواطن ..
اكيد البرامج دي مش هتمنع الفقر او هتمنع مظاهر التشرد في اي بلد ..
بس بتخفف بنسبة كبيرة من انخفاض العقول القادرة علي التطوير .
بتدي نفس لحياة ممكن تضيفلك بعد كدا وتقدر تنقل تجارب وضعها بانها تحسن فيها لما توصل بعد كدا ..

و قوة شبكات الامان في اي بلد يعتبر المقياس للمزاج العام ان كان للافضل او للأسوأ ..
المزاج العام للفئة المتضررة الأكبر او الفئة الغالبة في البلاد
من اللي عايشين في الفقر و ما قبل الطبقة المتوسطة ...

لأنها هي اداة الوصل بين وطن وابنائه ... يا هل البلد عندها احساس بأبنائها او لا ..
بتعطيهم الاولوية في قراراتها او لاء ...يا هل فعليا الناس عندها قدر من الامان كافي
لما تتعثر في حياتها بأنها هتجد شئ ولو بسيط هتستند عليه ولا لاء ..

يا هل المشاركة دي هتكون لمستحقيها او لاء ..
ويا هل الشبكات دي قادرة علي احداث طفرة في حياة بعض الناس
بأنها تخرجهم مثلا من حلقات الفقر لمستوي افضل او لاء ....

يا هل هتقدر تكفي الناس من اسألتها ولا لاء ..
الفكرة مش انك تديهم قرشين يعيشوهم يومين فكدا انت قمت بدورك ..
كدا انت يا دوب بتتصور انك بتتطهر من ضميرك ...
طول ما الناس بتتسائل .. طول ما اعرف ان المزاج العام متوتر ومتردد ...

بس هتلاقيه دايما مساند لبلده ...
لأن الدول بتبرمج عقول مواطنيها علي حسب ما الامر الواقع بيتفرض كإرث متواصل لسنين طويلة
طالما مافيش حلقة كسرت الروتين الفكري المتواجد ...
مافيش اختلاف في لغة كلامك مع الناس ..
وبالتالي مافيش شحنة جديدة بتدفعها في الناس انها تواصل وتستمر ...
بس حافزهم بيكون وطني فقط .. ودي الحاجة الوحيدة اللي بيربيها اي نظام في بلد ..
ما تقولش ايه اديتنا بلدنا .. قول هتدي ليها ايه ..

بس فكرة انك تغرز العطاء من غير مقابل ..علي قدر ما فيه زهد من الناس ..
علي قدر ما فيه نرجسية منك .. لان المواطن هيقوم بدوره في الدفاع عن بلده ..
بس انت مش هتقوم بدورك انك تحييه في بلده.. فلما ينتهي الدافع الوطني ..
بيظهر الدافع الشخصي .. كلها احاسيس مؤقتة .. مافيش دافع مستمر ..
وحتي الدافع الوطني ممكن يقل من جيل لتاني .. نتيجة احساس بالنقمة بيزيد ..

لأن احساس انك تكون راضي بقضاء الله شئ ..
وانك تكون راضي بالامر الواقع ده شئ تاني ... ده بيأخرك كدولة سنين ضوئية للخلف ...
لانه احساس مخفي من الناس طول ما الحياة ماشية وانت طول الوقت بتجري من غير امل ..
احساس اختلافه بيقوم دول وبيهدم دول ...لانه احساس من غير طموح ..

ولو الطموح اتوجد هيكون في الغالب شخصي .. مش لصالح البلد ...
ولو الصعود اتوجد لشخص هيكون غالبا لاتجاه شمال انت بعد كدا بتيجي بتنبذه
وبتخلق قصص بتتحكي بعد كدا ان ازاي الظروف الصعبة خلقت وحوش ..
ان ازاي الفكرة اللي خلقتها بداخل الناس مع السنين عملت جواهم في الغالب تشوهات نفسية
وشروخ طول ما حلقات الايمان بتقل نتيجة الانهيار الاخلاقي للمجتمع
اللي هو دايرة مفرغة من الظروف اللي خلقتها بتعاملك مع الفئة المستضعفة من الناس ...
يعني بتلاقي الناس عايشة في دواير ..
فصمود الفرد تجاه المحن والاختبارات بيبقي اصعب ..
لأنك مش مخلي حياته اسهل او اولوية ليك ..

اخيرا مافيش مبرر لدولة انها تربي احساس الضغف وقلة الحيلة في ابنائها..
الا ارث طويل من سوء الفكر وقلة الحيلة مش اكتر اللي اتبنت بسنين اطول ..
وصنعت برواز لطيف لدكتاتورية القرار واالآنا وازدواجية المعايير
والاهم من ده كله تكبر في عدم الاعتراف بالخطأ والمواصلة فيه للنهاية في بلاد العالم التالت ..
لأنه كله بيتهيأ ليه انه مافيش حساب قريب ..

[فداااااااااااء]

لاول مرة اقرأ لك موضوع لا اعارضك فيه
الموضوع هنا شامل ورائع جدا
بصراحة وانا اقرأه بقول قدر يعبر عن الحالة الفكرية والوجدانية للمواطن صح
فرق بين الشفقة والعطف ..فرق كبير
رغم اني شايفة ان دولتنا بتتعامل باسلوب الشفقة والمنة على المواطن بصورة مستفزة جدا علشان كدا
اؤيد هذا السطر الدافع الوطني ممكن يقل من جيل لتاني .. نتيجة احساس بالنقمة بيزيد
فى الواقع انا لامست هذا الشيئ فى الفترة الاخيرة بين الشباب وللاسف على الرغم من ان الامر خطير الا اننا بنلاقي اتهامات لهم بالخيانة بدل اصلاح المشكلة
فى النهاية طرح قيم جدا احيك عليه
اه عجبتنى الخاتمة دام نبضك القيم اخى

[دمعه حائره]

سياسه التجويع والحرمان بتخلي الناس ترضي بأي حاجه
الفرق بين الشفقه والمشاركة واضح بس كتير بيعمل نفسه مش واخد باله
بقي كل هم الناس الجري ورا لقمه العيش حتي لو حساب كرامتهم
حتي التنمر لما بيحصل لحد تلاقي الردود واخده شكل الشفقه وده تنمر تاني
مع ان حقه انه ياخد دعم ومشاركه بشكل كامل ضد اي متنمر
الانسان لما بيتعرض لظلم وقهر ومبيلاقيش حد يدعمه بيتحول لظالم غصب عنه
والانتماء فعلا بيقل ولو ظهر بيكون في وقت الكوارث بس وبشكل مؤقت
موضوع قيم تسلم ويدوم تواجدك المميز

[ahmed 22]

اقتباس المشاركة الأصلية كتبت بواسطة فداااااااااااء لاول مرة اقرأ لك موضوع لا اعارضك فيه الموضوع هنا شامل ورائع جدا بصراحة وانا اقرأه بقول قدر يعبر عن الحالة الفكرية والوجدانية للمواطن صح فرق بين الشفقة والعطف ..فرق كبير رغم اني شايفة ان دولتنا بتتعامل باسلوب الشفقة والمنة على المواطن بصورة مستفزة جدا علشان كدا اؤيد هذا السطر الدافع الوطني ممكن يقل من جيل لتاني .. نتيجة احساس بالنقمة بيزيد فى الواقع انا لامست هذا الشيئ فى الفترة الاخيرة بين الشباب وللاسف على الرغم من ان الامر خطير الا اننا بنلاقي اتهامات لهم بالخيانة بدل اصلاح المشكلة فى النهاية طرح قيم جدا احيك عليه اه عجبتنى الخاتمة دام نبضك القيم اخى

ليه بس لاول مرة ههههه
اكيد طبعا يسعدني رأيك
ومبسوط ان الطرح نال اعجابك

بمناسبة المعارضة .. لاني ملاحظ ان غالبا
بيتم تصنيف المواضيع اللي بتمس السياسة
ولو حتي من بعيد وبكتبها لفكرة مع وضد ..
وممكن ناس تكون متابعة كتابات قديمة
ترتبك في حكمها علي توجهاتي عامة
ويمكن مش واخدة بالها من اسلوبي فتحكم عليا بالتناقض...
مع ان دي الحاجة الوحيدة اللي بحرص اني ماقعش فيها

بس انا حابب اوضح حاجة مهمة من قترة ..
وردك يمكن هيديني الفرصة عشان اوضحها
وطبعا هكلم علي مستوي الهواية
مش عاوز ادي انطباع اني بدي لنفسي حجم اكبر من وضعي
لو سألتيني مصنف نفسك ايه كواحد بيكتب
فأنا مش بحط نفسي في خانة المفكر
بحطها في خانة المحلل سواء للامور الاجتماعية او السياسية او غيره ...

التحليل مكانته اقل من التفكير بكتير
لأن المفكر بتكون ثقافته اعلي ومطلع
وبيكون ليه افكاره الخاصة .. وبيكون عنده فكرة معينة
بيدافع عنها وبيتبناها وبالتالي تأثيره بيكون اكبر علي شريحة الناس
المتوافقة مع منهجه لأن شريحة المنقادين لنفس افكاره بتكون معروفة وواضحة
فبيصنع تيار واضح لافكاره .. او بيصنع قاعدة من الناس مؤمنين بنفس الفكرة


ده طبعا عكس ما تكون متجه اكتر للتحليل
انا بحب التحليل لأن فيه حرية اكتر
وبحاول اضيف ليه لمسة فلسفية بسيطة
.. لو هتبصي لطبيعة اي موضوع بطرحه ..
فغالبا مش هتلاقي متبني افكار واضحة وبدافع عنها
ومش بكلم باسم حد .. وماليش اني ادافع عن حد
كل واحد كفيل يكلم عن نفسه
سواء شخصية عامة ولا غيره ..
لأن كل واحد في النهاية مش بيقتنع غير في اللي بدماغه
ومن زمان بقول حتي في الدم
كل واحد بيهتم فقط بفصيلة دمه وبيتحدث عنها
وبيتجاهل بقية الواقع ... كتير من الناس في زي منافقين
وبيشوف الواقع بعنين قاصرة علي حبه لشخص وبغضه للتاني
مش المصلحة العامة
و كل من وصل للسلطة
تم اختباره وسقط في الاختبار ..
والكل بالنسبة ليا في موقف متهم
وماحدش برئ ...
وبالتالي بتعامل مع الواقع .. بحقيقته
مش بمخيلات غيري في تفهمهم لواقعهم
وتجاهلهم لواقع الغير ....
وبالتالي لازم الزمن ياخد دورته
لحد ما يظهر في واقع جديد نقدر نتعامل معاه

عامة عشان ماخرجش عن اطار اللي عاوز اقوله
اني فاهم انا فين من الكتابة

بمعني اني بعمل تلت حاجات فقط ليس اكثر غالبا

هتلاقيني دايما بربط مواقف بعد عرض وجهات النظر
بفصل مشاعري غالبا
بتوقع او بخمن حاجات ممكن تحصل وممكن لاء ...

من الاخر

المفكر = يصنع الحدث
المحلل = يصف الحدث

المفكر = بيقدم وجهة نظره في اطار شمولي ( بمعني فيه جزء من التحكم والسيطرة )
المحلل = فقط يريد ان يوضح وجهة نظر تنير الطريق للناس
وتوضيحها قدر الامكان دون تضليل او سيطرة الانتماءات ..

المفكر = ليه سلطته بأفكاره علي الرأي العام او الموقف السياسي...
المحلل = لا تأثير له علي الموقف السياسي او الاجتماعي .. فقط يوضح الامور للناس
عن طريق ربط الماضي بالحاضر ونقد المواقف لو استوجبت نقدها
والاشادة بموقف تاني لو استوجب .. وتقديم الحيرة لو فعليا الصورة مش واضحة
ده لو بكلم سياسة ...
ام اجتماعيا وغيره .. او بيكلم في فكرة
هتلاقي بستخدم الربط بين قوانين اقتصادية ووضعها في اطار اجتماعي
او يشرح مثلا اثر حاجة حصلت من 100 سنة علي واقعنا النهاردة ...
وممكن ده يؤدي لايه مستقبلا لو لم يتم تفاديه ..
بتشوف التحليل في اي حاجة حتي لو ايه ..وازاي ممكن تربطها
وتحولها لفكرة موضوع يخدم وجهة نظر جديدة

انا عارف اني طولت
انا بس كنت حابب اللي يقرأ كلامي
يشوفه من الاتجاه الصح او المناسب
او اللي انا كاتبه عشانه ليس اكتر في تخيلي
طبعا انا عارف اني مش واو ولسا قدامي كتيررررر
بس بكلم علي اللي انا متبنيه في افكاري ليس اكتر
واتمني ده يكون واضح ليس الا ..

[ahmed 22]

اقتباس المشاركة الأصلية كتبت بواسطة دمعه حائره سياسه التجويع والحرمان بتخلي الناس ترضي بأي حاجه الفرق بين الشفقه والمشاركة واضح بس كتير بيعمل نفسه مش واخد باله بقي كل هم الناس الجري ورا لقمه العيش حتي لو حساب كرامتهم حتي التنمر لما بيحصل لحد تلاقي الردود واخده شكل الشفقه وده تنمر تاني مع ان حقه انه ياخد دعم ومشاركه بشكل كامل ضد اي متنمر الانسان لما بيتعرض لظلم وقهر ومبيلاقيش حد يدعمه بيتحول لظالم غصب عنه والانتماء فعلا بيقل ولو ظهر بيكون في وقت الكوارث بس وبشكل مؤقت موضوع قيم تسلم ويدوم تواجدك المميز

اتمني ان الواقع ده يتغير
وان الحياة تشارك الناس الامال من جديد
وتبطل تديهم ظهرها
لما الناس تفهم هما فين فيها
وايه المطلوب منهم ..
عشان يتفهموا حقوقهم
في بلدهم ....

سعيد بحضورك اللي شرفني اكيد
كل التقدير

[جنون قلب]

شتان بين هذا وذاك
بجد بجد
انا ك واحد في مجتمع عربي وبالاخص مصري
بيصعب عليا حالي وحال الكثير والكثير
تحس ان احنا مجرد دمي بيتلعب بينا

احنا عدينا مرحله الشفقه من الدوله
احنت بقينا بنتعاير بالوهم
مجرد الات ماشيه بتنفذ الاوامر
للاسف كانوا الاول بيعلمونا الخوف
ف كان ممكن هيه حد يصرخ
دلوقتي بيعلمونا السكات
اللي هو انت خايف ومقهور وعينك ف الارض
بس وربنا لو قلت حتي اه تعب
لا نقتلك ونريح من الالم
اللي هو برضه هنشفق عليك حتي ف الموت



طرح طيب جدا
واسلوب راقي جدا
بالتوفيق لك اخوي

[ساحر الأحزان]

الاسلوب مش غريب عليه
ارفع له القبعه احتراماً وتقدير
تحياتي لك ولقلمك المميز